ວັນສຸກ, ວັນທີ 07 ພະຈິກ 2025
ປີ 2025 ເຊກອງ ຈາກແຂວງທຸກຍາກ ຈະກ້າວເປັນແຂວງກຸ້ມຕົນເອງທາງດ້ານການເງິນ
ເວລາອອກຂ່າວ: 2025-01-13 09:34:43 | ຜູ້ຂຽນ : admin1 | ຈຳນວນຄົນເຂົ້າຊົມ: 1061 | ຄວາມນິຍົມ: 
ປີ 2025 ເປັນປີມ້ວນທ້າຍຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ X ຂອງອົງຄະນະພັກ ໂດຍແຂວງເຊກອງຈະສືບຕໍ່ຮັກສາສະຖຽນລະພາບທາງດ້ານການເມືອງ, ຮັບປະກັນດ້ານເສດຖະກິດ ມີການຂະຫຍາຍຕົວ ໃນລະດັບ 6.2% ຂອງ GDP ບັນລຸໄດ້ 3,376 ຕື້ກີບ ໃນນັ້ນຂະແໜງກະສິກຳ ເພີ່ມຂຶ້ນ 4.34% ກວມເອົາ 62.99% ຂະແໜງອຸດສະຫະກຳ ເພີ່ມຂຶ້ນ 7.90% ກວມເອົາ 23.20%. ຂະແໜງບໍລິການ ເພີ່ມຂຶ້ນ 6.46% ກວມເອົາ 13.81% ຂອງ (GDP). ໃນຂະນະດຽວກັນຄາດ
ຄະເນລາຍຮັບ ຈະສູ້ຊົນເກັບລາຍຮັບໃຫ້ໄດ້ 616 ຕື້ກີບ ໃນນັ້ນ: ພູດຂອງສູນກາງ 95 ຕື້ກີບ ແລະ ພູດຂອງທ້ອງຖິ່ນ 521 ຕື້ກີບ ແລະ ປະຕິບັດລາຍຈ່າຍ 472 ຕື້ກີບ
ໃນໂອກາດເຂົ້າຮ່ວມກອງປະຊຸມ ລັດຖະບານເປີດກ້ວາງ ຄັ້ງທີ II ປີ 2024 ໃນລະຫວ່າງວັນທີ 6-7 ມັງກອນ 2025 ຜ່ານມາ, ທ່ານ ເຫຼັກໄຫຼ ສີວິໄລ ເຈົ້າແຂວງເຊກອງໄດ້ໃຫ້ສຳພາດຕໍ່ສື່ມວນຊົນວ່າ: ປີ 2025 ຈະກ້າວໃຫ້ເປັນແຂວງກຸ້ມຕົນເອງທາງດ້ານການເງິນເພື່ອສ້າງປະຫວັດສາດໜ້າໃໝ່ຈາກທີ່ເປັນແຂວງທຸກຍາກ, ພູດອຍໃຫ້ກຸ້ມຕົນເອງ ບໍ່ໃຫ້ເປັນພາລະຂອງລັດຖະບານ ແລະ ຈະກ້າວຂຶ້ນດຸ່ນດ່ຽງຊ່ວຍລັດຖະບານໃນປີ ຕໍ່ໄປ, ພ້ອມດຽວກັນນັ້ນຈະສືບຕໍ່ດຶງດູດການລົງທຶນຂອງຕ່າງປະເທດໃຫ້ນັບມື້ນັບຫຼາຍຂຶ້ນ ແລະ ຄຸ້ມຄອງບັນດາການລົງທຶນຂະໜາດໃຫຍ່, ໂຄງການຂຸດຄົ້ນບໍ່ຖ່ານຫີນ, ໂຄງການພະລັງງານລົມ, ໂຄງການຂຸດຄົ້ນແຮ່ບົກຊິດ ແລະ ໂຄງການພັດທະນາບໍ່ແຮ່ອື່ນໆໃຫ້ໄປຕາມແຜນການທີ່ລັດຖະບານໄດ້ວາງໄວ້ເພື່ອຮັບປະກັນຄວາມຍືນຍົງການປົກປັກຮັກສາສິ່ງ
ແວດລ້ອມ. ທ່ານກ່າວຕື່ມວ່າ: ໃນແຜນ ປີ 2025 ນີ້່ ຈະເນັ້ນໃສ່ການສ້າງເສດຖະກິດເອກະລາດເປັນເຈົ້າຕົນເອງ ແລະ ວຽກທີ່ເປັນວຽກບຸລິມະສິດ ໂດຍສະເພາະວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກເນື່ອງຈາກວ່າໄດ້ມີແຜນຄາດຄະເນ, ຄາດໝາຍວ່າຈະກຸ້ມຕົນເອງທາງດ້ານການເງິນ, ແຕ່ຄວາມທຸກຍາກເຫັນວ່າຍັງກວມອັດຕາສ່ວນສູງຢູ່ເມື່ອສົມທຽບໃສ່ມາດຕະຖານໃໝ່ ໂດຍສະເພາະມາດຕະຖານ 348 ເຊິ່ງຈະສືບຕໍ່ໃນເຂດເມືອງກະລຶມ, ດາກຈຶງ ແລະ ເມືອງລະມາມ ຈຳນວນໜຶ່ງທີ່ຍັງບໍ່ທັນໄດ້ຕາມມາດຖານທີ່ໄດ້ກຳນົດໄວ້ ແລະ ບັນຫາສຳຄັນອີກອັນໜຶ່ງໃນການແກ້ໄຂຄວາມທຸກຍາກແມ່ນໄດ້ນຳໃຊ້ກຳລັງແຮງທີ່ມີ ໂດຍສະເພາະນຳໃຊ້ການລົງທຶນຂະໜາດໃຫຍ່ປະກອບສ່ວນເອົາບັນດາການລົງທຶນທີ່ມີກອງທຶນຕ່າງໆມາພັດທະນາ ໝາຍຄວາມວ່າໃຫ້ປະຊາຊົນເຂົ້າ
ຮ່ວມ ແລະ ມີສ່ວນຮ່ວມໃນບັນດາໂຄງການດັ່ງກ່າວໃຫ້ຫຼາຍຂຶ້ນ ເພື່ອໃຫ້ມີຊີວິດການເປັນຢູ່ຂອງເຂົາເຈົ້ານັບມື້ດີຂຶ້ນ ແລະ ສືບຕໍ່ມູນເຊື້ອດຸໝັ່ນ, ວິລະຊົນເອົາມາເປັນມູນເຊື້ອໃນການພັດທະນາ, ເຖິງແມ່ນວ່າພາຍໃນແຂວງຈະມີຫຼາຍເຜົ່າຢູ່ຮ່ວມກັນ ແຕ່ກໍມີຄວາມປອງດອງສາມັກຄີ ຊ່ວຍເຫຼືອເຊິ່ງກັນ ແລະ ກັນ ໂດຍສະເພາະໃນໄລຍະມີພັກນຳພາ ແລະ ມີແນວທາງທີ່ຖືກຕ້ອງເຫັນວ່າປະຊາຊົນມີຄວາມເຂົ້າໃຈ ປະຕິບັດຕາມແນວທາງນະໂຍບາຍຂອງພັກ, ຄວາມສາມັກຄີບັນດາເຜົ່າແມ່ນໄດ້ຖືເອົາອົງການຈັດຕັ້ງຂອງພັກໂດຍສະເພາະສະມາຊິກພັກຕ້ອງໄດ້ສືບຕໍ່ນຳພາການເມືອງແນວຄິດໃຫ້ປະຊາຊົນເຂົ້າໃຈສະພາບລວມໃນປັດຈຸບັນ, ໃນນັ້ນພ້ອມກັນປະຕິບັດມະຕິ 04 ໃນການສ້າງເສດຖະກິດເອກະລາດເປັນເຈົ້າຕົນເອງ, ຕ້ອງເລີ່ມຈາກຄອບຄົວ, ປະຊາຊົນຕ້ອງຮູ້ຈັກປະຢັດ, ສະສົມ, ກຸ້ມຕົນເອງເພິ່ງພາຕົນເອງ, ບໍ່ເອື່ອຍອີງ, ບໍ່ລໍຄອຍການຊ່ວຍເຫຼືອ, ຕ້ອງຫັນປ່ຽນແນວຄິດ, ພວກເຮົາມີຊັບພະຍາກອນ, ດິນ, ນ້ຳ, ມີແນວທາງທີ່ຖືກຕ້ອງ, ມີກົດໝາຍ, ມີກົນໄກນຳພາທີ່ເປັນລະບົບຄົບຖ້ວນໂດຍໄດ້ໃຫ້ພະນັກງານສະມາຊິກພັກການນຳເປັນແບບຢ່າງໃນການຈັດຕັ້ງການປະຕິບັດ.
ທ່ານກ່າວໃຫ້ຮູ້ຕື່ມວ່າ: ໃນປີ 2024 ຜ່ານມາເສດຖະກິດມີການຂະຫຍາຍຕົວໃນລະດັບ 6% ຂອງ GDP ມີມູນຄ່າ 2,984 ຕື້ກີບ. ໃນນັ້ນ: ຂະແໜງກະສິກຳ ເພີ່ມຂຶ້ນ 4.32% ກວມເອົາ 62.81%. ຂະແໜງອຸດສາຫະກຳ ເພີ່ມຂຶ້ນ 7.10% ກວມເອົາ 22.51%. ຂະແໜງບໍລິການ ເພີ່ມຂຶ້ນ 6.84% ກວມເອົາ 14.68% ຂອງ GDP. ສາມາດເກັບລາຍຮັບໄດ້ 632.62 ຕື້ກີບ ລື່ນແຜນ 211.61%, ໃນນັ້ນ: ພູດຂອງສູນກາງ 127.21 ຕື້ກີບ ແລະ ພູດຂອງທ້ອງຖິ່ນ 505.07 ຕື້ກີບ; ການລົງທຶນ ພາກເອກະຊົນພາຍໃນ ແລະ ຕ່າງປະເທດ ແມ່ນມີບັນຍາກາດຟົດຟື້ນ ເປັນຕົ້ນ: ໂຄງການເຂື່ອນໄຟຟ້າເຊກະໝານ 3, ໂຄງການຂຸດຄົ້ນ-ປຸງແຕ່ງຖ່ານຫີນ, ໂຄງການພະລັງງານລົມ 600 ເມກະວັດ ມີຄວາມຄືບໜ້າ 90% ຄາດວ່າຈະປະຕິບັດສຳເລັດໃນປີ 2025 ແລະ ຈະທົດລອງຜະລິດກະແສໄຟຟ້າ 300 ເມກະວັດ, ຈະສົ່ງກະແສໄຟຟ້າອອກຂາຍໄປປະເທດຫວຽດນາມ ໃນເດືອນ 3-4 ປີ 2025 ນີ້ ແລະ ໃນທ້າຍປີ ແມ່ນຈະໄດ້ຜະລິດເຕັມອັດຕາ 600 ເມກະວັດ; ສຳລັບໂຄງການລົງທຶນດ້ານກະສິກຳກໍເປັນຂະບວນການຟົດຟື້ນ ເຊິ່ງສາມາດສ້າງວຽກເຮັດງານທຳ ໃຫ້ແກ່ຄົນທ້ອງຖິ່ນຢ່າງຫຼວງ
ຫຼາຍ, ສາມາດຫຼຸດຜ່ອນ ແລະ ສະກັດກັ້ນການໄປອອກແຮງງານຢູ່ຕ່າງປະເທດ.
ໂດຍ: ສຳນານ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
