POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 21 ມັງກອນ 2026

ກອງບັນຊາການທະຫານແຂວງຜົ້ງສາລີ ປາຖະກະຖາເລົ່າມູນເຊື້ອ 3 ວັນປະຫວັດສາດ
ເວລາອອກຂ່າວ: 2025-11-28 10:04:10 | ຜູ້ຂຽນ : admin3 | ຈຳນວນຄົນເຂົ້າຊົມ: 668 | ຄວາມນິຍົມ:

ເພື່ອເປັນການທົບທວນຫວນຄືນມູນເຊື້ອອັນດີງາມ ແລະ ຜົນງານການເຄື່ອນໄຫວຂອງວັນສຳຄັນ, ໃນວັນທີ 20 ພະຈິກ 2025 ນີ້, ກອງບັນຊາການທະ ຫານແຂວງຜົ້ງສາລີ ໄດ້ຈັດພິທີປາຖະກະຖາເລົ່າມູນເຊື້ອ ວັນມະ ຫາປະຕິວັດເດືອນຕຸລາຣັດເຊຍ ຄົບຮອບ 108 ປີ (7/11/1917-7/11/2025) ແລະ ວັນເກີດທ່ານ ຟຣິດຣິກ ອັງແກນ ຄົບຮອບ 205 ປີ ໂດຍການເປັນປະທານ ແລະ ປາຖະກະຖາໂດຍ ສະຫາຍ ພັນເອກ ສົມຈັນ ລອດສຸລີ ຮອງຫົວໜ້າກອງບັນຊາການທະຫານແຂວງຜົ້ງສາລີ ຫົວໜ້າຫ້ອງການເມືອງ, ມີຄະນະພັກ-ຄະນະບັນຊາ, ຕະຫຼອດຮອດນາຍ ແລະ ພົນທະຫານ ເຂົ້າຮ່ວມ ໂອກາດນີ້, ສະຫາຍປະທານໄດ້ທົບທວນຫວນຄືນປະຫວັດຄວາມເປັນມາຂອງວັນມະຫາປະຕິວັດເດືອນຕຸລາຣັດເຊຍ ແລະ ວັນເກີດຂອງ ທ່ານ ຟຣິດຣິກ ອັງແກນ ກ່ອນໜ້ານີ້ຫຼາຍສິບປີ ຄື: ວັນທີ 7 ພະຈິກ 1917, ພາຍໃຕ້ການນຳພາຂອງພັກໂບນເຊວິກທີ່ມີ ທ່ານ ເລນິນ ເປັນຜູ້ນຳພາຊົນຊັ້ນກຳມະກອນ ແລະ ຊາວຜູ້ອອກແຮງງານຣັດເຊຍໄດ້ລຸກຂຶ້ນຢຶດອຳນາດ ແລະ ສ້າງຕັ້ງລັດ ສ ຣັດເຊຍ (ໂຊວຽດ), ການປະຕິວັດເດືອນຕຸລາ ສ ຣັດເຊຍ ປີ 1917 ບໍ່ແມ່ນເຫດການທີ່ເກີດຂຶ້ນແບບບັງເອີນ ແຕ່ແມ່ນກົດເກນທີ່ຕ້ອງເປັນໄປຂອງສັງຄົມມະນຸດ, ຍ້ອນວ່າ ສ ຣັດເຊຍ ໃນຊຸມປີຕົ້ນ ຂອງສະຕະວັດທີ 20 ເປັນປະເທດທຶນນິຍົມທີ່ຂະຫຍາຍຕົວຊ້າ, ຫຼ້າຫຼັງ ແຕ່ຊົນຊັ້ນນາຍທຶນຊ້ຳພັດກົດຂີ່ຂູດຮີດກຳມະກອນ ແລະ ປະຊາຊົນຜູ້ອອກແຮງງານຢ່າງໜັກໜ່ວງ, ສະພາບຊີວິດການເປັນຢູ່ຂອງປະຊາຊົນທຸກຍາກລຳ ບາກບວກກັບສະພາບສົງຄາມໂລກຄັ້ງທີ I (1914-1917) ຍິ່ງເຮັດໃຫ້ ສ ຣັດເຊຍ ຕົກເຂົ້າສູ່ສະພາບວິກິດການຢ່າງຮ້າຍແຮງ, ໃນດ້ານອື່ນ ທ່ານ ເລນິນ ແລະ ທ່ານ ພັກ ໂບນເຊວິກ ກໍໄດ້ສຶກສາອົບຮົມປຸກລະດົມ, ຊົນຊັ້ນກຳມະກອນ, ປະຊາຊົນຊາວຜູ້ອອກແຮງງານ ແລະ ກອງທະຫານລຸກຮືຂຶ້ນ ເຮັດການປະຕິວັດ, ການປະຕິວັດເດືອນຕຸລາ ສ ຣັດເຊຍ ຫາກໍສຳ ເລັດ, ພວກນາຍທຶນປະຕິການພາຍໃນປະເທດສົມຮູ້ຮ່ວມຄິດກັບ 14 ປະເທດນາຍທຶນໄດ້ບຸກໂຈມຕີ ສ ຣັດເຊຍ (ໂຊວຽດ) ທີ່ໜຸ່ມນ້ອຍແຕ່ ປີ 1918-1922 ຫວັງບີບຄັ້ນໂຊວຽດທີ່ “ນອນຢູ່ໃນອູ່“ ໃຫ້ຕາຍແຕ່ຫົວທີ, ແຕ່ ທ່ານ ເລນິນ ແລະ ທ່ານ ພັກ ໂບນເຊວິກ ໄດ້ນຳພາປະຊາຊົນຕໍ່ສູ້ຕ້ານສັດຕູ ແລະ ໄດ້ຮັບໄຊຊະນະຢ່າງຂາດຕົວ ແລະ ສາມາດປົກປັກຮັກສາອຳນາດໂຊວຽດໄວ້ໄດ້, ຊີວິດ ແລະ ການເຄື່ອນໄຫວຂອງອັງແກນ, ທ່ານ ຟຣິດຮິກ (ຝ.ອັງແກນ) ເກີດເມື່ອວັນທີ 28/11/1820, ທີ່ເມືອງບັກແນມ ຂຶ້ນກັບເທດສະບານວຸບເປີຕານ, ແຂວງເຣນ ປະເທດເຢຍລະມັນ, ປີ 1829 ໄດ້ເລີ່ມເຂົ້າຮຽນທີ່ໂຮງຮຽນປະຖົມ ແລະ ຮຽນມັດ ທະຍົມກິນນອນຢູ່ອັງເຟີແຟນເດີເປັນໂຮງຮຽນສາສະໜາທີ່ເປີດກວ້າງທາງສະຕິປັນຍາ, ເພີ່ນໄດ້ຮຽນຫຼາຍວິຊາພື້ນຖານຄື: ພາສາເຢຍລະມັນ, ເຮບາຣີ, ລາຕີນ, ເກຣັກ, ຝຣັ່ງ, ວິຊາສາດສະໜາ, ປະຫວັດສາດ, ພູມສາດ, ເລກ, ຟີຊິກ, ແຕ້ມຮູບ, ດົນຕີ, ປັດຊະຍາ ແລະອື່ນໆ, ຝ.ອັງແກນ ເປັນຄົນດຸໝັ່ນຂະຫຍັນຮຽນ ແລະ ມັກຫຼິ້ນກິລາ ໂດຍສະເພາະແມ່ນກິລາຂີ່ມ້າ, ເພີ່ນມັກໄປຊອກຮູ້ຮໍ່າຮຽນທັງເຫັນໄດ້ ຄວາມທຸກຍາກລຳບາກຂອງຊາວຜູ້ອອກແຮງງານເປັນຕົ້ນເດັກນ້ອຍຜູ້ທຸກຍາກທົ່ວໄປ, ບາດກ້າວທຳອິດທີ່ເລີ່ມຄົ້ນຄວ້າ ແລະ ເຂົ້າຮ່ວມການປະຕິວັດແມ່ນ ປີ 1839, ເພີ່ນໄດ້ຂຽນບົດລົງໜ້າໜັງສືພິມທີ່ພາກຫົວເລື່ອງວ່າ: “ຈົດໝາຍຈາກກຸບເປີຕານ“ ເຊິ່ງເນື້ອໃນເວົ້າເຖິງຄວາມທຸກຍາກຂາດເຂີນຂອງກຳມະກອນທີ່ແຕກຕ່າງຈາກຊີວິດການເປັນຢູ່ທີ່ອຸດົມສົມບູນຂອງເຈົ້າຂອງໂຮງງານ ແລະ ພໍ່ຄ້າຊາວຂາຍ, ຝ.ອັງແກນ ເປັນຄົນກຳເນີດໃນຕະກຸນໃຫຍ່ທີ່ມີທີ່ດິນ ແລະ ໂຮງງານຫຼາຍ, ເປັນຄວາມຫວັງຂອງພໍ່ທີ່ຢາກໃຫ້ເປັນພໍ່ຄ້າທີ່ເກັ່ງ, ສະນັ້ນເພີ່ນຈຶ່ງເລືອກທັງສອງຢ່າງຄື: ເຮັດວຽກໃຫ້ຄອບຄົວ (ຢູ່ໂຮງງານ) ສ່ວນໜຶ່ງ ແຕ່ສ່ວນຫຼາຍເພີ່ນໄດ້ທຸ່ມເທໃຫ້ແກ່ວຽກງານການປະຕິວັດເພີ່ນເປັນນັກປະຕິວັດທີ່ກ້າຫານ, ອົດທົນ, ໜ່ຽວແໜ້ນ. ຕະຫຼອດຊີວິດເພີ່ນໄດ້ອຸທິດເຫື່ອແຮງ ແລະ ສະຕິປັນຍາຂອງເພີ່ນເພື່ອພາລະກິດປະຕິວັດ ພາລະກິດປົດປ່ອຍຊົນຊັ້ນກຳມະກອນ ແລະ ຊາວຜູ້ອອກແຮງງານໃຫ້ຫຼຸດຜົ້ນອອກຈາກແອກກົດຂີ່ຂູດຮີດ, ເຮັດໃຫ້ເຂົາເຈົ້າມີຊີວິດສົດໃສ, ມີອິດສະລະພາບ ແລະ ສະເໝີພາບຢ່າງແທ້ຈິງ. ຈຸດປະສົງໃນການປາຖະກະຖາວັນສຳຄັນດັ່ງກ່າວ ເພື່ອເຮັດໃຫ້ນາຍ ແລະ ພົນທະຫານມີຄວາມຮັບຮູ້ເຂົ້າໃຈຕໍ່ບັນດາຜົນງານການເຄື່ອນໄຫວ ແລະ ການເຕີບໃຫຍ່ຂະຫຍາຍຕົວຂອງວັນມະ ຫາປະຕິວັດເດືອນຕຸລາ ສ ຣັດເຊຍ ແລະ ວັນເກີດ ທ່ານ ຟຣິດຣິກ ອັງແກນ ແລະ ເພື່ອເປັນການຖອດຖອນ ແລະ ຮໍ່າຮຽນເອົາບົດຮຽນອັນລໍ້າຄ່າດັ່ງກ່າວມາໝູນໃຊ້ເຂົ້າໃນໜ້າທີ່ວຽກງານທີ່ໄດ້ຮັບການມອບໝາຍຈາກຂັ້ນເທິງໃຫ້ດີຂຶ້ນເປັນກ້າວໆ. ໂດຍ: ນາງ ສຸນາລີ ອຸ່ນວີໄຊ

news to day and hot news