ວັນຈັນ, ວັນທີ 02 ທັນວາ 2024
ກອງປະຊຸມຮອບວຽນຄັ້ງທີ XVIII ລະຫວ່າງ ທະຫານແຂວງເຊກອງ ແລະ 3 ກອງບັນຊາການ ທະຫານຊາຍແດນ ສສ ຫວຽດນາມ.
ເວລາອອກຂ່າວ: 2024-11-29 12:47:18 | ຜູ້ຂຽນ : admin2 | ຈຳນວນຄົນເຂົ້າຊົມ: 361 | ຄວາມນິຍົມ: 
ກອງປະຊຸມຮອບວຽນທີ XVIII ລະຫວ່າງກອງບັນຊາການ ທະຫານແຂວງເຊກອງ ຮ່ວມກັບ3 ກອງບັນຊາການ ທະຫານຊາຍແດນ ສສ ຫວຽດນາມ,ໄດ້ໄຂຂຶ້ນໃນ ວັນທີ 28 ພະຈິກ 2024 ນີ້, ທີ່ກອງບັນຊາການທະຫານແຂວງເຊກອງເປັນເຈົ້າພາບ, ເຊິ່ງຝ່າຍລາວມີ ສະຫາຍ ພົນຈັດຕະວາ ທອງສີ ກຸນສະນະ ຫົວໜ້າການທະຫານກອງບັນຊາການທະຫານແຂວງເຊກອງ, ຝ່າຍ ຫວຽດນາມ ນຳຄະນະໂດຍ ສະຫາຍ ພັນເອກ ຫ່ວາງ ວັນ ເມິ໋ນ ,ຫົວໜ້າການເມືອງກອງບັນຊາການທະຫານຊາຍແດນແຂວງກວາງນາມ, ມີບັນດາສະຫາຍ ຄະນະກອງບັນຊາການທະຫານຊາຍແດນຈາກ ແຂວງກອນຕູມ ແລະ ແຂວງເທື່ອທຽນເຫ້ວ, ພ້ອມດ້ວຍຄະນະຜູ້ແທນທີ່ກ່ຽວຂ້ອງທັງສອງຝ່າຍເຂົ້າຮ່ວມ.
ໂດຍປະຕິບັດຕາມບົດບັນທຶກຂອງກອງປະຊຸມຮອບວຽນຄັ້ງທີ XVII ລະຫວ່າງກອງບັນຊາການທະຫານຊາຍແດນ 3 ແຂວງຄື້ : ແຂວງກວາງນາມ, ແຂວງກອນຕູມ, ແຂວງເທື່ອທຽນເຫ້ວ ສສ ຫວຽດນາມ ກັບ ກອງບັນຊາການ ທະຫານແຂວງເຊກອງ ສປປ ລາວ,ໄດ້ລົງນາມໃນຄັ້ງວັນທີ 10 ກໍລະກົດ 2023 ຢູ່ທີ່ກອງບັນຊາການທະຫານຊາຍແດນແຂວງກອນຕູມ ເປັນເຈົ້າພາບ ແລະ ກອງປະຊຸມຄັ້ງນີ້ ທັງສອງຝ່າຍໄດ້ຕີລາຄາສູງຕໍ່ຜົນສຳເລັດໃນການຈັດຕັ້ງປະຕິບັດການພົວພັນຮ່ວມມືຮອບດ້ານໃນໄລຍະຜ່ານມາ ພ້ອມທັງຍົກໃຫ້ເຫັນສະພາບການທີ່ພົ້ນເດັ່ນ, ມີທັງດ້ານດີ - ດ້ານອ່ອນ ແລະ ຂໍ້ຄົງຄ້າງໃນການຮ່ວມມືພັດທະນາເສດຖະກິດ-ສັງຄົມຂອງທັງສອງປະເທດ ເວົ້າລວມ, ເວົ້າສະເພາະ ແມ່ນການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຕາມຊາຍແດນ, ເຊິ່ງຜ່ານມາປະຊາຊົນທັງສອງຊາດທີ່ອາໄສຢູ່ລຽບຕາມຊາຍແດນ, ໄດ້ພ້ອມກັນເອົາໃຈໃສ່ປົກປັກຮັກສາ ແລະ ສະກັດກັ້ນການເຄື່ອນໄຫວຂອງກຸ່ມຄົນທີ່ຫວັງບໍ່ດີ, ການຄ້າຂາຍເຖື່ອນລັກລອບພາສີ, ຂຸດຄົ້ນເຄື່ອງປ່າຂອງດົງທີ່ພັກ ແລະ ລັດຖະບານຫວງຫ້າມ, ຕະຫຼອດຮອດການໄປມາເຄື່ອນຍ້າຍຖິ່ນຖານພູມລຳເນົາ ແລະ ການສ້າງຄອບຄົວຜົວເມຍທີ່ບໍ່ຖືກຕ້ອງຕາມລະບຽບກົດ ໝາຍຂອງທັງສອງປະເທດວາງອອກ, ພ້ອມກັນນັ້ນ ທັງສອງຝ່າຍ ຍັງໄດ້ພ້ອມກັນປະສານສົມທົບໃນການກວດກາສາລະເວຕາມຊາຍແດນຮ່ວມກັນ,ໂດຍແນ່ໃສ່ເພື່ອປົກປັກຮັກສາລະບົບຫຼັກໝາຍຊາຍແດນແຫ່ງຊາດ ແລະ ສະກັດກັ້ນ ກໍລະນີການເຂົ້າ-ອອກດ່ານ, ການລ່ວງລ້ຳຂ້າມຜ່ານຊາຍແດນແບບຜິດຕໍ່ຂ້ໍກຳນົດ, ກົດລະບຽບຊາຍແດນຢ່າງເຂັ້ມງວດ.
ໃນໂອກາດດັ່ງກ່າວ ທັງສອງຝ່າຍກໍ່ໄດ້ລົງນາມເຊັນບົດບັນທຶກຊ່ວຍຈຳກ່ຽວກັບແຜນການສືບຕໍ່ຮ່ວມມືພັດທະນາເສດຖະກິດ-ສັງຄົມ, ການກວດກາລາດຕະເວນເພື່ອປົກປັກຮັກສາຫຼັກໝາຍ ລະຫວ່າງ 3 ແຂວງຂອງ ສສ ຫວຽດນາມ ທີ່ມີຊາຍແດນຕິດກັບແຂວງເຊກອງ ໂດຍປ່ຽນວາລະກອງປະຊຸມ ຈາກ 1 ປີ 2 ເທືອມາເປັນປີລະເທື່ອ.
ພາບ-ຂ່າວ : ຮ້ອຍເອກ ກອງຄໍາ ຈິ່ງດ້າຍອດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
