POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອາທິດ, ວັນທີ 18 ມັງກອນ 2026

ສະຫະພັນກຳມະບານກອງທັບ ມີຜົນສໍາເລັດຫຼາຍດ້ານໃນການຈັດຕັ້ງປະຕິບັດ ມະຕິກອງປະຊຸມຜູ້ແທນ ຄັ້ງທີ V
ເວລາອອກຂ່າວ: 2025-08-01 10:38:09 | ຜູ້ຂຽນ : admin2 | ຈຳນວນຄົນເຂົ້າຊົມ: 1613 | ຄວາມນິຍົມ:

ສະຫາຍ ພັນເອກ ໄຊຊະນະ ທຳມະສອນ ຮອງຫົວໜ້າຫ້ອງການສະຫະພັນກຳມະບານ ກອງທັບ ໄດ້ລາຍງານຕໍ່ກອງປະຊຸມໃຫຍ່ຜູ້ແທນສະຫະພັນກຳມະບານກອງທັບ ຄັ້ງທີ VI ໄຂຂຶ້ນໃນວັນທີ 30 ກໍລະກົດ 2025 ເຊິ່ງບາງຕອນໃຫ້ຮູ້ວ່າ: ນັບແຕ່ກອງປະຊຸມຜູ້ແທນກຳມະບານທົ່ວກອງທັບ ຄັ້ງທີ V ເປັນຕົ້ນມາ, ສະຫະພັນກຳມະບານ, ກຳມະບານຮາກຖານແຕ່ລະຂັ້ນໃນກອງທັບ ຖືວຽກງານການເມືອງ-ແນວຄິດເປັນກົກ ໄດ້ເອົາໃຈໃສ່ໂຄສະນາເຜີຍແຜ່ ໃຫ້ແກ່ພະນັກງານ, ສະມາຊິກກຳມະບານ-ກຳມະກອນ ແລະ ຜູ້ອອກແຮງງານໃນຖັນແຖວກອງທັບ, ຄົ້ນຄວ້າເຊື່ອມຊຶມຜັນຂະຫຍາຍແນວທາງນະໂຍບາຍຂອງພັກ, ກົດໝາຍຂອງລັດ ຢ່າງເລິກເຊິ່ງ ໂດຍສະເພາະແມ່ນເປັນເຈົ້າການສຶກສາອົບຮົມການເມືອງ-ນໍາພາແນວຄິດ, ຈັດຕັ້ງເຊື່ອມຊຶມມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກ ກະຊວງປ້ອງກັນປະເທດ ແລະ ມະຕິກອງປະຊຸມໃຫຍ່ຜູ້ແທນກຳມະບານລາວທົ່ວປະເທດ ຄັ້ງທີ VIII. ໃນ 5 ປີ ຜ່ານມາ, ຈໍານວນສະມາຊິກກຳມະບານ ແລະ ກໍາມະບານຮາກຖານ ໄດ້ເພີ່ມຂຶ້ນຢ່າງຕໍ່ເນື່ອງ, ປັດຈຸບັນ ອົງການຈັດຕັ້ງກຳມະບານກອງທັບ ມີ 12 ສະຫະພັນກຳມະບານ, 76 ກຳມະບານຮາກຖານ (ໃນນີ້ ຂະຫຍາຍການຈັດຕັ້ງກຳມະບານຮາກຖານຢູ່ຫົວໜ່ວຍແຮງງານການຜະລິດຈໍານວນ 4 ຮາກຖານ). ໃນທົ່ວກອງທັບ ມີສະມາຊິກກຳມະບານທັງໝົດ 3.372 ສະຫາຍ, ຍິງ 1.529 ສະຫາຍ, ຂະຫຍາຍໃໝ່ 567 ສະຫາຍ, ຍິງ 258 ສະຫາຍ, ສະມາຊິກພັກເຂົ້າຮ່ວມ 1.665 ສະຫາຍ, ສະຫະພັນແມ່ຍິງ 1.529 ສະຫາຍ ແລະ ສະມາຊິກຊາວໜຸ່ມ 2.040 ສະຫາຍ. ວຽກງານກໍ່ສ້າງ ແລະ ບຳລຸງພະນັກງານ: ໄດ້ຊຸກຍູ້, ປະສານສົມທົບກັບພາກສ່ວນທີ່ກ່ຽວຂ້ອງ ໃນການບຳລຸງ-ກໍ່ສ້າງ ແລະ ຍົກລະດັບພະນັກງານ, ສະມາຊິກກຳມະບານ ດ້ວຍຫຼາຍຮູບການ ເປັນຕົ້ນ ທິດສະດີການເມືອງ-ການປົກຄອງ, ວຽກງານວິຊາສະເພາະ ແລະ ພັດທະນາສີມືແຮງງານ ໂດຍສົ່ງພະນັກງານໄປຮຽນທິດສະດີການເມືອງ-ການປົກຄອງ 76 ສະຫາຍ, ຮຽນວິຊາສະເພາະ ແລະ ສີມືແຮງງານ 408 ສະຫາຍ, ໄປບຳລຸງວຽກງານກໍາມະບານ, ວຽກງານຂ່າວສານ, ວຽກງານຄູເຝິກ ນໍາສູນກາງສະຫະພັນກຳມະບານລາວ ຈັດຂຶ້ນ ຈໍານວນ 10 ສະຫາຍ, ໄປຮຽນກໍ່ສ້າງປະລິນຍາຕີ 1 ສະຫາຍ, ປະລິນຍາໂທ 1 ສະຫາຍ ຢູ່ມະຫາວິທະຍາໄລກຳມະບານ ສສ ຫວຽດນາມ ແລະ ໄດ້ຈັດສົ່ງພະນັກງານກຳມະບານໄປເຝິກອົບຮົມວຽກງານກຳມະບານໄລຍະສັ້ນຢູ່ ສສ ຫວຽດນາມ 3 ຄັ້ງ ຈໍານວນ 70 ສະຫາຍ. ວຽກງານນະໂຍບາຍ ພະນັກງານ ແລະ ສະມາຊິກກຳມະບານ: ໄດ້ເອົາໃຈໃສ່ຕິດຕາມການປະຕິບັດນະໂຍບາຍຕໍ່ພະນັກງານ, ສະມາຊິກກຳມະບານ ຕາມແນວທາງຂອງພັກ, ນະໂຍບາຍຂອງລັດ, ກົດໝາຍ ວ່າດ້ວຍນາຍທະຫານ ກອງທັບປະຊາຊົນລາວ, ກົດໝາຍ ວ່າດ້ວຍກຳມະບານລາວ ແລະ ກົດລະບຽບ ຂອງສະຫະພັນກຳມະບານລາວວາງອອກ ສະເໜີການເລື່ອນຕຳແໜ່ງ, ເລື່ອນຊັ້ນ, ຂັ້ນເງິນເດືອນ, ການສັບຊ້ອນຕຳແໜ່ງງານຂອງພະນັກງານ, ການປະຕິບັດນະໂຍບາຍຢ້ຽມຢາມໃນເວລາເຈັບປ່ວຍ, ນອນໂຮງໝໍ, ນະໂຍບາຍ ພັກຜ່ອນປະຈຳປີ ແລະ ນະໂຍບາຍອື່ນໆ ຕາມກົດໝາຍແຮງງານ ແລະ ຂໍ້ກຳນົດ, ລະບຽບການຂອງກົມກອງວາງອອກ. ວຽກງານປົກປ້ອງແຮງງານ: ອົງການຈັດຕັ້ງກຳມະບານແຕ່ລະຂັ້ນໃນກອງທັບ ໄດ້ຕັ້ງໜ້າເຄື່ອນໄຫວວຽກງານປົກປ້ອງສິດ ແລະ ຜົນປະໂຫຍດອັນຊອບທຳ ຂອງສະມາຊິກກຳມະບານ-ກຳມະກອນ ແລະ ຜູ້ອອກແຮງງານດ້ວຍການຕິດຕາມ ແລະ ຊຸກຍູ້ ການປະຕິບັດການສ້າງສັນຍາແຮງງານລວມໝູ່ ແລະ ບຸກຄົນ, ເຂົ້າຮ່ວມປຶກສາຫາລືແກ້ໄຂຂໍ້ຂັດແຍ່ງແຮງງານ ທວງຄ່າແຮງງານໃຫ້ກຳມະກອນມູນຄ່າ 7 ຕື້ກວ່າກີບ. ວຽກງານຂະບວນການແຂ່ງຂັນ ແລະ ຍ້ອງຍໍ: ອົງການຈັດຕັ້ງກຳມະບານແຕ່ລະຂັ້ນໃນກອງທັບ ໄດ້ເຊື່ອມຊຶມ ແລະ ຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າ ໂດຍຕິດພັນກັບຂະບວນການແຂ່ງຂັນ ຮັກຊາດ ແລະ ພັດທະນາ, ຂະບວນການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ ແລະ ປະຕິບັດໜ້າທີ່ວິຊາສະເພາະ ອົງການກຳມະບານກອງທັບ ໄດ້ພົວພັນປະສານສົມທົບກັບສູນກາງສະຫະພັນກຳມະບານລາວ, ສະຫະພັນກຳມະບານບັນດາກະຊວງ, ອົງການ, ອົງການພາຄີຊາວໜຸ່ມ, ແມ່ຍິງ ແລະ ພາກສ່ວນອື່ນໆ ປຸກລະດົມວັດຖຸປັດໄຈຕ່າງໆ ເພື່ອໄປມອບໃຫ້ພະນັກງານ-ນັກຮົບ ທີ່ປະຕິບັດໜ້າທີ່ຢູ່ເຂດຫ່າງໄກສອກຫຼີກ. ວຽກງານກອງທຶນ: ອົງການກຳມະບານແຕ່ລະຂັ້ນໃນກອງທັບ ໄດ້ຕັ້ງໜ້າຂະຫຍາຍກອງທຶນຊ່ວຍເຫຼືອເຊິ່ງກັນ ແລະ ກັນ ຕາມກົດລະບຽບກອງທຶນ ຂອງແຕ່ລະສະຫະພັນກຳມະບານ, ກຳມະບານຮາກຖານວາງອອກ ໃນແຕ່ລະປີໄດ້ຈັດກອງປະຊຸມຖອດຖອນບົດຮຽນ ກ່ຽວກັບວຽກງານກອງທຶນກຳມະບານ ເພື່ອເຮັດໃຫ້ການເຄື່ອນໄຫວວຽກງານກອງທຶນໄດ້ຮັບການປັບປຸງ ແລະ ຂະຫຍາຍຕົວດີຂຶ້ນເລື້ອຍໆ ປັດຈຸບັນ ທົ່ວກຳມະບານກອງທັບ ມີສະມາຊິກກອງທຶນ 2.329 ຄົນ, ມີເງິນໝູນວຽນທັງໝົດ 1.176.218.500 ກີບ. ວຽກງານພົວພັນຮ່ວມມືຕ່າງປະທດ: ອົງການກຳມະບານກອງທັບແຕ່ລະຂັ້ນ ໄດ້ຕັ້ງໜ້າປະຕິບັດ ແລະ ເຄື່ອນໄຫວວຽກງານການຕ່າງປະເທດ ຕາມແນວທາງການຕ່າງປະເທດຂອງພັກ-ລັດ ໄດ້ພົວພັນຮ່ວມມືກັບກຳມະບານປະເທດເພື່ອນມິດຍຸດທະສາດ ເປັນຕົ້ນແມ່ນ ສສ ຫວຽດນາມ, ສປ ຈີນ, ພົວພັນ-ຮ່ວມມືກັບກຳມະບານ ກອງທັບປະຊາຊົນຫວຽດນາມ ການແລກປ່ຽນຄະນະຜູ້ແທນ ເພື່ອຍາດແຍ່ງເອົາການສະໜັບສະໜູນ, ຊ່ວຍເຫຼືອທາງດ້ານບົດຮຽນ, ການເຝິກອົບຮົມ, ຍົກລະດັບໄລຍະສັ້ນ ແລະ ໄລຍະຍາວ. ສັງລວມແລ້ວ ຕະຫຼອດໄລຍະຜ່ານມາ, ພາຍໃຕ້ການຊີ້ນຳໂດຍກົງ ຂອງອົງຄະນະພັກ ກົມໃຫຍ່ການເມືອງກອງທັບ ຫ້ອງການກຳມະບານກອງທັບ ໄດ້ເອົາໃຈໃສ່ສຶກສາອົບຮົມການເມືອງ-ນໍາພາແນວຄິດໃຫ້ກຳມະກອນໃນການສືບຕໍ່ເສີມຂະຫຍາຍທາດແທ້, ລັກສະນະດີເລີດ ຂອງຊົນຊັ້ນກຳມະກອນ ແລະ ມູນເຊື້ອປະຕິວັດອັນດີງາມຂອງຊາດ, ປະຕິບັດສິດ ແລະ ພັນທະເຂົ້າໃນພາລະກິດປະຕິວັດໃນໄລຍະໃໝ່ຢ່າງຖືກຕ້ອງ. ປັດຈຸບັນ ຊົນຊັ້ນກຳມະກອນລາວ ຢູ່ຕາມຫົວໜ່ວຍແຮງງານ, ໂຮງຈັກ, ໂຮງງານ, ຮາກຖານຕ່າງໆ ໄດ້ເປັນເຈົ້າການປະກອບສ່ວນ ທັງສະຕິປັນຍາ ແລະ ກຳລັງແຮງໃນການພັດທະນາເສດຖະກິດ-ສັງຄົມ ໃຫ້ມີການເຕີບໃຫຍ່ເຂັ້ມແຂງ ເປັນຕົ້ນ: ການກໍ່ສ້າງຖະໜົນຫົນທາງ, ຂົວ, ອາຄານ, ການຂຸດຄົ້ນແຮ່ທາດ, ນ້ຳປະປາ, ກົນຈັກ, ສ້ອມແປງ, ບໍລິການປຸ່ງແຕ່ງ, ການຄົມມະນາຄົມ, ປ້ອງກັນຊາດ-ປ້ອງກັນຄວາມສະຫງົບ ແລະ ອື່ນໆ ລ້ວນແຕ່ມີການປະກອບສ່ວນຢ່າງຕັ້ງໜ້າ ຂອງກຳມະກອນ ແລະ ຊາວຜູ້ອອກແຮງງານ ເຮັດໃຫ້ພື້ນຖານໂຄງລ່າງ ແລະ ເສດຖະກິດ-ສັງຄົມ ຂອງຊາດ ມີຄວາມໜັກແໜ້ນເຂັ້ມແຂງ. ໂດຍ: ຈິດ ເພັດພູທອງ

news to day and hot news