ຮອງລັດຖະມົນຕີກະຊວງປ້ອງກັນປະເທດ ລົງຕິດຕາມ, ກວດກາ ແລະ ຊຸກຍູ້ການຈັດຕັ້ງປະຕິບັດ 2 ວາລະແຫ່ງຊາດ
ເວລາອອກຂ່າວ: 2023-03-20 09:20:54 | ຜູ້ຂຽນ : admin2 | ຈຳນວນຄົນເຂົ້າຊົມ: 161 | ຄວາມນິຍົມ:
ກອງປະຊຸມຕິດຕາມ, ກວດກາ ແລະ ຊຸກຍູ້ການຈັດຕັ້ງປະ ຕິບັດ 2 ວາລະແຫ່ງຊາດ 5 ຫົວ ໜ່ວຍກົມກອງ ໄດ້ຈັດຂຶ້ນໃນວັນທີ 16 ມີນາ 2023 ນີ້, ຢູ່ທີ່ສະໂມສອນຫ້ອງການເມືອງທະຫານແຂວງຫຼວງພະບາງ, ໂດຍການເປັນປະທານຂອງ ສະຫາຍ ພົນຕີ ຈັນທອງ ສອນຕະອາດ ຮອງລັດຖະມົນຕີກະຊວງປ້ອງກັນປະເທດ, ມີ ສະຫາຍ ພົນຈັດຕະວາ ບຸນຍົງ ດາດົງໄຊ ຮອງປະທານ ສານປະຊາຊົນສູງສຸດ, ປະທານສານທະຫານຂັ້ນສູງ, ມີຄະນະພັກ-ຄະນະບັນຊາກອງບັນຊາການທະຫານແຂວງຫຼວງພະບາງ, ໂຮງໝໍບໍລິເວນ 107, ໂຮງງານປະສານເຫຼົ່າຮົບ, ສານທະຫານ ພາກເໜືອ, ອົງການໄອຍະການ ທະຫານພາກເໜືອ, ພະນັກງານ ຫຼັກແຫຼ່ງຕະຫຼອດຮອດພະນັກງານ-ນັກຮົບ ເຂົ້າຮ່ວມ.
ພາຍຫຼັງຕາງໜ້າ 5 ຫົວໜ່ວຍກົມກອງ ໄດ້ຜັດປ່ຽນກັນຜ່ານບົດລາຍງານການຈັດຕັ້ງປະຕິບັດ 2 ວາລະແຫ່ງຊາດ, ເຊິ່ງໃນໄລຍະຜ່ານມາຄະນະພັກ-ຄະນະບັນຊາບັນດາກົມກອງໄດ້ອອກຄຳສັ່ງແນະນຳການຈັດຕັ້ງເຊື່ອມຊຶມ 2 ວາລະແຫ່ງຊາດຢ່າງທົ່ວເຖິງ, ອອກຂໍ້ຕົກລົງແຕ່ງຕັ້ງຄະນະຮັບຜິດຊອບກວດກາສານເສບຕິດ. ໃນນີ້, ໄດ້ເອົາໃຈໃສ່ສຶກສາອົບຮົມການເມືອງ-ນຳພາແນວຄິດ ໃຫ້ນາຍ ແລະ ພົນທະຫານຮັບຮູ້, ເຊຶ່ອມຊຶມ ກຳແໜ້ນແນວທາງນະໂຍບາຍຂອງພັກ ໂດຍສະເພາະແມ່ນວາລະແຫ່ງຊາດ ການແກ້ໄຂບັນຫາຫຍຸ້ງຍາກທາງດ້ານເສດຖະກິດ-ການເງິນ, ສຸມໃສ່ປະຕິບັດຄຳຂວັນ ເພິ່ງຕົນເອງ ກຸ້ມຕົນເອງ ສ້າງຄວາມເຂັ້ມແຂງດ້ວຍຕົນເອງ ແລະ ປະຍັດມັດທະຍັດ, ເອົາໃຈໃສ່ຊີ້ນຳວິຊາສະເພາະໃນການຄຸ້ມຄອງງົບປະມານແບບລວມສູນ, ເຂົ້າ-ອອກຜ່ານປະຕູດຽວຢ່າງເຂັ້ມງວດ, ຮັບປະກັນຕອບສະໜອງງົບປະມານເງິນເດືອນ, ເງິນຊື້ເຂົ້າ, ຮ່ວງອົບຮົມ-ຫັດແອບ ແລະ ອື່ນໆ. ພ້ອມກັນນີ້, ຍັງໄດ້ມີການປະສານງານພົວພັນຮ່ວມມືກັບແຂວງເຊີນລາ, ແຂວງດຽນບຽນ ສສ ຫວຽດນາມ ເພື່ອແລກປ່ຽນຂໍ້ມູນຂ່າວສານ, ຮ່ວມມືກັນຕ້ານ ແລະ ສະກັດກັ້ນ, ການລັກລອບຄ້າຂາຍ ແລະ ລຳລຽງຂົນສົ່ງເຂົ້າ-ອອກທາດສິ່ງເສບຕິດຕາມຂອບເຂດບໍລິເວນຊາຍແດນຢ່າງເຂັ້ມງວດ.
ໂອກາດນີ້, ສະຫາຍ ພົນຕີ ຈັນທອງ ສອນຕະອາດ ໄດ້ມີຄຳເຫັນໂອ້ລົມ ແລະ ຮຽກຮ້ອງໃຫ້ຄະນະພັກ-ຄະນະບັນຊາແຕ່ລະກົມກອງ ເອົາໃຈໃສ່ສຶກສາອົບຮົມການເມືອງແນວຄິດ ໃຫ້ພະນັກງານ-ນັກຮົບ ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ກຳແໜ້ນແນວທາງການປ່ຽນແປງໃໝ່ຂອງພັກ, ກົດໝາຍຂອງລັດ, ເຊື່ອມຊຶມ ແລະ ກຳແໜ້ນທິດທາງວຽກງານປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານ, ພ້ອມກັນເຊີດຊູນ້ຳໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ດຸໝັ່ນຊື່ສັດປະຢັດຊັດທ່ຽງ, ຍູ້ແຮງການເພີ່ມພູນປູກຝັງ-ລ້ຽງສັດ, ເພື່ອປັບປຸງແກ້ໄຂຊີວິດການເປັນຢູ່ຂອງກົມກອງໃຫ້ນັບມື້ດີຂຶ້ນ, ຕິດພັນກັບການກໍ່ສ້າງໜ່ວຍພັກ ປອດໃສ ເຂັ້ມແຂງ ໜັກແໜ້ນ; ກອງ 3 ປອດ, ນັກຮົບ ແລະ ກົມກອງວັດທະນະທຳໃຫ້ບັນລຸຕາມຄາດໝາຍ.
ໂດຍ: ສົມພອນ ສຸວັນທອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ