ວັນຈັນ, ວັນທີ 17 ກຸມພາ 2025
ເຮັດວຽກງານກໍ່ສ້າງຮາກຖານການເມືອງ ໄປຄວບຄູ່ກັບວຽກງານການສຶກສາ
ເວລາອອກຂ່າວ: 2025-01-13 09:09:34 | ຜູ້ຂຽນ : admin1 | ຈຳນວນຄົນເຂົ້າຊົມ: 670 | ຄວາມນິຍົມ: 
ໃນທ້າຍປີ 2024 ທີ່ຜ່ານມານີ້, ກົມກໍ່ສ້າງຮາກຖານ ກົມໃຫຍ່ການເມືອງກອງທັບ ແລະ ກົມຈັດຕັ້ງ ແລະ ພະນັກງານກະ ຊວງສຶກສາທິການ ແລະ ກິລາ ເຊິ່ງນຳໂດຍສະຫາຍ ພັນເອກ ຄຳຮັງ ໄຊມຸງຄຸນ ຮອງຫົວໜ້າກົມກໍ່ສ້າງຮາກຖານ ກົມໃຫຍ່ການເມືອງກອງທັບ ໄດ້ສົມທົບກັບກອງບັນຊາການທະຫານແຂວງສະຫວັນນະເຂດ ແລະ ພະແນກສຶກສາທິການ ແລະ ກິ ລາແຂວງສະຫວັນນະເຂດ, ວິ ທະຍາໄລຄູສະຫວັນນະເຂດ ແລະ ຫ້ອງການສຶກສາ ແລະ ກິລາ ເມືອງເຊໂປນ ໄດ້ລົງເຄື່ອນໄຫວເກັບກຳຂໍ້ມູນຢູ່ໂຮງຮຽນຊັ້ນປະ ຖົມທີ່ຂາດຄູສອນຢູ່ເຂດຈຸດສຸມຈຽງຕູບ, ຈຸດສຸມຜາບັງ, ຈຸດສຸມກະຕູບ-ມະຫາດ ແລະ ບັນດາຈຸດສຸມເຂດຫ່າງໄກສອກຫຼີກ ຂອງເມືອງເຊໂປນ ແຂວງສະຫວັນນະເຂດ.
ໂດຍປະຕິບັດຕາມທິດຊີ້ນຳຂອງສອງກະຊວງ ຄື: ກະຊວງປ້ອງກັນປະເທດ ແລະ ກະຊວງສຶກສາທິການ ແລະ ກິລາ ໃນການພັດທະນາວຽກງານການສຶກສາໃນທົ່ວປະເທດ ກໍຄື ການແກ້ໄຂບັນຫາຄູອາສາສະໝັກ, ບັນຫາຄູສອນ ບໍ່ພຽງພໍໃນເຂດຊົນນະບົດ, ຫ່າງໄກສອກຫຼີກ ເຊິ່ງໄດ້ເລີ່ມຈັດຕັ້ງປະຕິບັດຢູ່ແຂວງສະຫວັນນະເຂດ ກໍຄື ເມືອງເຊໂປນ ເປັນແຂວງທຳອິດ ແລະ ເປັນເມືອງຕົ້ນແບບ ໃນການຈັດຕັ້ງປະຕິບັດຢູ່ບັນດາແຂວງ, ເມືອງເປົ້າໝາຍຕ່າງໆ ທົ່ວປະເທດ. ໃນການລົງເກັບຂໍ້ມູນສະຖິຕິຄູສອນ, ນັກຮຽນ ແລະ ໂຮງຮຽນຊັ້ນປະຖົມທີ່ຂາດຄູສອນ ໃນຄັ້ງນີ້, ກົມກໍ່ສ້າງຮາກ ຖານ ກົມໃຫຍ່ການເມືອງກອງ ທັບ ພ້ອມດ້ວຍກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ, ກອງບັນຊາການທະຫານແຂວງສະຫວັນນະເຂດ, ພະແນກສຶກສາທິການ ແລະ ກິລາແຂວງ, ເມືອງເຊໂປນ ແລະ ວິທະຍາໄລຄູສະຫວັນນະເຂດ ໄດ້ມີການພົບປະໂອ້ລົມເພື່ອປຸກລະດົມຊຸກຍູ້ຄູອາສາສະໝັກທີ່ສອນມາຫຼາຍປີ ແລະ ບໍ່ທັນໄດ້ບັນຈຸເຂົ້າເປັນລັດຖະກອນຢູ່ບັນດາຈຸດສຸມຕ່າງໆ ຂອງເມືອງເຊໂປນ ໃຫ້ເຂົາເຈົ້າເຂົ້າເປັນທະຫານອາຊີບ ໂດຍບັນຈຸຢູ່ໃນກຳລັງປະກອບອາວຸດທ້ອງຖິ່ນກອງບັນຊາການທະຫານແຂວງສະຫວັນນະເຂດ ເພື່ອເຮັດໜ້າທີ່ໃນການສິດສອນນ້ອງນ້ອຍນັກ ຮຽນຢູ່ເຂດຫາງໄກສອກຫຼີກຕາມຈຸດສຸມຕ່າງໆ ເຂດເມືອງເຊໂປນຂອງລັດຖະບານ; ສ່ວນນະໂຍບາຍຕ່າງໆ ຕໍ່ຄູອາສາສະໝັກທີ່ເຂົ້າເປັນທະຫານອາຊີບແລ້ວນັ້ນ ແມ່ນຈະໄດ້ຮັບນະໂຍບາຍຕ່າງໆ ຂອງກອງທັບຕາມລະບຽບການ ເປັນຕົ້ນແມ່ນນະໂຍບາຍໃນການເລື່ອນຊັ້ນ, ເລື່ອນທຽບຊັ້ນ, ເລື່ອນຂັ້ນຕ່າງໆ ຕາມກົດໝາຍຂອງນາຍທະຫານກອງທັບປະຊາຊົນລາວ. ການຊຸກຍູ້ປຸກລະດົມຄູອາສາສະໝັກໃນຄັ້ງນີ້ ເຫັນວ່າ ບັນດາຄູອາສາສະໝັກແຕ່ລະຄົນຢູ່ຈຸດສຸມຕ່າງໆກໍມີຄວາມສະໝັກໃຈ ແລະ ດີໃຈ ຕໍ່ກັບແນວທາງນະໂຍບາຍຂອງພັກ-ລັດຖະບານ ກໍຄື ກອງທັບໃນການແກ້ໄຂບັນຫາຄູອາສາສະໝັກມາຫຼາຍປີ ທັງຍັງເປັນການແກ້ໄຂບັນຫາປະລະການຮຽນຂອງນັກຮຽນໃນເຂດຊົນ ນະບົດຫ່າງໄກສອກຫຼີກ ໃຫ້ຫຼຸດລົງເທື່ອລະກ້າວ.
ໂອກາດດັ່ງກ່າວ, ຍັງໄດ້ພົບປະໂອ້ລົມ ແລະ ຊີ້ນຳຄະນະພັກ-ຄະນະບັນຊາກອງກໍ່ສ້າງຮາກຖານການເມືອງ ຈຸດສຸມຈຽງຕູບ ແລະ ບັນດາກອງຮ້ອຍທະຫານຊາຍແດນ ເພື່ອຄັດເລືອກເອົາພະນັກງານ-ນັກຮົບ ເຂົ້າມາເຝິກ ອົບຮົມວິຊາຄູ ທີ່ວິທະຍາໄລຄູສະຫວັນນະເຂດ ຈະໄດ້ເປີດເຝິກ ອົບຮົມວຽກງານຄູໃນມໍ່ໆນີ້ ເພື່ອ ຊ່ວຍສິດສອນນ້ອງນ້ອຍຢູ່ໂຮງ ຮຽນເຂດຫ່າງໄກສອກຫຼີກຈຸດ ສຸມຈຽງຕູບ ແລະ ຈຸດສຸມຕ່າງໆ ຂອງເມືອງເຊໂປນ ແຂວງສະ ຫວັນນະເຂດ, ສ່ວນກຳລັງອ້າຍນ້ອງທະຫານທີ່ສອນຊ່ວຍນັ້ນກໍຈະໄດ້ຮັບເງິນອຸດໜູນ 70% ຂອງເງິນເດືອນຈາກກະຊວງສຶກສາທິການ ແລະ ກິລາ ນຳອີກ.
ໂດຍ: ວິລະພົງ ເທບໂພ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
