ກອງທັບປະຊາຊົນລາວ
 
ວັນອັງຄານ, ວັນທີ 11 ກຸມພາ 2025

  

ບ້ານ​ພູ​ດອກ​ໄມ້ ເມືອງ​ຫົງ​ສາ ຈັດ​ງານ​ບຸນ​ກິນຈຽງ ຫຼື ນໍ​ເປ​ເຈົ່າ ປະຈຳ​ປີ 2024
ເວລາອອກຂ່າວ: 2025-01-09 08:49:12 | ຜູ້ຂຽນ : admin3 | ຈຳນວນຄົນເຂົ້າຊົມ: 252 | ຄວາມນິຍົມ:



ເພື່ອ​ເປັນ​ການ​ສືບ​ສານ​ວັດທະນະທຳ​ຊົນເຜົ່າ​ມົ້ງ​ທີ່​ໄດ້​ສືບ​ຖອດ​ກັນ​ມາ​ແຕ່​ບູຮານ ເຊິ່ງ​ງານ​ບຸນ​ກິນ​ຈຽງ​ຊົນເຜົ່າ​ມົ້ງ ຫຼື ນໍ່​ເປ​ເຈົ່າ ເປັນ​ງານ​ສົ່ງ​ທ້າຍ​ປີ​ເກົ່າ​ຕ້ອນຮັບ​ປີ​ໃໝ່, ເປັນ​ສັນຍາ​ລັກ​ແຫ່ງ​ຄວາມ​ສາມັກຄີ, ຄວາມ​ຜູກ​ພັນ​ໃນ​ວົງສາ​ຄະນະ​ຍາດ ຂອງ​ຊົນເຜົ່າ​ມົ້ງ​ທີ່ຢູ່​ຫ່າງ​ໄກ​ໄດ້​ມາ​ພົບ​ປະ​ສ້າງສັນ ແລະ ເພື່ອ​ເຮັດ​ພິທີກຳ​ລະນຶກ​ເຖິງ​ບັນ​ພະ​ບູ​ລຸດ​ຂອງ​ຍາດ​ພີ່ນ້ອງ​ຕົນ ທີ່​ສ່ອງ​ແສງ​ເຖິງ​ຮີດຄອງ​ປະເພນີ, ວັດທະນະທຳ​ອັນ​ດີງາມ​ຂອງ​ຊາວ​ລາວ ໂດຍ​ສະເພາະ​ແມ່ນ​ຊົນເຜົ່າ​ມົ້ງ​ທີ່​ມີ​ເອກະລັກ​ສະເພາະ​ຂອງ​ເຜົ່າ​ຕົນ. ດັ່ງນັ້ນ, ໃນ​ວັນ​ທີ 3 ມັງກອນ 2025 ບ້ານ​ພູ​ດອກ​ໄມ້ ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ໄດ້​ຈັດ​ງານ​ບຸນ​ກິນ​ຈຽງ (ນໍ​ເປ​ເຈົ່າ) ເຜົ່າ​ມົ້ງ ປະຈຳ​ປີ 2024, ໂດຍ​ມີ ​ທ່ານ ພອນ​ສະຫວັນ ໄຊ​ສົມ​ພັນ, ເຈົ້າເມືອງ ເມືອງ​ຫົງ​ສາ, ມີ​ບັນດາ​ທ່ານ​ຄະນະ​ນຳ​ຂອງ​ເມືອງ, ແຂກ​ຖືກ​ເຊີນ, ອົງການ​ປົກຄອງ​ບ້ານ ແລະ ປະຊາຊົນ​ພາຍ​ໃນ​ບ້ານ ເຂົ້າ​ຮ່ວມ​. ທ່ານ ບຸນ​ມີ ເຮີ ນາຍບ້ານ​ພູ​ດອກ​ໄມ້ ໄດ້​ເລົ່າ​ປະຫວັດ​ຄວາມ​ເປັນ​ມາ ຂອງ​ບຸນ​ກິນ​ຈຽງ​ໂດຍ​ຫຍໍ້ ພ້ອມ​ທັງ​ລາຍ​ງານ​ການຈັດຕັ້ງ​ປະຕິບັດ​ແຜນ​ພັດທະນາ​ບ້ານ​ໂດຍ​ຫຍໍ້​ຕໍ່​ພິທີ, ໃນ​ໂອກາດ​ດັ່ງກ່າວ ທ່ານ ພອນ​ສະຫວັນ ໄຊ​ສົມ​ພັນ ​ໄດ້​ໂອ້​ລົມ​ຕໍ່​ພິທີ ແລະ ປະຊາຊົນ​ພາຍ​ໃນ​ບ້ານ ເຊິ່ງ​ກ່ອນ​ອື່ນ ທ່ານ​ໄດ້​ຕີ​ລາຄາ​ສູງ ແລະ ຍ້ອງຍໍ​ຊົມເຊີຍ ຕໍ່​ຄະນະ​ພັກ-ອົງການ​ປົກຄອງ ແລະ ປະຊາຊົນ​ພາຍ​ໃນ​ບ້ານ​ສ້າງ​ມາ​ໄດ້​ໃນ​ໄລຍະ​ຜ່ານ​ມາ ພ້ອມ​ນັ້ນ ທ່ານ​ຍັງ​ໄດ້​ເນັ້ນ​ໜັກ​ຫຼາຍ​ບັນຫາ ໃຫ້​ຄະນະ​ພັກ-ອົງການ​ປົກຄອງ​ບ້ານ​ສືບຕໍ່​ນຳພາ-ຊີ້​ນຳ ແລະ ຈັດ​ຕັ້ງ​ປະຕິບັດ​ບັນດາ​ໜ້າ​ວຽກ​ໃຫ້​ບັນລຸ​ຕາມ​ແຜນການ ສ້າງ​ບ້ານ​ໃຫ້​ມີ​ຄວາມ​ສະຫງົບ, ມີ​ການ​ພັດທະນາ, ຊີວິດ​ການ​ເປັນ​ຢູ່​ຂອງ​ປະຊາຊົນ​ໄດ້​ຮັບ​ການ​ພັດທະນາ​ດີ​ຂຶ້ນ. ໃນ​ໂອກາດ​ນີ້, ຍັງ​ໄດ້​ມີ​ການ​ບາສີສູ່ຂວັນ ອວຍພອນ​ເຊິ່ງ​ກັນ ແລະ ກັນ, ບຸນ​ກິນ​ຈຽງ​ປີ​ນີ້ ຜູ້​ເຂົ້າ​ຮ່ວມ ຍັງ​ໄດ້​ຮັບ​ຊົມ​ການສະແດງ​ສິລະ​ປະ-ວັນນະຄະດີ, ເຂົ້າ​ຮ່ວມ​ການ​ໂຍນ​ໝາກ​ຄອນ, ເປົ່າ​ແຄນ, ຂັບ​ລຳ, ຍິງ​ໜ້າ​ເກັກ ແລະ ອື່ນໆ ເຊິ່ງ​ໄດ້​ດຳເນີນ​ໄປ​ດ້ວຍ​ບັນຍາກາດ​ອັນ​ຄຶກຄື້ນ ມ່ວນຊື່ນ ຮັກສາ​ໄດ້​ຄວາມ​ສະຫງົບ​ປອດ​ໄພ. ພາບໂດຍ: ຄຳ​ພຸດມະຫາວົງ​ສະ​ນັ່ນ ຂ່າວໂດຍ: ສີ​ພູ​ວົງ ວິໄລ​ແກ້ວ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ