ໂຮງງານປະສານເຫຼົ່າຫຼວງພະບາງ ທາບທາມສ້າງແຜນກຳນົດ ພະນັກງານນຳພາ-ບັນຊາ ຂັ້ນກະຊວງປ້ອງກັນປະເທດຄຸ້ມຄອງ
ເວລາອອກຂ່າວ: 2023-03-20 09:09:42 | ຜູ້ຂຽນ : admin2 | ຈຳນວນຄົນເຂົ້າຊົມ: 252 | ຄວາມນິຍົມ:
ໃນວັນທີ 13 ມີນາ 2023 ນີ້, ຢູ່ໂຮງງານປະສານເຫຼົ່າຫຼວງພະບາງ ໄດ້ເປີດກອງປະຊຸມທາບທາມສ້າງແຜນກຳນົດພະນັກງານນຳພາ-ບັນຊາ ຂັ້ນກະຊວງປ້ອງກັນປະເທດຄຸ້ມຄອງຂຶ້ນ, ໂດຍການເປັນປະທານຂອງ ສະຫາຍ ພົນຈັດຕະວາ ທອງພັນ ສຸທຳມະວົງ ກຳມະການຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ເຕັກນິກກອງທັບ, ມີ ສະຫາຍ ພັນໂທ ຈັນທະວີ ພົງສຸທິ ຫົວໜ້າພະແນກຈັດຕັ້ງພັກ ຫ້ອງການເມືອງ ກົມໃຫຍ່ເຕັກນິກກອງທັບ ມີ ສະຫາຍ ພັນເອກ ເພັດລະຄອນ ມະນີຈັນ ເລຂາຄະນະພັກຮາກຖານ ອຳນວຍການໂຮງງານປະສານເຫຼົ່າຫຼວງພະບາງ, ມີຄະນະພັກ-ຄະນະບັນຊາ, ມີຫົວໜ້າພະແນກ, ຮອງພະແນກ, ຫົວໜ້າຂະແໜງຕະຫຼອດຮອດພະນັກງານຫຼັກແຫຼ່ງສະມາຊິກພັກສົມບູນພາຍໃນໂຮງງານປະສານເຫຼົ່າຫຼວງພະບາງ ເຂົ້າຮ່ວມ.
ສະຫາຍ ພັນໂທ ຈັນທະວີ ພົງສຸທິ ຫົວໜ້າພະແນກຈັດຕັ້ງພັກ ຫ້ອງການເມືອງ ກົມໃຫຍ່ເຕັກນິກກອງທັບ ກໍໄດ້ຂຶ້ນຜ່ານ ມະຕິຕົກລົງຂອງກົມໃຫຍ່ເຕັກ ນິກ ກອງທັບ ວ່າດ້ວຍການເຄື່ອນ ໄຫວທາບທາມສ້າງແຜນກຳນົດພະນັກງານນຳພາ-ບັນຊາ ຂັ້ນກະ ຊວງປ້ອງກັນປະເທດຄຸ້ມຄອງ. ຕໍ່ຈາກນັ້ນໃນກອງປະຊຸມ ສະຫາຍ ພົນຈັດຕະວາ ທອງພັນ ສຸທຳມະວົງ ໄດ້ກ່າວເປີດກອງປະຊຸມຢ່າງເປັນທາງການ ສະຫາຍໄດ້ໃຫ້ຮູ້ວ່າ: ການດຳເນີນກອງປະຊຸມທາບ ທາມສ້າງແຜນກຳນົດພະນັກງານນຳພາ-ບັນຊາ ຂັ້ນກະຊວງປ້ອງກັນປະເທດຄຸ້ມຄອງ ໃນຄັ້ງນີ້ ແມ່ນສຸດທີ່ມີຄວາມໝາຍສຳຄັນ, ເປັນການເລືອກເຟັ້ນເປົ້າໝາຍເພື່ອຈັດວາງເຂົ້າໃນໂຄງປະກອບຕຳແໜ່ງງານຂັ້ນຕ່າງໆ ຢູ່ໃນໂຮງງານປະສານເຫຼົ່າຫຼວງພະບາງ ທີ່ຂັ້ນກະຊວງປ້ອງກັນປະ ເທດຄຸ້ມຄອງ ເພື່ອແນໃສ່ຮັບປະ ກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ. ພ້ອມກັນນີ້, ກໍເພື່ອກວດກາ ແລະ ສະຫຼຸບຕີລາຄາຄືນ ຜ່ານການຈັດຕັ້ງປະຕິບັດແຜນ ກຳນົດພະນັກງານນຳພາ-ບັນຊາຂັ້ນຂັ້ນກະຊວງປ້ອງກັນປະເທດຄຸ້ມຄອງຢູ່ຄະນະພັກ-ຄະ ນະບັນຊາຂອງໂຮງງານປະສານເຫຼົ່າຫຼວງພະບາງ ໃນຊຸມປີຜ່ານມາ, ວຽກງານສ້າງແຜນກຳນົດພະນັກງານມີຄວາມສຳຄັນ ແລະ ຈຳເປັນເພາະ ວ່າເປັນການປະຕິ ບັດແນວທາງຈັດຕັ້ງຂອງພັກ, ເປັນຂອດຕັດສິນເຖິງຜົນໄດ້ຜົນເສຍໃນການຈັດຕັ້ງປະຕິບັດແນວທາງແຜນນະໂຍບາຍລວມຂອງພັກ ແລະ ວຽກງານພະນັກງານ ກໍແມ່ນຂໍກຸນ ແຈທີ່ສຳຄັນໃນຂະບວນວິວັດການຈັດຕັ້ງປະຕິບັດ ການນຳພາຂອງພັກຕໍ່ພາລະກິດປະຕິວັດ ກໍຄືຜົນສຳເລັດຂອງວຽກງານຕົວຈິງ, ຍ້ອນແນວນັ້ນກະຊວງປ້ອງກັນປະເທດ ກໍຄືອົງຄະນະພັກກົມໃຫຍ່ເຕັກນິກກອງທັບ ຍາມໃດກໍໃຫ້ຄວາມສຳຄັນ ແລະ ເອົາໃຈໃສ່ຊີ້ນຳເປັນພິເສດໃນການສ້າງແຜນກຳນົດພະນັກງານ ເພື່ອຊອກໃຫ້ໄດ້ບັນດາເປົ້າໝາຍທີ່ມີເງື່ອນໄຂມາດຖານຄົບຖ້ວນຮັບປະກັນດ້ານປະລິມານ ແລະ ຄຸນນະພາບ, ທັງຈະເປັນພື້ນຖານໃຫ້ແກ່ການບຳລຸງສ້າງພະນັກງານແຕ່ລະເປົ້າໝາຍໃນສະເພາະໜ້າ ແລະ ຍາວນານ ທັງນີ້ກໍເພື່ອຕອບສະໜອງກັບຄວາມຮຽກຮ້ອງຕ້ອງ ການຂອງໜ້າທີ່ການເມືອງຂອງກອງທັບ, ກໍຄືພາລະກິດປ່ຽນແປງໃໝ່ຂອງພັກ.
ຈາກນັ້ນ, ສະຫາຍ ພັນເອກ ເພັດລະຄອນ ມະນີຈັນ ໄດ້ຂຶ້ນຜ່ານບົດສະຫຼຸບລາຍງານຕີລາຄາການຈັດຕັ້ງປະຕິບັດແຜນກຳນົດພະນັກງານນຳພາ-ບັນຊາຂັ້ນກະ ຊວງປ້ອງກັນປະເທດຄຸ້ມຄອງ ຂອງໂຮງງານປະສານເຫຼົ່າຫຼວງພະບາງ ໃນໄລຍະຜ່ານມາ ແລະ ທິດທາງແຜນການໃນຕໍ່ໜ້າ.
ຈາກນັ້ນ, ສະຫາຍ ພັນໂທ ບຸນໄມ ແສງອາລຸນ ຫົວໜ້າພະແນກໂຄສະນາ-ອົບຮົມຫ້ອງການເມືອງ ກົມໃຫຍ່ເຕັກນິກກອງທັບ ໄດ້ຂຶ້ນຜ່ານມະຕິສະບັບເລກທີ 030, 032/ກມສພ ລົງວັນທີ 03/01/2018 ມາດຖານພະນັກງານນຳພາ-ຄຸ້ມຄອງ ແລະ ວ່າດ້ວຍວຽກງານສ້າງແຜນກຳ ນົດພະນັກງານນຳພາ-ຄຸ້ມຄອງ. ຫຼັງຈາກນັ້ນ, ສະຫາຍ ພັນໂທ ຈັນທະວີ ພົງສຸທິ ກໍໄດ້ຂຶ້ນແນະນຳວິທີການ ແລະ ຂັ້ນຕອນການທາບທາມ.
ພ້ອມດຽວກັນນີ້, ສະຫາຍ ພົນຈັດຕະວາ ທອງພັນ ສຸທຳມະວົງ ຍັງໄດ້ຮຽກຮ້ອງມາຍັງບັນດາສະຫາຍຜູ້ແທນເຂົ້າຮ່ວມກອງປະຊຸມຄັ້ງນີ້ຈົ່ງພ້ອມກັນເຊີດຊູຄວາມຮັບຜິດຊອບການເມືອງຂອງຕົນ, ໃນການໃຊ້ສິດປະຊາ ທິປະໄຕເຕັມສ່ວນ, ສຸມສະຕິປັນ ຍາໃສ່ໃນການຄົ້ນຄວ້າ, ຄັດເລືອກເອົາເປົ້າໝາຍຜູ້ທີ່ມີເງື່ອນ ໄຂມາດຖານຄົບຖ້ວນ ແລະ ເໝາະ ສົມກັບໜ້າທີ່ຕຳແໜ່ງຕ່າງໆ ນັ້ນເຂົ້າໃນແຜນກຳນົດພະນັກງານນຳພາ-ບັນຊາ ຂັ້ນກະຊວງປ້ອງກັນປະເທດຄຸ້ມຄອງ ຂອງໂຮງ ງານປະສານເຫຼົ່າຫຼວງພະບາງ. ຫຼັງຈາກນັ້ນ, ບັນດາສະຫາຍຜູ້ ແທນເຂົ້າຮ່ວມກອງປະຊຸມກໍໄດ້ ພ້ອມກັນໃຊ້ສິດຂອງຕົນປ່ອນບັດທາບທາມກຳນົດເອົາພະນັກ ງານນຳພາ-ບັນຊາ ຂັ້ນກະຊວງປ້ອງກັນປະເທດຄຸ້ມຄອງຂອງໂຮງງານປະສານເຫຼົ່າຫຼວງພະບາງ ຈົນສຳເລັດລົງຕາມຄາດໝາຍ.
ໂດຍ: ອຸ່ນຄຳ ດວງປະເສີດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ