ກອງທັບປະຊາຊົນລາວ
 
ວັນພຸດ, ວັນທີ 24 ເມສາ 2024

  

ຫົວໜ້າກົມໃຫຍ່ພະລາທິການກອງທັບລົງພົບປະພະນັກງານຫຼັກແຫຼ່ງ ວຕກ
ເວລາອອກຂ່າວ: 2024-04-01 12:40:31 | ຜູ້ຂຽນ : admin2 | ຈຳນວນຄົນເຂົ້າຊົມ: 245 | ຄວາມນິຍົມ:



ໃນວັນທີ29 ມີນາ 2024ນີ້, ສະຫາຍ ພົນຕີ ຄໍາເພັດ ສີຊານົນ ກໍາມະການປະຈໍາພັກກະຊວງປ້ອງກັນປະເທດ ຫົວໜ້າກົມໃຫຍ່ພະລາທິການກອງທັບ, ພ້ອມຄະນະ ໄດ້ລົງພົບປະພະນັກງານຫຼັກແຫຼ່ງ ແລະ ພະນັກງານພະລາທິການ ຢູ່ວິທະຍາຄານເຕັກນິກການທະຫານ. ໃຫ້ກຽດຕ້ອນຮັບໂດຍ ສະຫາຍ ພົນຈັດຕະວາ ແສງຍືນ ລັດສະໝີ ເລຂາຄະນະພັກ ຫົວໜ້າການເມືອງ ວຕກ ພ້ອມດ້ວຍຄະນະພັກ, ຄະນະອໍານວຍການ, ມີບັນດາສະຫາຍຕາງໜ້າກົມວິຊາສະເພາະ, ຫ້ອງການກົມໃຫຍ່ພະລາທິການກອງທັບ ຕະຫຼອດພະນັກງານຫຼັກແຫຼ່ງທົ່ວ ວຕກ ເຂົ້າຮ່ວມຢ່າງອົບອຸ່ນ. ສະຫາຍ ພັນເອກ ທອງສອນ ຕູໄຊລີຢາ ຮອງອໍານວຍການ ຫົວໜ້າຫ້ອງພະລາທິການ ໄດ້ລາຍງານຫຍໍ້ກ່ຽວກັບການເຄື່ອນໄຫວວຽກງານພະລາທິການ ຢູ່ວິທະຍາຄານເຕັກນິກການທະຫານ ເຊິ່ງຕະຫຼອດໄລຍະຜ່ານມາ ພະນັກງານ-ນັກຮົບທົ່ວວິທະຍາຄານ ເວົ້າລວມ ເວົ້າສະເພາະແມ່ນ ໃນຫ້ອງພະລາທິການ ທຸກສະຫາຍໄດ້ມີແນວຄິດອຸ່ນອຽນທຸ່ນທ່ຽງ, ເຝິກຝົນຫຼໍ່ຫຼອມຕົນເອງໄປຕາມແນວທາງຂອງພັກ-ລັດ, ປະຕິບັດໜ້າທີ່ວິຊາສະເພາະຂອງຕົນເພື່ອຮັບປະກັນໃນລະບອບອັດຕາທີ່ຂັ້ນເທິງກໍານົດໃນການສະໜອງວຽກງານອຸປະໂພກ-ບໍລິໂພກໃຫ້ແກ່ກົມກອງ ເພື່ອການລ້ຽງດູທັບ, ຮັບໃຊ້ວຽກງານທຸກຂະແໜງການຂອງ ວຕກ ຕາມການແບ່ງປັນຂອງກະຊວງຄົບຖ້ວນຕາມອັດຕາຄຽງຄູ່ກັບການປະຕິບັດທິດຊີ້ນໍາຂອງກະຊວງປ້ອງກັນປະເທດ ວ່າດ້ວຍການເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ເພື່ອແກ້ໄຂຊີວິດການເປັນຢູ່ດ້ວຍການປູກຝັງ, ລ້ຽງສັດ ແລະ ການບໍລິການສ້າງລາຍຮັບເຂົ້າກົມກອງ ເປັນຕົ້ນແມ່ນ ການລ້ຽງໝູ, ເປັດ, ໄກ່-ປາ, ນົກກະທາ ແລະ ກົບ ຮັບປະກັນຊີ້ນປາເຂົ້າເຮືອນຄົວ-ເຮືອນກິນ70-80%, ຊີ້ນໍາໃຫ້ກອງພັນນັກສຶກສາປູກພືດລົ້ມລຸກຕາມລະດູການ ເພື່ອສະໜອງເຂົ້າເຮືອນຄົວລວມ ແລະ ສາມາດຂາຍອອກຕາມທ້ອງຕະຫຼາດເປັນລາຍຮັບໃຫ້ແກ່ນັກສຶກສາ. ນອກຈາກນນັ້ນຍັງຜະລິດນໍ້າດື່ມ ຕຸກໃຫຍ່-ຕຸກນ້ອຍ ຂາຍພາຍໃນກົມກອງ ແລະ ຂາຍທາງນອກຕາມກົນໄກຕະຫຼາດ ເຊິ່ງໃນປີ 2023 ສາມາດຖອກເງິນເຂົ້າຄັງວິທະຍາຄານ ໄດ້ 165,258,000 ກີບ. ຄຽງຄູ່ກັນນັ້ນ, ສະຫາຍຍັງຍົກໃຫ້ເຫັນຂໍ້ຈໍາກັດຂອງການເຄື່ອນໄຫວປະຕິບັດວຽກງານພະລາທິການພາຍໃນວິທະຍາຄານ ເພື່ອສະເໜີຕໍ່ຂັ້ນເທິງພິຈາລະນາແກ້ໄຂເພື່ອເປັນບ່ອນອີງໃຫ້ແກ່ການຕອບສະໜອງ, ບໍລິການພະລາທິການໃຫ້ເຕັມເມັດເຕັມໜ່ວຍກໍຄືຜັນຂະຫຍາຍ 4ໜ້າໃຫຍ່ 26ແຜນງານຂອງກະຊວງປ້ອງກັນປະເທດວາງອອກໃຫ້ປາກົດຜົນເປັນຈິງເທື່ອລະກ້າວ. ໃນໂອກາດດຽວກັນ, ສະຫາຍ ພົນຕີ ຄໍາເພັດ ສີຊານົນ ກໍໄດ້ ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ຄະນະພັກ-ຄະນະບັນຊາທຸກຂັ້ນ ພ້ອມດ້ວຍພະນັກງານ-ນັກຮົບທົ່ວ ວຕກ ເວົ້າລວມ, ເວົ້າສະເພາະແມ່ນ ພະນັກງານພະລາທິການ ພ້ອມກັນຍາດມາໄດ້ຕະຫຼອດໄລຍະຜ່ານມາ ສະຫາຍຍັງໄດ້ເນັ້ນໜັກໃຫ້ ຄະນະພັກ-ຄະນະອໍານວຍການ ພະນັກງານນໍາພາ-ບັນຊາທຸກຂັ້ນ ຈົ່ງເອົາໃຈໃສ່ຍົກສູງວຽກງານສຶກສາອົບຮົມການເມືອງແນວຄິດໃຫ້ແກ່ພະນັກງານ-ນັກຮົບທີ່ຢູ່ພາຍໃຕ້ການບັນຊາຂອງຕົນ ໃຫ້ມີຄຸນທາດການເມືອງໜັ້ກແໜ້ນ, ຮູ້ຈໍາແນກມິດ-ສັດຕູຢ່າງຈະແຈ້ງ ພ້ອມທັງຕີຖອຍປະກົດການຫຍໍ້ທໍ້ຕ່າງໆ ສຶບຕໍ່ປັບປຸງກໍ່ສ້າງກໍາລັງໃຫ້ມີຄວາມເຂັ້ມແຂງ, ເປັນກົມກອງທີ່ມີລະບຽບແຜນແບບ, , ເອົາໃຈໃສ່ປະຕິບັດຂໍ້ກໍານົດກົດລະບຽບຂອງກອງທັບວາງອອກໃຫ້ເຂັ້ມງວດ ຄຽງຄູ່ກັບການປະຕິບັດໜ້າທີ່ວິຊາສະເພາະ ແລະ ຮັບປະກັນວຽກງານແກ້ໄຂຊີວິດການເປັນຢູ່ ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ໄປພ້ອມກັບການດູແລສຸຂະອະນາໄມຂອງນາຍ ແລະ ພົນທະຫານ, ນັກຮຽນ-ນັກສຶກສາພາຍໃນກົມກອງໃຫ້ໄດ້ 98% ຂຶ້ນໄປເພື່ອຮັບປະກັນໃຫ້ແກ່ການກຽມພ້ອມສູ້ຮົບທຸກສະຖານະການ ແລະ ພ້ອມກັນຫັນເອົາເນື້ອໃນຈິດໃຈ 4ໜ້າທີ່ໃຫຍ່ 26ແຜນງານທີ່ຄະນະພັກກະຊວງປ້ອງກັນປະເທດວາງອອກ ສອດຫ້ອຍເຂົ້າໃນທຸກວຽກງານ. ໂດຍ ເພັດນາລີ.



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ