ວັນພະຫັດ, ວັນທີ 03 ຕຸລາ 2024
ຫົວໜ້າກົມອຸປະໂພກ-ບໍລິໂພກ ກອງທັບ ພົບປະໂອ້ລົມພະນັກງານ-ນັກຮົບ ໂຮງສີເຂົ້າກອງທັບ
ເວລາອອກຂ່າວ: 2024-10-01 15:32:31 | ຜູ້ຂຽນ : admin2 | ຈຳນວນຄົນເຂົ້າຊົມ: 181 | ຄວາມນິຍົມ: 
ວັນທີ 01 ຕຸລາ ນີ້, ສະຫາຍ ພົນຈັດຕະວາ ສອນໄຊ ວົງພະຈັນ ຫົວໜ້າກົມອຸປະໂພກ-ບໍລິໂພກ ກົມໃຫຍ່ພະລາທິການກອງທັບ ພ້ອມດ້ວຍຄະນະ ລົງເຄື່ອນໄຫວຊຸກຍູ້ ພົບປະໂອ້ລົມ ຄະນະພັກ-ຄະນະບັນຊາ, ພະນັກງານ-ນັກຮົບຢູ່ໂຮງສີເຂົ້າກອງທັບ.
ຈຸດປະສົງຂອງການລົງເຄື່ອນໄຫວເຮັດວຽກງານຢູ່ໂຮງສີເຂົ້າກອງທັບໃນຄັ້ງນີ້, ເພື່ອເປັນການໂຄສະນາປຸກລະດົມກໍາລັງແຮງສັງລວມຂອງນາຍ ແລະ ພົນທະຫານທຸກສະຫາຍ ທີ່ຢູ່ໃນກົມກອງໃຫ້ມີຄວາມຕື່ນຕົວ ເປັນເຈົ້າການ ສຶກສາອົບຮົມການເມືອງ-ນໍາພາແນວຄິດ, ເຊື່ອມຊຶມ, ກໍາແໜ້ນຕໍ່ແນວທາງແຜນນະໂຍບາຍຂອງພັກ, ກົດໝາຍຂອງລັດ ແລະ ໜ້າທີ່ຂອງກອງທັບ, ສຶກສາອົບຮົມທັດສະນະແນວຄິດ ສ້າງໃຫ້ພະນັກງານ, ນັກຮົບ ມີຈິດໃຈຮັກເຊື້ອແພງຊາດ, ຮັກລະບອບໃໝ່ ຮັກສັງຄົມນິຍົມ, ມີຈິດໃຈດຸໝັ່ນຂະຫຍັນພຽນ, ນໍ້າໃຈອອກແຮງງານ, ແບບແຜນດໍາລົງຊີວິດທີ່ປອດໃສ, ຂາວສະອາດ, ມີຄວາມປະພຶດໃນການປົກປັກຮັກສາວັດຖຸສິ່ງຂອງສ່ວນລວມໄດ້ເປັນຢ່າງດີ, ຍົກສູງສະຕິລະວັງຕົວກຽມພ້ອມສູ້ຮົບ, ມີສະຕິຕອບຕ້ານທຸກກົນອຸບາຍຫັນປ່ຽນໂດຍສັນຕິຂອງສັດຕູ.ພ້ອມທັງຮຽກຮ້ອງໃຫ້ຄະນະພັກ-ຄະນະບັນຊາ ແຕ່ລະຂັ້ນຕ້ອງຮັບຮູ້ ແລະ ກໍາແໜ້ນແນວທາງແຜນນະໂຍບາຍຂອງພັກ, ເພີ່ມທະວີວຽກງານການເມືອງແນວຄິດ ມີສະຕິຕື່ນຕົວປະຕິບັດຕາມແນວທາງຂອງພັກ, ກົດໝາຍລັດຢ່າງເຂັ້ມງວດ, ກໍາແໜ້ນສະພາບການທົ່ວໄປໃນກົມກອງຢ່າງຮອບດ້ານ, ທັນເວລາ ແລະ ພ້ອມກັນສູ້ສົນເຮັດສໍາເລັດໜ້າທີ່ການເມືອງທີ່ໄດ້ຮັບມອບໝາຍ.
ໂອກາດລົງເຄື່ອນໄຫວຄັ້ງນີ້, ສະຫາຍ ພົນຈັດຕະວາ ສອນໄຊ ວົງພະຈັນ ພ້ອມດ້ວຍຄະນະ ກໍໄດ້ມອບເງິນຈໍານວນ 20.000.000 ກີບ, ໃຫ້ ໂຮງສີເຂົ້າກອງທັບ ເພື່ອຊຸກຍູ້, ປະກອບສ່ວນເຂົ້າໃນວຽກງານຂະບວນການປັບປຸງກໍ່ສ້າງກົມກອງໃຫ້ມີການພັດທະນາຢ່າງຕັ້ງໜ້າ.
ຂ່າວໂດຍ: ຄໍາປະສົງ ລາດຊະວົງ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
