ວັນພະຫັດ, ວັນທີ 17 ກັນຍາ 2026
6 ເດືອນຕົ້ນປີ 2026 ກອງພັນໃຫຍ່ 642 ສ້າງໄດ້ຜົນງານຫຼາຍດ້ານ
ເວລາອອກຂ່າວ: 2026-08-18 08:41:05 | ຜູ້ຂຽນ : admin1 | ຈຳນວນຄົນເຂົ້າຊົມ: 106 | ຄວາມນິຍົມ: 
ສະຫາຍ ພັນເອກ ວຽງພອນ ພົນທະລາຊາ ຫົວໜ້າການທະຫານ ກອງພັນໃຫຍ່ 642 ໃຫ້ຮູ້ວ່າ: ການຈັດຕັ້ງປະຕິບັດ ວຽກງານຮອບດ້ານ 6 ເດືອນຕົ້ນປີ 2026 ຂອງກົມກອງແມ່ນມີຜົນ ສຳເລັດຫຼາຍດ້ານ ເປັນຕົ້ນແມ່ນ ວຽກງານຮັບປະກັນເຮັດໃຫ້ສະ ພາບມີຄວາມສະຫງົບ ໄດ້ຫັນເອົາກຳລັງລົງກໍ່ສ້າງຮາກຖານ ຕິດພັນກັບວຽກງານປ້ອງກັນຊາດ-ປ້ອງກັນຄວາມສະຫງົບຮັບປະກັນເຮັດໃຫ້ຂອບເຂດທີ່ກົມກອງຮັບຜິດຊອບໃຫ້ມີຄວາມສະຫງົບປອດໄພໂດຍພື້ນຖານ, ຍົກສູງສະຕິລະວັງຕົວກຽມພ້ອມສູ້ຮົບຊີ້ນຳຄະນະບັນຊາແຕ່ລະ ຂັ້ນຈັດຕັ້ງລະບົບປະຈຳການຕະ ຫຼອດ 24 ຊົ່ວໂມງ, ເຊິ່ງໃນແຕ່ລະວັນ ຈະມີຄະນະປະຈຳການ, ສິດປະຈຳການບໍລິຫານ, ສິດປະຈຳການສູ້ຮົບ ແລະ ສິດປະຈຳການວິຊາສະເພາະ ຈັດຕັ້ງກຳລັງອອກເຄື່ອນໄຫວສາລະເວຕາມຂອບເຂດກົມກອງຮັບຜິດຊອບ ແລະ ປ້ອງກັນເວນຍາມທີ່ຕັ້ງຄ້າຍຄູ, ສາງຄັງໃຫ້ມີຄວາມປອດໄພ 100%.
ວຽກງານການເມືອງ-ແນວຄິດ ຄະນະພັກ-ຄະນະບັນຊາ ກອງພັນ ໃຫຍ່ ໄດ້ຊີ້ນຳພະແນກການເມືອງ ສຸມໃສ່ການໂຄສະນາສຶກສາອົບ ຮົມການເມືອງ-ນຳພາແນວຄິດໃຫ້ພະນັກງານ-ນັກຮົບມີແນວຄິດອຸ່ນອຽນທຸ່ນທ່ຽງເຊື່ອໝັ້ນຕໍ່ການນຳພາຂອງພັກ-ລັດ, ເປັນເຈົ້າການຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆເຮັດໃຫ້ສະພາບແນວຄິດພາຍໃນຂອງພະນັກງານ-ນັກຮົບມີຄວາມສະຫງົບ, ເຊື່ອໝັ້ນຕໍ່ການນຳພາຂອງຄະນະພັກຂັ້ນຕົນ ພ້ອມນັ້ນ, ຍັງໄດ້ຈັດຕັ້ງເຊື່ອມຊຶມ ເອກະສານຕ່າງໆ ທີ່ສຳຄັນຂອງຊາດ, ຂອງພັກ ແລະ ຂອງກອງ ທັບເປັນປົກກະຕິ ເຮັດໃຫ້ນາຍ ແລະ ພົນທະຫານ ມີແນວຄິດ ຫຼັກໝັ້ນ ແລະ ສະດຸງໄວຕໍ່ການ ນຳພາ-ຊີ້ນຳ; ວຽກງານກໍ່ສ້າງ ພັກ-ພະນັກງານ ໄດ້ຖືເອົາການ ກໍ່ສ້າງໜ່ວຍພັກປອດໃສ ເຂັ້ມ ແຂງ ໜັກແໜ້ນ, ດຳເນີນຊີວິດການເມືອງພາຍໃນພັກ ເປັນປົກ ກະຕິ ເພື່ອສຳຫຼວດກວດກາ, ຕຳນິຕິຊົມກໍ່ສ້າງຊ່ວຍເຫຼືອເຊິ່ງກັນ ແລະ ກັນ ເພື່ອເຮັດໃຫ້ພາຍໃນພັກມີຄວາມສະຫງົບ, ວຽກງານກໍ່ສ້າງພະນັກງານ ໄດ້ສ້າງພະນັກງານຮຸ່ນສືບທອດປ່ຽນແທນທັງກໍ່ສ້າງກັບທີ່ ແລະ ສົ່ງ ໄປບຳລຸງກໍ່ສ້າງຢູ່ພາຍໃນ ແລະ ຕ່າງປະເທດ ຕາມຕົວເລກແບ່ງ ປັນຂອງຂັ້ນເທິງ ບົນພື້ນຖານຫັນເປັນໜຸ່ມ. ວຽກງານການອົບ ຮົມ-ຫັດແອບ ໄດ້ປະຕິບັດຕາມຄຳສັງແນະນຳຂອງກົມໃຫຍ່ເສນາທິການກອງທັບ ກໍຄື ກົມປ້ອງກັນອາກາດ ວ່າດ້ວຍການອົບຮົມ-ຫັດແອບການເມືອງ, ການທະ ຫານພະລາທິການ-ເຕັກນິກ ແລະ ເຫຼົ່າຮົບວິຊາສະເພາະປ້ອງກັນອາກາດ ໃຫ້ມີຄວາມຊຳນິຊຳ ນານໃນການນຳໃຊ້ອາວຸດ-ຍຸດໂທປະກອນເຫຼົ່າຮົບວິຊາສະ ເພາະປ້ອງກັນອາກາດ.
ວຽກງານສ້າງເສດຖະກິດ ແລະ ແກ້ໄຂຊີວິດການເປັນຢູ່ໄດ້ຊີ້ນຳພະນັກງານ-ນັກຮົບ ສຸມໃສ່ການປູກ-ການລ້ຽງໄດ້ ຖືເອົາ 4 ປູກ 4 ລ້ຽງ ຕາມທິດ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນ ເອງ, ເຊິ່ງໃນ 6 ເດືອນຕົ້ນປີ 2026 ນີ້, ກົມກອງໄດ້ປູກພືດຜັກຊະນິດຕ່າງໆ ສາມາດເກັບກູ້ໄດ້ 3.414 ກິໂລກຣາມຄິດເປັນເງິນ 47.615.000 ກີບ, ເກັບກູ້ເຂົ້ານາແຊງ 2.300 ກິໂລກຣາມ (ເຂົ້າສານ) ເປັນເງິນ 34.500.000 ກີບ, ຂາຍນໍ້າດື່ມຮັບໃຊ້ບັນດາອົງການ ແລະ ກົມກອງຮາກຖານ ຈຳ ນວນ 4.338 ຕຸກ ຄິດເປັນເງິນ 21.690.000 ກີບ, ຂາຍປາ 500 ກິໂລກຣາມ ຄິດເປັນເງິນ 20.000.000 ກີບ ແລະ ຂາຍໄຂ່ໄກ່ພັນ ລວມເປັນເງິນທັງໝົດ 75.570.000 ກີບ, ລ້ຽງສັດປີກປະເພດ ເປັດ, ໄກ່ 2.750 ໂຕ, ລ້ຽງໝູ 17 ໂຕ ແລະ ງົວ 65 ໂຕ, ປັກດຳເຂົ້ານາປີ ສຳ ເລັດ ໃນເນື້ອທີ 7,4 ເຮັກຕາ, ປູກມັນຕົ້ນ 6,5 ເຮັກຕາ, ສັງລວມໃນ 6 ເດືອນຕົ້ນປີນີ້, ກົມກອງສາມາດສ້າງລາຍຮັບຈາກການປູກຝັງ-ລ້ຽງສັດເຂົ້າຄັງລວມໄດ້ທັງໝົດ 199.375.000 ກີບ.
ວຽກງານຮັບປະກັນເຕັກນິກ ກໍໄດ້ເປັນເຈົ້າການນຳພາ-ຊີ້ນຳ ພະນັກງານວິຊາສະເພາະຂອງຕົນ ເອົາໃຈໃສ່ຄຸ້ມຄອງປົກປັກຮັກສາ, ບົວລະບັດຜັດເຊັດ ແລະ ນຳໃຊ້ພາຫະນະເຕັກນິກ, ອາວຸດ-ລູກກະສຸນ ແລະ ວັດຖຸເຕັກນິກ ທີ່ໄດ້ປະກອບໃຫ້ຖືກຕ້ອງຕາມ ລະບຽບຫຼັກການ ຕາມຂໍ້ກຳນົດ ຂອງຂັ້ນເທິງວາງອອກ ເປັນຕົ້ນໃນດ້ານວຽກງານຄຸ້ມຄອງພາ ຫະນະໄດ້ເອົາໃຈໃສ່ ຊີ້ນຳພະ ແນກການທີ່ກ່ຽວຂ້ອງ ແລະ ກົມ ກອງເຫຼົ່າຮົບ ເປັນເຈົ້າການ ຈັດ ຕັ້ງປະຕິບັດວຽກງານຄຸ້ມຄອງ, ປົກປັກຮັກສາ, ບົວລະບັດຜັດເຊັດພາຫະນະຢ່າງເປັນປົກກະຕິ. ໃນນີ້, ໄດ້ຈັດຕັ້ງວັນເຕັກນິກ ເພື່ອກວດກາສະພາບເຕັກນິກ ເປັນປະຈຳ, ກວດກາກ່ອນອອກໄປປະຕິບັດໜ້າທີ່ ແລະ ເວລາກໍລະ ນີພາຫະນະເຕັກນິກ ມີການເປ່ເພ ກໍໄດ້ລາຍງານຂໍທິດຊີ້ນຳຈາກຂັ້ນເທິງ ອະນຸມັດສ້ອມແປງປ່ຽນຖ່າຍອາໄຫຼ່ ທັງນີ້, ກໍເພື່ອແນໃສ່ຮັບປະກັນການນຳໃຊ້ໄດ້ຍາວນານ ແລະ ມີຄຸນນະພາບ, ດ້ານວຽກງານການຄຸ້ມຄອງອາວຸດ-ລູກກະສຸນ ໄດ້ເອົາໃຈໃສ່ຕິດຕາມ, ຄຸ້ມຄອງຕາມລະບຽບຫຼັກການ ທີ່ກົມວິຊາສະເພາະແນະນຳ ເພື່ອຮັບປະກັນໃນການນຳໃຊ້ໃຫ້ມີຄຸນນະພາບ ແລະ ມີຄວາມປອດໄພ 100%.
ສັງລວມແລ້ວ ການຈັດຕັ້ງປະ ຕິບັດວຽກງານຮອບດ້ານ 6 ເດືອນຕົ້ນປີ 2026 ຂອງກອງພັນໃຫຍ່ 642 ມີຜົນສຳເລັດຫຼາຍດ້ານ ກໍຍ້ອນໄດ້ຮັບການຊີ້ນຳຢ່າງໃກ້ຊິດ ຈາກຄະນະພັກຂັ້ນເທິງ ບວກກັບຄວາມເອົາໃຈໃສ່ເປັນເຈົ້າການ ຂອງຄະນະພັກ-ຄະນະບັນຊາກອງພັນໃຫຍ່ ແລະ ຄະນະພັກແຕ່ລະຂັ້ນ ຈຶ່ງສາມາດຮັບປະກັນໄດ້ໜ້າທີ່ການເມືອງ ແລະ ວິຊາສະເພາະຂອງກົມກອງ.
ໂດຍ: ວັນໄຊ ໄຊສະຫວັດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
