POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 13 ມິຖຸນາ 2026

ພັກ, ລັດ ແລະ ປະຊາຊົນຊາວຫວຽດນາມ ຈັດງານໃຫຍ່ ລະນຶກວັນເກີດປະທານ ໂຮ່ຈີມິນ ຄົບຮອບ 136 ປີ
ເວລາອອກຂ່າວ: 2026-05-28 10:33:18 | ຜູ້ຂຽນ : admin3 | ຈຳນວນຄົນເຂົ້າຊົມ: 258 | ຄວາມນິຍົມ:

ວິທະຍຸກະຈາຍສຽງຫວຽດ ນາມ, ເນື່ອງໃນໂອກາດສະເຫຼີມ ສະຫຼອງ 136 ປີ ແຫ່ງວັນຄ້າຍ ວັນເກີດປະທານ ໂຮ່ຈີມິນ (19/ 05/1890-19/05/2026), ໃນວັນທີ 17 ພຶດສະພາ, ທ່ານ ໂຕເລິມ ເລຂາທິການໃຫຍ່ ພັກກອມມູນິດ, ປະທານປະເທດ ຫວຽດນາມ ໄດ້ມີບົດຂຽນສຳຄັນດ້ວຍຫົວຂໍ້: ແສງສະຫວ່າງ ໂຮ່ຈີມິນ ເຍືອງທາງໃຫ້ພວກເຮົາເດີນ. ບົດຂຽນບໍ່ພຽງແຕ່ ແມ່ນຄຳສະແດງຄວາມຮູ້ບຸນຄຸນ ຢ່າງເລິກເຊິ່ງ ຕໍ່ຄຸນງາມຄວາມດີຂອງ ປະທານ ໂຮ່ຈີມິນ ເທົ່ານັ້ນ, ຫາກຍັງແມ່ນສານການເມືອງ ຢ່າງແຮງກ່ຽວກັບ ການໝູນໃຊ້ແນວຄິດ ໂຮ່ຈີມິນ ຢ່າງມີຫົວຄິດປະດິດສ້າງອີກດ້ວຍ ເພື່ອນຳປະເທດຊາດ ກ້າວເຂົ້າສູ່ສັງກາດໃໝ່ ສັງກາດບຸກບືນຂອງຊາດ ຫວຽດນາມ. ໃນບົດຂຽນ, ທ່ານ ໂຕເລິມ ຊີ້ໃຫ້ເຫັນວ່າ, ວັນທີ 19 ພຶດສະພາ 2026 ແມ່ນວັນສະເຫຼີມສະຫຼອງ 136 ປີແຫ່ງວັນຄ້າຍວັນເກີດປະທານ ໂຮ່ຈີມິນ ຜູ້ຍິ່ງໃຫຍ່ໃນຈຸດເວລາ ທີ່ມີຄວາມໝາຍພິເສດ. ກອງປະຊຸມໃຫຍ່ ຜູ້ແທນທົ່ວປະເທດ ສະໄໝທີ XIV ຂອງພັກໄດ້ປະສົບຜົນສຳເລັດຢ່າງຟົດຟຶ້ນ, ກຳນົດບັນດາການກຳນົດທິດ ຍຸດທະສາດ ນຳປະເທດກ້າວເຂົ້າສູ່ງສັງກາດໃໝ່. ການເລືອກຕັ້ງ ສະມາຊິກສະພາແຫ່ງຊາດ ຊຸດທີ XVI ແລະ ສະພາປະຊາຊົນ ທຸກຂັ້ນອາຍຸການ 2026-2031 ໄດ້ເປີດພາຍພາກໜ້າໃໝ່. ໃນຂະນະທີ່, ລະບົບການເມືອງ ພວມເຄື່ອນໄຫວ ຕາມຮູບແບບຈັດຕັ້ງໃໝ່ເທື່ອລະກ້າວ, ກະທັດຮັດກວ່າ, ລຸ້ລວງກວ່າ, ຮຽກຮ້ອງ ຕ້ອງການປະສິດທິຜົນ, ປະສິດທິຜົນສູງກວ່າ. ທ່ານ ເລຂາທິການໃຫຍ່, ປະທານປະເທດ ຢັ້ງຢືນວ່າ: ກອງປະຊຸມໃຫຍ່ ສະໄໝທີ XIV ຂອງພັກ ແມ່ນຂີດໝາຍສຳຄັນທີ່ສຸດໃນວິວັດແຫ່ງການພັດທະນາ ຂອງປະເທດຊາດ. ບັນດາການກຳນົດທິດ ຍຸດທະສາດ ຂອງກອງປະຊຸມໃຫຍ່ນັ້ນ ແມ່ນການສືບທອດ, ໝູນໃຊ້ ແລະ ພັດທະນາແນວຄິດ ປະທານໂຮ່ຈີມິນ ຢ່າງມີຫົວຄິດປະດິດສ້າງ ໃນເງື່ອນໄຂປະຫວັດສາດໃໝ່. ໃນໂອກາດດຽວກັນ, ສະຖານທູດຫວຽດນາມ ປະຈຳລາວ ກໍໄດ້ຈັດພິທີສະເຫຼີມສະຫຼອງ ເພື່ອລະນຶກ, ສັນລະເສີນ ແລະ ຈົດຈຳບຸນຄຸນ ອັນໃຫຍ່ຫຼວງຂອງປະທານ ໂຮ່ຈີ່ມິນ ທີ່ມີຕໍ່ພາລະກິດປົດປ່ອຍຊາດ, ທ້ອນ ໂຮມປະເທດຊາດ ເປັນເອກະພາບ ເນື່ອງໃນໂອກາດສະເຫຼີມສະຫຼອງ ວັນເກີດ ປະທານ ໂຮ່ຈີ່ມິງ ຄົບ ຮອບ 136 ປີ, ໃນວັນທີ 19 ພຶດສະພາ 2026 ໂດຍມີ ທ່ານ ຫງວຽນ ມິງ ເຕີມ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສສ ຫວຽດນາມ ປະຈຳລາວ, ມີການນຳພັກ-ລັດບັນດາກະຊວງ, ສິລະປິນແຫ່ງຊາດລາວ, ຜູ້ຕາງໜ້າບັນດາອົງການສື່ມວນຊົນລາວ, ຄູ-ອາຈານ, ນັກສຶກສາຫວຽດນາມ, ຜູ້ຕາງໜ້າຊາວຫວຽດ ນາມ ແລະ ວິສາຫະ ກິດຫວຽດນາມ ປະຈຳ ລາວ ເຂົ້າຮ່ວມ. ໃນພິທີ ໄດ້ຮັບຊົມການສາຍຮູບເງົາສາລະຄະດີກ່ຽວກັບ ປະທານ ໂຮ່ຈີ່ມິນ ເປັນຕົ້ນ ຊີວິດ ແລະ ພາລະກິດການເຄື່ອນໄຫວປະຕິວັດ ຂອງ ປະທານ ໂຮ່ຈີ່ມິງ ໃນໄລຍະຜ່ານມາ ແລະ ວາງສະແດງຮູບພາບການເຄື່ອນ ໄຫວວຽກງານດ້ານຕ່າງໆ, ອ່ານບົດກອນ ແລະ ເລົ່າເລື່ອງ ກ່ຽວກັບ ປະທານ ໂຮ່ຈີ່ມິງ (ສະແດງໂດຍນ້ອງນັກຮຽນຈາກໂຮງ ຮຽນສອງພາສາ ລາວ-ຫວຽດ ນາມ ຫງວຽນຢູ), ພ້ອມທັງເປີດການສ້າງຕັ້ງຕູ້ປຶ້ມ ຢູ່ສຳນັກງານອົງການຕົວແທນ ຫວຽດນາມ ປະຈຳ ລາວ ແລະ ມອບປື້ມກ່ຽວກັບ ປະທານ ໂຮ່ຈີ່ມິນ ໃຫ້ແກ່ຕູ້ປຶ້ມຂອງບັນດາອົງການຕົວແທນ ແລະ ຊາວຫວຽດນາມຢູ່ລາວ. ໂອກາດດັ່ງກ່າວ, ທ່ານ ຫງວຽນ ມິງເຕີມ ໄດ້ຍົກໃຫ້ເຫັນປະຫວັດແຫ່ງການເຄື່ອນໄຫວປະຕິວັດ ແລະ ແນວຄວາມຄິດ, ແບບແຜນວິທີການເຮັດວຽກ ຂອງປະທານ ໂຮ່ຈີ່ມິນ ຊຶ່ງ ປະທານ ໂຮ່ຈີ່ມິນ ບໍ່ພຽງແຕ່ເປັນຜູ້ນຳພາຕໍ່ສູ່ກູ້ຊາດ ແລະ ການປົດປ່ອຍປະເທດຊາດ ເທົ່ານັ້ນ, ແຕ່ຍັງເປັນຜູ້ທີ່ວາງພື້ນຖານອຸດົມການຂອງການກໍ່ສ້າງ, ປົກປ້ອງ ແລະ ພັດທະນາຫວຽດນາມ ໃນຍຸກໃໝ່. “ເມື່ອກ້າວເຂົ້າສູ່ສັງກາດໃໝ່, ຄຳຮຽກຮ້ອງຕ້ອງການພັດທະນາຢ່າງວ່ອງໄວ ແລະ ຍືນຍົງຂອງປະເທດຊາດ ຮຽກຮ້ອງທຸກຂະແໜງການ ຕ້ອງມານະພະຍາຍາມຫຼາຍກວ່າອີກ, ມີການກະທຳຢ່າງເຂັ້ມແຂງກວ່າ, ບຸກທະລຸຢ່າງຈະແຈ້ງກວ່າ ເພື່ອໃຫ້ສົມກັບຂອບຂະໜາດ ແລະ ພາລະກຳຂອງຊາດ. ພັກເຮົາ ໄດ້ກ່າວເຕືອນເປັນຫຼາຍຄັ້ງແລ້ວວ່າ, ຫຼ້າຫຼັງ ແມ່ນຄວາມສ່ຽງປົກຄຸມ ແລະ ນາບຂູ່ເຖິງຊະຕາກຳ ແລະ ອະນາຄົດຂອງຊາດ. ຫຼ້າຫຼັງໃນລະດັບການພັດທະນາໄດ້ເລີ່ມຈາກການຫຼ້າຫຼັງກ່ຽວກັບວິທະຍາສາດ, ເຕັກໂນໂລຊີ, ນະວັດຕະກຳ, ກ່ຽວກັບລະດັບພູມປັນຍາໃນການຜະລິດ, ການບໍລິການ ແລະ ການຄຸ້ມຄອງບໍລິຫານປະເທດຊາດ. ໃນຍຸກສະໄໝເຫັນເປັນໂລກາພິວັດ ແລະ ການປະຕິວັດເຕັກໂນໂລຊີພັດທະນາຢ່າງໄວວາ ແລະ ແຂງແຮງຄືໃນປັດຈຸບັນ, ຫຼ້າຫຼັງ ມີຄວາມໝາຍອັນດຽວກັນກັບການເອືອຍອີງ, ຊຸດໂຊມ ແລະ ເຮັດເສຍໂອກາດບືນຕົວຂຶ້ນ”. ຖັດຈາກນັ້ນ, ທ່ານ ດວງມີໄຊ ລີໄກຍາ ສິລະປິນແຫ່ງຊາດລາວ ໄດ້ຂຶ້ນແບ່ງປັນຄວາມຮູ້ສຶກ ແລະ ຄວາມຮັກແພງຂອງປະຊາຊົນລາວ ທີ່ມີຕໍ່ຊີວິດ ແລະ ຄຸນສົມບັດສິນທຳປະຕິວັດຂອງ ປະທານ ໂຮ່ຈີ່ມິນ, ບົດຮຽນ ແລະ ຊີວິດໃນການເຄື່ອນໄຫວເປັນນັກປະຕິວັດທີ່ຍິ່ງໃຫຍ່, ຄວນຖືເອົາເປັນແບບຢ່າງ, ເປັນຄັນທຸງເອກຜືນໃຫຍ່ທີ່ໃຫ້ຮົ່ມເງົາແກ່ແນວ ທາງການກ້າວເດີນຂອງຄົນຮຸ່ນຫຼັງຂອງພັກ, ລັດ ແລະ ປະຊາຊົນຊາວຫວຽດນາມ ນຳມາໝູນໃຊ້ເຂົ້າໃນການພັດທະນາສ້າງສາປະເທດຊາດບ້ານເມືອງ ຈົນຈະເລີນຮຸ່ງເຮືອງເຖິງທຸກວັນນີ້.

news to day and hot news