ກອງທັບປະຊາຊົນລາວ
 
ວັນພະຫັດ, ວັນທີ 22 ກຸມພາ 2024

  

ການນຳພັກ-ລັດເມືອງຊະນະສົມບູນວາງພວງມາລາເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ແລະ ລະນຶກວັນເກີດທ່ານ ຄໍາໄຕ ສີພັນດອນ ຄົບຮອບ 100 ປີ
ເວລາອອກຂ່າວ: 2024-02-12 14:48:23 | ຜູ້ຂຽນ : admin2 | ຈຳນວນຄົນເຂົ້າຊົມ: 185 | ຄວາມນິຍົມ:



ໃນຕອນເຊົ້າຂອງວັນທີ 7 ກຸມພາ 2024 ນີ້, ການນໍາພັກ-ລັດຂັ້ນເມືອງຊະນະສົມບູນ ແຂວງຈໍາປາສັກ ໄດ້ເຂົ້າວາງພວງມາລາຢູ່ອານຸສາວະລີນັກຮົບນິລະນາມ ແລະ ວາງກະຕ່າດອກໄມ້ຢູ່ອານຸສອນສະຖານ ຮູບປັ້ນປະທານໄກສອນພົມວິຫານ ທີ່ສະໜາມແດງ ເມືອງຊະນະສົມບູນ ແຂວງຈຳປາສັກ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວຄົບຮອບ 75 ປີ (20 ມັງກອນ 1949 – 20 ມັງກອນ 2024) ທີ່ຜ່ານມານີ້, ເຊີ່ງນໍາໂດຍ ທ່ານ ຂາວພອນ ສີຍາທະຈັນ ຮອງເລຂາພັກເມືອງ ຜູ້ຊີ້ນໍາວຽກງານການເມືອງແນວຄິດພັກ-ພະນັກງານເມືອງຊະນະສົມບູນ, ມີຄະນະປະຈຳພັກເມືອງ, ກໍາມະການພັກເມືອງ,ຄະນະພັກ-ຄະນະບັນຊາກອງບັນຊາການປ້ອງກັນຄວາມສະຫງົບເມືອງ ແລະ ຄະນະພັກ-ຄະນະບັນຊາກອງບັນຊາການທະຫານເມືອງ ຕະຫຼອດຮອດພະນັກງານ-ນັກຮົບພາຍໃນກົມກອງເຂົ້າຮ່ວມ. ສໍາລັບການເຂົ້າວາງພວງມາລາໃນຄັ້ງນີ້, ຈຸດປະສົງກໍ່ເພື່ອເປັນການລະນຶກເຖິງວັນປະຫວັດສາດທີ່ມີຄວາມໝາຍສຳຄັນຢ່າງຍິ່ງທົ່ວພັກ-ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວບັນດາເຜົ່າ ກໍ່ຄືກຳລັງປະກອບອາວຸດທ້ອງຖິ່ນ ແລະ ປະຊາຊົນຊາວເມືອງຊະນະສົມບູນ, ຈະຂໍຈົດຈຳຄຸນງາມ, ຄວາມດີ ແລະ ຮູ້ບຸນຄຸນອັນລົ້ນເຫຼືອ ຕໍ່ບັນດາການນຳ, ວິລະຊົນແຫ່ງຊາດ, ນັກຮົບແຂ່ງຂັນ, ນັກຮົບປະຕິວັດທີ່ໄດ້ສຸ່ມທຸກສະຕິປັນຍາ,ອຸທິດກໍາລັງກາຍ, ເສຍສະຫະຊີວິດເລືອດເນື້ອຂອງຕົນ ເພື່ອປະເທດຊາດ ເພື່ອຄວາມເປັນເອກະລາດສ້າງສັງຄົມໃຫ້ມີຄວາມຜາສຸກ ແລະ ປະເທດຊາດຂໍຈົດຈໍາຈາລຶກຜົນງານ, ຄຸນງາມຄວາມດີ ວິລະກຳອັນລໍ້າເລີດຂອງພວກເພິ່ນນີ້ໄວ້ຕະຫຼອດການລະນານ. ຈາກນັ້ນ, ໃນເວລາຕໍ່ມາຂອງວັນດຽວກັນຢູ່ທີ່ສະໂມສອນຂອງເມືອງດັ່ງກ່າວ, ຍັງໄດ້ຈັດພິທີໂຮມຊຸມນຸມສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວຄົບຮອບ 75 ແລະລະນຶກວັນເກີດຂອງທ່ານ ຄຳໄຕ ສີພັນດອນ ຄົບຮອບ 100 ປີ (8 ກຸມພາ 1924–8 ກຸມພາ 2024 ) ໂດຍພາຍໄຕ້ການເປັນປະທານຂອງ ທ່ານ ຂາວພອນ ສີຍາທະຈັນ ຜູ້ຊີ້ນຳວຽກງານການເມືອງແນວຄິດພັກ-ພະນັກງານເມືອງຊະນະສົມບູນ, ມີຄະນະປະຈຳພັກເມືອງ, ກໍາມະການພັກເມືອງ, ຄະນະພັກ-ຄະນະບັນຊາກອງບັນຊາການປ້ອງກັນຄວາມສະຫງົບເມືອງ, ພະນັກງານຈາກພະແນກການທີ່ກ່ຽວຂ້ອງພາຍໃນເມືອງ, ມີຄະນະພັກ-ຄະນະບັນຊາກອງບັນຊາການທະຫານເມືອງ ຕະຫຼອດຮອດພະນັກງານ-ນັກຮົບພາຍໃນກົມກອງເຂົ້າຮ່ວມຢ່າງພ້ອມພຽງ. ໂອກາດນີ້, ທ່ານ ຂາວພອນ ສີຍາທະຈັນ ກໍ່ໄດ້ໃຫ້ກຽດກ່າວຫວນຄືນປະຫວັດຄວາມເປັນມາກ່ອນການສ້າງຕັ້ງກອງທັບປະຊາຊົນລາວ, ມູນເຊື້ອແຫ່ງການກຳເນີດເຕີບໃຫຍ່ຂະຫຍາຍຕົວ ລວມທັງໝາກຜົນ ຜົນງານ ແລະ ໄຊຊະນະທີ່ກອງທັບປະຊາຊົນລາວຍາດມາໄດ້ຕະຫຼອດໄລຍະ 75 ປີ ທີ່ຜ່ານມາ, ເຊິ່ງມີເນື້ອໃນບາງຕອນໄດ້ຍົກໃຫ້ເຫັນວ່າ: ກອງທັບປະຊາຊົນລາວກໍາເນີດເກີດຂຶ້ນໃນທ່າມກາງປະເທດຊາດຖືກພວກລ່າເມືອງຂຶ້ນຝຣັ່ງເຂົ້າມາຮຸກຮານ ແລະ ຄອບຄອງປະເທດລາວເຮົາ. ໂດຍພາຍໄຕ້ການນຳພາຂອງພັກ, ກອງທັບ ແລະ ປະຊາຊົນບັນດາເຜົ່າໄດ້ລຸກຮື້ຂຶ້ນຕໍ່ສູ້ຕ້ານການຮຸກຮານຢ່າງເປັນຂະບວນຟົດຟຶ້ນໃນຂອບເຂດທົ່ວປະເທດ. ໃນວັນທີ 20 ມັງກອນ 1949 ກອງທັບລາວອິດສະຫຼະ ໄດ້ຮັບການປະກາດສ້າງຕັ້ງຂຶ້ນ (ເຊິ່ງເປັນຕົ້ນກໍາເນີດຂອງກອງທັບປະຊາຊົນລາວໃນປະຈຸບັນ) ຢູ່ເຂດລາວຮຸ່ງພຽງສາ, ເມືອງຊຽງຄໍ້ ແຂວງຫົວພັນ ໂດຍແມ່ນປະທານໄກສອນ ພົມວິຫານ ເປັນຜູ້ປະກາດສ້າງຕັ້ງ ແລະ ຊີ້ນຳ-ບັນຊາໂດຍກົງ. ພາຍຫຼັງໄດ້ຮັບການສ້າງຕັ້ງຂຶ້ນ ກອງທັບກໍ່ໄດ້ປະເຊີນໜ້າກັບສັດຕູໂຕຮ້າຍກາດທີ່ມີກຳລັງແຮງເໜືອກວ່າ ນັບທັງດ້ານກຳລັງພົນ ແລະ ອາວຸດຍຸດໂທປະກອນທີ່ທັນສະໄໝກວ່າ, ແຕ່ດ້ວຍນ້ຳໃຈຮັກຊາດອັນສູງສົ່ງ ສືບທອດມູນເຊື້ອອັນພິລະອາດຫານບໍ່ຍອມຈໍານົນຂອງບັນພະບູລຸດ ຕໍ່ສູ້ຢ່າງພິລະອາດຫານ, ເດັດດ່ຽວໜຽວແໜ້ນ ແລະ ຍາດໄດ້ໄຊຊະນະເປັນກ້າວໆມາ ຈົນກ້າວໄປສູ່ການສະຖາປານາສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ຢ່າງສະຫງ່າຜ່າເຜີຍ. ໃນພິທີດັ່ງກ່າວຍັງໄດ້ກ່າວລະນຶກເຖິງວັນເກີດຂອງປະທານຄຳໄຕ ສີພັນດອນ ເຊິ່ງທ່ານໄດ້ຍົກໃຫ້ເຫັນເຖິງປະຫວັດ ແລະ ຄວາມເປັນມາອັນໂດດເດັ່ນຂອງທ່ານ ທີ່ມີນ້ຳໃຈຮັກຊາດສູງສົ່ງ, ສືບທອດມູນເຊື້ອອັນພິລະອາດຫານເດັດດ່ຽວໜຽວແໜ້ນ ບໍ່ຍອມຈໍານົນຢ່າງເດັດຂາດ, ເດັດດ່ຽວຕັ້ງຕໍ່ບໍລິສຸດຕໍ່ຊາດ ຕໍ່ພັກ ແລະ ຕໍ່ປະຊາຊົນຂອງທ່ານ ຈົນສາມາດຍາດໄດ້ໄຊຊະນະອັນຍິ່ງໃຫຍ່ ເຮັດໃຫ້ປະເທດຊາດບ້ານເມືອງຈະເລີນຮຸ່ງເຮືອງຂຶ້ນເປັນກ້າວໆ. ຂ່າວ - ພາບ: ສອ ສີພະຈັນ ຈັນແພງສີ



 news to day and hot news

ຂ່າວມື້ນີ້ ແລະ ຂ່າວຍອດນິຍົມ

ຂ່າວມື້ນີ້












ຂ່າວຍອດນິຍົມ













ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ