ວັນຈັນ, ວັນທີ 18 ພຶດສະພາ 2026
ການເຄື່ອນໄຫວກວດກາລາດຕະເວນເສັ້ນຊາຍແດນຮ່ວມກັນ 2 ຝ່າຍ ລາວ-ຫວຽດນາມ
ເວລາອອກຂ່າວ: 2026-04-06 08:58:55 | ຜູ້ຂຽນ : admin1 | ຈຳນວນຄົນເຂົ້າຊົມ: 130 | ຄວາມນິຍົມ: 
ໃນວັນທີ 26 ມີນາ 2026, ກອງຮ້ອຍທະຫານຊາຍແດນ 119 ກອງບັນຊາການທະຫານແຂວງຜົ້ງສາລີ ແຫ່ງ ສປປ ລາວ ແລະ ຄ້າຍທະຫານຊາຍແດນ 423 ແທ່ງລວງ ກອງບັນຊາການທະຫານແຂວງດຽນບຽນແຫ່ງ ສສ ຫວຽດນາມ ໄດ້ຮ່ວມກັນ ຈາລຶກບາດກ້າວແຫ່ງປະຫວັດ ສາດດ້ວຍການເຄື່ອນໄຫວກວດ ກາລາດຕະເວນຮ່ວມສອງຝ່າຍ, ເຊິ່ງ ຝ່າຍລາວ ນຳໂດຍ ສະຫາຍ ຮ້ອຍເອກ ວົງເພັດ ສູນວິເລີດ ຫົວໜ້າການທະຫານກອງຮ້ອຍ 119 ພ້ອມດ້ວຍຄະນະ ແລະ ຝ່າຍຫວຽດນາມ ນຳໂດຍ ສະຫາຍ ພັນໂທ ຫງວຽນວັນດ້າຍ ຫົວໜ້າການທະຫານ ຄ້າຍທະຫານຊາຍແດນ 423 ແທ່ງລວງ ພ້ອມດ້ວຍຄະນະ.
ສອງຝ່າຍໄດ້ຮ່ວມກັນດຳເນີນການກວດກາລະບົບຊາຍແດນ, ຫຼັກໝາຍຊາຍແດນ ແລະ ເສັ້ນຊາຍແດນ ໃນພາລະກິດປົກປັກຮັກສາຜືນແຜ່ນດິນໄວ້ໃຫ້ໝັ້ນຄົງຕະຫຼອດໄປ, ການເຄື່ອນໄຫວກວດກາລາດ ຕະເວນຄັ້ງນີ້ ບໍ່ພຽງແຕ່ເປັນການປະຕິບັດໜ້າທີ່ຕາມລະບຽບການເທົ່ານັ້ນແຕ່ມັນຄືການຢືນຢັນເຖິງ “ສາຍພົວພັນມິດຕະພາບອັນຍິ່ງໃຫຍ່ ແລະ ຄວາມສາມັກ ຄີຮັກແພງແບບພິເສດ, ເພື່ອກວດ
ກາລະບົບຫຼັກໝາຍຊາຍແດນໃຫ້ມີຄວາມໝັ້ນຄົງ”. ຜົນການກວດກາພົບວ່າ ທຸກຫຼັກໝາຍຍັງຄົງຕັ້ງເດັ່ນສະຫງ່າ, ບໍ່ມີການລ່ວງລະເມີດອະທິປະໄຕໃດໆ, ສ່ອງແສງໃຫ້ເຫັນເຖິງຄວາມສັກສິດຂອງກົດໝາຍ ແລະ ຄວາມໄວ້ເນື້ອເຊື່ອໃຈຢ່າງສູງຈາກພັກ-ລັດຂອງສອງປະເທດ; ນອກຈາກວຽກງານປ້ອງກັນຊາດແລ້ວ ສອງກຳລັງຍັງໄດ້ລົງໃກ້ຊິດຕິດແທດກັບພໍ່ແມ່ປະຊາຊົນ ບ້ານຢາຟູ ແລະ ບ້ານຫ້ວຍແວ່ນ ເພື່ອໂຄສະນາສຶກສາອົບຮົມໃຫ້ເຂົ້າໃຈເຖິງການຮັກສາປ່າໄມ້ ແລະ ການປະຕິບັດຕາມລະບຽບຊາຍແດນຢ່າງເຂັ້ມງວດ. ສິ່ງທີ່ຖອດຖອນໄດ້ບໍ່ແມ່ນພຽງແຕ່ຜົນສຳເລັດຂອງໜ້າທີ່, ແຕ່ແມ່ນການ “ເຂົ້າສູ່ລວງເລິກ” ຂອງສາຍພົວພັນ ລາວ-ຫວຽດນາມ ທີ່ນັບມື້ນັບແໜ້ນແກ່ນດັ່ງສາຍພູຫຼວງ.
ໂອກາດດຽວກັນນີ້, ສອງຝ່າຍ ຍັງໄດ້ຈັບມືກັນຢ່າງແໜ້ນແຟ້ນ ພ້ອມທັງ ເອກະພາບກັນວ່າ ໃນຕໍ່ໜ້າຈະເພີ່ມທະວີການແລກປ່ຽນຂໍ້ມູນຂ່າວສານ ແລະ ຈະຜັດປ່ຽນກັນເປັນເຈົ້າພາບໃນການລາດຕະເວນຄັ້ງຕໍ່ໄປ ເພື່ອໃຫ້ວຽກງານຊາຍແດນ ຜົ້ງສາລີ-ດຽນບຽນ ເປັນສັນຍະລັກແຫ່ງສັນຕິພາບ ແລະ ມິດຕະພາບຕະຫຼອດກາລະນານ.
ໂດຍ: ນາງ ສຸນາລີ ອຸ່ນວີໄຊ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
