ວັນຈັນ, ວັນທີ 02 ທັນວາ 2024
ຫ້ອງການເມືອງ ວຕກ ສະຫຼຸບວຽກງານຮອບດ້ານປະຈໍາປີ 2024.
ເວລາອອກຂ່າວ: 2024-11-29 12:32:41 | ຜູ້ຂຽນ : admin2 | ຈຳນວນຄົນເຂົ້າຊົມ: 418 | ຄວາມນິຍົມ: 
ວັນທີ 28 ພະຈິກ 2024 ນີ້. ຫ້ອງການເມືອງ ວິທະຍາຄານເຕັກນິກການທະຫານ ໄດ້ຈັດກອງປະຊຸມສະຫຼຸບວຽກງານຮອບດ້ານປະຈໍາປີ 2024 ແລະ ຜ່ານທິດທາງແຜນການປີ 2025. ໂດຍການເປັນປະທານຂອງ ສະຫາຍ ພົນຈັດຕະວາ ແສງຍືນ ລັດສະໝີ ຫົວໜ້າການເມືອງ ວິທະຍາຄານເຕັກນິກການທະຫານ. ມີຄະນະພັກ-ຄະນະບັນຊາ, ມີ 6 ຫ້ອງ, 6 ຄະນະວິຊາ, ສູນທົດລອງເຝິກຫັດ, ກອງພັນຄຸ້ມຄອງນັກສຶກສາ ຕະຫຼອດຮອດພະນັກງານ-ນັກຮົບ ເຂົ້າຮ່ວມ.
ສະຫາຍ ພັນໂທ ຄໍາເຜີຍ ທຳມະນີວົງ ຮອງຫົວໜ້າຫ້ອງການເມືອງ ໄດ້ ຍົກໃຫ້ເຫັນຜົນງານດ້ານດີ ແລະ ຂໍ້ຄົງຄ້າງຜ່ານການເຄື່ອນໄຫວປະຕິບັດວຽກງານຮອບດ້ານໃນ 1 ປີຜ່ານມາ. ໃນນັ້ນມີດ້ານຕັ້ງໜ້າທີ່ພົ້ນເດັ່ນ ເປັນຕົ້ນແມ່ນ ຫ້ອງການເມືອງໄດ້ເປັນເສນາທິການໃຫ້ແກ່ ຄະນະພັກ-ຄະນະອໍານວຍການ ວຕກ ໃນການເຮັດວຽກງານພັກ-ວຽກງານພະນັກງານກໍຄືການໂຄສະນາເຜີຍແຜ່ແນວທາງນະໂຍບາຍການນໍາພາຂອງພັກ ເຊິ່ງໄດ້ເອົາໃສ່ໃຈສຶກສາອົບຮົມການເມືອງ-ນໍາພາແນວຄິດ ໃຫ້ແກ່ພະນັກງານ-ນັກຮົບ, ນັກສຶກສາໃນຂັ້ນຫ້ອງ ກໍຄືທົ່ວ ວຕກ ເປັນແຕ່ລະໄລຍະດ້ວຍຫຼາຍຮູບແບບ ເພື່ອເປັນການສົ່ງເສີມປຸກລະດົມ ເຮັດໃຫ້ນາຍ ແລະ ພົນທະຫານທົ່ວ ວຕກ ມີຄວາມອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການນໍາພາຂອງພັກຢ່າງໜັກແໜ້ນ, ໄປຄຽງຄູ່ກັບການປະຕິບັດໜ້າທີ່ວິຊາສະເພາະຂອງຕົນ ເຮັດໃຫ້ສະພາບພາຍໃນມີຄວາມສະຫງົບໂດຍພື້ນຖານ. ໃນປີ 2024 ຜ່ານມາ ໄດ້ຊີ້ນໍາ ວຽກງານກໍ່ສ້າງພັກ-ກໍ່ສ້າງພະນັກງານທົ່ວ ວຕກ ໂດຍຍຶດໝັ້ນຕາມ 5 ຫຼັກການ 3 ທິດນໍາຂອງພັກ, ໄດ້ສໍາເລັດກອງປະຊຸມໃຫຍ່ສະມາຊິກພັກຂັ້ນຕົນ ແລະ ປະກາດຮັບຮອງເອົາ ຄະນະບໍລິຫານງານພັກ 7 ສະຫາຍ, ເປີດຮຽນເອກະສານສະໜັບສະໜູນພັກ, ກົດລະບຽບພັກໃຫ້ແກ່ມະຫາຊົນຜູ້ກ້າວໜ້າທົ່ວ ວຕກ ໄດ້ 4 ຊຸດ, ຮັບເອົາສະມາຊິກພັກສົມບູນ-ສໍາຮອງພາຍໃນກົມກອງໄດ້ 76 ສະຫາຍ, ຈັດຕັ້ງສະຫຼຸບຖອດຖອນບົດຮຽນການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັ້ກແໜ້ນ, ຮ່າງແຜນການມະຕິຕົກລົງຂອງຄະນະພັກ ວຕກ ວ່າດ້ວຍການກະກຽມດໍາເນີນກອງປະຊຸມໃຫຍ່ຂອງບັນດາຮາກຖານພັກ, ກອງປະຊຸມໃຫຍ່ອົງຄະນະພັກ ວຕກ ສໍາເລັດ; ວຽກງານພະນັກງານ ກໍໄດ້ປະຕິບັດຕໍ່ພະນັກງານ-ນັກຮົບຢ່າງທົ່ວເຖິງ ແລະ ເປັນເອກະພາບ, ສໍາລັບວຽກງານນະໂຍບາຍ ໄດ້ປະກອບເອກະສານເງິນອູດໜູນຕ່າງໆໃຫ້ ພະນັກງານພາຍໃນກົມກອງ, ສຳລັບວຽກງານພະລາທິການແກ້ໄຂຊີວິດການເປັນຢູ່ ປັດຈຸບັນຫ້ອງການເມືອງມີເງິນຄັງລວມ 24, 297,000 ກີບ, ຈາກຜົນງານທີ່ກ່າວມານັ້ນ ເຮັດໃຫ້ ທັງ 3 ໜ່ວຍພັກທົ່ວຫ້ອງການເມືອງ ຖືກຮັບຮອງເປັນໜ່ວຍພັກປອດໃສ ເຂັ້ມແຂງ ໜັກແໜ້ນ, ມີສະມາຊິກພັກແຂງ 49 ສະຫາຍ, ສະມາຊິກພັກກາງ 2 ສະຫາຍ. ຄຽງຄູ່ກັບຜົນງານດ້ານຕັ້ງໜ້າແລ້ວ ຍັງມີຂໍ້ຄົງຄ້າງ ເຊິ່ງພະນັກງານ-ນັກຮົບທົ່ວຫ້ອງການເມືອງຕ້ອງໄດ້ ພ້ອມກັນຫາທິດທາງປັບປຸງແກ້ໄຂໃນຕໍ່ຫນ້າ.
ໃນໂອກາດນີ້ ສະຫາຍ ພົນຈັດຕະວາ ແສງຍືນ ລັດສະໝີ ຍັງໄດ້ເນັ້ນ ໜັກໃຫ້ ຄະນະພັກ-ຄະນະບັນຊາຫ້ອງ ຈົ່ງເອົາໃຈໃສ່ສຶກສາອົບຮົມການເມືອງແນວຄິດໃຫ້ແກ່ພະນັກງານ-ນັກຮົບຂັ້ນຕົນເປັນປົກກະຕິ ໂດຍຖືເອົາການດໍາເນີນຊິວິດການເມືອງ, ຕໍາໜິສົ່ງຂ່າວເຊິ່ງກັນ ແລະ ກັນເປັນພື້ນຖານການຄົງຕົວ ບົນຫຼັກການລວມສູນປະຊາທິປະໄຕ ເພື່ອໃຫ້ ນາຍທະຫານພາຍໃນຫ້ອງການເມືອງມີຄຸນທາດການເມືອງໜັກແໜ້ນ, ມີຄຸນສົມບັດ, ສິນທໍາປະຕິວັດ; ເອົາໃຈໃສ່ຕິດຕາມການປະຕິບັດນະໂຍບາຍຕ່າງໆຕໍ່ພະນັກງານ-ນັກຮົບຢ່າງທົ່ວເຖິງ; ປົກປັກ, ຮັກສາວັດຖຸ ອຸປະກອນຫ້ອງການ ເພື່ອໝູນໃຊ້ໃຫ້ຊົມໃຊ້ໄດ້ຍາວນານ ແລະ ຊີ້ນໍາການກໍ່ສ້າງກອງແຂງໜ່ວຍພັກຮູ້ນໍາພາຮອບດ້ານໃຫ້ຟົດຟື້ນ ແລະ ກວ້າງຂວາງ ໄປພ້ອມກັບການສ້າງກົມກອງວັດທະນະທໍາ-ນັກຮົບວັດທະນະທໍາ, ກົມກອງມີລະບຽບແບບແຜນທັນສະໄໝເທື່ອລະກ້າວ.
ໂດຍ ເພັດນາລີ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
