ວັນສຸກ, ວັນທີ 04 ຕຸລາ 2024
ທະຫານແຂວງບໍ່ແກ້ວ ສະຫຼຸບວຽກງານປ້ອງກັນຊາດ ປະຈຳປີ 2024
ເວລາອອກຂ່າວ: 2024-06-10 15:17:24 | ຜູ້ຂຽນ : admin2 | ຈຳນວນຄົນເຂົ້າຊົມ: 530 | ຄວາມນິຍົມ: 
ໃນວັນທີ7 ມິຖຸນາ 2024 ນີ້, ຢູ່ທີ່ກອງບັນຊາການທະຫານແຂວງບໍ່ແກ້ວ ໄດ້ ສະຫຼຸບຖອດຖອນບົດຮຽນວຽກງານປ້ອງກັນຊາດຮອບດ້ານ 6ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2024, ໂດຍການເປັນປະທານຂອງ ສະຫາຍ ພົນຈັດຕະວາ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງບໍ່ແກ້ວ, ສະຫາຍ ພັນເອກ ທອງໄຂ ສີຍາລາດ ຮອງເລຂາຄະນະພັກ ຫົວໜ້າການທະຫານດອງບັນຊາການທະຫານແຂວງບໍ່ແກ້ວ ມີບັນດາຄະນະພັກ-ຄະນະບັນຊາ 6 ຫ້ອງ, 5 ກອງບັນຊາການເມືອງ, 2 ກອງພັນ, ໂຮງຮຽນ, ໂຮງໝໍ, ກອງຮ້ອຍເອກະລາດແລະແຂກຖືກເຊີນຈາກພະແນກການອ້ອມຂ້າງແຂວງ ຕະຫຼອດຮອດ ພະນັກງານຫຼັກແຫຼ່ງຈາກບັນດາກົມກອງຮາກຖານເຂົ້າຮ່ວມ.
ສະຫາຍ ພັນເອກ ອຸດົມໄຊ ພົມປັນຍາ ຫົວໜ້າຫ້ອງການແລະບໍລິຫານ ກອງບັນຊາການທະຫານແຂວງບໍ່ແກ້ວ ໄດ້ຂຶ້ນຜ່ານບົດສະຫຼຸບຕີລາຄາ, ການເຄື່ອນໄຫວຈັດຕັ້ງປະຕິບັດວຽກງານປ້ອງກັນຊາດຮອບດ້ານໃນໄລຍະ 1 ປີຜ່ານມາ ແລະ ວາງທິດທາງແຜນການໃນຕໍ່ໜ້າ, ໂດຍລວມ ແມ່ນມີຄວາມສະຫງົບແລະປອດໄພ 100%, ພະນັກງານນາຍແລະ ພົນທະຫານ ແມ່ນມີຄວາມຫ້າວຫັນວ່ອງໄວ, ມີນໍ້າໃຈຮັກຊາດຢ່າງສູງສົ່ງ ຕ້ານ ແລະ ສະກັດກັ້ນທຸກກົນອຸບາຍ ແລະ ບັນດາປະກົດການຫຍໍ້ທໍ້ຂອງພວກອິດທິກຳລັງປໍລະປັກ, ຈັດຕັ້ງກໍາລັງປ້ອງກັນເວນຍາມ ຄ້າຍຄູ່ ແລະ ຂອບເຂດຄວາມຮັບຜິດຊອບທົ່ວເທດສະບານແຂວງ ໃຫ້ມີຄວາມສະຫງົບ ແລະ ປອດໄພ. ໂດຍປະຕິບັດຕາມ 4ໜ້າທີ່ໃຫຍ່ 26ແຜນງານຂອງກະຊວງ ປ້ອງກັນປະເທດວາງອອກໃຫ້ປະກົດຜົນເປັນຈິງ, ພ້ອມກັນນັ້ນ, ຜູ້ແທນກອງປະຊຸມໄດ້ສຸມສະຕິປັນຍາເຂົ້າໃນການຄົ້ນຄວ້າປະກອບຄຳຄິດເຫັນ, ແລກປ່ຽນ ບົດຮຽນດ້ວຍບັນກາດຟົດຟື້ນ ແລະ ມີຄວາມໝາຍສຳຄັນຢ່າງເລິກເຊິ່ງ. ເພື່ອປັບປຸງແກ້ໄຂວຽກງານປ້ອງກັນຊາດຮອບດ້ານ ກໍຄືປັບປຸງ ກໍ່ສ້າງພັກ-ພະນັກງານ, ກໍ່ສ້າງກຳລັງປະກອບອາວຸດທ້ອງຖິ່ນແຂວງບໍ່ແກ້ວ ໃນທຸກດ້ານຕາມແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ຮັບປະກັນເຮັດໃຫ້ກຳລັງປະກອບອາວຸດທົ່ວແຂວງ ມີຄວາມສະຫງົບໂດຍພື້ນຖານ.
ໂອກາດນີ້ ສະຫາຍ ພົນຈັດຕະວາ ບຸນມີ ພາມີໄຊ ໄດ້ຍ້ອງຍໍຊົມເຊີຍຕໍ່ວຽກງານຜົນສໍາເລັດທີ່ຍາດມາໄດ້ໃນໄລຍະຜ່ານມາ ພ້ອມທັງໄດ້ເນັ້ນໜັກ ແລະ ຮຽກຮ້ອງບາງບັນຫາໃຫ້ບັນດາ ຄະນະພັກ-ຄະນະບັນຊາ ແຕ່ລະຂັ້ນ ຈົ່ງພ້ອມກັນສຶກສາອົບຮົມຮອບດ້ານການເມືອງ-ນໍາພາແນວຄິດໃຫ້ເປັນບັນຫາສໍາຄັນ, ຈັດຕັ້ງປະຕິບັດເຮັດສຳເລັດໜ້າທີ່ວຽກງານຕາມພາລະບົດບາດຂອງຕົນເຂົ້າໃນການຊີ້ນຳ-ນຳພາ, ບັນຊາພະນັກງານ-ນັກຮົບ, ປະຕິບັດລະບອບປະຊຸມ ແລະ ລະບົບສ່ອງແສງລາຍງານພ້ອມກັບຕິດຕາມກວດກາສະພາບການໃຫ້ໜັກແໜ້ນເຂັ້ມແຂງ ແລະ ວ່ອງໄວທັນເວລາ, ເປັນເຈົ້າການເພີ່ມທະວີມີສະຕິລະວັງຕົວທັບມ້າງທຸກກົນອຸບາຍຫັນປ່ຽນໂດຍສັນຕິຂອງສັດຕູ, ສືບຕໍ່ປັບປຸງແບບແຜນວິທີການເຮັດວຽກ, ຄົ້ນຄວ້າສຶກສາອົບຮົມດ້ານທິດສະດີການ ເມືອງຂອງພັກ, ເພື່ອແນໃສ່ກໍ່ສ້າງພັກ-ກໍ່ສ້າງພະນັກງານ ກໍຄືການປັບປຸງກໍ່ສ້າງກຳລັງປະກອບອາວຸດ ໃຫ້ມີຄວາມເຕີບໃຫຍ່ໜັກແໜ້ນເຂັ້ມແຂງກ້າວຂຶ້ນຢ່າງບໍ່ຢຸດຢັ້ງ.
ຂ່າວໂດຍ: ວໍລະສິດ ພິດສະຫາຍ, ພາບໂດຍ: ນາງ ນີ່ ທໍາມະວົງ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
