ວັນອັງຄານ, ວັນທີ 21 ກໍລະກົດ 2026
ບົນເສັ້ນທາງ ການກຳເນີດເຕີບໃຫຍ່ ຂອງວິທະຍາຄານ ນາຍທະຫານບົກ ກົມມະດຳ
ເວລາອອກຂ່າວ: 2026-06-25 09:33:16 | ຜູ້ຂຽນ : admin1 | ຈຳນວນຄົນເຂົ້າຊົມ: 758 | ຄວາມນິຍົມ: 
ປີ 1954 ກຳລັງປະຕິວັດໄດ້ເຄື່ອນກຳລັງຂຶ້ນເຕົ້າໂຮມຢູ່ສອງແຂວງຄື: ຫົວພັນ ແລະ ຜົ້ງສາລີ ພາຍໃຕ້ການນຳພາຂອງພັກ, ແນວລາວຮັກຊາດ ໄດ້ເອົາໃຈໃສ່ຢ່າງຕັ້ງໜ້າ ຕໍ່ການກໍ່ສ້າງກຳລັງທາງດ້ານການເມືອງ ແລະ ກຳລັງປະກອບອາວຸດ ນັບທັງກຳລັງທີ່ ຍັງປະຈຳການຢູ່ທ້ອງຖິ່ນ 10 ແຂວງໃນເຂດກວດກາຂອງຝ່າຍ ວຽງຈັນ. ສະເພາະກຳລັງປະ ກອບອາວຸດ ເຊິ່ງເປັນກຳລັງຕົ້ນ ຕໍໃນການຮັບປະກັນໃຫ້ແກ່ສັນ ຕິພາບ ແລະ ຄວາມສະຫງົບສຸກຂອງປະຊາຊົນບັນດາເຜົ່າ. ໃນເວລານັ້ນ ສູນກາງພັກ, ກອງບັນ ຊາການທະຫານສູງສຸດ ໄດ້ຈັດຕັ້ງກຳລັງເພື່ອກຽມພ້ອມເຮັດ ໜ້າທີ່ສູ້ຮົບປົກປັກຮັກສາເຂດເຕົ້າໂຮມຂອງກຳລັງປະຕິວັດ ເຮົາ. ທ້າຍເດືອນທັນວາ ປີ 1954 ພາຍຫຼັງກອງປະຊຸມວຽກງານການທະຫານ, ການເມືອງ ຄັ້ງທີ I ໄດ້ໄຂຂຶ້ນຢູ່ເມືອງໂສຍ ແຂວງຫົວພັນ ໂດຍແມ່ນປະທານ ໄກສອນ ພົມວິຫານ ເປັນປະທານກອງປະຊຸມ ໄດ້ຕົກລົງສ້າງຕັ້ງກຳລັງປະກອບອາວຸດຂຶ້ນ ເຊິ່ງລວມມີ 9 ກອງພັນນ້ອຍທະຫານຮາບ ແລະ ກົມກອງເຫຼົ່າຮົບອີກຈຳນວນໜຶ່ງ.
ເພື່ອປະຕິບັດຕາມແນວທາງນະໂຍບາຍຕໍ່ສູ້ຍືດເຍື້ອຍາວນານຂອງພັກ ແລະ ທັງເປັນການປັບ ປຸງກໍ່ສ້າງກຳລັງປະກອບອາວຸດຂອງຝ່າຍປະເທດລາວ ໃຫ້ມີບາດກ້າວເຕີບໃຫຍ່ຂະຫຍາຍຕົວ ໂດຍສະເພາະວຽກງານກໍ່ສ້າງ ພະນັກງານຂັ້ນບັນຊາ, ພະນັກ ງານນຳພາ, ພະນັກງານເຕັກນິກວິຊາສະເພາະຕ່າງໆ ໃນຖັນແຖວ ກອງທັບ ເຊິ່ງແມ່ນຂອດຈຳເປັນ ແລະ ຮີບດ່ວນ ສຳລັບການປະຕິ ວັດລາວ. ຕົ້ນລະດູແລ້ງປີ 1955 ປະທານ ໄກສອນ ພົມວິຫານ ແລະ ທ່ານ ສິງກະໂປ ສີໂຄດຈຸນນະມານີ ໄດ້ຕາງໜ້າໃຫ້ສູນກາງພັກ ທັງເປັນຜູ້ບັນຊາການທະຫານສູງສຸດກອງທັບປົດປ່ອຍປະຊາຊົນລາວ ໄດ້ເດີນທາງໄປບ້ານກາງໂມງ ເມືອງໂສຍ ແຂວງຫົວພັນ ເພື່ອຊີ້ນຳວຽກງານຢ່າງຮອບດ້ານ, ວັນທີ 18 ມິຖຸນາ 1955 ສູນກາງພັກ ໄດ້ມີມະຕິຕົກລົງ ສ້າງຕັ້ງໂຮງຮຽນກອງທັບ ຫຼັງທຳອິດຂອງກອງ ທັບຂຶ້ນຢູ່ທີ່ບ້ານກາງໂມງ ເມືອງໂສຍ ແຂວງຫົວພັນ ແລະ ໄດ້ຖື ເອົານາມວິລະບູລຸດແຫ່ງຊາດ (ກົມມະດຳ) ເປັນຊື່ຂອງໂຮງ ຮຽນ, ພ້ອມທັງໄດ້ແຕ່ງຕັ້ງ ຄະນະຮັບຜິດຊອບໂຮງຮຽນຂຶ້ນ, ໃນນັ້ນ, ໄດ້ແຕ່ງຕັ້ງ ສະຫາຍ ບຸນຊູ ສີໄພງາມ ເປັນອຳນວຍການ, ປະ ກອບມີພະນັກງານ, ຄູ-ອາຈານຈຳນວນໜຶ່ງ ທີ່ຢູ່ໃນໂຄງຮ່າງການຈັດຕັ້ງໃນເວລານັ້ນ.
ພາຍຫຼັງທີ່ປະທານ ໄກສອນ ພົມວິຫານ ໄດ້ປະກາດສ້າງຕັ້ງໂຮງຮຽນກົມມະດຳ, ທ່ານ ສິງກະໂປ ສີໂຄດຈຸນລະມະນີ ໄດ້ມອບໝາຍໜ້າທີ່ອັນສຳຄັນໃຫ້ແກ່ພະນັກງານຄູ-ອາຈານ, ອ້າຍເອື້ອຍນ້ອງຮັບໃຊ້ພາຍໃນໂຮງຮຽນ, ທັງສຶກສາອົບຮົມການເມືອງ-ແນວຄິດ ໃຫ້ມີຄວາມອົດທົນຜ່ານຜ່າອຸປະສັກ ແລະ ສິ່ງທ້າທາຍທົດສອບຕ່າງໆນາໆປະການໃນການສ້າງຄວາມເຂັ້ມແຂງດ້ວຍຕົນເອງ ທາງດ້ານ ວັດຖຸອຸປະກອນ, ເຄື່ອງອຸປະ ໂພກ-ບໍລິໂພກ ເຊິ່ງໃນເວລານັ້ນທົ່ວພັກ-ທົ່ວກອງທັບ ໄດ້ສຸມໃສ່ການປະຕິບັດທິດທາງກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ເພື່ອພ້ອມກັນຜ່ານຜ່າ ແລະ ປະເຊີນໜ້າກັບສົງຄາມສະ ເພາະໜ້າ ແລະ ຍາວນານຂອງ ການປະຕິວັດລາວ. ຍ້ອນແນວນັ້ນ, ໜ້າທີ່ສະເພາະຂອງໂຮງ ຮຽນກົມມະດຳ ຈຶ່ງແມ່ນການໝູນໃຊ້ກຳລັງແຮງຂອງກົມກອງ ເພື່ອເປັນພື້ນຖານໃຫ້ແກ່ການກໍ່ສ້າງກຳລັງປະກອບອາວຸດຂອງພວກເຮົາໃນເບື້ອງຕົ້ນຢ່າງຈິງຈັງ ແລະ ໄດ້ຮັບການຊ່ວຍເຫຼືອ, ອູ້ມຊູສະໜັບສະໜູນຈາກປະຊາຊົນຈຶ່ງເຮັດໃຫ້ໂຮງຮຽນກົມມະດຳ ຄ່ອຍດີຂຶ້ນເປັນລຳດັບ.
ໄປຄຽງຄູ່ກັບການສ້າງຕັ້ງໂຮງຮຽນກົມມະດຳກອງທັບປົດປ່ອຍປະຊາຊົນລາວ, ວັນທີ 23 ຕຸລາ 1955 ສູນກາງພັກໄດ້ ຕົກລົງສ້າງຕັ້ງໂຮງຮຽນຄິດໄລ່ (ໂຮງຮຽນພະລາທິການ) ຂອງກອງບັນຊາການທະຫານສູງສຸດຂຶ້ນ. ຈາກນັ້ນ, ເດືອນພະຈິກ 1956 ໂຮງຮຽນກົດລັບ-ສື່ສານ ກໍໄດ້ສ້າງຕັ້ງຂຶ້ນເປັນລຳດັບ, ນັ້ນ ແມ່ນບາດກ້າວຂະຫຍາຍຕົວ ຂອງໂຮງຮຽນໃນຖັນແຖວກຳ ລັງປະກອບອາວຸດກອງທັບປະ ຊາຊົນລາວ.
ໃນໄລຍະຕໍ່ສູ້ປົດປ່ອຍປະເທດຊາດ ໂຮງຮຽນກົມມະດຳ ໄດ້ ຍົກຍ້າຍສະຖານທີ່ຢູ່ເລື້ອຍໆ, ເຮືອນນອນ, ຫ້ອງຮຽນ, ຫ້ອງ ການແມ່ນບໍ່ມີ, ອາໄສເຮືອນປະ ຊາຊົນເປັນສະຖານທີ່ (ບໍ່ມີລະບົບອັດຕາກິນ, ເງິນເດືອນ) ການກິນຢູ່, ນຸ່ງຫົ່ມໄດ້ຮັບການຊ່ວຍເຫຼື່ອຈາກປະຊາຊົນລາວບັນດາເຜົ່າ ແລະ ເພື່ອນມິດສາກົນ, ຫ້ອງຮຽນອາໄສຮຽນຢູ່ຕາມປ່າດົງ, ເອົາຫົວເຂົ່າເປັນໂຕະ, ເອົາດິນເປັນຕັ່ງ, ເປັນກະດານຂີດຂຽນແຕ້ມແຜນຮ່າງ, ແຕ້ມແຜນທີ່ຕ່າງໆ ວັດຖຸອຸປະກອນຂາດເຂີນຫຼາຍດ້ານ, ໂຄງການຫຼັກສູດ, ເອກະສານອາໄສການຊ່ວຍເຫຼືອຈາກຊ່ຽວຊານຫວຽດນາມ, ຄູ-ອາຈານບໍ່ພຽງພໍ ແຕ່ຄຸນນະ ພາບການບຳລຸງອົບຮົມ, ກໍ່ສ້າງ ພະນັກງານໄດ້ຮັບການຍົກສູງ ຢູ່ຕະຫຼອດເວລາ, ເຮັດໃຫ້ການປະກອບພະນັກງານຂັ້ນຊີ້ນຳ-ບັນຊາ ຢູ່ໃນບັນດາກົມກອງກຳລັງປະກອບອາວຸດກອງທັບ ແລະ ຮາກຖານປະຊາຊົນ ໄດ້ຮັບການເຕີບໃຫຍ່ຂະຫຍາຍຕົວຢ່າງວ່ອງໄວ, ມີຄວາມສາມາດປະດິດສ້າງໃນການຊີ້ນຳ-ນຳພາ, ຮູ້ນຳໃຊ້ອາວຸດພື້ນເມືອງຈົນເຖິງອາວຸດທັນສະໄໝ ກ້າວໄປພ້ອມກັບຄວາມຮູ້, ຄວາມສາມາດຕີເອົາໄຊຊະນະຈັກກະພັດຜູ້ຮຸກຮານປົດປ່ອຍປະເທດຊາດໄດ້ຢ່າງສົມບູນ.
ກ້າວເຂົ້າສູ່ໄລຍະໃໝ່ແຫ່ງການປົກປັກຮັກສາ ແລະ ສ້າງ ສາປະເທດຊາດ ພັກ-ລັດ ກໍຄືກະຊວງປ້ອງກັນປະເທດ ໄດ້ຍົກລະດັບບົດບາດຂອງບັນດາໂຮງຮຽນຢູ່ໃນຖັນແຖວກອງທັບຂຶ້ນຕາມລຳດັບໃຫ້ເຕີບໃຫຍ່ຂະ ຫຍາຍຕົວ ທາງດ້ານຈຳນວນພົນ ແລະ ຄຸນນະພາບ ໂດຍອີງໃສ່ການຂະຫຍາຍຕົວຂອງໂຮງຮຽນກົມມະດຳ ວັນທີ 23 ກຸມພາ 1981 ຈຶ່ງໄດ້ປ່ຽນຊື່ຈາກໂຮງ ຮຽນກົມມະດຳ ມາເປັນໂຮງ ຮຽນປະສານເຫຼົ່າ (ຊັ້ນຕົ້ນຢູ່ນ້ຳຊວງ, ຊັ້ນກາງ ຢູ່ບ້ານແປນ ແລະ ຊັ້ນສູງຢູ່ຈີ່ນາຍໂມ້) ເຊິ່ງປະກອບດ້ວຍເຫຼົ່າຮົບທະຫານຮາບ, ການເມືອງ, ສື່ສານ, ຊ່າງແສງ, ປືນໃຫຍ່ໜ້າດິນ, ປ້ອງກັນອາກາດ, ລົດຕັງ, ສືບຂ່າວ, ຕີພິ ເສດ ແລະ ເຫຼົ່າຮົບເຄມີ.
ໃນໄລຍະຕໍ່ມາ, ເພື່ອຕອບສະໜອງກັບຄວາມຮຽກຮ້ອງຕ້ອງການຂອງໂຮງຮຽນ ທີ່ມີການຂະຫຍາຍຕົວຂຶ້ນສູ່ລະດັບໃໝ່ ມີບົດບາດສຳຄັນໃນການປັບປຸງກໍ່ສ້າງກຳລັງປະກອບອາວຸດ, ກະຊວງປ້ອງກັນປະ ເທດໄດ້ປ່ຽນຊື່ຈາກໂຮງຮຽນປະສານເຫຼົ່າ (ຊັ້ນກາງ) ມາເປັນວິທະຍາຄານການທະຫານ-ການເມືອງ ໃນວັນທີ 9 ສິງຫາ 1996. ຜ່ານການເຄື່ອນໄຫວວຽກງານຕົວຈິງຂອງໂຮງຮຽນຍິ່ງເຮັດໃຫ້ມີບົດບາດອັນສູງໃຫ້ ແກ່ການບຳລຸງ-ກໍ່ສ້າງພະນັກ ງານ-ນັກຮົບ ປະກອບໃຫ້ກອງ ທັບ ແລະ ມີຄວາມຈຳເປັນພາວະວິໄສ. ດັ່ງນັ້ນ, ວັນທີ 15 ສິງຫາ 2004 ກະຊວງປ້ອງກັນປະເທດ ຈຶ່ງໄດ້ປ່ຽນຊື່ຈາກ ວິທະຍາຄານການທະຫານ-ການເມືອງ ມາເປັນວິທະຍາຄານກົມມະດຳ.
ຈາກພຶດຕິກຳຕົວຈິງ ແຫ່ງການເຄື່ອນໄຫວ ແລະ ເຕີບໃຫຍ່ຂະຫຍາຍຕົວ ຂອງວິທະຍາຄານກົມມະດຳ ໄດ້ສືບຕໍ່ເສີມຂະຫຍາຍມູນເຊື້ອວຽກງານອົບຮົມບຳ ລຸງ-ກໍ່ສ້າງພະນັກງານ-ນັກຮົບ ກອງທັບປະຊາຊົນລາວ ໃຫ້ມີຄຸນນະພາບນັບມື້ສູງຂຶ້ນ ບັນດານາຍທະຫານທີ່ໄດ້ຮັບການຊຸບຫຼໍ່ກໍ່ສ້າງຢູ່ສະຖາບັນແຫ່ງນີ້ ລ້ວນແລ້ວແຕ່ມີແນວຄິດອຸ່ນອຽນທຸ່ນທ່ຽງ, ມີຄວາມຈົງຮັກພັກດີ, ຊື່ສັດບໍລິສຸດຕໍ່ພັກ, ຕໍ່ປະເທດຊາດ ແລະ ປະຊາຊົນ, ເຊື່ອໝັ້ນຕໍ່ແນວທາງນະໂຍບາຍຂອງພັກ- ລັດ ແຕ່ລະໄລຍະ, ມີອຸດົມການ ສັງຄົມນິຍົມ ຢ່າງສະເໝີຕົ້ນສະ ເໝີປາຍ, ສິ່ງເຫຼົ່ານີ້ ໄດ້ກາຍເປັນມູນເຊື້ອອັນດີງາມ ຂອງວິທະຍາ ຄານກົມມະດຳ ແຕ່ເມື່ອກ່ອນຈົນເຖິງປັດຈຸບັນ.
ການປະຕິບັດໜ້າທີ່ການເມືອງທີ່ພັກ-ລັດ ແລະ ກະຊວງປ້ອງກັນປະເທດມອບໝາຍໃຫ້ໃນແຕ່ລະໄລຍະນັ້ນ, ຄະນະພັກ-ຄະນະອຳນວຍການວິທະຍາຄານກົມມະດຳ ພ້ອມດ້ວຍພະນັກງານ, ຄູ-ອາຈານ ແລະ ພະນັກງານບັນຊາແຕ່ລະຂັ້ນໄດ້ຈັດຕັ້ງຜັນຂະຫຍາຍໜ້າທີ່ການເມືອງຂອງຕົນເຂົ້າໃນວຽກງານສຶກສາອົບຮົມ, ບຳ ລຸງກໍ່ສ້າງນາຍທະຫານໃຫ້ກ້າວເຂົ້າສູ່ລະບຽບແບບແຜນ ແລະ ທັນສະໄໝ, ມີຄຸນນະພາບທຽບເທົ່າກັບລະດັບຊາດ, ລະດັບສາ ກົນເທື່ອລະກ້າວ ໂດຍສະເພາະແມ່ນການປັບປຸງດ້ານໂຄງການຫຼັກສູດການຮຽນ-ການສອນ ໄປຄຽງຄູ່ກັບການຍົກລະດັບວຸດທິການສຶກສາຂອງບັນດາເຫຼົ່າຮົບວິຊາສະເພາະໃຫ້ສູງຂຶ້ນ.
ດ້ານວຽກງານຄົ້ນຄວ້າວິທະ ຍາສາດ ກ່ຽວກັບແນວທາງການ ທະຫານ, ການເມືອງ, ສິລະປະ ຍຸດ-ຍຸດທະວິທີ ສູ້ຮົບໄດ້ຮັບການປັບປຸງເປັນລະບົບເອກະສານທີ່ ສົມບູນແບບມີເນື້ອໃນຄົບຖ້ວນ, ຖືກຕ້ອງ, ເໝາະສົມ ແລະ ສອດ ຄ່ອງກັບພາລະກິດປ່ຽນແປງໃໝ່ຂອງພັກ-ລັດ ກໍຄື ກະຊວງປ້ອງກັນປະເທດ. ໃນນັ້ນ, ໄດ້ກຳແໜ້ນບັນດາບົດຮຽນຂອງຊາດ, ສາ ກົນຢ່າງໜັກແໜ້ນ ເພື່ອຍົກສູງຄຸນນະພາບການບຳລຸງ-ກໍ່ສ້າງ ສຶກສາອົບຮົມພະນັກງານ-ນັກຮົບ ສ້າງໃຫ້ມີຄວາມມານະອົດທົນ, ດຸໝັ່ນຂະຫຍັນພຽນ, ເປັນເຈົ້າການຄົ້ນຄວ້າຕຳລາການສອນ ແລະ ຫຼັກສູດການຮຽນຕ່າງໆເພື່ອປັບປຸງໃຫ້ແທດເໝາະກັບສະພາບຕົວຈິງໃນເງື່ອນໄຂພູມີປະເທດໃນການກໍ່ສ້າງກຳລັງ ກໍຄື ການປັບປຸງກໍ່ສ້າງນາຍທະຫານຢ່າງຮອບດ້ານ, ສົ່ງເສີມຫົວຄິດປະດິດສ້າງ ແລະ ຄວາມເປັນເຈົ້າການໃນການອອກແຮງງານທາງມັນສະໝອງໃນການຄົ້ນຄວ້າວິ ທະຍາສາດການທະຫານ, ການ ເມືອງ, ສ້າງຫຼັກສູດ, ຕຳລາສິດ ສອນ, ຕຳລາຮຽນ ແລະ ສົ່ງເສີມຂຸດຄົ້ນຫົວຄິດປະດິດສ້າງທາງດ້ານມັນສະໝອງລວມໝູ່ເຂົ້າໃນການນຳໃຊ້ຕົວຈິງຂອງວຽກງານດ້ານຕ່າງໆ.
ສຳລັບວິທີການສິດສອນອົບ ຮົມບຳລຸງ-ກໍ່ສ້າງພະນັກງານ, ຄຸ້ມຄອງນັກຮຽນໃນ ໄລຍະມາໄດ້ຈັດຕັ້ງປະຕິບັດຢ່າງຖືກຕ້ອງ ແລະ ມີປະສິດທິຜົນໃນສະເພາະໜ້າ ແລະ ຍາວນານ, ການສຶກ ສາຄົ້ນຄວ້າຮໍ່າຮຽນຂອງພະນັກ ງານ-ນັກຮົບທີ່ເຂົ້າມາສຶກສາຢູ່ວິທະຍາຄານກົມມະດຳ ທຸກຄົນກໍຕ້ອງໄດ້ປະຕິບັດຂໍ້ກຳນົດກົດລະບຽບຂອງວິທະຍາຄານຢ່າງເຂັ້ມງວດ ໄປພ້ອມໆກັບການປະຕິບັດກົດລະບຽບວິໄນຂອງກອງທັບ, ທັງນີ້ກໍເພື່ອເຮັດ ໃຫ້ການກໍ່ສ້າງພະນັກງານທີ່ມີ ຄຸນນະພາບ. ໄປພ້ອມກັບການຫັນປ່ຽນວິທີການສິດສອນທີ່ສອດຄ່ອງກັບແຕ່ລະໄລຍະແຕ່ ລະເປົ້າໝາຍ ບໍ່ວ່າຈະເປັນແຫຼ່ງ ຂໍ້ມູນຈາກຫ້ອງຮຽນ ແລະ ນອກ ຫ້ອງຮຽນ (ຫ້ອງສະໝຸດ, ຫ້ອງ ມູນເຊື້ອ ແລະ ຮຽນນຳພະນັກ ງານປະຕິວັດອາວຸໂສ, ຜູ້ຊົງຄຸນ ນະວຸດທິຕ່າງໆ) ດ້ວຍຄວາມຮັບ ຜິດຊອບສູງ ພ້ອມທັງເຊີດຊູບົດ ບາດ ແລະ ປະຕິບັດນະໂຍບາຍ ຕໍ່ ຄູ-ອາຈານຢ່າງແທດເໝາະໃນວຽກງານການສິດສອນຕົວຈິງ.
ນອກຈາກເຮັດໜ້າທີ່ການ ເມືອງທີ່ຂັ້ນເທິງມອບໝາຍໃຫ້ໄດ້ດີແລ້ວຍັງໄດ້ຫັນລົງກໍ່ສ້າງຮາກຖານການເມືອງພັດທະນາຊົນນະບົດຮອບດ້ານຕາມ 4 ເນື້ອໃນ 4 ຄາດໝາຍ ກົມກອງຕັ້ງທັບຢູ່ບ່ອນໃດກໍຕ້ອງກຳແໜ້ນຮາກຖານປະຊາຊົນ ໃນນັ້ນໄດ້ສົ່ງພະນັກງານລົງກໍ່ສ້າງຮາກຖານປະຊາຊົນໃນຂອບເຂດຮັບ ຜິດຊອບ ຄື: ເຂດນ້ຳແຈ້ງ, ເຂດ ໂພນສູງ ແລະ ເຂດອື່ນທີ່ໄດ້ຮັບມອບໝາຍຈາກຂັ້ນເທິງ ໂດຍ ມອບໃຫ້ແຕ່ລະອົງການ, ກົມກອງ ຈັດຕັ້ງສ້າງເປັນບ້ານແຮກ ສ່ຽວ ເພື່ອຊ່ວຍອຳນາດການປົກຄອງທ້ອງຖິ່ນ ພ້ອມທັງນຳເອົາແນວທາງນະໂຍບາຍຂອງພັກໄປເຜີຍແຜ່ເປັນຕົ້ນແມ່ນວຽກງານປ້ອງກັນຊາດ-ປ້ອງກັນຄວາມສະຫງົບເຮັດໃຫ້ຮາກຖານປະຊາຊົນມີຄວາມສະຫງົບ. ດ້ານວຽກງານການພົວພັນຮ່ວມມືກັບຕ່າງປະເທດ ໄດ້ເປີດກວ້າງການຮ່ວມມື ແລະ ຈັດເປັນໂຄງການຫຼັກສູດອົບຮົມບຳລຸງ-ກໍ່ສ້າງໂດຍກົງໃນວຽກງານດັ່ງກ່າວ ເພື່ອຍົກລະດັບພະ ນັກງານ, ນາຍທະຫານໃນແຕ່ລະໄລຍະ ໄດ້ຫັນເອົາແນວທາງການຕ່າງປະເທດຂອງພັກ ມາເປັນແຜນການລະອຽດໃນການຮ່ວມມືກັບບັນດາປະເທດສັງຄົມນິຍົມ, ພ້ອມກັນນັ້ນໄດ້ຮັບເອົາການເຊື້ອເຊີນໄປທັດສະນະສຶກສາດ້ານຕ່າງໆ ຂອງສະຖາບັນ ການທະຫານ ເຊັ່ນ: ສສ ຫວຽດ ນາມ, ສປ ຈີນ, ສ ຣັດເຊຍ ແລະ ບັນດາປະເທດອື່ນໆ. ພ້ອມນັ້ນຍັງໄດ້ຮັບຕ້ອນແຂກ ແລະ ເຮັດວຽກຮ່ວມກັບຫຼາຍຄະນະຜູ້ແທນຂອງກອງທັບປະເທດເພື່ອນມິດ ທີ່ມາຢ້ຽມຢາມ ແລະ ເຮັດວຽກ ອັນໄດ້ສ້າງຄວາມຈິງໃຈ, ຄວາມ ສະດວກ ແລະ ຄວາມເປັນມິດ ຢ່າງແທ້ຈິງ, ເຊິ່ງເປັນການປະ ກອບສ່ວນສຳຄັນໃນຜົນສຳເລັດລວມທົ່ວກອງທັບ ຕາມທິດນຳ “ເພີ່ມມິດຫຼຸດສັດຕູ”.
ດ້ານວຽກງານການກໍ່ສ້າງ ພັກ-ພະນັກງານ ໄດ້ຖືເອົາ 5 ຫຼັ້ກການ 3 ທິດນຳຂອງພັກເປັນສຳຄັນຕິດພັນກັບການກໍ່ສ້າງພະ ນັກງານ 3 ຮຸ່ນ ທັງກໍ່ສ້າງກັບທີ່ ແລະ ສົ່ງໄປຮຽນຢູ່ບັນດາວິ ທະຍາຄານໃນກອງທັບ ແລະ ຕ່າງປະເທດ ໂດຍສະເພາະແມ່ນປະເທດເພື່ອນມິດຍຸດທະສາດ. ເຊິ່ງປັດຈຸບັນທົ່ວວິທະຍາຄານກົມມະດຳ ມີຖັນແຖວພະນັກງານ, ຄູ-ອາຈານ ລ້ວນແລ້ວແຕ່ໄດ້ຮັບການກໍ່ສ້າງ ມີລະດັບຄວາມຮູ້ວິຊາສະເພາະທີ່ແນ່ນອນ ຂັ້ນປະລິນຍາເອກ, ປະລິນຍາໂທ, ປະລິນຍາຕີ, ຊັ້ນສູງ ແລະ ຊັ້ນກາງ.
ດ້ານວຽກງານແກ້ໄຂຊີວິດການເປັນຢູ່ໄດ້ປະຕິບັດຕາມທິດ ນຳເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍ ຕົນເອງ ປັບປຸງກໍ່ສ້າງຕືກອາ ຄານ, ສຳນັກງານຫ້ອງການ, ໂຮງຮຽນ, ຫໍພັກນັກສຶກສາ, ເຮືອນໄວ້ລົດ-ປືນໃຫຍ່, ໂຮງໝໍ 20 ຕຽງ, ເຮືອນພັກເຊົາຮັບຕ້ອນແຂກ, ເຮືອນຄົວ-ເຮືອນກິນເຂົ້າ, ຫໍຄອຍສະໜາມຊ້ອມຮົບ, ເສັ້ນທາງເຂົ້າອອກຄ້າຍ ແລະ ເສັ້ນທາງໄປຫາເສັ້ນທາງເລກທີ 13 ເໜືອ, ສະໜາມຫັດແອບລົດຕັງ, ປືນໃຫຍ່ໜ້າດິນ ແລະ ທະຫານຮາບ 3 ສະໜາມ, ເຈາະນ້ຳບາດານ, ອ່າງເກັບນ້ຳປະປາ, ສ້າງເດີນເຕາະບານ, ເດີນບານສົ່ງ, ປະຕູໂຂງເຂົ້າ-ອອກຄ້າຍ, ຜາມໄຊ, ສາງຄັງ, ຕະຫຼາດນ້ອຍ, ຕິດຕັ້ງລະບົບກັ່ນຕອງນ້ຳດື່ມບໍລິສຸດ ແລະ ສິ່ງປຸກສ້າງອື່ນໆໃຫ້ແໜ້ນໜາຖາວອນຕາມແບບວັດທະນະທຳຈົບງາມ; ດ້ານວຽກງານການຄຸ້ມຄອງພາ ຫະນະເຕັກນິກ, ອາວຸດກະສຸນ ແມ່ນໄດ້ມີການກວດກາເປັນປະ ຈຳເພື່ອຮັບປະກັນໃນການຮັບໃຊ້ການຮຽນ-ການສອນຂອງນັກສຶກສາໃຫ້ມີຄຸນນະພາບດີ.
ບົນເສັ້ນທາງແຫ່ງການກຳ ເນີດເຕີບໃຫຍ່ຂະຫຍາຍຕົວຂອງໂຮງຮຽນກົມມະດຳກອງທັບປະຊາຊົນລາວ ໃນເມື່ອກ່ອນພາຍໃຕ້ການນຳພາອັນປີຊາສາມາດສະຫຼາດສ່ອງໃສຂອງພັກ, ມີຄວາມພາກພູມໃຈຕໍ່ຜົນງານອັນໃຫຍ່ຫຼວງ, ມູນເຊື້ອອັນດີ ງາມໃນການບຳລຸງ-ກໍ່ສ້າງພະ ນັກງານ-ນັກຮົບ ແລະ ລູກຫຼານຂອງປະຊາຊົນບັນດາເຜົ່ານັບຫຼາຍພັນຄົນ. ເຊິ່ງປັດຈຸບັນນີ້ເຂົາເຈົ້າເຫຼົ່ານັ້ນໄດ້ກາຍເປັນພະ ນັກງານການນຳຂັ້ນສູງຂອງ ພັກ-ລັດ ແລະ ກອງທັບ, ມີຫຼາຍ ທ່ານ, ຫຼາຍສະຫາຍຢູ່ໃນຂັ້ນ ກົມການເມືອງສູນກາງພັກ, ກຳ ມະການສູນກາງພັກ, ຄະນະນຳ ກະຊວງປ້ອງກັນປະເທດ, ຂັ້ນ ນາຍພົນ, ນາຍພັນ ແລະ ນາຍ ຮ້ອຍຢູ່ໃນຖັນແຖວກຳລັງປະ ກອບອາວຸດຂອງກອງທັບ ປະ ຊາຊົນລາວ ທີ່ໄດ້ຜ່ານການອົບ ຮົມບຳລຸງ-ກໍ່ສ້າງຢູ່ໃນໂຮງຮຽນກົມມະດຳໃນສະໄໝຕໍ່ຕ້ານ. ເຊິ່ງປັດຈຸບັນກະຊວງປ້ອງກັນປະເທດ ໄດ້ປ່ຽນຊື່ເອີ້ນ ຈາກວິທະຍາຄານກົມມະດຳ ມາເປັນວິທະຍາຄານ ນາຍທະຫານບົກ ກົມມະດຳ.
ຮຽບຮຽງໂດຍ: ວັນໄຊ ໄຊສະຫວັດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
