ກອງທັບປະຊາຊົນລາວ
 
ວັນພຸດ, ວັນທີ 24 ເມສາ 2024

  

ກອງປະຊຸມປະຈຳປີ ລັດຖະມົນຕີປ້ອງກັນຄວາມສະຫງົບພາຍໃນ ກໍາປູເຈຍ-ລາວ-ຫວຽດນາມ ຄັ້ງທີ1
ເວລາອອກຂ່າວ: 2024-04-01 12:44:57 | ຜູ້ຂຽນ : admin2 | ຈຳນວນຄົນເຂົ້າຊົມ: 244 | ຄວາມນິຍົມ:



ກອງປະຊຸມປະຈຳປີ ລັດຖະມົນຕີປ້ອງກັນຄວາມສະຫງົບ, ພາຍໃນ ກໍາປູເຈຍ-ລາວ-ຫວຽດນາມ ຄັ້ງທີ1 ໄດ້ຈັດຂຶ້ນໃນວັນທີ29 ມີນາ 2024 ຢູ່ທີ່ນະຄອນດານັງ, ສສ ຫວຽດນາມ; ເປັນປະທານຮ່ວມຝ່າຍກຳປູເຈຍໂດຍ ທ່ານ ອະພິສັນຕິບັນດິດ ຊໍ ສົກຂາ ຮອງນາຍົກລັດຖະມົນຕີ ລັດຖະມົນຕີກະຊວງພາຍໃນກຳປູເຈຍ, ຝ່າຍລາວ ນໍາໂດຍ ທ່ານ ພົນເອກ ວິໄລ ຫຼ້າຄຳຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບລາວ ແລະ ທ່ານ ພົນເອກ ໂຕເລິມ ລັດຖະມົນຕີກະຊວງປ້ອງກັນຄວາມສະຫງົບຫວຽດນາມ ພ້ອມດ້ວຍຄະນະຜູ້ແທນທັງສາມກະຊວງເຂົ້າຮ່ວມ. ໃນກອງປະຊຸມ, ບັນດາທ່ານລັດຖະມົນຕີສາມກະຊວງໄດ້ຜັດປ່ຽນກັນຂຶ້ນນໍາ ສະເໜີສະພາບການຂອງໂລກ, ພາກພື້ນ ແລະ ພາຍໃນປະເທດຂອງຕົນ; ພ້ອມທັງເຫັນດີໃນການສືບຕໍ່ຮັດແໜ້ນສາຍພົວພັນ ແລະ ການຮ່ວມມືຂອງສາມກະຊວງ ໃຫ້ນັບມື້ເພີ່ມທະວີຂຶ້ນໄປເລື້ອຍໆ; ກອງປະຊຸມຄັ້ງນີ້ແມ່ນມີຄວາມໝາຍ-ຄວາມສຳຄັນຢ່າງຍິ່ງ ເຊິ່ງຈະໄດ້ຮ່ວມມືກັນໃນຫຼາຍດ້ານ ເປັນຕົ້ນແມ່ນ ການເພີ່ມທະວີຮ່ວມມືຕໍ່ສູ້ຕ້ານອາຊະຍາກຳຄ້າມະນຸດ, ການປະສານສົມທົບສະກັດກັ້ນ ແລະ ຕ້ານຢາເສຍຕິດ, ຍົກສູງໝາກຜົນການຮ່ວມມືໃນຂົງເຂດສັນຕິບານ ປະກອບສ່ວນໃນການປ້ອງກັນຄວາມສະຫງົບແຫ່ງຊາດ ໃນສະພາບການໃໝ່ ແລະ ຮັກສາຄວາມສະຫງົບບໍລິເວນຊາຍແດນຕິດຈອດ ກໍ່ຄືເຂດສາມຫຼ່ຽມພັດທະນາ ກຳປູເຈຍ-ລາວ-ຫວຽດນາມ (CLV). ທ່ານ ພົນເອກ ວິໄລ ຫຼ້າຄໍາຟອງ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບລາວ ໄດ້ຕາງໜ້າໃຫ້ຄະນະຜູ້ແທນຂັ້ນສູງກະຊວງປ້ອງກັນຄວາມສະຫງົບລາວ; ຝາກຄວາມຢື້ຢາມຖາມຂ່າວອັນອົບອຸ່ນຄວາມສາມັກຄີຮັກແພງຈາກ ຄະນະນໍາກະຊວງ ແລະ ພະນັກງານນັກຮົບໃນທົ່ວກໍາລັງປ້ອງກັນຄວາມສະຫງົບລາວ ມາຍັງ-ບັນດາທ່ານໃນທົ່ວກໍາລັງປ້ອງກັນຄວາມສະຫງົບ-ຄະນະນໍາ, ກະຊວງພາຍໃນກຳປູເຈຍ ແລະ ຫວຽດນາມ. ພ້ອມນັ້ນ, ກໍ່ໄດ້ສະແດງຄວາມສະໜັບສະໜູນ ແລະ ສະແດງຄວາມຍ້ອງຍໍຊົມເຊີຍ ມາຍັງກະຊວງປ້ອງກັນຄວາມສະຫງົບ ແຫ່ງ ສສ. ຫວຽດນາມ ທີ່ໄດ້ທຸ່ມເທ ແລະ ກະກຽມຄວາມພ້ອມດ້ານຕ່າງໆ ໃນການເປັນເຈົ້າພາບຈັດກອງປະຊຸມໃນຄັ້ງນີ້; ເຊິ່ງນອກຈາກຈະເປັນການສະແດງໃຫ້ເຫັນເຖິງຄວາມເປັນເອກະພາບ ແລະ ຄວາມເອົາໃຈໃສ່ຂອງສາມກະຊວງໃນການຈັດຕັ້ງຜັນຂະຫຍາຍຖະແຫຼງການຮ່ວມຂອງສາມ ລັດຖະບານ ໃຫ້ກາຍເປັນຮູບປະທໍາແລ້ວ, ຍັງເປັນໂອກາດອັນດີ ໃຫ້ແກ່ຄະນະຜູ້ແທນຂອງສາມກະຊວງ ກໍ່ຄືເຈົ້າ ໜ້າທີ່ບັນດາແຂວງ ທີ່ມີຊາຍແດນຮ່ວມຂອງສາມປະເທດ ໄດ້ພົບປະແລກປ່ຽນບົດຮຽນນໍາກັນ, ທັງນີ້ ກໍ່ເພື່ອຮ່ວມກັນສະກັດກັ້ນ ແລະ ຕ້ານການເຄື່ອນໄຫວກໍ່ອາຊະຍາກຳທຸກຮູບແບບ ເພື່ອຜົນປະໂຫຍດລວມຂອງສາມປະເທດ ກຳປູເຈຍ-ລາວ-ຫວຽດນາມ. ຈາກນັ້ນ, ລັດຖະມົນຕີສາມກະຊວງກໍ່ໄດ້ອອກຖະແຫຼງການຮ່ວມ 07 ບັນຫາທີ່ສຳຄັນ ເພື່ອຮ່ວມມືຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ເພື່ອສະຖຽນລະພາບ ແລະ ການພັດທະນາເສດຖະກິດ-ສັງຄົມຂອງແຕ່ລະປະເທດ; ກໍຄືການຮັບມືຢ່າງມີປະສິດທິພາບຕໍ່ສິ່ງທ້າທາຍຕ່າງໆດ້ານຄວາມສະຫງົບທີ່ກຳລັງເກີດຂຶ້ນ ລວມທັງອາຊະຍາກຳຂ້າມຊາດຢູ່ພາກພື້ນ ແລະ ສາກົນໃນສະພາບການຟື້ນຟູເສດຖະກິດ-ສັງຄົມ ຫຼັງຈາກສາມປະເທດພົບກັບການແຜ່ລະບາດຂອງພະຍາດ; ເພື່ອຫັນເອົາເນື້ອໃນຈິດໃຈຂອງການພົບປະ ລະຫວ່າງ ຜູ້ນຳຂັ້ນສູງສຸດ ກຳປູເຈຍ-ລາວ- ຫວຽດນາມ ໃນຄັ້ງວັນທີ6 ກັນຍາ 2023 ຢູ່ນະຄອນຫຼວງຮ່າໂນ້ຍ ໃຫ້ເປັນຮູບປະທຳ, ເຊິ່ງຮັບຮູ້ເຖິງຄວາມຈຳເປັນໃນການສືບຕໍ່ການຮ່ວມມືຕາມກົນໄກທີ່ມີຢູ່. ຈັດຕັ້ງຜັນຂະຫຍາຍເນື້ອໃນຂອງການພົບປະ ລະຫວ່າງ ນາຍົກລັດຖະມົນຕີຂອງທັງສາມປະເທດ ກຳປູເຈຍ-ລາວ-ຫວຽດນາມ ໃນຄັ້ງວັນທີ17 ທັນວາ 2023 ຢູ່ຍີ່ປຸ່ນ; ເພື່ອທົບທວນຄືນບັນດາໝາກຜົນຂອງກອງປະຊຸມລັດຖະມົນຕີ ລະຫວ່າງ ລັດຖະມົນຕີກະຊວງພາຍໃນ ແຫ່ງ ຣາຊະອານາຈັກ ກຳປູເຈຍ, ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ລັດຖະມົນຕີ ກະຊວງປ້ອງກັນຄວາມສະຫງົບ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ທີ່ໄດ້ຈັດຂຶ້ນແບບເຊິ່ງໜ້າ ແລະ ຮູບແບບທາງໄກ ໃນປີ 2011, 2014, ແລະ 2022. ຂ່າວ: ພັຕ ຄໍາແສງ ປັນຍາ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ