POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນພຸດ, ວັນທີ 09 ກໍລະກົດ 2025

ໂຮງຮຽນການທະຫານທ້ອງຖິ່ນແຂວງອຸດົມໄຊ ປິດຮຽນກໍ່ສ້າງນາຍສິບ ຊຸດທີ VIII
ເວລາອອກຂ່າວ: 2025-07-04 11:57:07 | ຜູ້ຂຽນ : admin2 | ຈຳນວນຄົນເຂົ້າຊົມ: 1224 | ຄວາມນິຍົມ:

ພິທີ ປິດຮຽນກໍ່ສ້າງນາຍສິບ ຊຸດທີ VIII ສົກຮຽນ 2024-2025 ຂອງໂຮງຮຽນການທະຫານທ້ອງຖິ່ນແຂວງອຸດົມໄຊ ໄດ້ຈັດຂຶ້ນໃນວັນທີ 4 ກໍລະກົດ 2025 ນີ້, ໂດຍການເປັນປະທານ ຂອງສະຫາຍ ພົນຈັດຕະວາ ຄຳເຜີຍ ໂສມພັນ ຫົວໜ້າການທະຫານ ກອງບັນຊາການທະຫານແຂວງອຸດົມໄຊ, ມີຄະນະພັກ-ຄະນະກອງບັນຊາການ, ອົງການ 5 ຫ້ອງ, ໂຮງຮຽນ, ໂຮງໝໍ, ຄູ-ອາຈານ, ກົມກອງອ້ອມຂ້າງ ຕະຫຼອດຮອດພະນັກງານ-ນັກຮົບ ແລະ ນັກຮຽນນາຍສິບ ເຂົ້າຮ່ວມ. ສະຫາຍ ພັນໂທ ພອນແກ້ວ ດາລາເພັດ ຫົວໜ້າການທະຫານ ໂຮງຮຽນການທະຫານທ້ອງຖິ່ນ ໄດ້ຜ່ານສະຫຼຸບຜົນຂອງການຈັດຕັ້ງປະຕິບັດໂຄງການອົບຮົມ-ຫັດແອບນັກຮຽນນາຍສິບ ຊຸດທີ VIII ປະຈຳສົກ ຮຽນ 2024-2025. ເຊິ່ງຄະນະພັກ-ຄະນະອໍານວຍການໂຮງຮຽນ ໄດ້ເອົາໃຈໃສ່ໃກ້ຊິດຕິດແທດກັບນັກຮຽນຕົວຈິງ ຕະຫຼອດໄລຍະການສຶກສາຮໍ່າຮຽນ, ຖືເອົາການສຶກສາອົບຮົມການເມືອງ-ນໍາພາແນວຄິດເປັນສຳຄັນ ຕິດພັນກັບກັບການນຳພາ-ຊີ້ນໍາ, ເອົາໃຈໃສ່ຄຸ້ມຄອງດ້ານລະບຽບແບບແຜນຢ່າງເຂັ້ມງວດ, ສິດສອນທາງດ້ານທິດສະດີຫຼັກການເປັນຈຸດໜັກ, ຖືເອົາການຫັດແອບຕົວຈິງເປັນສຳຄັນ ແລະ ເອົາການຄົ້ນຄວ້າທວນຄືນ, ສອບເສັງໃນແຕ່ລະວິຊາເປັນໄມ້ຫຼາວັດແທກຄວາມຮູ້ ຄວາມສາມາດ ສະແດງອອກໃນເວລາຫັດແອບຮໍ່າຮຽນ. ເຊິ່ງມີນັກຮຽນທັງໝົດ 107 ສະຫາຍ, ຮຽນ ແລະ ກວດກາສອບເສັງທັງໝົດ 18 ວິຊາ ໃນນັ້ນ, ເສັງຈົບຊັ້ນ ມີ 5 ວິຊາຄື: ວິຊາການເມືອງ ຂັ້ນເກັ່ງ 38 ສະຫາຍ ເທົ່າກັບ 35,18%, ຂັ້ນກາງ 65 ສະຫາຍ ເທົ່າກັບ 51,85%, ຄາດໝາຍ 13,01%; ວິຊາລະບຽບ ຂັ້ນເກັ່ງ 42 ສະຫາຍ ເທົ່າກັບ 38,88%, ຂັ້ນກາງ 55 ສະຫາຍ ເທົ່າກັບ 50,92%, ຄາດໝາຍ 10 ສະຫາຍ ເທົ່າກັບ 9,25%; ວິຊາ ສິລະປະຍຸດປືນຮາບ ຂັ້ນເກັ່ງ 43 ສະຫາຍ ເທົ່າກັບ 39,81%, ຂັ້ນກາງ 53 ສະຫາຍ ເທົ່າກັບ 49,07%, ຄາດໝາຍ 11 ສະຫາຍ ເທົ່າກັບ 10,18%; ວິຊາສິລະປະຍຸດປືນໃຫຍ່ແບກຫາບ ຂັ້ນເກັ່ງ 37 ສະຫາຍ ເທົ່າກັບ 34,25%, ຂັ້ນກາງ 57 ສະຫາຍ ເທົ່າກັບ 52,77%, ຄາດໝາຍ 13 ສະຫາຍ ເທົ່າກັບ 12,03%; ວິຊາຍຸດທະວິທີ ຂັ້ນເກັ່ງ 44 ສະຫາຍ ເທົ່າກັບ 30,74%, ຂັ້ນກາງ 51 ສະຫາຍ ເທົ່າກັບ 47,22%, ຄາດໝາຍ 12 ສະຫາຍ ເທົ່າກັບ 11,11%. ສະເລຍຜົນໄດ້ຮັບທັງໝົດ 88,13%. ຈາກນັ້ນ, ໄດ້ຜ່ານຂໍ້ຕົກລົງ ຂອງກອງບັນຊາການທະຫານແຂວງອຸດົມໄຊ ວ່າດ້ວຍການປະດັບຊັ້ນໃຫ້ນັກຮຽນນາຍສິບ ຊຸດທີ VIII ໃນນັ້ນ, ປະດັບຊັ້ນສິບເອກ 64 ສະຫາຍ ແລະ ມອບປະກາສະນີຍະບັດໃຫ້ນັກຮຽນນາຍສີບ ຊຸດທີ VIII ຢ່າງສົມກຽດ. ໂອກາດນີ້, ສະຫາຍ ພົນຈັດຕະວາ ຄໍາເຜີຍ ໂສມພັນ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສໍາເລັດບັ້ນອົບຮົມໃນຄັ້ງນີ້ ພ້ອມທັງເນັ້ນໜັກໃຫ້ເອົາໃຈໃສ່ນຳເອົາບົດຮຽນ ທີ່ຄູ-ອາຈານຖ່າຍທອດໃຫ້ໄປໝູນໃຊ້ຢູ່ໃນກົມກອງຂອງຕົນໃຫ້ມີຜົນສຳເລັດ, ສືບຕໍ່ເຝິກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງ, ມີຄວາມຮູ້ ຄວາມສາມາດ, ນຳເອົາຄວາມຮູ້ພື້ນຖານດັ່ງກ່າວນີ້ ໄປຈັດຕັ້ງປະຕິບັດເຂົ້າໃນວຽກງານວິຊາສະເພາະຂອງຕົນໃຫ້ມີໃບໜ້າອັນໃໝ່ ເພື່ອສ້າງຕົນເອງໃຫ້ກາຍເປັນນາຍທະຫານຜູ້ສືບທອດທີ່ດີຂອງກອງທັບປະຊາຊົນລາວ ໃນອະນາຄົດ. ໂດຍ: ສົມພູນ

news to day and hot news