ວັນພະຫັດ, ວັນທີ 03 ຕຸລາ 2024
ທະຫານນະຄອນຫຼວງວຽງຈັນ ປະກາດການເລື່ອນຊັ້ນ ແລະ ເລື່ອນທຽບຊັ້ນໃຫ້ນາຍທະຫານ
ເວລາອອກຂ່າວ: 2024-10-02 14:48:34 | ຜູ້ຂຽນ : admin2 | ຈຳນວນຄົນເຂົ້າຊົມ: 194 | ຄວາມນິຍົມ: 
ໃນວັນທີ 2 ຕຸລາ 2024 ນີ້, ກອງບັນຊາການທະຫານນະຄອນຫຼວງວຽງຈັນ ໄດ້ປະກາດການເລື່ອນຊັ້ນ ແລະ ເລື່ອນທຽບຊັ້ນໃຫ້ນາຍທະຫານ ຂອງຕົນ. ໂດຍການເປັນປະທານ ຂອງ ສະຫາຍ ພົນຈັດຕະວາ ໂສພາວັນ ທໍາມະເທວາ ຫົວໜ້າການເມືອງກອງບັນຊາການທະຫານນະຄອນຫຼວງວຽງຈັນ, ມີຄະນະຫ້ອງ, ພະແນກການ, ຄະນະບັນຊາກົມກອງ ພ້ອມດ້ວຍນາຍທະຫານທີ່ໄດ້ຮັບການເລື່ອນຊັ້ນໃໝ່ ເຂົ້າຮ່ວມ.
ສະຫາຍ ພັນຕີ ຈັນທະວີພອນ ສິດທິສັກ ຮອງຫົວໜ້າພະແນກພະນັກງານ ທະຫານນະຄອນຫຼວງວຽງຈັນ ໄດ້ຜ່ານຂໍ້ຕົກລົງ ຂອງລັດຖະມົນຕີກະຊວງປ້ອງກັນປະເທດ ວ່າດ້ວຍການເລື່ອນຊັ້ນ, ເລື່ອນທຽບຊັ້ນໃຫ້ນາຍທະຫານຢູ່ກອງບັນຊາການທະຫານນະຄອນຫຼວງວຽງຈັນ, ອີງຕາມກົດໝາຍນາຍທະຫານກອງທັບປະຊົນລາວ ວ່າດ້ວຍການເລື່ອນຊັ້ນໃຫ້ນາຍທະຫານ ແລະ ອີງຕາມການຄົ້ນຄວ້ານຳສະເໜີ ຂອງກົມໃຫຍ່ການເມືອງກອງທັບ. ກະຊວງປ້ອງກັນປະເທດ ຕົກລົງ ເລື່ອນຊັ້ນ, ເລື່ອນທຽບຊັ້ນໃຫ້ນາຍທະຫານ ຢູ່ກອງບັນຊາການທະຫານນະຄອນຫຼວງວຽງຈັນທັງໝົດ 190 ສະຫາຍ, ຍິງ 25 ສະຫາຍ ໃນນີ້, ໄດ້ເລື່ອນຊັ້ນ ຮ້ອຍເອກ ຂຶ້ນຊັ້ນ ພັນຕີ ຈຳນວນ 41 ສະຫາຍ, ຍິງ 11 ສະຫາຍ, ເລື່ອນທຽບຊັ້ນ 16 ສະຫາຍ, ຍິງ 8 ສະຫາຍ, ເລື່ອນຊັ້ນ ຮ້ອຍໂທ ຂຶ້ນ ຮ້ອຍເອກ ຈໍານວນ 89 ສະຫາຍ, ຍິງ 10 ສະຫາຍ, ເລື່ອນທຽບຊັ້ນ 33 ສະຫາຍ, ຍິງ 6 ສະຫາຍ, ເລື່ອນຊັ້ນ ຮ້ອຍຕີ ຂຶ້ນຊັ້ນ ຮ້ອຍໂທ ຈໍານວນ 27 ສະຫາຍ, ທຽບຊັ້ນ 2 ສະຫາຍ ແລະ ເລື່ອນຊັ້ນ ວາທີ ຂຶ້ນຊັ້ນ ຮ້ອຍຕີ ຈໍານວນ 33 ສະຫາຍ, ຍິງ 4 ສະຫາຍ, ທຽບຊັ້ນ 3 ສະຫາຍ, ຍິງ 1 ສະຫາຍ.
ໂອກາດນີ້, ສະຫາຍ ພົນຈັດຕະວາ ໂສພາວັນ ທໍາມະເທວາ ຍັງໄດ້ເນັ້ນໜັກໃຫ້ພະນັກງານທີ່ໄດ້ຮັບການເລື່ອນຊັ້ນ, ເລື່ອນທຽບຊັ້ນໃໝ່ ສືບຕໍ່ກຳແໜ້ນເຊື່ອມຊຶມແນວທາງນະໂຍບາຍຂອງພັກ-ລັດ, ມີລະບຽບວິໄນເຂັ້ມງວດ, ເອົາໃຈໃສ່ໃນການຈັດຕັ້ງຜັນຂະຫຍາຍໜ້າທີ່ວິຊາສະເພາະຂອງຕົນໃຫ້ໄດ້ຮັບຜົນສູງຂຶ້ນ, ມີຄວາມສາມັກຄີຮັກແພງພາຍໃນໃຫ້ແໜ້ນແຟ້ນພ້ອມກັນສືບຕໍ່ເອົາໃຈໃສ່ເຝິກຝົນຫຼໍ່ຫຼອມ ພັດທະນາຕົນເອງໃນທຸກດ້ານ, ມີແບບແຜນວິທີເຮັດວຽກໃນການນຳພາ-ບັນຊາ, ຍົກສູງຄວາມຮັບຜິດຊອບໜ້າທີ່ການເມືອງຂອງຕົນເຮັດວຽກເປັນໝູ່ຄະນະ, ມີຄວາມເສຍສະຫຼະສູງຕໍ່ໜ້າທີ່ວຽກງານ ພ້ອມກັນສ້າງຜົນງານໃຫ້ກົມກອງມີໃບໜ້າອັນໃໝ່.
ໂດຍ: ສຸລິຍາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
