ວັນເສົາ, ວັນທີ 14 ກັນຍາ 2024
ຮອງຫົວໜ້າກົມກວດກາ ເຄື່ອນໄຫວເຮັດວຽກຢູ່ທະຫານແຂວງອັດຕະປື
ເວລາອອກຂ່າວ: 2024-09-04 22:00:12 | ຜູ້ຂຽນ : admin2 | ຈຳນວນຄົນເຂົ້າຊົມ: 297 | ຄວາມນິຍົມ: 
ວັນທີ 3 ກັນຍານີ້, ສະຫາຍ ພັນເອກ ສີສົມພູ ແກ້ວບຸນລ້ອມ ຮອງຫົວໜ້າກົມກວດກາ ກະຊວງປ້ອງກັນປະເທດ, ພ້ອມດ້ວຍທີມງານ ໄດ້ເຄື່ອນໄຫວເຮັດວຽກຢູ່ ກອງບັນຊາການທະຫານແຂວງອັດຕະປື, ມີສະຫາຍ ພົນຈັດຕະວາ ໂຊກໄຊ ພິມມະລາ ຄະນະປະຈໍາພັກແຂວງ, ເລຂາຄະນະພັກ, ຫົວໜ້າການເມືອງ ກອງບັນຊາການທະຫານແຂວງອັດຕະປື ພ້ອມດ້ວຍຄະນະພັກ-ຄະນະບັນຊາ ອົງການ 5 ຫ້ອງ ແລະ ພະແນກກວດກາ ເຂົ້າຮ່ວມ.
ໂອກາດນີ້, ສະຫາຍ ຮອງຫົວໜ້າກົມກວດກາ ໄດ້ຮັບຟັງບົດລາຍງານໂດຍຫຍໍ້ ການເຄື່ອນໄຫວວຽກງານກວດກາໃນໄລຍະຜ່ານມາຂອງກອງບັນຊາການທະຫານແຂວງອັດຕະປື, ໂດຍໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ, ບາງບັນຫາທີ່ຈະຕ້ອງໄດ້ສຸມໃສ່, ປັບປຸງແກ້ໄຂຢ່າງເດັດຂາດໃນປີຕໍ່ໜ້າ, ໄລຍະຜ່ານມາ ຄະນະພັກ-ຄະນະບັນຊາແຕ່ລະຂັ້ນໄດ້ເອົາໃຈໃສ່ເຄື່ອນໄຫວເຮັດໜ້າທີ່ຕາມສິດ, ພາລະບົດບາດຂອງຕົນ ໃນການກວດກາການຈັດຕັ້ງປະຕິບັດໜ້າທີ່ວຽກງານພາຍໃນພັກ ແລະ ການປະຕິບັດບັນດາຂໍ້ກຳນົດ, ກົດລະບຽບຂອງພັກ ແລະ ການຈັດຕັ້ງປະຕິບັດປັບປຸງກໍ່ສ້າງພັກຢ່າງເປັນປົກກະຕິ, ພ້ອມທັງຊຸກຍູ້ ແລະ ປັບປຸງ, ແກ້ໄຂບັນຫາໜໍ່ແໜ່ງປະກົດການຕ່າງໆ ພາຍໃນພັກຢ່າງມີປະສິດທິພາບ, ຖືກຕ້ອງ ແລະ ເດັດຂາດ ເຊິ່ງໄດ້ກວດກາ, ຕາມທິດສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ. ພ້ອມນັ້ນຄະນະພັກ ໄດ້ເອົາໃຈໃສ່ຊຸກຍູ້ວິຊາການຕິດຕາມກວດກາຄຸນທາດການເມືອງ, ຄຸນສົມບັດສິນທໍາປະຕິວັດ, ດ້ວຍການສຶກສາອົບຮົມນໍາເອົາແນວທາງ, ມະຕິ, ຄໍາສັ່ງ, ຂໍ້ກໍານົດ, ກົດລະບຽບຂອງພັກລົງເຜີຍແຜ່ເຊື່ອມຊຶມຢ່າງທົ່ວເຖິງ, ເຮັດໃຫ້ຄຸນທາດການເມືອງຂອງພະນັກງານ-ສະມາຊິກພັກ, ມີຄວາມໜັກແໜ້ນ ເຂັ້ມແຂງ ເຮັດສໍາເລັດໜ້າທີ່ຕາມການມອບໝາຍ.
ພ້ອມນີ້, ວຽກງານການກວດກາຍັງໄດ້ເອົາໃຈໃສ່ເຄື່ອນໄຫວກວດກາຕາມແຜນການເຄື່ອນໄຫວວຽກງານຕົວຈິງຂອງແຕ່ລະກົມກອງຮາກຖານ, ໂດຍສະເພາະແມ່ນການກວດກາແບບແຜນການຈັດຕັ້ງປະຕິບັດແນວທາງນະໂຍບາຍຂອງພັກ, ຂໍ້ກຳນົດ, ກົດໝາຍຂອງລັດ ແລະ ຂອງກອງທັບ ໂດຍປິ່ນອ້ອມ 4 ໜ້າທີ່ໃຫຍ່ 26 ແຜນງານ ຂອງກະຊວງປ້ອງກັນປະເທດວາງອອກ, ໂດຍສະເພາະແມ່ນການກວດກາກຳລັງພົນ, ການຄຸ້ມຄອງນຳໃຊ້ງົບປະມານລາຍຮັບ, ລາຍຈ່າຍ, ການຈັດຊື້, ຈັດຈ່າຍເຄື່ອງຂອງວັດຖຸອຸປະກອນຕ່າງໆ, ການຄຸ້ມຄອງປົກປັກຮັກສາພາຫະນະວັດຖຸ, ອາວຸດກະສຸນ ທີ່ຂັ້ນເທິງປະກອບໃຫ້, ບັນດາໂຄງການກໍ່ສ້າງ ແລະ ສ້ອມແປງຢູ່ໃນຂອບເຂດຄວາມຮັບຜິດຊອບຂອງແຕ່ລະກົມກອງສາມາດຈັດຕັ້ງປະຕິບັດຕາມແຜນການໄດ້ດີພໍສົມຄວນ.
ໂດຍ: ແສງຫຼ້າ ກຸວົງສາ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
