ວັນຈັນ, ວັນທີ 11 ພຶດສະພາ 2026
41 ປີແຫ່ງການກຳເນີດ ແລະ ເຮັດສຳເລັດໜ້າທີ່ການເມືອງ ຂອງກອງພົນທີ 1
ເວລາອອກຂ່າວ: 2026-02-18 10:05:34 | ຜູ້ຂຽນ : admin1 | ຈຳນວນຄົນເຂົ້າຊົມ: 2291 | ຄວາມນິຍົມ: 
ກ່ອນໜ້ານີ້ 41 ປີ, ໂດຍຕອບສະໜອງກັບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ຂອງການປະຕິວັດ, ການປັບປຸງກໍ່ສ້າງກອງທັບໃຫ້ເຕີບໃຫຍ່ເຂັ້ມແຂງເທື່ອລະກ້າວ, ດັ່ງນັ້ນກອງພົນທີ 1 ໄດ້ຮັບການສ້າງຕັ້ງຢ່າງເປັນທາງການ ໃນວັນທີ 12 ກຸມພາ 1985, ການກຳເນີດເກີດຂຶ້ນຂອງກອງພົນທີ 1 ເປັນເຫດການ-ການເມືອງຄັ້ງປະຫວັດສາດຂອງຊາດ, ຂອງກອງທັບເຮົາ, ແມ່ນຂີດໝາຍອັນສຳຄັນຍິ່ງທີ່ສ່ອງແສງໃຫ້ເຫັນການເຕີບໃຫຍ່ຂະຫຍາຍຕົວ ແລະ ເຂັ້ມແຂງຂອງກອງທັບປະຊາຊົນລາວ, ພາຍຫຼັງໄດ້ຮັບການສ້າງຕັ້ງຂຶ້ນກອງພົນທີ 1 ກໍໄດ້ຮັບມອບໝາຍໜ້າທີ່ປົກປັກຮັກສານະຄອນຫຼວງວຽງຈັນ, ລົງກໍ່ສ້າງຮາກຖານການເມືອງ ແລະ ສົມທົບ, ກັບກຳລັງທ້ອງຖິ່ນລຸກຮື້ກຸ່ມກໍ່ກະບົດຢູ່ນະຄອນຫຼວງວຽງຈັນ, ກວດລ້າງກຸ່ມກອງປຸນຢູ່ແຂວງວຽງຈັນ, ເຂດພິເສດໄຊສົມ
ບູນ ແລະ ບ່ອນອຶ່ນໆ, ພ້ອມກັນນັ້ນກໍ່ໄດ້ປັບປຸງກໍ່ສ້າງກຳລັງໃຫ້ເຕີບໃຫຍ່ເຂັ້ມແຂງ ແລະ ເພີ່ມພູນຜະລິດຜົນແກ້ໄຂຊີວິດການເປັນຢູ່ຂອງພະນັກງານ - ນັກຮົບໃນກົມກອງໃຫ້ນັບມື້ດີຂຶ້ນ.
ສະຫາຍ ພັນເອກ ຄຳຊາວ ລິນທະກຸນແກ້ວ ຫົວໜ້າການທະຫານກອງພົນທີ 1 ໃຫ້ຮູ້ວ່າ: ການກຳເນີດເຕີບໃຫຍ່ຂະຫຍາຍຕົວ ແລະ ສູ້ຮົບມີໄຊຂອງກອງພົນທີ 1 ໄດ້ແບ່ງອອກເປັນຫຼາຍໄລຍະ, ພົ້ນເດັ່ນກວ່າໝູ່ແມ່ນການເຂົ້າຮ່ວມບັ້ນຮົບ, ຢູ່ຕາແສງນາບໍ່ນ້ອຍ, ເມືອງບໍ່ແຕນ, ແຂວງໄຊຍະບູລີ ເປັນເວລາ 68 ວັນຄືນ, ຕະຫຼອດໄລຍະເວລາ ດັ່ງກ່າວ, ສາມາດຮັກສາ ແລະ ເສີມຂະຫຍາຍມູນເຊື້ອສູ້ຮົບຢ່າງພິລະອາດຫານ, ອົງອາດກ້າແກ່ນ, ໃນນີ້ສູ້ຮົບທັງໝົດ 29 ຄັ້ງ, ຂ້າສັດຕູຕາຍ 182 ບັກ, ບາດເຈັບ 386 ບັກ, ປັດເຂ່ຍສັດຕູອອກຈາກວົງສູ້ຮົບ 568 ບັກ, ຢຶດອາວຸດໄດ້ທັງໝົດ 56 ກະບອກ, ຢຶດສະໜາມປືນໃຫຍ່ 106 ມມ ໄດ້ 1 ສະໜາມ, ຢຶດ ແລະ ກູ້ມິນໄດ້ 113 ໜ່ວຍ, ຈັກຕິດຕໍ່ສື່ສານ 3 ເຄື່ອງ, ແຜນທີ່ການທະຫານ 1 ຊຸດ ພ້ອມກະສູນຈຳນວນໜຶ່ງ, ຜ່ານການສູ້ຮົບຢູ່ບັ້ນຮົບບໍ່ແຕນໄດ້ມີບັນດາກົມກອງລວມໝູ່ ແລະ ບຸກຄົນ ໄດ້ຮັບການຍ້ອງຍໍສັນລະ
ເສີນຈາກພັກ-ລັດ ຢ່າງສົມກຽດ, ໃນນີ້ກອງພົນໄດ້ຮັບນາມມະຍົດເປັນກອງພິລະອາດຫານມີ 1 ກອງພັນນອ້ຍ ແລະ 4 ກອງຮ້ອຍໄດ້ຮັບນາມມະຍົດເປັນກອງວິລະຊົນ, 3 ສະຫາຍ ໄດ້ຮັບນາມມະຍົດເປັນວິລະຊົນແຫ່ງຊາດ ແລະ ມີ 11 ສະຫາຍ ໄດ້ຮັບນາມມະຍົດເປັນນັກຮົບແຂ່ງຂັນ, ນອກນັ້ນຍັງໄດ້ຮັບຫຼຽນໄຊພິລະອາດຫານ, ໃບຍ້ອງຍໍປະເພດຕ່າງໆຈຳນວນຫຼວງຫຼາຍ, ພ້ອມກັນນັ້ນກອງພົນທີ 1 ຍັງໄດ້ຊີ້ນຳບັນດາກົມກອງເຄື່ອນໄຫວກວາດລ້າງກຸ່ມຄົນບໍ່ດີ, ຈັດຕັ້ງປະຈຳການກຽມພ້ອມສູ້ຮົບ ເພື່ອຕອບຕ້ານທຸກກົນອຸບາຍມ້າງເພຂອງສັດຕູໃນທຸກສະພາບການ, ສະແດງອອກໃນໄລຍະປີ 2006-2010 ໄດ້ເຄື່ອນໄຫວທັງໝົດ 258 ຄັ້ງ, ຕີສັດຕູ 46 ຄັ້ງ, ຂ້າຕາຍ 129 ຄົນ, ຍຶດອາວຸດໄດ້ 17 ກະບອກ, ເຈັບ 5 ຄົນ ແລະ ເຄື່ອງສິນເສິກອີກຈຳນວນໜຶ່ງ, ພ້ອມທັງຂົນຂວາຍເອົາພາກສ່ວນທີ່ເລື່ອນລ່ອຍຢູ່ປາອອກມາເປັນພົນລະເມືອງດີ ຈຳນວນ 151 ຄົນ.
ໄປຄຽງຄູ່ກັບວຽກງານເຄື່ອນໄຫວເຮັດໃຫ້ສະພາບມີຄວາມສະຫງົບ ກອງພົນທີ 1 ໄດ້ເອົາໃຈໃສ່ສຶກສາອົບຮົມການເມືອງນຳພາແນວຄິດໃຫ້ພະນັກງານ-ນັກຮົບ ມີຄວາມຈົ່ງຮັກພັກດີ, ບໍລິສຸດສັດຊື່ຕໍ່ພັກ, ຕໍ່ປະເທດຊາດ, ຕໍ່ປະຊາຊົນ, ເຊື່ອມຊຶມກຳແໜ້ນແນວທາງນະໂຍບາຍຂອງພັກ-ລັດ ໃນແຕ່ລະໄລຍະ, ຮັບຮູ້ເຊື່ອມຊຶມຕໍ່ໜ້າທີ່ການເມືອງຂອງກອງທັບ ກໍຄືຂອງກົມກອງເປັນຢ່າງດີ, ຕັ້ງໜ້າ
ເຝິກແອບຮ່ຳຮຽນສິລະປະຍຸດ-ຍຸດທະວິທີ, ຍົກສູງລະດັບການທະຫານ, ຍົກສູງຄວາມສາມາດ ຂອງພະນັກງານບັນຊາ-ນຳພາໃຫ້ສູງຂຶ້ນເລື້ອຍໆ, ຜ່ານການເຄື່ອນໄຫວເຮັດສຳເລັດໜ້າທີ່ວຽກງານຂອງຕົນ ໄດ້ເຮັດໃຫ້ກອງພົນທີ 1 ໄດ້ຮັບການຍ້ອງຍໍສັນລະເສີນຈາກພັກ-ລັດ ຢ່າງສົມກຽດ)
ສະຫາຍ ພັນເອກ ຄຳຊາວ ລິນທະກຸນແກ້ວ ໃຫ້ຮູ້ຕື່ມອີກວ່າ: ໃນປີ 2015-2020 ເປັນໄລຍະສືບຕໍ່ປັບປຸງກໍ່ສ້າງກຳລັງ ແລະ ເຮັດໜ້າທີ່ເຂດທຸລະກັນດານ, ຫ່າງໄກສອກຫຼີກ ເພື່ອປົກປັກຮັກສາຄວາມສະຫງົບປອດໄພໃນຂອບເຂດຮັບຜິດຊອບມີບຸກຄົນ ແລະ ກົມກອງລວມໝູ່ໃນທົ່ວກອງພົນທີ 1 ໄດ້ຮັບຫຼຽນໄຊປະເພດຕ່າງໆ 1.026 ໜ່ວຍ, ຫຼຽນກາແຮງງານ 815 ໜ່ວຍ, ຫຼຽນກຽດຕິຄຸນ 56 ໜ່ວຍ, ໃບຍ້ອງຍໍປະເພດຕ່າງໆ 1.371 ໃບ, ສຳລັບຜົນ
ງານລວມໝູ່ໃນໂອກາດວັນສ້າງຕັ້ງກອງພົນ ຄົບຮອບ 40 ປີ ປະກອບມີ: ຫຼຽນໄຊພິລະອາດຫານ ຊັ້ນ I; 2 ກົມກອງ, ຫຼຽນໄຊພິລະອາດຫານ ຊັ້ນ II; 8 ກົມກອງ, ຫຼຽນໄຊພິລະອາດຫານ ຊັ້ນ III; 20 ກົມກອງ, ໃບຍ້ອງຍໍກະຊວງປ້ອງກັນປະເທດ 31 ກົມກອງ,ໃບຍ້ອງຍໍກົມໃຫຍ່ການເມືອງກອງທັບ 42 ກົມກອງ.
ສັງລວມແລ້ວ, ຕະຫຼອດໄລຍະ 41 ປີ ແຫ່ງການສ້າງຕັ້ງ ແລະ ການເຕີບໃຫຍ່ຂະຫຍາຍຕົວ ແລະ ສູ້ຮົບມີໄຊຢ່າງບໍ່ຮູ້ອິດຮູ້ເມື່ອຍຂອງກອງພົນທີ 1, ພະນັກງານ-ນັກຮົບ ພວກເຮົາໄດ້ປະເຊີນໜ້າກັບອຸປະສັກນາໆ ປະການ ແລະ ເຕັມໄປດ້ວຍຄວາມເສຍສະຫຼະທັງຊີວິດອິນຊີ ແລະ ເລືອດເນື້ອສະຫງ່າຂອງຕົນ, ທີ່ພັກ-ລັດ ແລະ ປະຊາຊົນມອບໝາຍໃຫ້, ໃນການປັບປຸງກໍ່ສ້າງກຳລັງຂອງ
ຕົນໃຫ້ມີຄວາມເຕີບໃຫຍ່ເຂັ້ມແຂງ ທັງຈຳນວນ ແລະ ຄຸນນະພາບ ໃນຜົນງານ ແລະ ໄຊຊະນະທີ່ຍາດມາໄດ້ນັ້ນ ແມ່ນມາຈາກການນຳພາຂອງພັກ-ລັດ, ໂດຍສະເພາະແມ່ນການຊີ້ນຳຢ່າງໃກ້ສິດຕິດແທດຈາກຄະນະພັກ-ຄະນະນຳກະຊວງປ້ອງກັນປະເທດ, ໄດ້ມາຈາກຄວາມສາມັກຄີເປັນເອກະພາບ, ຄວາມຕັດສິນໃຈບຸກບືນ, ນ້ຳໃຈສູ້ຊົນ ເສຍສະຫຼະ ແລະ ຫົວຄິດປະດິດສ້າງຂອງຄະນະພັກ-ຄະນະບັນຊາກອງພົນແຕ່ລະຮຸ້ນ, ພະນັກງານ-ນັກຮົບ ແຕ່ລະສະຫາຍ ແລະ ອຳນາດການປົກຄອງທ້ອງຖິ່ນ, ພໍ່ແມ່ປະຊາຊົນ ບັນດາເຜົ່າ, ບັນດາບໍລິສັດຫ້າງຮ້ານທັງພາກລັດ ແລະ ເອກະຊົນອ້ອມຂ້າງ, ພ້ອມທັງໄດ້ຮັບການຊ່ວຍເຫຼືອຈາກ ປະເທດເພື່ອນມິດຂອງພວກເຮົາດ້ວຍດີຕະຫຼອດມາ)
ໃນໂອກາດອັນມີຄວາມໝາຍສຳຄັນນີ້ ສະຫາຍ ພັນເອກ ຄຳຊາວ
ລິນທະກຸນແກ້ວ ຍັງໄດ້ຕາງໜ້າໃຫ້ຄະນະພັກ-ຄະນະບັນຊາ, ພະນັກງານ-ນັກຮົບ ໃນທົ່ວກອງພົນທີ 1, ສະແດງຄວາມຮູ້ບຸນຄຸນຕໍ່ການນຳພັກ-ລັດ, ຄະນະນຳກະ
ຊວງປ້ອງກັນປະເທດ, ເຊິ່ງຍາມໄດ້ກໍ່ໄດ້ເອົາໃຈໃສ່ຊີ້ນຳ-ນຳພາກອງພົນທີ 1 ເຮັດສຳເລັດໜ້າທີ່ອັນມີກຽດສະຫງ່າຂອງຕົນໂດຍດີຕະຫຼອດມາ, ຂໍສະແດງຄວາມ
ຮູ້ບຸນຄຸນຢ່າງລົ້ນເຫຼືອຕໍ່ການເອົາໃຈໃສ່ອຸ້ມຊູຊ່ວຍເຫຼືອເບິ່ງແຍງຂອງອຳນາດການປົກຄອງ ແລະ ພໍ່ແມ່ປະຊາຊົນບັນດາເຜົ່າໃນຂອບເຂດທົ່ວປະເທດ, ທີ່ໄດ້ເອົາໃຈໃສ່ເບິ່ງແຍ່ງທາງດ້ານວັດຖຸ ແລະ ຈິດໃຈໃຫ້ແກ່ກອງພົນຄືກັບວ່າເປັນຄອບຄົວດຽວກັນ ສົມແລ້ວກັບຄຳເວົ້າທີ່ວ່າ: ກອງທັບກັບປະຊາຊົນຄືປາກັບນ້ຳ, ຂໍສະແດງຄວາມຮູ້ບຸນຄຸນຢ່າງສູງຕໍ່ບັນດາສະຫາຍຄະນະນຳກອງພົນແຕ່ລະຮຸ້ນ, ພະນັກງານອາວຸໂສບຳນານ ຕະຫຼອດຮອດພະນັກງານ-ນັກຮົບ ທຸກສະຫາຍທີ່ໄດ້ປະກອບສ່ວນ ອຸທິດເຫື່ອແຮງ, ສະຕິປັນຍາເຂົ້າໃນການປັບປຸງກໍ່ສ້າງກອງພົນຕະ
ຫຼອດໄລຍະທີ່ຜ່ານມາເຮັດໃຫ້ ກອງພົນທະຫານຮາບທີ 1, ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ.
ເພື່ອປັບປຸງກໍ່ສ້າງກອງພົນທີ 1 ໃຫ້ເຕີບໃຫຍ່ເຂັ້ມແຂງໃນທຸກດ້ານ, ປະກອບສ່ວນເຂົ້າໃນການກໍ່ສ້າງກອງທັບ ເຮົາກ້າວຂຶ້ນເປັນກອງທັບປະຕິວັດທີ່ມີແບບແຜນທັນສະໄໝ, ສະຫາຍ ພັນເອກ ຄຳຊາວ ລິນທະກຸນແກ້ວ ຫົວໜ້າ
ການທະຫານກອງພົນທີ 1, ຍັງໄດ້ຮຽກຮ້ອງໃຫ້ບັນດາສະຫາຍນາຍ ແລະ ພົນທະຫານທົ່ວກອງພົນທະຫານຮາບທີ 1 ຈົ່ງພ້ອມກັນເສີມຂະຫຍາຍມູນເຊື້ອອັນດີງາມຂອງກອງທັບ ແລະ ຂອງກົມກອງ, ເສີມຂະຫຍາຍນ້ຳໃຈຮັກເຊື້ອແພງ
ຊາດ, ມີຄວາມຈົ່ງຮັກພັກດີຕໍ່ປະເທດຊາດ, ຕໍ່ປະຊາຊົນ ເປັນເຈົ້າການກຳແໜ້ນ ແລະ ຈັດຕັ້ງປະຕິບັດແນວທາງຂອງພັກ, ກົດໝາຍຂອງລັດໃຫ້ຖືກຕ້ອງ, ເພີ່ມທະວີຄວາມສາມັກຄີພາຍໃນ, ຄວາມສາມັກຄີ ລະຫວ່າງ ກົມກອງກັບອຳນາດການປົກຄອງທ້ອງຖິ່ນ ແລະ ພໍ່ແມ່ປະຊາຊົນບັນດາເຜົ່າໃນຂອບເຂດກົມກອງຕັ້ງທັບໃຫ້ແໜ້ນແຟ້ນຍິ່ງຂຶ້ນ, ເພື່ອຄວາມຢູ່ເຢັນເປັນສຸກຂອງປະຊາຊົນບັນດາເຜົ່າ, ເພື່ອ
ຄວາມຮຸ່ງເຮືອງສີວິໄລຂອງປະເທດຊາດ, ເພື່ອຄວາມເຕີບໃຫຍ່ເຂັ້ມແຂງຂອງກອງທັບປະຊາຊົນລາວ, ພະນັກງານ-ນັກຮົບ ກອງພົນທີ 1 ຈົ່ງພ້ອມກັນບຸກໜ້າກ້າວຂຶ້ນຢ່າງບໍ່ຢຸດຢັ້ງ.
ໂດຍ: ຊັນໂດ ລາດຊະພູມີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
