ວັນພະຫັດ, ວັນທີ 05 ທັນວາ 2024
ສູນເຝິກອົບຮົມກອງພົນທີ1 ສະຫຼຸບວຽກງານປະຈຳປີ 2023 ແລະ ຍ້ອງຍໍຜົນງານ 5 ປີ
ເວລາອອກຂ່າວ: 2024-02-12 14:49:51 | ຜູ້ຂຽນ : admin2 | ຈຳນວນຄົນເຂົ້າຊົມ: 1155 | ຄວາມນິຍົມ: 
ໃນວັນທີ 9 ກຸມພາ 2024 ນີ້, ສູນເຝິກອົບຮົມກອງພົນທີ 1 ສະຫຼຸບວຽກງານປະຈຳປີ 2023 ແລະ ວາງທິດທາງແຜນການປະຈໍາປີ 2024 ພ້ອມທັງຍ້ອງຍໍຜົນງານໄລຍະ 5 ປີ ໂດຍການເປັນປະທານຂອງ ສະຫາຍ ພັນເອກ ສົມຈັນ ກອງໄຊສອນ ກໍາມະການຄະນະພັກກອງພົນ, ຫົວໜ້າຫ້ອງການກອງພົນທີ1, ມີຄະນະພັກ-ຄະນະບັນຊາ, ພະນັກງານ-ນັກຮົບເຂົ້າຮ່ວມ.
ສະຫາຍ ພັນໂທ ພອນໄຊ ແກ້ວວິໄລວົງ ຫົວໜ້າການເມືອງສູນເຝິກອົບຮົມ ໃຫ້ຮູ້ວ່າ: ໃນໄລຍະ 1 ປີຜ່ານມາໄດ້ສຸມໃສ່ວຽກງານສຶກສາອົບຮົມການເມືອງ-ນຳພາແນວຄິດໃຫ້ພະນັກງານ-ນັກຮົບ, ມີແນວຄິດການເມືອງໜັກແໜ້ນ, ຮູ້ຈຳແນກມິດ ແລະ ສັດຕູຢ່າງຈະແຈ້ງ, ມີຄວາມຮັບຜິດຊອບສູງຕໍ່ໜ້າທີ່ການເມືອງຂອງຕົນທີ່ຂັ້ນເທິງມອບໝາຍໂດຍສະເພາະແມ່ນການຊີ້ນຳໃນການຮຽນ-ການສອນ ໃຫ້ນັກຮຽນກໍ່ສ້າງນາຍສິບ ແລະ ບໍາລຸງການທະຫານຂັ້ນພື້ນຖານ; ນອກນັ້ນຍັງໄດ້ເອົາໃຈໃສ່ປັບປຸງກໍ່ສ້າງກົມກອງ, ກໍ່ສ້າງຮາກຖານຂອບເຂດກົມກອງຕັ້ງທັບ ແລະ ວຽກງານອື່ນໆເຫັນວ່າມີຜົນສໍາເລັດເປັນຢ່າງດີເຊິ່ງສະແດງອອກໃນການເປັນເບົ້າຫຼໍ່ກໍ່ສ້າງນັກຮຽນນາຍສິບ ຂັ້ນຮຽນດີ, ຮຽນເກັ່ງ ກວມເອົາ 85% ຂຶ້ນໄປ, ຂົງເຂດວຽກງານການອົບຮົມການເມືອງ, ການທະຫານ, ພະລາທິການ-ເຕັກນິກ ກວມເອົາ 90% ຂຶ້ນໄປ, ວຽກງານຂະບວນການກິລາກາຍຍະກຳ, ສີລະປະ-ວັນນະຄະດີ ໄດ້ສົ່ງນັກກິລາ ແລະ ສີລະປະເຂົ້າຮ່ວມນຳຂັ້ນເທິງສາມາດຍາດໄດ້ 7 ລາງວັນເປັນເງິນລາງວັນລະ 3 ລ້ານກວ່າກີບ; ວຽກງານປູກຝັງ-ລ້ຽງສັດ ສາມາດກຸ້ມຕົນເອງໄດ້ດ້ານຜັກກິນ 85%; ວຽກງານນະໂຍບາຍຕໍ່ພະນັກງານ-ນັກຮົບ ຜູ້ທີ່ມີຜົນງານດີເດັ່ນໄດ້ມີການສະເໜີເລື່ອນຊັ້ນ, ເລື່ອນທຽບຊັ້ນ, ຍ້ອງຍໍຂັ້ນຕ່າງໆຕາມຂໍ້ກໍານົດຂອງຂັ້ນເທິງວາງອອກຢ່າງເຂັ້ມງວດ.
ໂອກາດນີ້, ຍັງໄດ້ຍ້ອງຍໍບຸກຄົນທີ່ມີຜົນງານດີເດັ່ນໄລຍະ 5 ປີ ໃນນີ້ໄດ້ມອບຫຼຽນໄຊພິລະອາດຫານຊັ້ນ II ຈຳນວນ 13 ສະຫາຍ, ຫຼຽນໄຊພິລະອາດຫານຊັ້ນ III ຈຳນວນ 10 ສະຫາຍ, ໃບຍ້ອງຍໍກະຊວງປ້ອງກັນປະເທດຈໍານວນ 13 ສະຫາຍ ແລະ ໃບຍ້ອງຍໍກົມໃຫຍ່ການເມືອງກອງທັບຈໍານວນ 5 ສະຫາຍ ຢ່າງສົມກຽດ.
ໂດຍ: ຄໍາໄຕ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
