POWERED_BY WWW.KONGTHAP.GOV.LA

ໜ້າໜຶ່ງ
ກ່ຽວກັບພວກເຮົາ
ມູນເຊື້ອກອງທັບ
ລະບຽບວິໄນ
ກົດຫມາຍ
ເຊື່ອມຕໍ່ເວບອື່ນ
ຕິດຕໍ່ພວກເຮົາ PDF

ຂ່າວ

ຂ່າວໜ້າໜຶ່ງ ຂ່າວພາຍໃນ ຂ່າວເສດຖະກິດ, ວັດທະນາທຳ ແລະ ສັງຄົມ ຂ່າວຕ່າງປະເທດ ມູນເຊື້ອກອງທັບ ຂ່າວກີລາ

ເຂົ້າລະບົບ ລົງທະບຽນ

ວັນອັງຄານ, ວັນທີ 24 ມິຖຸນາ 2025

ຄະນະພັກຮາກຖານຫ້ອງເສນາທິການ ທະຫານແຂວງບໍລິຄຳໄຊ ສຳເລັດກອງປະຊຸມໃຫຍ່ ສະມາຊິກພັກ ຄັ້ງທີ VI
ເວລາອອກຂ່າວ: 2024-10-03 09:49:30 | ຜູ້ຂຽນ : admin3 | ຈຳນວນຄົນເຂົ້າຊົມ: 787 | ຄວາມນິຍົມ:

ກອງປະຊຸມໃຫຍ່ສະມາຊິພັກຄັ້ງທີ VI ຂອງຄະນະພັກຮາກຖານຫ້ອງເສນາທິການ ກອງບັນຊາການທະຫານແຂວງບໍລິຄຳໄຊ ໃນວັນທີ 13 ກັນຍາ 2024 ນີ້, ໂດຍການເປັນປະທານຂອງ ສະຫາຍ ພົນຈັດຕະວາ ຈວງຈັນ ລາດຊະວົງ ກຳມະການຄະນະປະຈຳພັກແຂວງ, ເລຂາຄະນະພັກກອງບັນຊາການ, ຫົວໜ້າການເມືອງກອງບັນຊາການທະຫານແຂວງບໍລິຄຳໄຊ, ມີຄະນະພັກຮາກຖານ, ຄະນະໜ່ວຍພັກແຂກຖືກເຊີນ, ພະແນກການກ່ຽວຂ້ອງ ແລະ ສະມາຊິກພັກສົມບູນເຂົ້າຮ່ວມ. ສະຫາຍ ພັນເອກ ພິດາວັນ ພີມເຮືອງສີ ກຳມະການຄະນະພັກກອງບັນຊາການ, ເລຂາຄະນະພັກຮາກຖານ ຫົວໜ້າຫ້ອງເສນາທິການກອງບັນຊາການທະຫານແຂວງບໍລິຄຳໄຊ ໄດ້ຜ່ານບົດລາຍງານການເມືອງທັງສອງພາກ ແລະ ບົດສຳຫຼວດການນຳພາລວມ ຂອງຄະນະພັກຮາກຖານ, ເຊິ່ງໄດ້ຍົກໃຫ້ເຫັນຜົນງານຫຼາຍດ້ານທີ່ຄະນະພັກຮາກຖານສ້າງມາໄດ້ໃນໄລຍະຜ່ານາມາ ເປັນຕົ້ນແມ່ນໄດ້ເອົາໃຈໃສ່ສຶກສາອົບຮົມການເມືອງ-ນຳພາແນວຄິດໃຫ້ສະມາຊິກພັກ, ພະນັກງານ-ນັກຮົບເປັນປະຈຳ, ນຳເອົາບັນດາເອກະສານຕ່າງໆມາຈັດຕັ້ງເຜີຍແຜ່, ເຊື່ອມຊຶມ ຕິດພັນກັບການຈັດຕັ້ງດຳເນີນຊີວິດການເມືອງພາຍໃນຢ່າງປົກກະຕິ ໄປພ້ອມກັບການຊຸກຍູ້ສ້າງຂະບວນການອົບຮົມ-ຫັດແອບປະຈຳປີ, ຂະບວນການກິລາກາຍຍະກຳ, ກິລາການທະຫານ-ກິລາມວນຊົນ ແລະ ອື່ນໆ, ນຳພາ-ຊີ້ນຳຈັດຕັ້ງກຳ ລັງເຄື່ອນໄຫວກໍ່ສ້າງຮາກຖານການເມືອງຢູ່ເຂດຫຼໍ່ແຫຼມຕ່າງໆ ຕິດພັນກັບວຽກງານ 3 ສ້າງຂອງພັກ ແລະ 4 ເນື້ອໃນ 4 ຄາດໝາຍ, ຮັບປະກັນໃຫ້ສະພາບມີຄວາມສະຫງົບໂດຍພື້ນຖານ, ຈັດຕັ້ງອົບຮົມກຳລັງໄຟແບກຫາບ 1 ຄັ້ງ, ສ້າງບ້ານປ້ອມໝັ້ນໄດ້ 28 ບ້ານ, ສ້າງກຸ່ມບ້ານສູ້ຮົບຕິດລຽນໄດ້ 9 ກຸ່ມ, ຈັດຕັ້ງຊ້ອມຮົບຂັ້ນກອງພັນ 1 ຄັ້ງ, ອົບຮົມວິຊາສຶກສາປ້ອງກັນຊາດໃຫ້ນັກຮຽນ-ນັກສຶກສາ 5 ຄັ້ງ, ມີ 29 ໂຮງຮຽນ, ອົບຮົມວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ພະນັກງານຫຼັກແຫຼ່ງຂອງແຂວງ 2 ຄັ້ງ, ອົບຮົມວຽກງານການທະຫານທ້ອງຖິ່ນ ໃຫ້ຫົວໜ້າຂະແໜງການທະຫານທ້ອງຖິ່ນກອງບັນຊາການທະຫານເມືອງ ແລະ ຫົວໜ້າກອງຮ້ອຍກອງຫຼອນເຂດ 1 ຄັ້ງ, ເປີດຮຽນນາຍສິບລະບົບກໍ່ສ້າງ, ບຳລຸງ ແລະ ທະຫານໃໝ່ພັນທະປ້ອງກັນຊາດໄດ້ເປັນປົກກະຕິ, ຊີ້ນຳບັນດາກົມກອງຮາກຖານເຄື່ອນໄຫວສາລະເວ ເພື່ອສະກັດກັ້ນ ແລະ ແກ້ໄຂບັນຫາປະກົດການຫຍໍ້ທໍ້ຢູ່ຕາມບໍລິເວນຊາຍແດນ, ຕາມຈຸດເປົ້າໝາຍຕ່າງໆ, ເຂດຍຸດທະສາດທີ່ສຳຄັນເຊັ່ນ: ສຳນັກງານ-ອົງການ, ເຂື່ອນໄຟຟ້າ, ສາງ-ຄັງ ໄດ້ເປັນຢ່າງດີ, ຈັດຕັ້ງກຳລັງປະ ຈຳການກຽມພ້ອມສູ້ຮົບເປັນລະບົບຄົບຊຸດພ້ອມ ທັງເຮັດໜ້າທີ່ກຳແໜ້ນສະພາບການຜັນແປຂອງດິນຟ້າອາກາດ ເພື່ອມີສະຕິໃນການກອບກູ້ໄພພິບັດທາງທຳມະຊາດ ແລະ ໄດ້ກະກຽມກຳລັງເຂົ້າຊ່ວຍເມື່ອມີກໍລະນີເກີດຂຶ້ນ. ສະຫາຍ ເລຂາຄະນະພັກຮາກຖານ ຍັງໃຫ້ຮູ້ຕື່ມອີກວ່າ: ນອກຈາກທີ່ກ່າວມາຂ້າງເທິງນັ້ນ, ຄະນະພັກຮາກຖານ ຍັງໄດ້ຖືສຳຄັນໃນການປັບປຸງກໍ່ສ້າງພັກຕາມ 5 ຫຼັກການ 3 ທິດນຳ ສຸມໃສ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ ໄປຄຽງຄູ່ ກັບການບຳລຸງ-ກໍ່ສ້າງພະນັກງານ ຕາມທິດ 3 ຮຸ່ນ 3 ປະເພດ, ຮັບປະກັນໄດ້ລັກສະນະສືບທອດປ່ຽນແທນ, ດ້ານວຽກງານແກ້ໄຂຊີວິດການເປັນຢູ່ ໂດຍປະຕິບັດຕາມທິດນຳ 4 ປູກ 4 ລ້ຽງ ທີ່ກົມໃຫຍ່ພະລາທິການກອງທັບວາງອອກ ໄດ້ຊີ້ນຳພະນັກງານ-ນັກຮົບ ເອົາໃຈໃສ່ຕໍ່ວຽກງານເພີ່ມພູນຜະລິດຜົນ, ສຸມໃສ່ປູກຝັງ ແລະ ລ້ຽງສັດ ເພື່ອຮັບປະກັນແກ້ໄຂຊີວິດການເປັນຢູ່ຂອງພະນັກງານ-ນັກຮົບ. ຈາກນັ້ນ, ກອງປະຊຸມຍັງໄດ້ໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະພັກຮາກຖານຊຸດໃໝ່ ກອງປະຊຸມຄັ້ງປະຖົມມະລຶກເຫັນດີເປັນເອກະພາບເລືອກເອົາ ສະຫາຍ ພັນເອກ ພິດາວັນ ພີມເຮືອງສີ ເປັນເລຂາຄະນະພັກຮາກຖານ, ສະຫາຍ ພັນໂທ ວິສັນ ທິບວົງສາ ເປັນຮອງເລຂາຄະນະພັກຮາກຖານ, ສະຫາຍ ພັນໂທ ແສງອາລຸນ ດວງດາລາ ເປັນປະທານການກວດກາພັກ, ສະຫາຍ ພັນໂທ ທອງພັນ ແກ້ວປະເສີດ, ສະຫາຍ ພັນໂທ ແກ້ອຸດອນ ເພັງພະຈັນ, ສະຫາຍ ພັນໂທ ຄຳແບ່ງ ວົງມີຈິດ ແລະ ສະຫາຍ ພັນໂທ ກັນຍາ ບໍລິວັນ ເປັນກຳມະການຄະນະພັກຮາກຖານ. ສະຫາຍ ພົນຈັດຕະວາ ຈວງຈັນ ລາດຊະວົງ ໄດ້ຍ້ອງຍໍຊົມເຊີຍຕໍຜົນງານທີ່ຄະນະພັກຮາກຖານຫ້ອງເສນາທິການ ສ້າງມາໄດ້ໃນໄລຍະ 5 ປີຜ່ານມາ ພ້ອມທັງເນັ້ນໜັກໃຫ້ຄະນະພັກຮາກຖານຊຸດໃໝ່ ສືບຕໍ່ປະຕິບັດໜ້າທີ່ການເມືອງຂອງຕົນທີ່ການຈັດຕັ້ງໄດ້ຮັບມອບໝາຍໃຫ້ມີສຳເລັດ, ນຳພາ-ຊີ້ນຳ ຫ້ອງເສນາທິການໃຫ້ເຕີບໃຫຍ່ເຂັ້ມແຂງ, ບົນພື້ນຖານຕ້ອງມີແບບແຜນວິທີເຮັດວຽກທີ່ສອດຄອງ, ເຮັດວຽກເປັນໝູ່ຄະນະ, ລວມສູນປະຊາທິປະໄຕ, ແບ່ງຄວາມຮັບຜິດຊອບໃຫ້ບຸກຄົນ, ເອົາໃຈໃສ່ສຶກສາອົບຮົມການເມືອງ-ນຳພາແນວຄິດ ໃຫ້ພະນັກງານ-ນັກຮົບເປັນປົກກະຕິ ສິ່ງສຳຄັນແມ່ນເຕົ້າໂຮມຄວາມສາມັກຄີພາຍໃນໃຫ້ໜັກແໜ້ນ, ພາຍນອກໃຫ້ກວ້າງຂວາງ ເພື່ອນຳພາກົມກອງໃຫ້ເຕີບໃຫຍ່ເຂັ້ມແຂງ. ໂດຍ: ສີທອງ ຈັນທະວົງ

news to day and hot news