POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນເສົາ, ວັນທີ 13 ມິຖຸນາ 2026

ບໍລິສັດເບຍລາວ ທຸ່ມເງິນຫຼາຍກວ່າ 1,4 ຕື້ກີບ ເຂົ້າໃນການພັດທະນາຊັບພະຍາກອນມະນຸດ ຜ່ານໂຄງການ “ເບຍລາວ ສານຝັນໃຫ້ນ້ອງ”
ເວລາອອກຂ່າວ: 2026-05-28 10:22:28 | ຜູ້ຂຽນ : admin3 | ຈຳນວນຄົນເຂົ້າຊົມ: 260 | ຄວາມນິຍົມ:

ການສຶກສາແມ່ນໝາກຫົວໃຈຫຼັກຂອງການພັດທະນາປະເທດຊາດ ເພາະເປັນພື້ນຖານໃນການສ້າງຊັບພະຍາກອນມະນຸດ ໃຫ້ມີສະຕິປັນຍາ, ທັກສະ, ຄວາມຮູ້ ຄວາມສາມາດ ເພື່ອຊ່ວຍຂັບເຄື່ອນເສດຖະກິດ, ຄິດຄົ້ນນະວັດຕະກຳໃໝ່ໆ, ແລະ ແກ້ໄຂບັນຫາຂອງສັງຄົມຢ່າງຍືນຍົງ. ດັ່ງນັ້ນ ບໍລິສັດ ເບຍລາວ ຈຳກັດ ຈຶ່ງຍັງຄົງຢຶດໝັ້ນໃນການເປັນສ່ວນໜຶ່ງຂອງການພັດທະນາຊັບພະຍາ ກອນມະນຸດ ເພື່ອຮ່ວມສະໜັບສະໜູນ ແລະ ປະກອບສ່ວນເຂົ້າໃນການຂັບເຄື່ອນເສດຖະກິດ-ສັງຄົມລາວ ໃຫ້ເຕີບໂຕຢ່າງໝັ້ນຄົງ. ໜຶ່ງໃນໂຄງການບູລິມະສິດທີ່ສະທ້ອນເຖິງຄວາມມຸ່ງໝັ້ນດັ່ງກ່າວຄື ໂຄງການ “ເບຍລາວ ສານຝັນໃຫ້ນ້ອງ” ເຊິ່ງໄດ້ລິເລີ່ມຈັດຕັ້ງປະຕິບັດມາຕັ້ງແຕ່ປີ 2010. ໃນປີນີ້, ຖືເປັນປີທີ 15 ທີ່ໂຄງການໄດ້ເປັນກຳລັງສຳຄັນໃນການສົ່ງເສີມການສຶກສາ ແລະ ພັດທະນາຊັບພະຍາກອນມະນຸດຂອງ ສປປ ລາວ ໃຫ້ມີຄວາມຮູ້ ຄວາມສາມາດ, ທັກສະທີ່ເຂັ້ມແຂງ ແລະ ຍືນຍົງ. ນັບຕັ້ງແຕ່ລິເລີ່ມໂຄງການເປັນຕົ້ນມາ, ບໍລິສັດ ເບຍລາວ ຈຳກັດ ໄດ້ປະກອບສ່ວນງົບປະມານເຂົ້າໃນວຽກງານການສຶກສາມາແລ້ວຫຼາຍກວ່າ 13 ຕື້ກີບ, ເຊິ່ງສາມາດສ້າງໂອກາດໃຫ້ແກ່ນັກສຶກສາໄປແລ້ວ 3,874 ຄົນ. ສຳລັບປີ 2026 ນີ້, ບໍລິສັດໄດ້ສືບຕໍ່ມອບທຶນການສຶກສາລວມມູນຄ່າກວ່າ 1.4 ຕື້ກີບ ໃຫ້ແກ່ນັກສຶກສາຈຳນວນ 150 ຄົນ ທີ່ມີຜົນການຮຽນດີເດັ່ນ ແຕ່ຂາດເຂີນທຶນຮອນ ໃນ 4 ມະຫາວິທະຍາໄລ ແລະ 4 ສະຖາບັນການສຶກສາຫຼັກ ທົ່ວປະເທດ ເຊັ່ນ: ມະຫາວິທະຍາໄລແຫ່ງຊາດ, ມະຫາວິທະຍາໄລສຸພານຸວົງ, ມະຫາວິທະຍາໄລສະຫວັນນະເຂດ ແລະ ມະຫາວິທະຍາໄລຈຳປາສັກ, ວິ ທະຍາໄລຄູປາກເຊ, ວິທະຍາໄລຄູສະຫວັນນະເຂດ, ສະຖາບັນວິຈິດສິນແຫ່ງຊາດ ແລະ ວິທະຍາໄລເຕັກນິກ ລາວ-ເຢຍລະມັນ. ນັກສຶກສາທີ່ຜ່ານການຄັດເລືອກ ແລະ ສາມາດຮັກສາຜົນການຮຽນຕາມເງື່ອນໄຂຈະໄດ້ຮັບທຶນສະໜັບສະໜູນຈາກໂຄງການ “ເບຍລາວ ສານຝັນ ໃຫ້ນ້ອງ” ທີ່ກວມເອົາຄ່າທຳນຽມການຮຽນ, ອຸປະກອນການສຶກສາ ແລະ ຄ່າຄອງຊີບຈົນຈົບສົກການສຶກສາ. ນອກຈາກການຊ່ວຍເຫຼືອດ້ານທຶນຮອນແລ້ວ, ນັກສຶກສາຍັງຈະໄດ້ຮັບໂອກາດໃນການຝຶກງານຕາມສາຂາວິຊາທີ່ກ່ຽວຂ້ອງ ແລະ ໂອກາດໄດ້ຮັບການຈ້າງງານທີ່ດີໃນອະນາຄົດ. ສຳລັບຂັ້ນຕອນການຄັດເລືອກ, ໂຄງການໄດ້ເປີດໂອກາດໃຫ້ຜູ້ທີ່ສົນໃຈສາມາດສະໝັກໄດ້ດ້ວຍຕົນເອງ, ໂດຍບໍ່ໄດ້ຈຳແນກເພດ, ເຊື້ອຊາດ, ສາດສະໜາ ແລະ ພູມລຳເນົາ ເຊິ່ງຈະມີການຄັດເລືອກເອກະສານ ແລະ ການສຳພາດຢ່າງເປັນລະບົບ ແລະ ສະເໝີພາບ ຕາມເງື່ອນໄຂຂອງບໍລິສັດ. ຕະຫຼອດໄລຍະ 15 ປີ ທີ່ຜ່ານມາ, ບໍລິສັດ ເບຍລາວ ຈຳກັດ ໄດ້ໃຫ້ຄວາມສຳຄັນສູງສຸດຕໍ່ກັບວຽກງານການສຶກສາ ແລະ ການພັດທະນາຊັບພະຍາກອນມະນຸດ ຄຽງຄູ່ກັບວຽກງານເຄື່ອນໄຫວທາງສັງຄົມ. ບໍລິສັດ ມີຄວາມຫວັງຢ່າງຍິ່ງວ່າ ນັກສຶກສາທີ່ໄດ້ຮັບທຶນການສຶກສາດັ່ງກ່າວ ຈະກາຍເປັນບຸກຄະລາກອນທີ່ມີຄຸນນະພາບ ແລະ ເປັນກຳລັງສຳຄັນໃນການພັດທະນາປະເທດຊາດໃຫ້ຈະເລີນຮຸ່ງເຮືອງ. ເພາະພວກເຮົາເຊື່ອວ່າ “ການສຶກສາທີ່ດີ ຄືເສົາຄ້ຳທີ່ແຂງແກ່ນໃຫ້ແກ່ການພັດທະນາໃນອະນາຄົດ”. ທ່ານ ເຮັນຣິກ ແອນເດີເຊິນ ຜູ້ອຳນວຍການໃຫຍ່ ບໍລິສັດ ເບຍລາວ ຈຳກັດ ກ່າວວ່າ: “ຜ່ານໂຄງການ “ເບຍລາວ ສານຝັນໃຫ້ນ້ອງ”, ພວກເຮົາມີຄວາມພາກພູມໃຈທີ່ໄດ້ສືບຕໍ່ຄວາມມຸ່ງໝັ້ນໃນການປະກອບສ່ວນຊ່ວຍເຫຼືອສັງຄົມລາວ ເຊິ່ງຖືເປັນສ່ວນໜຶ່ງໃນຄວາມຮັບຜິດຊອບຂອງບໍລິສັດ. ພວກເຮົາມີຄວາມເຊື່ອວ່າ ການສຶກສາແມ່ນຮາກຖານທີ່ແຂງແກ່ນທີ່ສຸດໃນການສ້າງໂອກາດ, ການເສີມສ້າງທ່າແຮງໃຫ້ແກ່ເຍົາວະຊົນ ແລະ ການວາງຮາກຖານເພື່ອອະນາຄົດທີ່ສົດໃສຂອງ ສປປ ລາວ. ໂຄງການນີ້ ໄດ້ຖືກອອກແບບມາເປັນພິເສດ ເພື່ອສະໜັບສະໜູນນັກສຶກສາທີ່ມີຜົນການຮຽນດີເດັ່ນ ແຕ່ຂາດເຂີນດ້ານທຶນຮອນ ເພື່ອໃຫ້ພວກເຂົາສາມາດເຂົ້າເຖິງການຮຽນຮູ້ຢ່າງຕໍ່ເນື່ອງ ແລະ ກ້າວຕາມຄວາມຝັນຂອງຕົນເອງໄດ້ຢ່າງໝັ້ນໃຈ. ຜ່ານການຈັດຕັ້ງປະຕິບັດໂຄງການໃນຂອບເຂດທົ່ວປະເທດ, ພວກເຮົາມີຄວາມພາກພູມໃຈທີ່ໄດ້ໃຫ້ການຊ່ວຍເຫຼືອນັກສຶກສາ ທີ່ຄວບຄຸມທັງ 3 ພາກ ຄື: ພາກເໜືອ, ພາກກາງ ແລະ ພາກໃຕ້ ເພື່ອຮັບປະກັນວ່າຊາວໜຸ່ມຈາກທົ່ວປະເທດ ຈະສາມາດເຂົ້າເຖິງໂອກາດທາງການສຶກສາ ແລະ ມີອະນາຄົດທີ່ດີຂຶ້ນ. ພວກເຮົາຫວັງວ່າ ການສະໜັບສະໜູນໃນຄັ້ງນີ້ ຈະເປັນການເປີດປະຕູສູ່ໂອກາດທີ່ດີ ແລະ ສ້າງການປ່ຽນແປງໃນທາງບວກໃຫ້ແກ່ຊີວິດຂອງເຂົາເຈົ້າ. ເຊື່ອວ່າ: ນັກສຶກສາເຫຼົ່ານີ້ລ້ວນແຕ່ມີທ່າແຮງອັນສຳຄັນ ແລະ ຈະເຕີບໃຫຍ່ກາຍເປັນບຸກຄະ ລາກອນທີ່ມີຄຸນນະພາບ, ສາມາດສ້າງປະໂຫຍດໃຫ້ແກ່ຊຸມຊົນ ແລະ ຮ່ວມເປັນສ່ວນໜຶ່ງໃນການພັດທະນາ ປະເທດຊາດ ໃຫ້ຈະເລີນຮຸ່ງເຮືອງໃນອະນາຄົດ.”

news to day and hot news