ວັນຈັນ, ວັນທີ 08 ມິຖຸນາ 2026
ກອງປະຊຸມ ກະກຽມຈັດຕັ້ງເຝິກອົບຮົມ "ຕີພິເສດໃຕ້ຝຸ່ນ 2026" ແລະ ຊ້ອມຮົບຮ່ວມ ລາວ-ຣັດເຊຍ "ລາໂຣສ 2026"
ເວລາອອກຂ່າວ: 2026-05-11 10:02:53 | ຜູ້ຂຽນ : admin3 | ຈຳນວນຄົນເຂົ້າຊົມ: 122 | ຄວາມນິຍົມ: 
ວັນທີ 30 ເມສາ 2026, ກົມອົບຮົມ ກົມໃຫຍ່ເສນາທິການກອງທັບ ໄດ້ຈັດກອງປະຊຸມກະກຽມຈັດຕັ້ງເຝິກອົບຮົມ "ຕີພິເສດໃຕ້ຝຸ່ນ 2026" ແລະ ຊ້ອມຮົບຮ່ວມ ລາວ-ຣັດເຊຍ "ລາໂຣສ 2026" ຢູ່ ວິທະຍາຄານ ນາຍທະຫານບົກ ກົມມະດຳ(ວນກ), ໂດຍການເປັນປະທານຂອງ ສະຫາຍ ພັນເອກ ຄຳຜາຍ ອ້ວນວິໄລ ຫົວໜ້າກົມອົບຮົມ, ມີບັນດາອະນຸກຳມະການ, ກົມ, ຫ້ອງ ແລະ ພະແນກການທີ່ກ່ຽວຂ້ອງ ເຂົ້າຮ່ວມ.
ສະຫາຍ ພັນໂທ ອະນຸສິດ ຊຸວົງສະຫວັດ ຮອງຫົວໜ້າພະແນກຍຸດທະວິທີ ກົມອົບຮົມ ກົມໃຫຍ່ເສນາທິການກອງທັບ ໄດ້ສະເໜີຜ່ານເນື້ອໃນແຜນການ
ຈັດຕັ້ງປະຕິບັດ ຕໍ່ກອງປະຊຸມໃນກະກຽມຈັດຕັ້ງເຝິກອົບຮົມ "ຕີພິເສດໃຕ້ຝຸ່ນ 2026" ແລະ ຊ້ອມຮົບຮ່ວມ ລາວ-ຣັດເຊຍ "ລາໂຣສ 2026" ຢູ່ ວນກ ທີ່ຈະໄດ້ຈັດຂຶ້ນໃນມໍ່ໆນີ້ ໄດ້ໃຫ້ຮູ້ວ່າ: ການຊ້ອມຮົບດັ່ງກ່າວແມ່ນຈະເລີ່ມຕັ້ງແຕ່ 13 ພຶດສະພາ 2026-13 ມິຖຸນາ 2026 ເປັນເວລາໜຶ່ງເດືອນ ຈຶ່ງຈະສິ້ນສຸດແຜນການຊ້ອມຮົບຮ່ວມກັນ ລະຫວ່າງ ລາວ-ຣັດເຊຍ, ເຊິ່ງໃນການເຝິກຊ້ອມຈະໄດ້ແລກປ່ຽນບົດຮຽນທາງດ້ານການທະຫານ ລະຫວ່າງ ກອງທັບປະຊາຊົນລາວ ກັບ ກອງທັບສະຫະພັນຣັດເຊຍໃນແຕ່ລະຄັ້ງ ນັບວ່າເປັນໂອກາດດີໃຫ້ສອງກອງ
ທັບ ໄດ້ຮ່ວມກັນເຝິກແອບ ແລະ ຖອດຖອນບົດຮຽນນຳກັນ; ທັງນີ້, ກອງປະຊຸມ ຍັງໄດ້ຄົ້ນຄວ້າຈັດຕັ້ງກຳລັງ ກະກຽມພາຫະນະ ເພື່ອຮັບປະກັນໃຫ້ແກ່ການຊ້ອມ
ຮົບໃນຄັ້ງນີ້ ໃຫ້ສຳເລັດຕາມແຜນການທີ່ຂອງຂັ້ນເທິງກຳນົດໄວ້, ທັງສ້າງແຜນການ ຊີ້ນຳການຈັດຕັ້ງອົບຮົມ-ຫັດແອບຢູ່ພາຍໃນກົມກອງເພື່ອໃຫ້ ພະນັກງານ-ນັກຮົບ ຜູ້ທີ່ຈະເຂົ້າຮ່ວມຊ້ອມຮົບຄັ້ງນີ້ ໃຫ້ມີຄວາມຊຳນານຄ່ອງແຄ້ວໃນການນຳໃຊ້ພາຫະນະ-ອາວຸດຍຸດໂທປະກອນຂອງລົດ, ອົບຮົມທາງດ້ານສິລະປະຍຸດ, ຍຸດທະວິທີ, ການນຳໃຊ້ອາວຸດຂອງລົດຕັງ ເພື່ອຮັບປະກັນທາງດ້ານກຳລັງພົນ, ພາຫະນະອາວຸດຍຸດໂທປະກອນ, ຮັກສາໄດ້ກົດລະບຽບຂອງສະໜາມ ແລະ ຮັບປະກັນຄວາມປອດໄພ.
ສະຫາຍ ພັນເອກ ຄຳຜາຍ ອ້ວນວິໄລ ໄດ້ຮຽກຮ້ອງໃຫ້ທຸກພາກສ່ວນທີ່ກ່ຽວຂ້ອງ ເອົາໃຈໃສ່ຮັບຜິດຊອບວຽກງານກະກຽມໃຫ້ສຳເລັດ ມີຄວາມພ້ອມສຳລັບການເຝິກອົບຮົມ-ຫັດແອບ ບໍ່ວ່າຈະເປັນທາງດ້ານສະໜາມ, ລົດ, ລວມຮອດວັດຖຸຮັບໃຊ້ຕ່າງໆ, ກຳລັງຄົນໃຫ້ຄົບຖ້ວນ ເພື່ອຕອບສະໜອງໃຫ້ໄດ້ກັບຄວາມຮຽກຮ້ອງຕ້ອງການໃນໜ້າວຽກຕົວຈິງ ໃນຕໍ່ໜ້າ ຈຶ່ງຈະສາມາດກຳແໜ້ນໄດ້ຍຸດທະວິທີສູ້ຮົບ, ທິດສະດີຫຼັກການ ເພື່ອໃຫ້ມີຄວາມຊຳນິຊຳນານໃນການຂັບຂີ່, ການນຳໃຊ້ປືນຊະນິດຕ່າງໆໄດ້ຢ່າງແມ່ນຢຳ ໃຫ້ເຂັ້ມແຂງທາງດ້ານລະບຽບແບບແຜນ ແລະ ມີຄວາມທັນສະໄໝຂຶ້ນຢ່າງບໍ່ຢຸດຢັ້ງ.
ໂດຍ : ນາງ ບຸນເກີດ ຈັນທະວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
