ຫົວໜ້າກົມແຜນທີ່ກອງທັບ ເຄື່ອນໄຫວເຮັດວຽກຢູ່ ກອງພົນທີ 2
ເວລາອອກຂ່າວ: 2023-03-15 09:35:31 | ຜູ້ຂຽນ : admin2 | ຈຳນວນຄົນເຂົ້າຊົມ: 214 | ຄວາມນິຍົມ:
ໃນລະຫວ່າງວັນທີ 1-4 ມີນາ 2023 ນີ້, ສະຫາຍ ພົນຈັດຕະວາ ທອງຈັນ ວັນນະສີ ຫົວໜ້າກົມແຜນທີ່ກອງທັບ ໄດ້ເຄື່ອນໄຫວ ຕິດຕັ້ງຂໍ້ມູນແຜນທີ່ສູ່ຄອມພິວເຕີ ແລະ ອົບຮົມວິທີການນຳໃຊ້ ຢູ່ ກອງພົນທີ 2 ມີສະຫາຍ ພັນເອກ ຄຳດີ ໄຊຍະວົງ ຫົວໜ້າການທະຫານ ກອງພົນທີ 2 , ມີຄະນະພັກ-ຄະນະບັນຊາກອງພົນ ແລະ ພະແນກການທີ່ກ່ຽວຂ້ອງ ເຂົ້າຮ່ວມ.
ສະຫາຍ ພັນເອກ ຄຳດີ ໄຊຍະວົງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການລົງເຄື່ອນໄຫວເຮັດວຽກຂອງສະຫາຍ ຫົວໜ້າກົມແຜນທີ່ກອງທັບ. ຈາກນັ້ນ, ສະຫາຍ ພັນໂທ ວັນຄຳ ອິນທະວົງ ຫົວໜ້າພະແນກແຜນທີ່ ກອງພົນທີ 2 ໄດ້ລາຍງານຫຍໍ້ ການເຄື່ອນໄຫວ ໃນການນຳໃຊ້ແຜນທີ່ ໃນໄລຍະຜ່ານມາ. ການເຄື່ອນໄຫວເຮັດວຽກໃນຄັ້ງນີ້ ແມ່ນລົງມາຕິດຕັ້ງຂໍ້ມູນແຜນທີ່ສູ່ຄອມພິວເຕີ ແລະ ອົບຮົມວິທີການນຳໃຊ້ ເຊິ່ງແມ່ນວຽກຈຳເປັນໃນການຕອບສະໜອງແຜນທີ່ ໃຫ້ກົມກອງມີແຜນທີ່ນຳໃຊ້ຕາມຄວາມຮຽກຮ້ອງຕ້ອງການ ວຽກງານກຽມພ້ອມສູ້ຮົບ ແລະອົບ ຮົມຫັດແອບ ເປັນການຍົກລະດັບບົດຮຽນໃໝ່ ຂອງການນຳໃຊ້ແຜນທີ່ການທະຫານ ໃຫ້ຜູ້ບັນຊາ ເພື່ອຕິດຕາມຊຸກຍູ້ ແລະ ເກັບກຳສະພາບການນຳໃຊ້ແຜນທີ່, ເຄື່ອງໝາຍການທະຫານ ແລະ ເຄື່ອງມືເຕັກໂນໂລຊີ ສຳຫຼວດວັດແທກ ເພື່ອເກັບກຳຂໍ້ມູນຂ່າວສານພູມສາດ, ປັບປຸງແຜນທີ່ ໃຫ້ມີເນື້ອໃນໃໝ່ໃກ້ຄຽງກັບສະພາບພື້ນທີ່ໃນປັດຈຸບັນ. ໂດຍຄາດໝາຍແນໃສ່ຄວາມເປັນເອກະພາບລວມສູນ ໃນການຄຸ້ມຄອງ-ນຳໃຊ້ແຜນທີ່ໃນຄອມພິວເຕີ, ລະບົບແຜນທີ່ ແລະ ເຄື່ອງໝາຍເທິງແຜນທີ່ ໃນສະເພາະໜ້າ ແລະ ຍາວນານ ໃຫ້ມີຄວາມຮັບປະກັນໄດ້ຕາມຫຼັກການວິຊາສະເພາະ ທັງເປັນການຍົກລະດັບຄວາມຮູ້, ຄວາມສາມາດ ໃຫ້ວິຊາການເຕັກນິກແຜນທີ່ ຂອງເຫຼົ່າຮົບແຜນທີ່ ຢູ່ບັນດາກົມກອງ ມີຄວາມຊຳນິຊຳນານ ໃນການນຳໃຊ້ແຜນທີ່ໃນຄອມພິວເຕີ.
ໂດຍ: ຄຳຮັກ ໄຊວັນທອນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ