ວັນພະຫັດ, ວັນທີ 03 ຕຸລາ 2024
ຫົວໜ້າການເມືອງ ວິທະຍາຄານປ້ອງກັນຊາດ ໄກສອນ ພົມວິຫານ ໂອ້ລົມນັກສຶກສາສົກຮຽນ 2024-2025
ເວລາອອກຂ່າວ: 2024-09-13 14:00:33 | ຜູ້ຂຽນ : admin2 | ຈຳນວນຄົນເຂົ້າຊົມ: 360 | ຄວາມນິຍົມ: 
ວັນທີ 12 ກັນຍາ 2024 ນີ້, ສະຫາຍ ພົນຈັດຕະວາ ແປ້ນຄຳ ບຸດຈັນແພງ ຫົວໜ້າການເມືອງ ວິທະຍາຄານປ້ອງກັນຊາດ ໄກສອນ ພົມວິຫານ ໄດ້ພົບປະໂອ້ລົມນັກສຶກສາລະບົບກໍ່ສ້າງ, ລະບົບບຳລຸງ ປະຈຳສົກຮຽນ 2024-2025, ມີຄະນະພັກ-ຄະນະບັນຊາ, ຄະນະຮັບຜິດຊອບນັກສຶກສາລະບົບບຳລຸງ, ລະບົບກໍ່ສ້າງ, ພ້ອມດ້ວຍນັກສຶກສາທັງສອງລະບົບເຂົ້າຮ່ວມ.
ໂອກາດນີ້ ສະຫາຍ ປະທານ ໄດ້ຍົກໃຫ້ເຫັນຫຼາຍບັນຫາທີ່ສຳຄັນ ເປັນຕົ້ນແມ່ນ ຕົ້ນກຳເນີດການສ້າງຕັ້ງວິທະຍາຄານປ້ອງກັນຊາດ ໄກສອນ ພົມວິຫານ, ຄວາມຈຳເປັນໃນການບຳລຸງ-ກໍ່ສ້າງ ພະນັກງານ-ນັກຮົບໃນກອງທັບ, ຄວາມສຳຄັນໃນການສຶກສາຮ່ຳຮຽນ ແລະ ວຽກງານຈຸດສຸມຂອງວິທະຍາຄານ ພ້ອມທັງໄດ້ເນັ້ນໜັກໃຫ້ນັກສຶກສາທັງສອງລະບົບເອົາໃຈໃສ່ ຍົກສູງທັດສະນະ ຫຼັກໝັ້ນການເມືອງໃຫ້ໜັກແໜ້ນ, ບໍ່ຫວັ່ນໄຫວຄອນແຄນຕໍ່ຄວາມຫຍຸ້ງຍາກ ແລະ ອຸປະສັກຕ່າງໆ, ມີຄວາມອຸ່ນອ່ຽນ, ມີຄວາມມານະອົດທົນ ເຊື່ອມຊຶມກໍາແໜ້ນໜ້າທີ່ການເມືອງຂອງຕົນ, ຕື່ນຕົວຫ້າວຫັນເຂົ້າໃນການຈັດຕັ້ງປະຕິບັດທຸກວຽກງານ, ຕ້ອງກໍານົດຈຸດຢືນ ແລະ ຄວາມຮັບຮູ້ໃຫ້ຖືກຕ້ອງຕໍ່ການມາ ສຶກສາຢູ່ສະຖາບັນແຫ່ງນີ້, ໜ້າທີ່ສຶກສາຮໍ່າຮຽນແມ່ນເປັນໜ້າທີ່ໃຈກາງສໍາຄັນຕົ້ນຕໍ, ສະນັ້ນຕ້ອງໄດ້ຕັ້ງໃຈຄົ້ນຄວ້າ, ຮໍ່າຮຽນ, ຮຽນໃຫ້ດີ, ໃຫ້ເກັ່ງ, ຮູ້ໝູນໃຊ້ຫຼາຍວິທີການຮຽນ ໂດຍຕິດພັນແໜ້ນກັບການຮຽນນຳຄູອາຈານ, ຮຽນນຳໝູ່ເພື່ອນ ແລະ ຮຽນດ້ວຍຕົນເອງ, ຕ້ອງປະຕິບັດລະບຽບວິໄນຂອງກອງທັບ ແລະ ລະບຽບວິໄນ ຂອງວິທະຍາຄານ ວາງອອກຢ່າງເຂັ້ມງວດ, ຕ້ອງມີຄວາມສາມັກຄີ ແລະ ຄວາມເປັນເອກະພາບພາຍໃນ, ຮັກແພງຊ່ວຍເຫຼືອເຊິ່ງກັນ ແລະ ກັນ. ນອກຈາກຮ່ໍາຮຽນແລ້ວຍັງມີໜ້າທີ່ ແລະ ພັນທະໃນການປັບປຸງ-ກໍ່ສ້າງກົມກອງ ແລະ ວິທະຍາຄານໃຫ້ເຕີບໃຫຍ່ເຂັ້ມແຂງ ໃຫ້ສົມກັບເປັນສະຖາບັນສຶກສາປ້ອງກັນຊາດສູງສຸດ ຂອງກອງທັບປະຊາຊົນລາວ, ທັງສາມາດປຸກລະດົມ ແລະ ເຕົ້າໂຮມຄວາມສາມັກຄີ ເພື່ອພ້ອມກັນເຮັດສໍາເລັດໜ້າທີ່ຢ່າງຈົບງາມ. ພ້ອມດຽວກັນນັ້ນກໍຍັງໄດ້ຮັບຟັງການເຜີຍແຜ່ ແຜນການຮຽນ-ການສອນ, ກົດລະບຽບຂອງນັກສຶກສານາຍທະຫານ ຢູ່ ວປກ ແລະ ວຽກງານຮັບປະກັນຈຳນວນໜຶ່ງອີກດ້ວຍ.
ຂ່າວຍັງໃຫ້ຮູ້ຕື່ມອີກວ່າ: ໃນຕອນແລງຂອງວັນດຽວກັນນີ້ ສະຫາຍ ພົວ ຮສ ປອ ສົມພອນ ສິສຸວັນນະ ຮອງຫົວໜ້າການເມືອງ, ຫົວໜ້າກົມການເມືອງ ວິທະຍາຄານປ້ອງກັນຊາດ ໄກສອນ ພົມວິຫານ ກໍ່ໄດ້ພົບປະໂອ້ລົມນັກສຶກສາລະບົບພາສາຕ່າງປະເທດ ສົກຮຽນ 2024 - 2025 ເຊັ່ນດຽວກັນອີກດ້ວຍ.
ພາບ-ຂ່າວ: ສົງການ ທະວີສຸກ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
