ວັນພະຫັດ, ວັນທີ 03 ຕຸລາ 2024
ທະຫານແຂວງໄຊຍະບູລີເປັນເຈົ້າພາບສ່ອງແສງວຽກງານຮອບດ້ານປະຈຳໄຕມາດ1
ເວລາອອກຂ່າວ: 2024-04-01 12:38:49 | ຜູ້ຂຽນ : admin2 | ຈຳນວນຄົນເຂົ້າຊົມ: 1325 | ຄວາມນິຍົມ: 
ໃນວັນທີ 29 ມີນາ 2024 ນີ້, ກອງບັນຊາການທະຫານແຂວງໄຊຍະບູລີເປັນເຈົ້າພາບຈັດກອງປະຊຸມສ່ອງແສງວຽກງານຮອບດ້ານທົ່ວກອງທັບປະຈຳໄຕມາດI ແລະ ທິດທາງແຜນການໄຕມາດII ປີ 2024 ບັນດາກົມກອງເຂດ2 ໂດຍການເປັນປະທານຂອງ ສະຫາຍ ພົນຕີ ສາຍໃຈ ກົມມະສິດ ກຳມະການປະຈຳຄະນະພັກກະຊວງ ຫົວໜ້າຫ້ອງວ່າການກະຊວງປ້ອງກັນປະເທດ, ມີສະຫາຍ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ປະທານສະພາປະຊາຊົນແຂວງ, ມີຄະນະພັກ-ຄະນະບັນຊາກອງບັນຊາການທະຫານແຂວງໄຊຍະບູລີ, ກອງບັນຊາການທະຫານແຂວງຫຼວງພະບາງ, ກອງພົນທີ2, ໂຮງຮຽນກໍ່ສ້າງນາຍສິບເລກ1, ໂຮງງານປະສານເຫຼົ່າ, ໂຮງໝໍບໍລິເວນ 107, ໄອຍະການພາກເໜືອ ແລະ ສານພາກເໜືອຕະຫຼອດຮອດພະນັກງານຫລັກແຫຼ່ງເຂົ້າຮ່ວມ.
ກອງປະຊຸມຄະນະພັກ-ຄະນະບັນຊາແຕ່ລະກົມກອງໄດ້ຜັດປ່ຽນກັນຂຶ້ນສະຫຼຸບລາຍງານສະພາບການຈັດຕັ້ງປະຕິບັດໜ້າທີ່ວຽກງານຮອບດ້ານປະຈຳໄຕມາດ1 ໂດຍສັງເຂບ ແລະ ວຽກງານຄົງຄ້າງທີ່ຈະຕ້ອງສຸມໃສ່ໃນໄຕມາດ2 ໂດຍສະເພາະແມ່ນບັນດາກົມກອງເອົາໃຈໃສ່ປະຕິບັດຕາມຫຼັກການ ລວມສູນປະຊາທິປະໄຕທີ່ປິ່ນອ້ອມ 4ໜ້າທີ່ໃຫຍ່ 26ແຜນການຂອງຄະນະພັກກະຊວງປ້ອງກັນປະເທດວາງອອກເປັນຕົ້ນແມ່ນຖືເອົາວຽກງານສຶກສາອົບຮົມການເມືອງນຳພາ-ແນວຄິດສອດຫ້ອຍເຂົ້າໃນທຸກຂົງເຂດວຽກງານຂອງກົມກອງເຮັດໃຫ້ພະນັກງານ-ນັກຮົບມີຄຸນທາດການເມືອງໜັກແໜ້ນເຊື່ອໝັ້ນຕໍ່ການນຳພາຂອງພັກ, ຄຽງຄູ່ກັນນັ້ນກໍ່ໄດ້ຈັດຕັ້ງພະນັກງານລົງກໍ່ສ້າງຮາກຖານການ ເມືອງແບບມູນເຊື້ອຢູ່ບັນດາເຂດຈຸດສຸມຕ່າງໆສົມທົບແໜ້ນກັບອຳນາດການປົກຄອງທ້ອງຖິ່ນຂອງຕົນເກັບກຳເອົາສະພາບການຕ່າງໆ, ຈັດຕັ້ງອົບຮົມ-ຫົດແອບວຽກງານວິຊາສະເພາະໃຫ້ມີຄວາມຊຳນິຊຳນານປະກອບສ່ວນເຂົ້າໃນການປັບປຸງກໍ່ສ້າງຄ້າຍຄູຕິດພັນກັບການກໍ່ສ້າງກອງ 3ປອດ, ສ້າງກົມກອງວັດທະນາທຳ-ນັກຮົບວັດທະນາທຳ, ຕ້ານ ແລະ ສະກັດກັ້ນບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນຢູ່ພາຍໃນກົມກອງ ແລະ ບັນຫາກຸ່ມຄົນບໍ່ດີ ກໍ່ໃຫ້ເກີດຄວາມບໍ່ສະຫງົບຢູ່ໃນຂອບເຂດຊາຍແດນ, ສະພາບການທີ່ພົ້ນເດັ່ນບັນຫາຢາເສດຕິດ, ຂີ້ລັກງັດແງະ ແລະ ອື່ນໆໃນສັງຄົມ.
ໂອກາດດັ່ງກ່າວນີ້, ສະຫາຍ ພົນຕີ ສາຍໃຈ ກົມມະສິດ ໄດ້ເນັ້ນໜັກໃຫ້ຄະນະພັກ-ຄະນະບັນຊາແຕ່ລະບັນດາກົມກອງຈົ່ງສືບຕໍ່ວຽກງານປັບປຸງກໍ່ສ້າງກຳລັງໃຫ້ມີຄວາມໜັກແໜ້ນເຂັ້ມແຂງ, ເອົາໃຈໃສ່ວຽກງານການເມືອງນຳພາ-ແນວຄິດໃຫ້ພະນັກງານ-ນັກຮົບພາຍໃນຄວາມຮັບຜິດຊອບຂອງຕົນມີແນວຄິດການເມືອງໜັກແໜ້ນ, ຫັນລົງກໍ່ສ້າງຮາກຖານ ເກັບກຳສະພາບແນວຄິດຂອງປະຊາຊົນ ແລະ ສະພາບກຸ່ມຄົນບໍ່ດີ, ແກ້ໄຂບັນດາປະກົດການຫຍໍ້ທໍ້ທີ່ຈະເກີດຂຶ້ນໃຫ້ທັນເວລາ, ເອົາໃຈໃສ່ສືບຕໍ່ເຮັດໜ້າທີ່ວຽກງານປ້ອງກັນຊາດ-ປ້ອງກັນຄວາມສະຫງົບ, ຈັດຕັ້ງລະບົບປະຈຳການຕະຫຼອດ 24 ຊົ່ວໂມງໃຫ້ເຂັ້ມງວດ, ພ້ອມກັນເຄື່ອນໄຫວຕ້ານ ແລະ ສະກັດກັ້ນປະກົດການຕ່າງໆທີ່ຈະເກີດຂຶ້ນຮັບປະກັນໃຫ້ຂອບເຂດຄວາມຮັບຜິດຊອບຂອງກົມກອງມີຄວາມສະຫງົບປອດໄພ 100%.
ຂ່າວ: ສົມຈີນ
ພາບ ໄຊຍະສັກ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
