ວັນອາທິດ, ວັນທີ 01 ທັນວາ 2024
ການນຳແຂວງຈໍາປາສັກ ວາງພວງມາລາ ແລະ ວາງກະຕ່າດອກໄມ້ ໃນໂອກາດວັນຊາດທີ 2 ທັນວາ
ເວລາອອກຂ່າວ: 2024-11-29 13:30:27 | ຜູ້ຂຽນ : admin2 | ຈຳນວນຄົນເຂົ້າຊົມ: 431 | ຄວາມນິຍົມ: 
ວັນທີ 29 ພະຈິກ 2024 ນີ້, ການນໍາແຂວງຈຳປາສັກນໍາໂດຍ ສະຫາຍ ປອ ອາລຸນໄຊ ສູນນະລາດ ກໍາມະການສູນກາງພັກ ເລຂາພັກແຂວງ ເຈົ້າແຂວງ ແຂວງຈໍາປາສັກພ້ອມດ້ວຍບັນດາຂົງເຂດການເມືອງ, ຂົງເຂດປ້ອງກັນຊາດ-ປ້ອງກັນຄວາມສະຫງົບ,ຂົງເຂດເສດຖະກິດ, ຂົງເຂດວັດທະນະທຳ-ສັງຄົມ, ຂົງເຂດຍຸດຕິທຳ, ນິຕິບັນຍັດ, ຕຸລາການ, ສາມາຄົມ ແລະ ຄະນຳນະຄອນປາກເຊ ໄດ້ເຂົ້າວາງພວງມາລາທີ່ອະນຸສາວະລີນັກຮົບນິລະນາມ ແລະ ວາງກະຕ່າດອກໄມ້ທີ່ອະນຸສອນສະຖານປະທານ ໄກສອນ ພົມວິຫານ ຢູ່ທີ່ເດີ່ນ ສະໜາມແດງ ຫຼັກ 2 ນະຄອນປາກເຊ. ເນື່ອງໃນໂອກາດວັນ ຊາດ ທີ 2 ທັນວາ ຄົບຮອບ 49 ປີ ແລະ ວັນຄ້າຍວັນເກີດຂອງ ປະທານ ໄກສອນ ພົມວິຫານ ຄົບຮອບ 104 ປີ.
ການເຂົ້າວາງພວງມາລາ ແລະ ວາງກະຕ່າດອກໄມ້ ໃນຄັ້ງນີ້ ກໍເພື່ອເປັນການສະແດງ ຄວາມເຄົາລົບ ແລະ ລະນຶກເຖິງ ຄຸນງາມຄວາມດີ, ຄວາມກະຕັນຍູຮູ້ບຸນຄຸນອັນສູງສົ່ງຕໍ່ທ່ານຜູ້ ນໍາການປະຕິວັດ, ນັກຮົບນິລະນາມ ພ້ອມດ້ວຍປະຊາຊົນ ບັນດາເຜົ່າທີ່ເສຍສະຫຼະຊີວິດເລືອດເນື້ອອຸທິດໃຫ້ແກ່ປະເທດຊາດ ໃນພາລະກິດແຫ່ງການຕໍ່ສູ້ກູ້ ຊາດຍາດເອົາເອກະລາດ ແລະ ຜືນແຜ່ນດີນອັນຄົບຖ້ວນມາ ໃຫ້ປະຊາຊົນບັນດາເຜົ່າ ໃຫ້ໄດ້ ຢູ່ເຢັນເປັນສຸກຈົນມາເຖິງທຸກວັນນີ້. ເຊິ່ງບຸນຄຸນ ແລະ ຄວາມດີດັ່ງກ່າວຈະຢືນຍົງຄົງຢູ່ຄູ່ພາລະກິດປະຕິວັດລາວໄປຕະຫຼອດກາລະນານ.
ໃນໂອກາດສໍາຄັນນີ້ ຍັງກໍ່ໄດ້ມີພິທີໂຮມຊຸມນຸມໃຫຍ່ ເພື່ອສະເຫຼີມສະຫຼອງວັນສະຖາປານາ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 49 ປີ ຄື ( 2 ທັນວາ 1975- 2 ທັນວາ 2024 ) ແລະ ລະນຶກເຖີງວັນເກີດ ປະທານ ໄກສອນ ພົມວິຫານ ຄົບຮອບ 104 ປີ.ເຊີ່ງພິທີດັ່ງກ່າວໄດ້ຈັດຂື້ນຢ່າງສົມກຽດຢູ່ທີ່ເດີ່ນສະໜາມແດງ ນະຄອນປາກເຊ .ໂດຍເປັນກຽດເຂົ້າຮ່ວມ ແລະ ກ່າວສູນທອນພົດ ຂອງ ສະຫາຍ ປອ ອາລຸນໄຊ ສູນນະລາດ ກຳມະການສູນກາງພັກ, ເລຂາພັກແຂວງ ເຈົ້າແຂວງ ແຂວງຈໍາປາສັກ, ພ້ອມດ້ວຍ ບັນດາການນຳພັກ-ລັດຂັ້ນແຂວງ, ອົງການຈັດຕັ້ງມະຫາຊົນ, ກຳລັງປ້ອງກັນຊາດ-ປ້ອງກັນຄວາມສະຫງົບ, ພະນັກງານປະຕິວັດອາວຸໂສບໍານານ, ພະນັກງານລັດຖະກອນ ຈາກບັນດາພະແນກການ, ຫ້ອງການ, ອຳນາດການປົກຄອງບ້ານ, ພໍ່ແມ່ປະຊາຊົນ, ຄູ-ອາຈານ,ນັກຮຽນ-ນັກສືກສາ ເຂົ້າຮ່ວມ.
ສະຫາຍ ປອ ອາລຸນໄຊ ສູນນະລາດ ໄດ້ຂື້ນກ່າວສູນທອນພົດຕໍ່ພິທີ, ເຊິ່ງເນື້ອໃນ ໂດຍລວມແລ້ວແມ່ນຍົກໃຫ້ເຫັນ ບັນດາໝາກຜົນ, ຜົນງານອັນຍິ່ງໃຫຍ່ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ພາຍໃຕ້ການ ຊີ້ນໍາ-ນໍາພາທີ່ສະຫຼາດສ່ອງໃສຂອງພັກປະຊົນປະຕິວັດລາວ ຕະຫຼອດໄລຍະ 49 ປີຜ່ານມາ, ໂດຍສະເພາະແມ່ນໃນໄລຍະການປະຕິບັດນະໂຍບາຍປ່ຽນແປງໃໝ່ ຢ່າງມີຫຼັກການຂອງພັກ, ເຮັດໃຫ້ປະເທດຊາດອັນແສນຮັກຂອງພວກເຮົາ ນັບມື້ໄດ້ຮັບການພັດທະນາ ແລະ ເຕີບໃຫຍ່ເຂັ້ມແຂງໃນທຸກດ້ານ, ພື້ນຖານໂຄງລ່າງ ແລະ ສິ່ງອໍານວຍຄວາມສະດວກຕ່າງໆ ທີ່ເປັນພື້້ນຖານໃນການພັດທະນາປະເທດຊາດມີການຂະຫຍາຍຕົວ ແລະ ມີຄຸນນະພາບ, ຊີວິດການເປັນ ຢູ່ທາງດ້ານວັດຖຸ ແລະ ຈິດໃຈຂອງປະຊາຊົນລາວບັນດາເຜົ່າດີຂຶ້ນຢ່າງຈະແຈ້ງ, ປະເທດຊາດມີຄວາມສະຫງົບ ແລະ ສັງຄົມມີຄວາມເປັນລະບຽບຮຽບຮ້ອຍ ກາຍເປັນທ່າແຮງອັນໜັກ ແໜ້ນ ໃນການພັດທະນາປະເທດຊາດໃຫ້ດີຂຶ້ນຢ່າງຕໍ່ເນື່ອງ, ການຮ່ວມມືກັບບັນດາປະເທດໃນພາກພື້ນ ແລະ ສາກົນ ນັບມື້ກວ້າງຂວາງ, ໜັກແໜ້ນ ແລະ ຂະຫຍາຍຕົວ ຍິ່ງໆຂຶ້ນ, ໂດຍສະເພາະແມ່ນ ກັບບັນດາປະເທດເພື່ອນມິດຍຸດທະສາດ ທີ່ຮ່ວມອຸດົມການອັນດຽວກັນ ແມ່ນນັບມື້ແຕກດອກອອກຜົນ ແລະ ໝັ້ນຄົງທະນົງແກ່ນ. ທັງໝົດນັ້ນແມ່ນເປັນເງື່ອນໄຂ ແລະ ທ່າແຮງອັນສໍາຄັນ ທີ່ປະກອບສ່ວນເຂົ້າໃນການພັດທະນາປະເທດຊາດ ໃຫ້ຫຼຸດພົ້ນອອກຈາກຄວາມດ້ອຍພັດທະນາ ແລະ ກ້າວຂຶ້ນສູ່ຈຸດໝາຍສັງຄົມນິຍົມທີ່ພັກ ໄດ້ກຳນົດໄວ້ ແນໃສ່ເພື່ອເຮັດໃຫ້ ປະເທດຊາດຂອງພວກເຮົາມີການພັດທະນາດີຂື້ນຢ່າງບໍ່ຢຸດຢັ້ງ.
ຂ່າວ: ວາທີ ດາວົງ ບຸດຕະວົງ
ພາບ: ຮ້ອຍໂທ ນາງ ສີລິຄານ ສີດາວົງ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
