POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 13 ມິຖຸນາ 2026

ເອເປັກ ຊຸກຍູ້ການຮ່ວມມືດ້ານການຄ້າ, ເສດຖະກິດດີຈີຕອນ ແລະ ການເຕີບໂຕສີຂຽວ
ເວລາອອກຂ່າວ: 2026-05-28 10:34:16 | ຜູ້ຂຽນ : admin3 | ຈຳນວນຄົນເຂົ້າຊົມ: 261 | ຄວາມນິຍົມ:

ຂ່າວຫວຽດນາມອອນໄລ, ກອງ ປະຊຸມລັດຖະມົນຕີການຄ້າ ເວທີປາໄສຮ່ວມມືດ້ານເສດຖະກິດ ອາຊີ-ປາຊີຟິກ (APEC) ປີ 2026, ເຊິ່ງຈັດຂຶ້ນທີ່ນະຄອນຊູໂຈວ ຂອງຈີນ, ບັນລຸໄດ້ໝາກຜົນສຳຄັນຫຼາຍດ້ານ, ໃນນັ້ນໄດ້ເນັ້ນໜັກເຖິງການຊຸກຍູ້ການເຊື່ອມໂຍງດ້ານເສດຖະກິດໃນພາກພື້ນ, ການປະຕິຮູບອົງການການຄ້າໂລກ (WTO), ເພີ່ມທະວີການຮ່ວມມືດ້ານການຄ້າດີຈີຕອນ ແລະ ການພັດທະນາສີຂຽວ. ກ່າວຄຳເຫັນທີ່ກອງປະຊຸມຂ່າວພາຍຫຼັງກອງປະຊຸມ, ທ່ານ Wang Wentao ລັດຖະມົນຕີກະຊວງການຄ້າຈີນ ໃຫ້ຮູ້ວ່າ: ບັນດາຝ່າຍ ໄດ້ແລກປ່ຽນຄຳເຫັນຢ່າງກົງໄປກົງມາ, ເລິກເຊິ່ງກວ້າງຂວາງ ແລະ ມີລັກສະນະສ້າງສັນ ດ້ວຍຫົວຂໍ້ “ກໍ່ສ້າງປະຊາຄົມ ອາຊີ-ປາຊີຟິກ, ຊຸກຍູ້ຄວາມວັດທະນາຖາວອນລວມ”. ກອງປະຊຸມໄດ້ສຸມໃສ່ 2 ເນື້ອໃນຕົ້ນຕໍ ລວມມີ: ສ້າງລະບຽບຮຽບຮ້ອຍດ້ານເສດຖະກິດ-ການຄ້າຢູ່ພາກພື້ນ ແລະ ຫຼາຍຝ່າຍເປີດອົກເປີດໃຈ, ສາມາດຄາດຄະເນໄດ້; ແລະ ສ້າງແຮງຂັບເຄື່ອນໃໝ່ໃຫ້ການຮ່ວມມືດ້ານການຄ້າ ແລະ ການລົງທຶນທີ່ປ່ຽນແປງໃໝ່, ຂະຫຍັນຂັນເຄື່ອນ. ກອງປະຊຸມຄັ້ງນີ້ ບັນລຸໄດ້ໝາກຜົນ “1+1”, ເຊິ່ງລວມມີການຮັບຮອງເອົາຖະແຫຼງການຮ່ວມ ແລະ ໃຫ້ສັດຕະຍາບັນແຜນການພັດທະນາຂະແໜງບໍລິການຂອງ APEC ສະບັບໃໝ່. ບັນດາພື້ນຖານເສດຖະກິດສະມາຊິກ ໄດ້ຢືນຢັນຄືນໃໝ່ ສະໜັບສະໜູນວິໄສທັດໄລຍະຍາວ ກ່ຽວກັບເຂດການຄ້າເສລີອາຊີ-ປາຊີຟິກ (FTAAP), ໃຫ້ຄຳໝັ້ນສັນຍາສືບຕໍ່ຊຸກຍູ້ການເຊື່ອມໂຍງດ້ານເສດຖະກິດຢູ່ພາກພື້ນ ໂດຍຜ່ານການເພີ່ມທະວີການຮ່ວມມືດ້ານການສ້າງກຳລັງຄວາມສາມາດ, ການແບ່ງປັນປະສົບການ ແລະ ການຮ່ວມມືດ້ານເຕັກນິກ. ໜຶ່ງໃນບັນດາເນື້ອໃນເປັນໜ້າເອົາໃຈໃສ່ແມ່ນເລື່ອງບັນດາສະມາຊິກ ໄດ້ຮັບຮອງເອົາ “ແຜນການຂອງ APEC ກ່ຽວກັບຂະແໜງບໍລິການທີ່ປ່ຽນແປງໃໝ່, ແກ່ງແຍ້ງ ແລະ ມີຄວາມສາມາດຍອມຮັບ”, ເຊິ່ງໄດ້ກຳນົດທິດພັດທະນາຂະແໜງບໍລິການໃນ 10 ປີຕໍ່ໄປ, ໂດຍສຸມໃສ່ 8 ຂົງເຂດຮ່ວມມືທີ່ຈຸດສຸມ, ຊຸກຍູ້ການປະຕິຮູບ ແລະ ການປ່ຽນແປງໃໝ່ນະໂຍບາຍທີ່ກ່ຽວຂ້ອງເຖິງການຄ້າ ແລະ ການລົງທຶນດ້ານການບໍລິການ. ໃນຂົງເຂດການຄ້າດີຈີຕອນ, ບັນດາຝ່າຍບັນລຸໄດ້ຄວາມກ້າວໜ້າຢ່າງແທດຈິງໃນການປຶກສາຫາລືກ່ຽວກັບຂອບເຂດການຮ່ວມມືຫັນການຄ້າໃນພາກພື້ນເປັນດີຈີຕອນ. ບັນດາພື້ນຖານເສດຖະກິດ ໄດ້ໃຫ້ຄຳໝັ້ນສັນຍາຈະຊຸກຍູ້ການຄ້າແບບບໍ່ມີເຈ້ຍ, ເພີ່ມທະວີການຖ່າຍທອດຂໍ້ມູນຂ້າມຊາຍແດນ ແລະ ເປີດກວ້າງການຮ່ວມມືທີ່ກ່ຽວຂ້ອງເຖິງປັນຍາປະດິດ (AI). ນອກຈາກນັ້ນ, ກອງປະຊຸມຍັງໄດ້ເນັ້ນໜັກເຖິງຄວາມຮຽກຮ້ອງຕ້ອງການຊຸກຍູ້ການຫັນປ່ຽນສີຂຽວ ແລະການພັດທະນາກາກບອນໃນລະດັບຕ່ຳແນໃສ່ຮັບມືກັບສິ່ງທ້າທາຍດ້ານສິ່ງແວດລ້ອມ. ບັນດາສະມາຊິກໄດ້ຮຽກຮ້ອງໃຫ້ຫຼີກລ່ຽງການນຳໃຊ້ມາດຕະການແບບ “ກວາດພຽງ”, ພ້ອມທັງເພີ່ມທະວີການລົງທຶນ ແລະ ຜັນຂະຫຍາຍມາດຕະການທີ່ແທດຈິງກວ່າໃຫ້ແກ່ການພັດທະນາແບບຍືນຍົງຂອງພາກພື້ນອາຊີ-ປາຊີຟິກ.

news to day and hot news