ວັນສຸກ, ວັນທີ 04 ຕຸລາ 2024
ວິທະຍາຄານ ເຕັກນິກການທະຫານ ມອບເງິນອຸດໜູນໃຫ້ພະນັກງານທີ່ໄດ້ຮັບນະໂຍບາຍພັກຜ່ອນບຳນານ
ເວລາອອກຂ່າວ: 2024-09-13 13:57:55 | ຜູ້ຂຽນ : admin2 | ຈຳນວນຄົນເຂົ້າຊົມ: 260 | ຄວາມນິຍົມ: 
ວັນທີ 11 ກັນຍາ ຜ່ານມານີ້ ວິທະຍາຄານ ເຕັກນິກການທະຫານ ໄດ້ຈັດຕັ້ງພິທີມອບເງິນໃຫ້ພະນັກງານທີ່ໄດ້ຮັບນະໂຍບາຍພັກການຮັບບຳນານ ໂດຍການເຂົ້າຮ່ວມເປັນປະທານຂອງ ສະຫາຍ ພົນຈັດຕະວາ ແສງຍືນ ລັດສະໝີ ຫົວໜ້າການເມືອງ ວິທະຍາຄານເຕັກນິກການທະຫານ, ມີບັນດາສະຫາຍ ຕ່າງໜ້າ ຫ້ອງເຕັກນິກ, ຫ້ອງພະລາທິການ, ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ພັນໂທ ສົມສຸກ ແກ້ວຄຳພົນ ຫົວໜ້າພະແນກ ພະນັກງານ ວິທະຍາຄານເຕັກນິກການທະຫານ ຂຶ້ນຜ່ານ ຂໍ້ຕົງລົງຂອງກະຊວງປ້ອງກັນປະເທດ ວ່າດ້ວຍການອະນຸມັດໃຫ້ນາຍທະຫານພັກການຮັບບຳນານ ອີງຕາມກົດໝາຍ ວ່າດ້ວຍປະກັນສັງຄົມ, ອີງຕາມຂໍ້ຕົງລົງຂອງລັດທະມົນຕີກະຊວງປ້ອງກັນປະເທດ ວ່າດ້ວຍການ ອະນຸມັດໃຫ້ ສະຫາຍ ພັນໂທ ບຸດດີ ມະນີວັນ ຫົວໜ້າພະແນກຄຸ້ມຄອງລົດ ຫ້ອງເຕັກນິກ ແລະ ສະຫາຍ ພັນຕີ ນາງ ສິງພອນ ໄຊຍະວົງສາ ປຸງແຕ່ງ ພະແນກ ອຸປະໂພກ - ບໍລິໂພກ ຫ້ອງພະລາທິການ ພັກການຮັບບໍານານ ນັບແຕ່ງວດ 04 ປີ 2024 ເປັນຕົ້ນໄປ ເປັນຈຳນວນເງິນທັງໝົດ 35,113,019 ກີບ.
ການມອບເງິນໃນຄັ້ງນີ້ກໍ່ເພື່ອເປັນທຶນຮອນ ໃນການປັບປຸງຊີວິດການເປັນຢູ່ ໃຫ້ພະນັກງານທີ່ໄດ້ຮັບບຳນານຄັ້ງນີ້ ທັງເປັນການປະຕິບັດນະໂຍບາຍລວມຂອງພັກ-ລັດ ທີ່ມີຕໍ່ນາຍ ແລະ ພົນທະຫານ ໃນຖັນແຖວກອງທັບປະຊາຊົນລາວ ທີ່ໄດ້ປະກອບສ່ວນເຂົ້າໃນພາລະກິດປົກປັກຮັກສາປະເທດຊາດ ກໍ່ຄືກົມກອງຕາມໜ້າທີ່ວຽກງານ ທີ່ໄດ້ຮັບການມອບໝາຍຕະຫຼອດໄລຍະຜ່ານມາ ທັງເປັນການປະຕິບັດຕາມຂໍ້ຕົກລົງຂອງກະຊວງປ້ອງກັນປະເທດ ວ່າດ້ວຍການຕອບບຸນແທນຄຸນ ຂອງບັນດາ ສະຫາຍ ທີ່ໄດ້ເສຍສະຫຼະແຮງກາຍ ສະຕິປັນຍາຂອງຕົນເພື່ອພາລະກິດປົກປັກຮັກສາ ແລະ ສ້າງສາປະເທດຊາດ ກໍ່ຄືການປະກອບສ່ວນເຂົ້າໃນການປັບປຸງກໍ່ສ້າງກົມກອງໃນໄລຍະຜ່ານມາທີ່ມີຜົນງານອັນໃຫ່ຍຫຼວງຫຼາຍດ້ານ.
ສະຫາຍ ພົນຈັດຕະວາ ແສງຍືນ ລັດສະໝີ ກໍ່ໄດ້ສະແດງຄວາມຂອບໃຈ ແລະ ຮູ້ບຸນຄຸນຕໍ່ຜົນງານການເຄື່ອນໄຫວປະຕິວັດຂອງບັນດາສະຫາຍທີໄດ້ຮັບບຳນານ ພ້ອມທັງເນັ້ນໜັກໃຫ້ ພະນັກງານທີ່ໄດ້ຮັບການພັກບໍານານ ໃຫ້ສືບຕໍ່ເປັນພະນັກງານຫຼັກແຫຼ່ງທີ່ດີ, ເປັນແບບຢ່າງໃຫ້ແກ່ສັງຄົມ, ຊ່ວຍເຫຼືອອໍານາດການປົກຄອງທ້ອງຖິ່ນທີ່ຕົນເອງສັງກັດຢູ່ ໃນການສຶກສາອົບຮົມການເມືອງແນວຄິດ, ເຕົ້າໂຮມຄວາມສາມັກຄີ, ປຸກລະດົມສັງຄົມໃຫ້ເຂົ້າໃຈແຈ້ງຕໍ່ແນວທາງນະໂຍບາຍຂອງພັກ-ລັດ, ຍົກສູງສະຕິລະວັງຕົວຕໍ່ກົນອຸບາຍຫັນປ່ຽນໂດຍສັນຕິຂອງສັດຕູ, ສຶກສາອົບຮົມລູກຫຼານໃຫ້ເປັນຄົນດີ, ມີຄຸນທາດການເມືອງໜັກແໜ້ນ ແລະ ນໍາໃຊ້ເງິນຈໍານວນດັ່ງກ່າວເຂົ້າໃນການພັດທະນາເສດຖະກິດຄອບຄົວໃຫ້ດີຂຶ້ນກວ່າເກົ່າ
ໂດຍ: ນ ໄຂຄຳ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
