ວັນຈັນ, ວັນທີ 02 ທັນວາ 2024
ງານວາງສະແດງ ວຽງຈັນ ມໍເຕີ້ເຊວ ເອັກສໂປ 2024 ຈະຈັດຂຶ້ນໃນທ້າຍເດືອນພະຈິກ
ເວລາອອກຂ່າວ: 2024-11-08 10:47:10 | ຜູ້ຂຽນ : admin3 | ຈຳນວນຄົນເຂົ້າຊົມ: 142 | ຄວາມນິຍົມ: 
ພິທີຖະແຫຼງຂ່າວງານວາງສະແດງ ວຽງຈັນ ມໍເຕີ້ເຊວ ເອັກສໂປ 2024 (Vientiane Motor sale Expo 2024) ຈັດຂຶ້ນວັນທີ 6 ພະຈິກ 2024 ນ້ີ, ທີ່ສູນການຄ້າ ລາວ-ໄອເຕັກ, ໂດຍມີທ່ານ ພານະລິນ ສຸວັນນະວົງ ຜູ້ອຳນວຍການ ບໍລິສັດ ອີລີເເກ້ນ ອີເວັ້ນສ ຈຳກັດ ຜູ້ດຽວ, ທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກໍາ ແລະ ການຄ້າ, ທ່ານນາງ ຄຳພາ ຄຳບຸນເຮືອງ ຮອງຜູ້ອຳນວຍການໃຫຍ່ ຝ່າຍການຄ້າ ບໍລິສັດ ລາວເວີນ ມະຫາຊົນ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ທ່ານ ພານະລິນ ສຸວັນນະວົງ ກ່າວວ່າ: ງານວາງສະແດງລົດ ວຽງຈັນ ມໍເຕີ້ເຊວ ເອັກສໂປ 2024 ຈະດຳເນີນການວາງສະແດງເປັນເວລາ 8 ວັນ ເລີ່ມແຕ່ວັນທີ 30 ພະຈິກ-8 ທັນວາ ທີ່ສູນການຄ້າ ລາວ-ໄອເຕັກ, ປັດຈຸບັນໄດ້ກະກຽມຄວາມພ້ອມດ້ານຕ່າງໆ ເປັນຕົ້ນ ການກະກຽມພື້ນທີ່ການວາງສະແດງສິນຄ້າ ເຊິ່ງໄດ້ຈັດສັນບູດຫຼາຍກວ່າ 55 ບູດ, ລົດ 18 ຍີ່ຫໍ້ ໃນນັ້ນ, ມີລົດໄຟຟ້າ EV ລົດທີ່ປະຢັດພະລັງງານນ້ຳມັນ, ອຸປະກອນປະດັບລົດຍົນ ບັນດາເຄື່ອງຮັບໃຊ້ ທີ່ຕິດພັນກັບພາຫະນະ, ສະຖາບັນການເງິນ ແລະ ທະນາຄານທຸລະກິດ, ໄດ້ລະດົມຫົວໜ່ວຍທຸລະກິດຄ້າຍລົດເຂົ້າຮ່ວມມີຫຼາຍກວ່າ 45 ບູດ ກວມ 80% ແລ້ວ ນອກຈາກນີ້, ພື້ນທີ່ດ້ານນອກຍັງມີການວາງສະແດງຜະລິດຕະພັນໂອດັອບ ແລະ ສິນຄ້າທ່າແຮງຂອງລາວຫຼາຍກວ່າ 20 ບູດ ທັງນີ້, ເພື່ອເປັນການໂຄສະນາ ແລະ ສົ່ງເສີມການຊົມໃຊ້ສິນຄ້າຂອງລາວ.
ພາຍໃນງານມີກິດຈະກຳຫຼາຍຢ່າງເຊັ່ນ: Cosplay, ແຂ່ງຂັນເຕັ້ນ, Concept, ລົດຍົນ ເດີນແບບ, ຄອນເສີດຈາກສິລະປິນທັງພາຍໃນ ແລະ ປະເທດເພື່ອນບ້ານມາສ້າງສີສັນ, ຫຼິ້ນເກມແຈກຂອງລາງວັນໃຫ້ແຂກທີ່ເຂົ້າມາຮ່ວມຊົມງານ. ສຳລັບລູກຄ້າທີ່ຈອງລົດພາຍໃນງານຈະມີສິດລົງທະບຽບ ເພື່ອຮັບຄູປອງລຸ້ນໂຊກແຈກຂອງລາງວັນ ຈາກມາສຄອດປະຈຳງານ ບໍ່ວ່າຈະເປັນເຄືອບແກ້ວບໍ່ເສຍຄ່າ 30 ຄັນ, ແຈກລົດໄຟຟ້າ 3 ຄັນ, ແຈກ Smart TV 5 ໜ່ວຍ, ແຈກຕູ້ເຢັນ 9 ໜ່ວຍ ແລະ ອື່ນໆ ອີກຫຼາຍຢ່າງ ຄາດຄະເນວ່າຈະມີຜູ້ເຂົ້າຊົມງານປະມານ 40.000 ຄົນຕໍ່ວັນ, ມີການສັງຈ່ອງລົດພາຍໃນງານ 50 ຄັນຕໍ່ວັນ, ມີການຊື້ຂາຍສິນຄ້າ ແລະ ບໍລິການເພີ່ມຂຶ້ນກວ່າປີທີ່ຜ່ານມາ ນອກນີ້ ຍັງລະດົມທຶນຊ່ວຍເຫຼືອຕ້ານໄພໜາວຢູ່ຊົນນະບົດ ອີກດ້ວຍ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
