POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 21 ມັງກອນ 2026

ຄະນະຜູ້ແທນກອງປະຊຸມໃຫຍ່ ຄັ້ງທີ XII ຂອງພັກ ຢ້ຽມຢາມເຂດພັດທະນາກວມລວມໄຊເສດຖາ ແລະ ເຂດເສດຖະກິດພິເສດບຶງທາດຫຼວງ
ເວລາອອກຂ່າວ: 2026-01-08 15:52:15 | ຜູ້ຂຽນ : admin2 | ຈຳນວນຄົນເຂົ້າຊົມ: 1256 | ຄວາມນິຍົມ:

ວັນທີ 7 ມັງກອນ 2026 ນີ້, ຄະນະຜູ້ແທນກອງປະຊຸມໃຫຍ່ ຄັ້ງທີ XII ຂອງພັກ ໄດ້ລົງ ຢ້ຽມຢາມເຂດພັດທະນາກວມລວມໄຊເສດຖາ ແລະ ເຂດເສດຖະກິດພິເສດບຶງທາດຫຼວງ, ບໍລິສັດຈົງຫູ້ນ ໂຊລ້າເຕັກໂນໂລຊີ ລາວ ຈຳກັດຜູ້, ໂຄງການກໍ່ສ້າງອາຄານ ຂອງບໍລິສັດ ອ້ອມອາຊີ ພັດທະນາ ອະສັງຫາລິມະຊັບ. ການໄປຢ້ຽມຢາມເຂດພັດທະນາກວມລວມໄຊເສດຖາ ຄະນະຜູ້ແທນໄດ້ຮັບຟັງການລາຍງານຂອງ ທ່ານ ພູວົງ ວົງຄຳຊາວ ຮອງເຈົ້າຄອງນະຄອນຫຼວງວຽງຈັນວ່າ: ເຂດພັດທະນາກວມລວມໄຊເສດຖາ ໄດ້ຮັບການສ້າງຕັ້ງຂຶ້ນຕາມແນວທາງນະໂຍບາຍຂອງພັກ ແລະ ລັດຖະບານ ເພື່ອເປັນແກ່ນສໍາຄັນໃນການດຶງດູດການລົງທຶນ, ສ້າງວຽກເຮັດງານທໍາ, ຍົກສູງຂີດຄວາມສາມາດໃນການຜະລິດອຸດສາຫະກໍາ, ເພື່ອປັບປຸງໂຄງສ້າງເສດຖະກິດ ໃຫ້ທັນສະໄໝ ແລະ ຍືນຍົງ. ພາຍໃຕ້ການນໍາພາອັນສະຫຼາດສ່ອງໃສຂອງພັກ, ການນໍາພາ-ຊີ້ນໍາ ຂອງລັດຖະບານ ແລະ ອໍານວຍຄວາມສະດວກຈາກຂະແໜງການຕ່າງໆ, ເຂດພັດທະນາກວມລວມໄຊເສດຖາແຫ່ງນີ້ ກໍາລັງມີຄວາມກ້າວໜ້າຢ່າງຕໍ່ເນື່ອງ ໃນການພັດທະນາພື້ນຖານໂຄງລ່າງເປັນເສັ້ນທາງ, ລະບົບໄຟຟ້າ, ນໍ້າປະປາ, ລະບົບສາທາລະນຸປະໂພກ ແລະ ສະພາບແວດລ້ອມທີ່ເອື້ອອໍານວຍຕໍ່ກິດຈະການລົງທຶນ ແລະ ການດໍາລົງຊີວິດຂອງພະນັກງານ-ກໍາມະກອນ ແລະ ປະຊາຊົນ. ພ້ອມນັ້ນ, ຍັງມີໂຄງການລົງທຶນຈາກພາຍໃນ ແລະ ຕ່າງປະເທດເຂົ້າມາດໍາເນີນກິດຈະການຢ່າງຕໍ່ເນື່ອງ, ເຊິ່ງສ້າງມູນຄ່າເພີ່ມ, ເຕີບໂຕທາງເສດຖະກິດ ແລະ ເຕີບໂຕອັດຕາການຈ້າງງານ ແລະ ອື່ນໆ. ຢູ່ເຂດເສດຖະກິດພິເສດບຶງທາດຫຼວງ, ທ່ານ ນາງ ອ່ອນລາຢາ ແສງທຳມະວົງ ຜູ້ຊ່ວຍຫົວໜ້າການຕະຫຼາດ ບໍລິສັດລາວທາດຫຼວງລົງທຶນພັດທະນາຈຳກັດ ໄດ້ໃຫ້ຮູ້ວ່າ: ເຂດເສດຖະກິດພິເສດບຶງທາດຫຼວງ ມີເນື້ອທີ່ທັງໝົດ 365 ເຮັກຕາ, ມີເນື້ອທີ່ສິ່ງປຸກສ້າງ 8 ລ້ານຕາລາງແມັດ ແລະ ມີມູນຄ່າການລົງທຶນທັງໝົດ 5 ຕື້ໂດລາສະຫະລັດ. ກຸ່ມບໍລິສັດ ວ່ານເຟິງ ຊຽງໄຮ້ ໄດ້ເຊັນສັນຍາຮ່ວມມືກັບລັດຖະບານລາວໃນທ້າຍປີ 2011 ແລະ ໂຄງການກໍ່ສ້າງໄດ້ເລີ່ມຕົ້ນຢ່າງເປັນທາງການໃນເດືອນ ທັນວາ ປີ 2012. ບໍລິເວນນີ້ ເປັນໄລຍະທຳອິດຂອງການພັດທະນາ ເຊິ່ງປະກອບມີໂຮງແຮມ ແລະ ອາພາດເມັ້ນ, ປະກອບມີ 11 ອາຄານ. ໃນນັ້ນ, ມີ 2 ອາຄານຢູ່ຊັ້ນ 1-3 ຈະເປັນໂຮງຮຽນນານາຊາດ, ອາຄານ 3 ແລະ 4 ທີ່ເປີດເປັນໂຮງແຮມໂປລີ ຫລື The Qube Hotel ແລະ ອາຄານ 6 ແລະ 7 ແມ່ນເປີດເປັນໂຮງແຮມຢູອຶນ, ສ່ວນທີ່ເຫຼືອແມ່ນເປັນອາພາດເມັ້ນ. ນອກຈາກນີ້, ດ້ານໜ້າຂອງ ໂຮງແຮມໂປລີ ແມ່ນ ສູນການຄ້າ Q Mall ປະກອບມີ: ຮ້ານອາຫານ, ຮ້ານກິນດື່ມ, ເຄື່ອງຫັດຖະກໍາ ແລະ ຊຸບເປີມາເກັດ ໄດ້ເປີດຂາຍ ແລະ ໃຫ້ບໍລິການແລ້ວ. ໂຄງການຕໍ່ມາ ແມ່ນຕະຫຼາດບຶງທາດຫຼວງ, ສວນສະໜຸກທີ່ໄດ້ເປີດໃຫ້ປະຊາຊົນໃນເຂດອ້ອມຮອບເຂົ້າມາໃຊ້ບໍລິການໄດ້ສະດວກສະບາຍ. ປັດຈຸບັນ, ເຂດເສດຖະກິດພິເສດບຶງທາດຫຼວງມີ 3 ໂຄງການໃຫຍ່ທີ່ເລັ່ງໃສ່ໃນການພັດທະນາກໍຄືໂຄງການສ້າງສະໜາມກ໊ອຟ 18 ຫຼຸມ, ໂຄງການກໍ່ສ້າງປົກຄອງນະຄອນຫຼວງວຽງຈັນ ແລະ ການສ້າງພະພຸດທະຮູບຂະໜາດໃຫຍ່ໃຈກາງບຶງທາດຫຼວງ ສູງປະມານ 129 ແມັດ. ຫຼັງຈາກໂຄງການນີ້ສ້າງສໍາເລັດຈະເປັນແລນມາກແຫ່ງໃໝ່ໃຫ້ກັບປະເທດລາວ ໂດຍສະເພາະແມ່ນນະຄອນຫຼວງວຽງຈັນ ແລະ ສະຖານທີ່ແຫ່ງນີ້, ຈະກາຍເປັນສະຖານທີ່ທ່ອງທ່ຽວທີ່ດຶງດູດນັກທ່ອງທ່ຽວຫຼາຍລ້ານຄົນໃນແຕ່ລະປີ. ນອກຈາກນີ້, ຍັງມີໂຄງການທີ່ກໍາລັງຢູ່ໃນຂັ້ນຕອນດໍາເນີນງານ ແລະ ຊອກຫານັກລົງທຶນ ປະກອບມີ: ອາພາດເມັ້ນສໍາລັບນັກການທູດ (15-16 ຊັ້ນ), ໂຄງການຕຶກແຝດ, ສູນການຄ້າສາກົນບຶງທາດຫຼວງ, ຖະໜົນຄົນຍ່າງ, ຕະຫຼາດກາງຄືນ ແລະ ອື່ນໆ.

news to day and hot news