ວັນຈັນ, ວັນທີ 02 ທັນວາ 2024
ທາບທາມ ຄະນະບໍລິຫານງານພັກ ກອງພົນທີ 4 ສະໄໝທີ VII ຮອບທີ 2
ເວລາອອກຂ່າວ: 2024-11-14 10:52:09 | ຜູ້ຂຽນ : admin2 | ຈຳນວນຄົນເຂົ້າຊົມ: 673 | ຄວາມນິຍົມ: 
ໃນວັນທີ 13 ພະຈິກ 2024 ນີ້, ກອງພົນທີ 4 ໄດ້ເປີດກອງປະຊຸມ ທາບທາມບຸກຄະລາກອນສະໝັກຮັບເລືອກຕັ້ງ ເຂົ້າໃນຄະນະບໍລິຫານງານພັກກອງພົນທີ 4 ສະໄໝທີ VII ຮອບທີ 2. ໂດຍເປັນປະທານຂອງ ສະຫາຍ ພົນຈັດຕະວາ ແສງມະນີວອນ ຄຳມະນີ ກໍາມະການຄະນະພັກກະຊວງປ້ອງກັນປະເທດ. ຮອງຫົວໜ້າກົມໃຫຍ່ການເມືອງກອງທັບ, ມີ ສະຫາຍ ພົນຈັດຕະວາ ຂັນທີ ສະໜາມອຸ່ນ ຮອງເລຂາຄະນະພັກ ຫົວໜ້າການທະຫານກອງພົນ, ມີວິຊາການມາຈາກກົມຈັດຕັ້ງພັກ, ຄະນະພັກກອງພົນ, ອົງການ, ກົມກອງຮາກຖານ ແລະ ຜູ້ແທນກອງປະຊຸມ ເຂົ້າຮ່ວມ.
ສະຫາຍ ພົນຈັດຕະວາ ຂັນທີ ສະໜາມອຸ່ນ ໄດ້ຍົກໃຫ້ເຫັນເຖິງຜົນສໍາເລັດໃນການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ອັນມີກຽດສະຫງ່າຂອງຄະນະພັກກອງພົນທີ 4 ສະໄໝທີ VI. ກອງປະຊຸມໄດ້ຮັບຟັງການຂຶ້ນຜ່ານບົດສໍາຫຼວດການນໍາພາລວມຂອງຄະນະພັກຊຸດເກົ່າ ຈາກ ສະຫາຍ ພັນເອກ ຈັນແດງ ຂຸນຍຸລາດ ຫົວໜ້າຫ້ອງການເມືອງກອງພົນ. ເພື່ອໃຫ້ກອງປະຊຸມມີບັນຍາກາດຟົດຟື້ນ ແລະ ມີເນື້ອໃນເລິກເຊິ່ງ, ຄົບຖ້ວນ ຜູ້ແທນກອງປະຊຸມກໍ່ໄດ້ຂຶ້ນປະກອບຄໍາຄິດຄໍາເຫັນ ຢ່າງກົງໄປກົງມາດ້ວຍຄວາມຮັບຜິດຊອບສູງ. ໂດຍປະຕິບັດຕາມວາລະກອງປະຊຸມ ສະຫາຍ ພັນໂທ ສົມເພັດ ຈັນທະພິມ ຫົວໜ້າພະແນກວຽກງານພັກ-ວຽກງານການເມືອງກົມຈັດຕັ້ງພັກ ກົມໃຫຍ່ການເມືອງກອງທັບ ໄດ້ຂຶ້ນຜ່ານມາດຖານເງື່ອນໄຂຂອງຜູ້ທີ່ຈະສະໝັກເລືອກຕັ້ງເຂົ້າໃນຄະນະບໍລິຫານງານພັກ ກອງພົນທີ 4 ສະໄໝທີ VII ຮອບທີ 2; ຜູ້ທີ່ອອກສະໝັກຮັບເລືອກຕັ້ງຕ້ອງເປັນຄົນຜູ້ມີຄຸນທາດການເມືອງໝັກແໜ້ນ; ມີຄຸນສົມບັດ-ສິນທຳປະຕິວັດ ແລະ ມີແບບແຜນດໍາລົງຊີວິດທີ່ບໍລິສຸດ, ປອດໃສ, ມີຄວາມຮູ້ຄວາມສາມາດ, ກຳແໜ້ນທິດສະດີມາກເລນິນ, ແນວຄິດໄກສອນພົມວິຫານ, ກໍາແໜ້ນແຜນນະໂຍບາຍຂອງພັກ, ມີລະດັບວິຊາສະເພາະໃດໜຶ່ງທີ່ແນ່ນອນ; ມີແບບແຜນການນໍາພາ ແລະ ວິທີເຮັດວຽກໂປ່ງໃສ, ສອດຄ່ອງ, ຍຸດຕິທໍາ; ຖືກຕ້ອງຕາມຫຼັກການລວມສູນປະຊາທິປະໄຕຂອງພັກ ຢ່າງເຂັ້ມງວດ; ມີສຸຂະພາບແຂງແຮງດີ, ສາມາດປະຕິບັດໜ້າທີ່ການເມືອງ ທີ່ການຈັດຕັ້ງມອບໝາຍຢ່າງມີຜົນສໍາເລັດ. ເພື່ອເປັນທິດທາງໃຫ້ແກ່ການທາບທາມບັນລຸຕາມຈຸດປະສົງ, ຄາດໝາຍ, ແທດເໝາະກັບຄວາມເປັນຈິງ; ສະຫາຍ ປະທານໄດ້ມີຄຳເຫັນຊີ້ນຳ ໃຫ້ຜູ້ແທນກອງປະຊຸມພ້ອມກັນໃຊ້ສິດປະຊາທິປະໄຕຂອງຕົນ ເຂົ້າໃນການປ່ອນບັດຄັດເລືອກດ້ວຍຄວາມຮັບຜິດຊອບສູງ, ມີຈຸດສຸມ ແລະ ສັດຈະວິພາກ, ຫຼີກລ້ຽງແນວຄິດອັກຄະຕິ, ກຸ່ມກ້ອນ, ຈຸ້ມເຈື້ອເຊື້ອສາຍ; ໃຫ້ເບິ່ງທັດສະນະຫຼັກໝັ້ນຊົນຊັ້ນ, ນໍ້າໃຈຟົດຟື້ນປະຕິວັດ, ຄວາມຈົງຮັກພັກດີ, ສັດຊື່ບໍລິສຸດຕໍ່ອຸດົມການ ແລະ ແນວທາງນະໂຍບາຍຂອງພັກ-ລັດ, ມີຄວາມຮູ້ຄວາມສາມາດໃນການນຳພາ-ບັນຊາ, ເຮັດສຳເລັດໜ້າທີ່ການເມືອງທີ່ໄດ້ຮັບມອບໝາຍ. ກອງປະຊຸມໄດ້ດໍາເນີນດ້ວຍບັນຍາກາດຄຶກຄື້ນຜູ້ແທນກອງປະຊຸມໄດ້ໃຊ້ສິດທາບທາມຢັ່ງຫາງສຽງຕໍ່ຄະນະບໍລິຫານງານພັກ ຊຸດເກົ່າ; ທັງເປັນການຄັດເລືອກເອົາບຸກຄະລາກອນຜູ້ທີ່ຈະລົງສະໝັກຮັບເລືອກຕັ້ງເຂົ້າໃນ ຄະນະບໍລິຫານງານພັກ ຊຸດໃໝ່ ຮອບທີ 2; ພ້ອມກັນນີ້ ຍັງໄດ້ໃຊ້ສິດ ປະຊາທິປະໄຕຂອງຕົນ ບ່ອນບັດທາບທາມຄັດເລືອກເອົາບຸກຄະລາກອນທີ່ຕົນເອງເຊື່ອໝັ້ນ, ໄວ້ວາງໃຈ ເພື່ອລົງສະໝັກຮັບເລືອກຕັ້ງເຂົ້າໃນ ຄະນະປະຈໍາພັກ, ເລຂາ-ຮອງເລຂາ, ປະທານ-ຮອງປະທານ ຄະນະກວດກາພັກ ສະໄໝທີ VII ຮອບທີ 1.
ກອງປະຊຸມທາບທາມບຸກຄະລາກອນ ແມ່ນມີຄວາມໝາຍສຳຄັນ ເພາະເປັນການກວດກາຕີລາຄາຄືນການນໍາພາ-ຊີ້ນໍາ ແລະ ຈັດຕັ້ງປະຕິບັດບັນດາມະຕິກອງປະຊຸມໃຫຍ່ຂອງພັກແຕ່ລະຂັ້ນ ແລະ ປະຕິບັດໜ້າທີ່ການເມືອງຂອງຄະນະພັກກອງພົນ ຊຸດເກົ່າ; ສະແດງເຖິງຄວາມເຊື່ອໝັ້ນ ແລະ ໄວ້ວາງໃຈຂອງພະນັກງານ-ສະມາຊິກພັກ; ເປັນການເລືອກເຟັ້ນບຸກຄະລາກອນທີ່ມີຄຸນນະພາບ ເພື່ອຮັບປະກັນໃຫ້ແກ່ກອງປະຊຸມໃຫຍ່ ຄັ້ງທີ VII ຂອງຄະນະບໍລິຫານງານພັກກອງພົນທີ 4 ທີ່ຈະໄຂຂຶ້ນໃນຕໍ່ໜ້ານີ້; ທັງເປັນການຄັດເລືອກບຸກຄະລາກອນຊຸດໃໝ່ ເພື່ອສືບຕໍ່ນຳພາກອງພົນໃນຊຸມປີຕໍ່ໜ້າແນ່ໃສ່ຮັບປະກັນລັກສະນະສືບທອດປ່ຽນແທນ, ຕໍ່ເນື່ອງໃນສະເພາະໜ້າ ແລະ ຍາວນານ.
+ ຂ່າວ: ຮທ ໂພຄຳ ພອນປະເສິດ ກອງພົນທີ 4
+ພາບ: ຮທ ບົວຄຳ ທອງລັດສະໝີ ກອງພົນທີ 4
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
