ວັນຈັນ, ວັນທີ 02 ທັນວາ 2024
ສໍາເລັດກອງປະຊຸມໃຫຍ່ຜູ້ແທນ ອົງຄະນະພັກ ທະຫານແຂວງຈໍາປາສັກ ຄັ້ງທີ VI
ເວລາອອກຂ່າວ: 2024-11-14 10:40:20 | ຜູ້ຂຽນ : admin2 | ຈຳນວນຄົນເຂົ້າຊົມ: 567 | ຄວາມນິຍົມ: 
ກອງປະຊຸມໃຫຍ່ຜູ້ແທນ ອົງຄະນະພັກກອງບັນຊາການທະຫານແຂວງຈໍາປາສັກ ຄັ້ງທີ VI ໄດ້ໄຂຂຶ້ນ ແລະ ອັດລົງດ້ວຍຜົນສຳເລັດຢ່າງຈົບງາມ ໃນລະຫວ່າງວັນທີ 12-13 ພະຈິກ 2024 ນີ້, ໂດຍການເຂົ້າຮ່ວມເປັນປະທານຂອງ ສະຫາຍ ປອ ອາລຸນໄຊ ສູນນະລາດ ກຳມະການສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງ, ປະທານປ້ອງກັນຊາດ-ປ້ອງກັນຄວາມສະຫງົບ ແຂວງຈໍາປາສັກ, ມີ ສະຫາຍ ພົນຕີ ວົງສອນ ອິນປານພິມ ຄະນະປະຈຳພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ, ສະຫາຍ ພົນຈັດຕະວາ ວິລະຕູ່ ວໍລະຈິດ ຮັກສາການເລຂາອົງຄະນະພັກ, ຫົວໜ້າການເມືອງ ກອງບັນຊາການທະຫານແຂວງຈໍາປາສັກ, ມີກົມຈັດຕັ້ງພັກ, ກົມພະນັກງານ, ບັນດາສະຫາຍຄະນະປະຈຳພັກແຂວງ, ກຳມະການພັກແຂວງ, ພະແນກການ, ຫ້ອງການ, ກົມກອງອ້ອມຂ້າງແຂວງ, ກອງບັນຊາການທະຫານແຂວງສາລະວັນ, ເຊກອງ, ອັດຕະປື, ຄະນະນຳ 9 ຕົວເມືອງ 1 ນະຄອນ, ສະຫະພັນນັກຮົບເກົ່າແຂວງ, ອະດີດນາຍທະຫານປະຕິວັດອາວຸໂສບຳນານຕະຫຼອດຮອດຜູ້ແທນສົມບູນເຂົ້າຮ່ວມ.
ສະຫາຍ ພົນຈັດຕະວາ ວິລະຕູ່ ວໍລະຈິດ ໄດ້ຍົກໃຫ້ເຫັນຜົນງານອັນພົ້ນເດັ່ນຫຼາຍດ້ານ ໃນໄລຍະຊຸມປີຜ່ານມາ ຄະນະພັກ-ຄະນະບັນຊາ ໄດ້ຖືເອົາວຽກງານສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບ, ຈັດຕັ້ງເຊື່ອມຊຶມຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງສູນກາງພັກ, ມະຕິກອງປະຊຸມໃຫຍ່ຄັ້ງທີ V ຂອງຄະນະພັກກະຊວງປ້ອງກັນປະເທດ, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກອງບັນຊາການທະຫານແຂວງ ເຂົ້າໃນວຽກງານຕົວຈິງຢ່າງເປັນຂະບວນຟົດຟື້ນ-ຕໍ່ເນື່ອງ ແລະ ຍາດໄດ້ຜົນສຳເລັດຫຼາຍດ້ານ ຕໍ່ການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກ, ນອກນີ້ ຄະນະພັກໄດ້ຖືສຳຄັນໃນການກໍ່ສ້າງພັກທາງດ້ານການເມືອງ-ແນວຄິດ, ດ້ານການຈັດຕັ້ງໂດຍຢຶດໝັ້ນຕາມ 5ຫຼັກການ 3ທິດນຳຂອງພັກແນໃສ່ເຮັດໃຫ້ການຈັດຕັ້ງພັກຂະຫຍາຍຕົວດ້ວຍຄວາມເຂັ້ມແຂງ, ໜັກແໜ້ນຂຶ້ນເປັນກ້າວໆ.
ໃນກອງປະຊຸມ ບັນດາຜູ້ແທນທີ່ເຂົ້າຮ່ວມ ກໍ່ໄດ້ຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ຄົ້ນຄວ້າເຊື່ອມຊຶມຕໍ່ບົດລາຍງານການເມືອງທັງສອງພາກ ພ້ອມທັງໄດ້ປະກອບຄໍາຄິດເຫັນໃນຫົວຂໍ້ກ່ຽວກັບວຽກງານ: ຍົກສູງຄຸນນະພາບຕໍ່ວຽກງານກໍ່ສ້າງພັກປອດໃສ, ເຂັ້ມແຂງ, ໜັກແໜ້ນຕິດພັນກັບການກໍ່ສ້າງພະນັກງານ, ວຽກງານເພີ່ມທະວີຄວາມຮັບຜິດຊອບຕໍ່ອົບຮົມ-ຫັດແອບ, ການກຽມພ້ອມສູ້ຮົບ ແລະ ການກອບກູ້ໄພພິບັດ, ວຽກງານການປັບປຸງກໍ່ສ້າງພື້ນຖານໂຄງລ່າງ, ຕິດພັນກັບການຄຸ້ມຄອງພາຫະນະ-ເຕັກນິກ, ວຽກງານ ການສ້າງພະລາທິການກັບທີ່ໃນການຜະລິດເຂົ້າກຸ້ມກິນ 06 ເດືອນ ແລະ ວຽກງານ ການຍົກສູງຄຸນນະພາບຕໍ່ການຄຸ້ມຄອງປ້ອງກັນຊາຍແດນໃຫ້ມີຄວາມສະຫງົບ. ໃນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕປ່ອນບັດເລືອກຕັ້ງເອົາຄະນະບໍລິຫານງານພັກກອງບັນຊາການທະຫານແຂວງຈໍາປາສັກ ຊຸດໃໝ່ ຈໍານວນ 11 ສະຫາຍ ແລະ ຄັດເລືອກເອົາຜູ້ແທນສົມບູນ ຈໍານວນ 21 ສະຫາຍ, ສຳຮອງ 03 ສະຫາຍ ໄປຮ່ວມກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງຈໍາປາສັກ
ກອງປະຊຸມຄັ້ງປະຖົມມະລຶກຂອງຄະນະບໍລິຫານພັກກອງບັນຊາການທະຫານແຂວງຈໍາປາສັກ ສະໄໝທີ VI ໄດ້ເລືອກຕັ້ງເອົາຄະນະປະຈຳພັກ 03 ສະຫາຍຄື: ສະຫາຍ ພົນຈັດຕະວາ ວິລະຕູ່ ວໍລະຈິດ, ສະຫາຍ ພັນເອກ ສິດປະເສີດ ນວນມະນີວົງ, ສະຫາຍ ພັນເອກ ພູເວີນ ສູນນິວົງ, ໃນກອງປະຊຸມຍັງໄດ້ເປັນເອກະສັນເລືອກເອົາເລຂາ, ຮອງເລຂາ, ປະທານ ແລະ ຮອງປະທານຄະນະກວດກາພັກ. ໃນນີ້ໄດ້ເລືອກເອົາ ສະຫາຍ ພົນຈັດຕະວາ ວິລະຕູ່ ວໍລະຈິດ ເປັນເລຂາຄະນະບໍລິຫານງານພັກ, ສະຫາຍ ພັນເອກ ສິດປະເສີດ ນວນມະນີວົງ ເປັນຮອງເລຂາຄະນະບໍລິຫານງານພັກ, ສະຫາຍ ພັນເອກ ພູເວີນ ສູນນິວົງ ເປັນປະທານຄະນະກວດກາພັກ, ສະຫາຍ ພັນໂທ ກອງແກ້ວ ວຽງໄຊຍະສອນ ເປັນຮອງປະທານຄະນະກວດກາພັກ ແລະ ສະຫາຍ ພັນໂທ ວຽງທອງ ກອງວົງສາ ເປັນຮອງປະທານຄະນະກວດກາພັກ ກອງບັນຊາການທະຫານແຂວງຈໍາປາສັກ.
ໃນໂອກາດນີ້, ສະຫາຍ ປອ ອາລຸນໄຊ ສູນນະລາດ ໄດ້ມີຄຳເຫັນໂອ້ລົມ ເຊິ່ງສະຫາຍສະແດງຄວາມຍ້ອງຍໍຊົມເຊີຍຕໍ່ຄະນະພັກ-ຄະນະບັນຊາກອງບັນຊາການທະຫານທະຫານແຂວງຈໍາປາສັກ ທີ່ໄດ້ນໍາພາ-ຊີ້ນໍາສະມາຊິກພັກ, ນາຍ ແລະ ພົນທະຫານໃນທົ່ວກໍາລັງທ້ອງຖິ່ນແຂວງຈໍາປາສັກ ປະຕິບັດໜ້າທີ່ການເມືອງຂອງຕົນ, ເຊິ່ງຍາດໄດ້ຜົນສໍາເລັດ ຫຼາຍດ້ານ, ພ້ອມນັ້ນ ສະຫາຍຍັງໄດ້ຮຽກຮ້ອງໃຫ້ຄະນະພັກຊຸດໃໝ່ ຕ້ອງເອົາໃຈໃສ່ຍົກສູງພາລະບົດບາດໜ້າທີ່ການເມືອງຂອງຕົນຢ່າງຕັ້ງໜ້າ, ມີແບບແຜນວິທີເຮັດວຽກ ປະຕິບັດຫຼັກການລວມສູນ ປະຊາທິປະໄຕ, ເຮັດວຽກເປັນໝູ່ຄະນະແບ່ງຄວາມຮັບຜິດຊອບໃຫ້ບຸກຄົນຢ່າງຈະແຈ້ງ, ສືບຕໍ່ປັບປຸງແກ້ໄຂໃຫ້ມີການຫັນປ່ຽນຢ່າງຕັ້ງໜ້າໃນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VI ຂອງ ອົງຄະນະພັກກອງບັນຊາການທະຫານແຂວງຈໍາປາສັກ ໃນເທື່ອນີ້ໃຫ້ມີຜົນສໍາເລັດໃຫຍ່ຫຼວງກວ່າເກົ່າ ແລະ ຮຽກຮ້ອງໃຫ້ສະມາຊິກພັກ ຈົ່ງພ້ອມກັນເອົາໃຈໃສ່ເຊີດຊູ ສະຕິຄວາມຮັບຜິດຊອບການເມືອງ ຂອງຕົນໃຫ້ສູງຂຶ້ນເລື້ອຍໆ ເພື່ອພ້ອມກັນເຮັດສຳເລັດໜ້າທີ່ ຕາມການຈັດຂັ້ນເທິງມອບໝາຍໃຫ້.
ຂ່າວ: ດາວົງ ບຸດຕະວົງ
ພາບ: ດາວົງ ບຸດຕະວົງ+ ນາງ ສີລິຄານ ສີດາວົງອ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
