ກອງທັບປະຊາຊົນລາວ
 
ວັນພຸດ, ວັນທີ 19 ມິຖຸນາ 2024

  

ຍົກ​ສູງ​ວຽກ​ງານ​ອົບຮົມ​ສຶກ​ສາ​ປ້ອງ​ກັນ​ຊາດ-ປ້ອງ​ກັນ​ຄວາມສະຫງົບໃຫ້ແຕ່ລະເປົ້າໝາຍ
ເວລາອອກຂ່າວ: 2024-05-21 09:03:08 | ຜູ້ຂຽນ : admin1 | ຈຳນວນຄົນເຂົ້າຊົມ: 185 | ຄວາມນິຍົມ:



ສະຫາຍ ພົນ​ຈັດຕະວາ ທອງ​ສີ ກຸນ​ສະ​ນະ ກຳມະການ​ຄະນະ​ປະຈຳ​ພັກ​ແຂວງ, ຮອງ​ປະທານ, ຜູ້​ປະຈຳການ​ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ ຄວາມ​ສະຫງົບ, ຫົວໜ້າ​ການ​ທະຫານ ​ກອງ​ບັນຊາ​ການ​ທະຫານ​ແຂວງ​ເຊ​ກອງ ໄດ້​ກ່າວ​ວ່າ: ປັດຈຸບັນ​ເຖິງ​ແມ່ນ​ວ່າ​ປະເທດ​ຊາດ​ຈະ​ມີ​ຄວາມ​ສະຫງົບ, ການເມືອງ​ພາຍ​ໃນ​ມີ​ຄວາມ​ໝັ້ນຄົງ, ການ​ພັດທະນາ​ເສດຖະກິດ, ວັດທະນະ​ທຳ ແລະ ສັງຄົມມີ​ທ່າ​ກ້າວ​ຂະຫຍາຍຕົວ​ຢ່າງ​ຕໍ່​ເນື່ອງ, ແຕ່​ພວກ​ກຳລັງ​ອິດ​ທິ​ປໍ​ລະ​ປັກ​ຍັງ​ສຶບ​ຕໍ່​ເຄື່ອນ​ໄຫວ​ກົນອຸບາຍ​ຍຸດ​ທະ​ສາດ​ຫັນປ່ຽນ​ໂດຍ​ສັນຕິ ພວກ​ເຂົາໄດ້​ເຄື່ອນ​ໄຫວ​ທຳລາຍ​ມ້າງເພ​ແນວ​ຄິດ, ຄວາມ​ສາມັກຄີ​ປອງ​ດອງ​ພາຍ​ໃນ​ຊາດ ໂດຍ​ພະຍາຍາມ​ນຳ​ໃຊ້​ຊ່ອງ​ວ່າງ​ກົນ​ໄກ​ເປີດ​ກວ້າງ​ການ​ຮ່ວມ​ມື​ສາກົນ​ເພື່ອ​ກົດ​ດັນ​ແຊກ​ແຊງທາງ​ສາ ສະໜາ, ສິດທິ​ມະນຸດ, ບັນຫາ​ຊົນເຜົ່າ ແລະ ອື່ນໆ ເປັນ​ຂໍ້​ອ້າງ​ເພື່ອ​ໂຄສະນາ​ທັບ​ຖົມ​ໂຈມ​ຕີ​ແນວທາງ​ນະໂຍບາຍ​ຂອງ​ພັກ-ລັດ ແລະ ກ່ໍ​ໃຫ້​ເກີດ​ມີ​ປະກົດ​ການ​ຫຍໍ້ ທໍ້​ໃນ​ສັງຄົມ. ຕໍ່​ບັນຫາ​ດັ່ງກ່າວ ພາຍ​ໃຕ້​ການ​ນຳພາ​ອັນ​ສະຫຼາດ​ສ່ອງ​ໃສ​ຂອງ​ພັກປະຊາຊົນ ປະຕິວັດ​ລາວ ຖື​ສຳຄັນ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ ທົ່ວ​ປວງ​ຊົນ​ຮອບດ້ານ​ເປັນ​ບູລິມະສິດ​ແຖວ​ໜ້າ​ ຕິດ​ພັນ​ກັບ​ວຽກ​ງານ 3 ສ້າງ​ຫັນ​ລົງ​ສູ່​ຮາກ​ຖານ​ການເມືອງ​ພັດທະນາ​ຊົນນະບົດ​ຮອບດ້ານ ​ຕາມ 4 ເນື້ອ​ໃນ 4 ຄາດໝາຍ ສ້າງ​ທ່າ​ສະໜາມ​ສາມ​ຂັ້ນ​ໃນ​ການ​ສ້າງ​ແຂວງ​ເປັນ​ຫົວໜ່ວຍ​ຍຸດ​ທະ​ສາດ, ສ້າງ​ເມືອງ​ເປັນ​ເປັນ​ຫົວໜ່ວຍ​ເຂັ້ມແຂງ​ຮອບດ້ານ ແລະ ສ້າງ​ບ້ານ​ເປັນ​ກຸ່ມ​ບ້ານ​ພັດທະນາ ດັ່ງນັ້ນ, ກົມ​ການເມືອງ​ສູນ​ກາງ​ພັກ, ຄະນະ​ເລຂາທິການ​ສູນ​ກາງ​ພັກ ຈິ່ງ​ອອກ​ມະຕິ​ຕົກລົງ​ໃຫ້​ມີ​ການ​ສະຫຼຸບ​ຖອດ​ຖອນ​ບົດຮຽນ​ການເຄື່ອນໄຫວ​ຈັດ​ຕັ້ງ​ປະຕິບັດ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ປະຈຳ​ປີ​ຂອງ​ແຕ່​ລະ​ພາກ​ຄື: ພາກ​ເໜືອ, ພາກ​ກາງ, ພາກ​ໃຕ້ ແລະ ເຂດ​ໃຈກາງ​ນະຄອນຫຼວງ​ວຽງ​ຈັນ ມອບ​ໃຫ້​ກະຊວງ​ປ້ອງ​ກັນ​ປະເທດ, ກະຊວງ​ປ້ອງ​ກັນ​ຄວາມ​ສະຫງົບ, ການ​ນຳ​ແຂວງ, ນະຄອນຫຼວງ​ວຽງ​ຈັນ, ກອງ​ບັນຊາ​ການ​ທະຫານ​ແຂວງ-ນະຄອນຫຼວງ​ວຽງ​ຈັນ, ກອງ​ບັນຊາ​ປ້ອງ​ກັນຄວາມ​ສະຫງົບ​ແຂວງ-ນະຄອນຫຼວງ​ວຽງ​ຈັນ ແລະ ອຳນາດ​ການ​ປົກຄອງ​ເມືອງ​ທຸກ​ຂັ້ນ ເປັນ​ເຈົ້າ​ການ​ປະຕິບັດ​ວຽກ​ງານ​ດັ່ງກ່າວ​ໃຫ້​ມີ​ຄວາມ​ສະຫງົບ​ໂດຍ​ພື້ນຖານໃນ​ນີ້, ເວົ້າ​ສະເພາະ​ແຂວງ​ເຊ​ກອງ ​ເປັນ​ແຂວງ​ໜື່ງ​ທີ່​ມີ​ຍຸດ​ທະ​ສາດ​ສຳຄັນ ແລະ ມີ​ມູນເຊື້ອ​ປະຕິວັດ ໃນ​ການ​ສູ້​ຮົບ​ປົດ​ປ່ອຍ​ຊາດ ແລະ ເປັນ​ກຳລັງ​ຫຼັກ​ແຫຼ່ງ​ຄໍ້າປະກັນ​ໃຫ້​ປະເທດ​ຊາດ​ມີ​ສະຖຽນ​ນະ​ພາບ​ທາງ​ດ້ານ​ການເມືອງ, ເສດຖະກິດ​ເຕີບ​ໃຫຍ່​ຂະຫຍາຍຕົວ ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ພາລະກິດ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ​ໃຫ້​ມີ​ຄວາມ​ໝັ້ນຄົງ​ຮຸ່ງເຮືອງ​ສີວິໄລ. ສະຫາຍ ພົນ​ຈັດຕະວາ ທອງ​ສີ ກຸນ​ສະ​ນະ ຍັງ​ກ່າວ​ຕື່ມ​ວ່າ: ຕໍ​່​ວຽກ​ງານ​ດັ່ງກ່າວ, ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ແຂວງ​ເຊ​ກອງ ໄດ້​ຈັດ​ຕັ້ງ​ອົບຮົມ-ຫັດ​ແອບ​ວຽກ​ງານ​ສຶກ​ສາ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ໃຫ້​ເປົ້າ​ໝາຍ​ແຕ່​ລະ​ຂັ້ນ​ນັບ​ແຕ່​ຂັ້ນ​ແຂວງ, ເມືອງ, ພະ​ແນ​ການ​ຕ່າງໆ ໂດຍ​ຖື​ ເອົາ​ວຽກ​ງານ​ດັ່ງກ່າວ​ເປັນ​ບ່ອນ​ອີງ​ໃນ​ການ​ເຮັດ​ໃຫ້​ສະພາບ​ມີ​ຄວາມ​ສະຫງົບ ໜູນ​ໜິບ​ການ​ພັດທະນາ​ເສດຖະກິດ, ວັດທະນະທຳ-ສັງຄົມ ໃຫ້​ມີ​ທ່າ​ກ້າວ​ຂະ ຫຍາຍຕົວ ປະຊາຊົນ​ບັນດາເຜົ່າ​ຢູ່​ທ່າງ​ທຳ​ມາຫາ​ກິນ. ສະເພາະ​ໃນ​ປີ 2024 ນີ້, ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບແຂວງ ​ໄດ້​ເປີດ​ຊຸດ​ອົບຮົມ​ໃຫ້​ເປົ້າ​ໝາຍ 4 ຊຸດ​ທີ I ປະຈຳ​ປີ 2024 ເຊິ່ງ​ມີ​​ສຳ​ມະ​ນາ​ກອນ​ເຂົ້າ​ຮ່ວມ​ຕາມ​ແຜນການ​ອົບຮົມ​ທັງ​ໝົດ 32 ສະຫາຍ ແຕ່​ຕົວ​ຈິງ​ມີ 26 ສະຫາຍ ໂດຍ​ນຳ​ໃຊ້​ທຶນ​ຮອນ​​ການ​ອົບຮົມ​ຈາກ​ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ແຂວງ ເຊິ່ງ​ເນື້ອ​ໃນ​ການ​ອົບຮົມ​ປະກອບ​ມີ 2 ພາກ​ຄື: ພາກ​ທິດ​ສະ​ດີ ແລະ ພາກ​ປະຕິບັດ​ຕົວ​ຈິງ​ຢູ່​ສະໜາມ​ຫັດ​ແອບ, ຕະຫຼອດ​ໄລຍະ​ການ​ອົບຮົມ 16 ວັນ ຄະນະ​ຮັບຜິດຊອບ, ຕະຫຼອດ​ຮອດ​ພະນັກງານຄູ-ອາຈານ ແລະ ນັກ​ເຝິກອົບຮົມ ໄດ້​ພ້ອມ​ກັນ​ຍົກ​ສູງ​ຄຸນ​ທາດ​ການເມືອງ, ນ້ຳໃຈ​ເດັດ​ດຽວ​ປະຕິວັດ​ສຸມ​ໃສ່​ການ​ອົບຮົມ-ຫັດ​ແອບ​ຢ່າງ​ຕັ້ງໜ້າ ສາມາດ​ກຳ​ໄດ້​ທາງ​ດ້ານ​ທິດ​ສະ​ດີ, ຫຼັກການ​ທີ່​ສຳຄັນ​ຕ່າງໆ​ ທີ່​ຄະນະ​ສຶກ​ສາ​ອົບຮົມ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ວາງ​ອອກ ໃນ​ນັ້ນ, ໄດ້​ເລັ່ງ​ໃສ່​ເປົ້າ​ໝາຍ​ພະນັກງານ​ນຳພາ-ບັນຊາ​ຂັ້ນ​ບ້ານ, ເມືອງ ແລະ ແຂວງ ເປັນ​ຈຸດ​ສຸມ​ຕົ້ນຕໍ​ສຳຄັນ ​ເພື່ອ​ເຮັດ​ໃຫ້​ເຂົາເຈົ້າ​ໄດ້​ຮັບ​ຮູ້ ແລະ ເຂົ້າໃຈ​ແຈ້ງ ໃນ​ການ​ນຳພາ-ບັນຊາ​ສູ້​ຮົບ ແລະ ແກ້​ໄຂ​ກໍລະນີ​ຕ່າງໆ ​ຢູ່​ຂັ້ນ​ຮາກ​ຖານ​ເມື່ອ​ມີ​ສະພາບ​ກໍ​ສາມາດ​ແກ້​ໄຂ​ໄດ້​ຂາດ​ຕົວ​ໃນ​ພາວະ​ເພີ່ມ​ທະວີ​ກຽມພ້ອມ​ສູ້​ຮົບ, ຄວາມ​ຕັດ​ສີນ​ໃຈ​ຂອງ​ຜູ້​ບັນຊາ​ດ້ານ​ຮົບ​ແນວ​ໜ້າ​ຢູ່​ຂັ້ນ​ທ້ອງຖິ່ນ ທັງ​ເປັນ​ການ​ທົບ​ຖວນ​ຄືນ​ມູນເຊື້ອ​ພິລະ​ອາດ​ຫານ​ ຂອງ​ປະຊາຊົນ​ແຂວງ​ເຊ​ກອງ, ເວົ້າ​ສະເພາະ​ແມ່ນ​ພະນັກ ງານ​ນຳພາ-ບັນຊາ​ຂັ້ນ​ຕ່າງໆ​ຢູ່​ຮາກ​ຖານ​ຕ້ອງ​ກຳ​ແໜ້ນ​ແນວທາງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ໃຫ້​ແໜ້ນ. ຜ່ານ​ການ​ອົບຮົມ-ຫັດ​ແອບ​ຕົວ​ຈິງ​ເຫັນ​ວ່າ​ບັນດາ​ນັກ​ເຝິກອົບຮົມ​ສາມາດ​ກຳ​ແໜ້ນ​ພາກ​ທິດ​ສະ​ດີ ແລະ ພາກ​ປະຕິບັດ​ຕົວ​ຈິງ​ໄດ້​ດີ​ສະແດງ​ອອກ​ຜົນ​ການ​ຮຽນ​ບັນລຸ​ໄດ້ 89 % ໃນ​ນັ້ນ, ​ມີ​ຂັ້ນ​ເກັ່ງ 7 ສະຫາຍ; ກາງ 14 ສະຫາຍ ແລະ ຄາດໝາຍ 5 ສະຫາຍ​ ໃນ​ການ​ບັນຊາ​ສູ້​ຮົບ ແກ້​ ໄຂ​ກໍລະນີ​ຕ່າງໆ. ໂອກາດ​ນີ້, ຄະນະ​ກຳມະການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ແຂວງ ຍັງ​ໄດ້​ມອບ​ໃບ​ຍ້ອງຍໍ​ປະເພດ​ນຳພາ​ດີ-ບັນຊາ​ເກັ່ງ ຈຳນວນ 12 ສະຫາຍ, ພະນັກງານ​ຄູ-ອາຈານ​ສອນ​ດີ-ສອນ​ເກັ່ງ ຈຳນວນ 11 ສະຫາຍ ແລະ ມອບ​ໃບ​ກຽດ​ຕິ​ຄຸນ​ໃຫ້​ພາກສ່ວນ​ອຸປະຖຳ​ຊຸດ​ອົບຮົມ​ຄັ້ງ​ນີ້​ ອີກ​ຈຳນວນ​ໜຶ່ງ​ຢ່າງ​ໜ້າ​ຊົມເຊີຍ. ໂດຍ: ວັນ​ໄຊ ໄຊ​ສະ​ຫວັດ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ