ວັນເສົາ, ວັນທີ 14 ກັນຍາ 2024
ກອງປະຊຸມໃຫຍ່ສະມາຊິກພັກ ຄັ້ງທີ VI ຂອງອົງຄະນະພັກ ໂຮງຮຽນກໍ່ສ້າງນາຍສິບ ເລກ 2 ວຽງໄຊ
ເວລາອອກຂ່າວ: 2024-09-03 15:42:40 | ຜູ້ຂຽນ : admin2 | ຈຳນວນຄົນເຂົ້າຊົມ: 386 | ຄວາມນິຍົມ: 
ກອງປະຊຸມໃຫຍ່ສະມາຊິກພັກ ຄັ້ງທີ VI ຂອງອົງຄະນະພັກໂຮງຮຽນກໍ່ສ້າງນາຍສິບ ເລກ 2 ວຽງໄຊ ໄດ້ໄຂຂຶ້ນ ແລະ ອັດລົງດ້ວຍຜົນສຳເລັດຢ່າງຈົບງາມ ໃນວັນທີ 30 ສິງຫາ 2024 ນີ້. ໂດຍການເປັນປະທານຂອງ ສະຫາຍ ພົນຕີ ສອນທອງ ພົມລາວົງ ກຳມະການຄະນະພັກກະຊວງປ້ອງກັນປະເທດ, ຮອງຫົວໜ້າກົມໃຫຍ່ການເມືອງກອງທັບ, ມີກົມຈັດຕັ້ງພັກ, ກົມພະນັກງານ, ບັນດາກົມກອງອ້ອມຂ້າງ, ພະນັກງານອາວຸໂສບຳນານ ແລະ ຜູ້ແທນສົມບູນເຂົ້າຮ່ວມ.
ສະຫາຍ ພົນຈັດຕະວາ ວົງມະນີຈັນ ສາມາວົງ ຮອງເລຂາຄະນະພັກ, ຫົວໜ້າການທະຫານໂຮງຮຽນກໍ່ສ້າງນາຍສິບເລກ 2 ວຽງໄຊ ໄດ້ຍົກໃຫ້ເຫັນຜົນງານການເຄື່ອນໄຫວນຳພາຂອງຄະນະພັກຕະຫຼອດໄລຍະ 5 ປີຜ່ານມາ ເຊິ່ງມີຜົນງານຜົ້ນເດັ່ນໃນຫຼາຍດ້ານ, ພ້ອມນີ້ ກອງປະຊຸມໄດ້ຄົ້ນຄວ້າປະກອບຄຳເຫັນ ແລະ ຮັບຮອງເອົາຮ່າງລາຍງານການເມືອງ, ຮ່າງບົດສໍາຫຼວດການນໍາພາລວມ ຂອງຄະນະພັກ ສະໄໝທີ V ໃນໄລຍະ 5 ປີຜ່ານມາ ແລະ ປ່ອນບັດຄັດເລືອກເອົາຄະນະບໍລິຫານງານພັກຊຸດໃໝ່ ເພື່ອສືບຕໍ່ນໍາພາ-ຊີ້ນຳວຽກງານໃນຕໍ່ໜ້າ. ເຊິ່ງກອງປະຊຸມຄັ້ງປະຖົມມະລືກໄດ້ຕົກລົງເຫັນດີເປັນເອກະພາບ ເລືອກເອົາເລຂາ ແລະ ຮອງເລຂາ ຄະນະພັກ ໂຮງຮຽນກໍ່ສ້າງນາຍສິບ ເລກ 2 ວຽງໄຊ ສະໄໝທີ VI ຄື: ສະຫາຍ ພັນເອກ ສຳລີ ຈັນທະວົງ ເປັນເລຂາຄະນະພັກ, ສະຫາຍ ພົນຈັດຕະວາ ວົງມະນີຈັນ ສາມາວົງ ເປັນຮອງເລຂາຄະນະພັກ ແລະ ເລືອກເອົາສະຫາຍ ພັນໂທ ບຸນມີ ໄຕໄຊຍະວົງ ເປັນຄະນະປະຈຳພັກ.
ໂອກາດດັ່ງກ່າວ, ສະຫາຍ ພົນຕີ ສອນທອງ ພົມລາວົງ ໄດ້ໂອ້ລົມແລະ ສະແດງຄວາມຍ້ອງຍໍຊົມເຊີຍຕໍ່ຜົນງານ ຂອງອົງຄະນະພັກໂຮງຮຽນກໍ່ສ້າງນາຍສິບ ເລກ 2 ວຽງໄຊ ທີ່ຍາດມາໄດ້ຕະຫຼອດໄລຍະ 5 ປີຜ່ານມາ ແລະ ເນັ້ນໜັກໃຫ້ຄະນະພັກຊຸດໃໝ່ ຕ້ອງສືບຕໍ່ນໍາພາ-ຊີ້ນຳຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ເປັນແຜນງານ, ໂຄງການ ແລະ ສ້າງເປັນນິຕິກຳລະອຽດຢ່າງຕັ້ງໜ້າ. ຕ້ອງຮີບຮ້ອນໃຫ້ມີການແບ່ງວຽກ-ແບ່ງຄວາມຮັບຜິດຊອບພາຍໃນຄະນະພັກໂຮງຮຽນ, ຄະນະປະຈຳພັກໃຫ້ລະອຽດຈະແຈ້ງ; ເຊີດຊູຄວາມເປັນເຈົ້າການຕໍ່ໜ້າທີ່ການເມືອງ, ພາຍໃຕ້ຄວາມເອກະພາບພາຍໃນຄະນະພັກ. ຕ້ອງຍຶດໝັ້ນ ແລະ ປະຕິບັດຢ່າງເຂັ້ມງວດບັນດາຫຼັກການ, ລະບອບແບບແຜນວິທີນຳພາຂອງພັກ ແລະ ຄວາມຮັບຜິດຊອບໂດຍກົງຕໍ່ວຽກງານທີ່ໄດ້ຖືກມອບໝາຍ. ເປັນແບບຢ່າງນຳໜ້າດ້ານຄວາມຈົງຮັກພັກດີ ແລະ ຄວາມຊື່ສັດບໍລິສຸດຕໍ່ອຸດົມການຂອງພັກ ແລະ ຜົນປະໂຫຍດຂອງປະເທດຊາດ. ຊຸກຍູ້ໃຫ້ການຈັດຕັ້ງ, ພະນັກງານ-ນັກຮົບ ທີ່ຂຶ້ນກັບຄວາມຮັບຜິດຊອບຂອງຕົນ, ມີທັດສະນະ ແລະ ການກະທຳທີ່ຖືກຕ້ອງ, ຕັ້ງໜ້າຕ້ານບັນດາປະກົດການຫຍໍ້ທໍ້, ລ່ວງລະເມີດກົດໝາຍ ແລະ ອື່ນໆ. ສືບຕໍ່ເສີມຂະຫຍາຍມູນເຊື້ອແຫ່ງຄວາມສາມັກຄີ, ຄວາມເປັນເອກະພາບພາຍໃນ-ພາຍນອກໃຫ້ແໜ້ນແຟ້ນ ບົນພື້ນຖານແນວທາງຂອງພັກ, ແລະ ພົວພັນສາມັກຄີສາກົນຢ່າງກວ້າງຂວາງ.
ໂດຍ: ສົມພົງ ແກ້ວປະເສີດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
