ວັນພຸດ, ວັນທີ 09 ກໍລະກົດ 2025
ຕົ້ນປີ 2025 ຂະແໜງການສຶກສາ ແລະ ກິລາ ສາມາດບັນລຸໄດ້ 12 ຄາດໝາຍ ແລະ ບໍ່ບັນລຸ 4 ຄາດໝາຍ
ເວລາອອກຂ່າວ: 2025-06-24 09:12:40 | ຜູ້ຂຽນ : admin3 | ຈຳນວນຄົນເຂົ້າຊົມ: 265 | ຄວາມນິຍົມ: 
ອີງຕາມບົດລາຍງານຂອງລັດຖະບານຕໍ່ກອງປະຊຸມສະພາແຫ່ງຊາດ ຊຸດທີ 9 ເທື່ອທີ IX ໃຫ້ຮູ້ວ່າ: ໃນ 6 ເດືອນຕົ້ນປີ 2025 ລັດຖະບານໄດ້ສຸມໃສ່ມາດຕະ
ການແກ້ໄຂບັນຫາການຂາດແຄນຄູສອນ, ການປະລະການຮຽນ ແລະ ສົ່ງເສີມການເຂົ້າຮຽນວິຊາຊີບ ໂດຍໄດ້ອອກນິຕິກຳກ່ຽວກັບ ການໂຮມໂຮງຮຽນສາມັນສຶກສາ, ຫັນເອົາຄູສັນຍາຈ້າງເຂົ້າເປັນລັດຖະກອນ ແລະ ການທົດແທນຄູທີ່ສູນເສຍ ດ້ວຍຮູບການຕ່າງໆ, ການເພີ່ມເບ້ຍລ້ຽງນັກຮຽນ-ນັກສຶກສາທຸກຊັ້ນສາຍ ໃນຂອບເຂດທົ່ວປະເທດ, ບາງແຂວງໄດ້ມີນະໂຍບາຍໃຫ້ອັດຕາກິນແກ່ນັກຮຽນສະເພາະ ເພື່ອຊຸກຍູ້ໃຫ້ນັກຮຽນເຂົ້າໂຮງຮຽນ ແລະ ແບ່ງເບົາພາລະຂອງຄົວນັກຮຽນ, ໄດ້ກຳນົດໂຄຕ້າຄູສອນໃຫ້ສອດຄ່ອງກັບແຜນກໍ່ສ້າງຄູ; ສຳເລັດໃນການສ້າງແຜນຄວາມຕ້ອງການຄູ ແລະ ການກໍ່ສ້າງຄູການສຶກສາກ່ອນໄວຮຽນ ແລະ ສາມັນສຶກສາ ໃນໄລຍະ 10 ປີ (2026-2035); ນອກຈາກນັ້ນ, ເພື່ອປັບປຸງຄຸນນະພາບການສຶກສາ ໂດຍສະເພາະໃນສາມັນ ແມ່ນໄດ້ສຸມໃສ່ການເຝິກອົບຮົມຄູປະຈຳການໃນຫຼາກຫຼາຍຫົວຂໍ້ ທັງທາງດ້ານເນື້ອໃນບົດຮຽນ ແລະ ວິທີການສິດສອນຢ່າງເປັນປົກກະຕິ, ເຝິກອົບຮົມໃຫ້ພະນັກງານ-ນັກຮົບເພື່ອໄປສິດສອນຢູ່ເຂດຫ່າງໄກສອກຫຼີກ ຈຳນວນໜຶ່ງ ແລະ ໄດ້ລິເລີ່ມການສຶກສາຄົ້ນຄວ້າ ຄວາມເປັນໄປໄດ້ໃນການຫັນປ່ຽນລະບົບການສຶກສາສາຍສາມັນ ຈາກ 5+4+3 ມາເປັນ 6+3+3. ປະຕິບັດນະໂຍບາຍຕໍ່ຄູອາສາສະ
ໝັກ, ພະນັກງານບຳນານ ແລະ ທະຫານຊາຍແດນ ທີ່ສອນຊ່ວຍໃນໂຮງຮຽນພາກລັດທີ່ຂາດຄູສອນ ສຳລັບຊັ້ນການສຶກສາກ່ອນໄວຮຽນ ແລະ ສາມັນສຶກສາ. ວຽກງານອາຊີວະສຶກສາໄດ້ມີການປັບປຸງ ຫັນປ່ຽນທັງຫຼັກສູດ ແລະ ຮູບແບບການຮຽນ-ການສອນ ແລະ ພັດທະນາມາດຕະຖານອາຊີບໃໝ່ ພ້ອມທັງໄດ້ມີການຂະຫຍາຍຫຼັກສູດສາມັນວິຊາຊີບໄປໃນໂຮງຮຽນສາມັນ. ການສຶກສາຊັ້ນສູງ ໄດ້ມີການປັບປຸງຫຼັກສູດ ໂດຍໄດ້ມີການຫຼຸດຜ່ອນຕົວເລກນັກສຶກສາທີ່ສັງຄົມຕ້ອງການໜ້ອຍ ແລະ ເພີ່ມນັກສຶກສາໃນສາຂາທີ່ ສັງຄົມຕ້ອງການສູງ ເຊັ່ນ: ວິທະຍາສາດ, ເຕັກໂນໂລຊີ, ວິສະວະກຳ ພ້ອມທັງສົ່ງເສີມມະຫາວິທະຍາໄລ ຫັນໄປສູ່ການຄົ້ນຄວ້າຫຼາຍຂຶ້ນ. ນອກຈາກນີ້, ຍັງໄດ້ເອົາໃຈໃສ່ປັບປຸງໂຄງລ່າງພື້ນຖານໂຮງຮຽນຈຳນວນໜຶ່ງ, ສຳເລັດການເປັນເຈົ້າພາບຈັດການແຂ່ງຂັນ ກິລາຕ່າງໆ ແລະ ເຂົ້າຮ່ວມແຂ່ງຂັນກິລາ ໃນພາກພື້ນ ແລະ ສາກົນ. ດ້ວຍການເອົາໃຈໃສ່ດັ່ງກ່າວ, ເຮັດໃຫ້ໃນຈຳນວນ 16 ຄາດໝາຍຂອງຂະແໜງການສຶກສາ, ວິທະຍາສາດ ແລະ ກິລາ, ມີ 12 ຄາດ
ໝາຍ ສາມາດບັນລຸໄດ້ ແລະ ມີ 4 ຄາດໝາຍ ບໍ່ສາມາດບັນລຸໄດ້ໂດຍມີລາຍລະອຽດ ຄືດັ່ງນີ້: ມີ 12 ຄາດໝາຍ ທີ່ສາມາດບັນລຸໄດ້ຕາມແຜນ (ຕາມການລາຍງານໄດ້ຮອດປັດຈຸບັນ): ອັດຕາເຂົ້າຮຽນຂອງເດັກ 5 ປີ ເພີ່ມຈາກ 83,8% ເປັນ 84,7% (ຄາດໝາຍແມ່ນ 83%); ອັດຕານັກຮຽນເຂົ້າໃໝ່ ປ1 ທຽບໃສ່ເດັກ 6 ປີ (ອັດຕາເຂົ້າຮຽນໃໝ່ສຸດທິ) ເພີ່ມຈາກ 99,10% ເປັນ 99,3% (ຄາດໝາຍ 98%);
ອັດຕາປະລະ ຂັ້ນ ປ 1 ຫຼຸດລົງຈາກ 6% ເປັນ 5,9% (ຄາດໝາຍ 6%); ອັດຕາເລື່ອນຊັ້ນ ປ 5 ຂຶ້ນ ມ 1 ເພີ່ມຈາກ 85% ເປັນ 85,6% (ຄາດໝາຍ 85%); ດັດສະນີຄວາມສະເໝີພາບ ຍິງ-ຊາຍ ອັດຕາເລື່ອນຊັ້ນ ປ 5 ຂຶ້ນ ມ 1 ບັນລຸ 0,99 (ຄາດໝາຍ ລະຫວ່າງ 0,97-1,03); ອັດຕາປະລະ ຊັ້ນ ມ ຕົ້ນ ປະຕິບັດໄດ້ເທົ່າເດີມ 12,4% (ຄາດໝາຍ 13%); ປະຊາກອນໜຸ່ມ ແລະ ຜູ້ປະລະການຮຽນ ທີ່ໄດ້ບຳລຸງຜ່ານການສຶກສານອກໂຮງຮຽນ ແລະ ເຝິກອົບຮົມວິຊາຊີບ ຈຳ
ນວນ 30.093 ຄົນ (ຄາດໝາຍ 25.000 ຄົນ); ຄູຊັ້ນປະຖົມ ແລະ ມັດທະຍົມສຶກສາ ໃຫ້ໄດ້ຮັບການເຝິກອົບຮົມ ສະເລ່ຍບັນລຸໄດ້ 22,67% ຂອງຈຳນວນຄູ
ສອນທັງໝົດ (ຄາດໝາຍບໍ່ໃຫ້ຫຼຸດ 10% ຂອງຈຳນວນຄູທັງໝົດ); ນັກຮຽນທີ່ຈົບຊັ້ນມັດທະຍົມຕອນຕົ້ນ ໄດ້ເຂົ້າຮຽນຕໍ່ໃນສາຍ ອາຊີວະສຶກສາ ແລະ ອົບຮົມວິຊາຊີບ ບັນລຸໄດ້ 5,7% (ຄາດໝາຍ 3%); ນັກສຶກສາທີ່ສະໝັກເຂົ້າຮຽນ ຢູ່ສະຖານການສຶກສາຊັ້ນສູງ ໄດ້ເຂົ້າຮຽນໃນສາຍວິທະຍາສາດທຳມະຊາດ, ເຕັກໂນໂລຊີ, ວິສະວະກຳ ແລະ ຄະນິດສາດ ຈຳນວນ 3.147 ຄົນ (ຄາດໝາຍ 2.500 ຄົນ); ໄດ້ຊຸກຍູ້ ແລະ ສົ່ງເສີມການຄົ້ນຄວ້າວິທະຍາສາດ ຈຳນວນ 41 ຫົວຂໍ້ (ຄາດໝາຍ 40 ຫົວຂໍ້); ມວນຊົນທຸກເພດທຸກໄວ ເຂົ້າຮ່ວມການຫັດກາຍຍະບໍລິຫານ, ການອອກກຳລັງກາຍ ແລະ ການຫຼິ້ນກິລາກາຍຍະກຳ ປະຕິບັດໄດ້ 50% (ຄາດໝາຍ 50%).ມີ 4 ຄາດໝາຍ ບໍ່ສາມາດບັນລຸໄດ້ຕາມແຜນຄື: ອັດຕາເຂົ້າຮຽນໃໝ່ລວມ ປ 5 ໄດ້ 95,5% ເຊິ່ງຫຼຸດຄາດໝາຍ 1.5% (ຄາດໝາຍ 97%); ອັດຕາປະລະການຮຽນຂອງນັກຮຽນຊັ້ນປະຖົມແມ່ນ 4,6% ຫຼຸດຄາດໝາຍ 0,6% (ຄາດໝາຍ 4%); ອັດຕາຈົບຊັ້ນປະຖົມສຶກສາບັນລຸພຽງແຕ່ 93,3% ເຊິ່ງຫຼຸດຄາດໝາຍ 0,7% (ຄາດໝາຍ 94%); ອັດຕາເຂົ້າຮຽນໃໝ່ລວມຂັ້ນ ມ 4 ບັນລຸພຽງແຕ່ 61,4%
ເຊິ່ງຫຼຸດຄາດໝາຍ 2,6% (ຄາດໝາຍ 64%).
ໂດຍ: ບຸນຊ້ອຍ ວິໄລພອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
