ກອງປະຊຸມສຳມະນາສ້າງຄວາມເຂັ້ມແຂງໃຫ້ພະນັກງານ ພາຍໃນກຳມາທິການ ປກຊ-ປກສ ສະພາ ແຫ່ງຊາດ
ເວລາອອກຂ່າວ: 2023-01-27 08:39:44 | ຜູ້ຂຽນ : admin2 | ຈຳນວນຄົນເຂົ້າຊົມ: 407 | ຄວາມນິຍົມ:
ກອງປະຊຸມສຳມະນາສ້າງຄວາມເຂັ້ມແຂງໃຫ້ພະນັກງານພາຍໃນກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ຈັດຂຶ້ນໃນວັນທີ 26 ມັງກອນ 2023 ຢູ່ທີ່ສະພາແຫ່ງຊາດ, ໂດຍການເປັນປະທານຂອງ ສະຫາຍ ພົນຕີ ວົງສັກ ພັນທະວົງ ປະທານກຳມາທິການປ້ອງກັນຊາດ-ປ້ອງກັນຄວາມສະ
ຫງົບສະພາແຫ່ງຊາດ, ມີຄະນະກຳມາທິການ, ສຳມະນາກອນຈາກ 18 ເຂດເລືອກຕັ້ງ, ພ້ອມດ້ວຍພະນັກງານ-ວິຊາການ ປກຊ-ປກສ ເຂົ້າຮ່ວມ.
ສະຫາຍ ພົນຕີ ປອ ວົງສັກ ພັນທະວົງ ໄດ້ກ່າວວ່າ: ເພື່ອປະຕິບັດຕາມແຜນການສ້າງຄວມເຂັ້ມແຂງໃຫ້ພະນັກງານຂັ້ນວິຊາການຂອງກຳມາທິການ ປກຊ-ປກສ ສະພາແຫ່ງຊາດ ປະຈຳປີ 2022 ຈະໄດ້ຄົ້ນຄວ້າ, ສຳມະນາ ແລະ ເຊື່ອມຊຶມບັນດາເອກະສານ ກ່ຽວກັບພາລະບົດບາດວ່າດ້ວຍການຮັບ ແລະ ການພິຈາລະນາຄຳຮ້ອງຂໍຄວາມເປັນທຳຂອງຄະນະປະຈຳສະພາແຫ່ງຊາດຂັ້ນແຂວງ ແລະ ຄະນະປະຈຳສະພາແຫ່ງຊາດ, ການຮ່າງ ແລະ ການຈໍລະຈອນເອກກະສານທາງລັດຖະການຂອງສະພາແຫ່ງຊາດ ເພື່ອຍົກສູງຄວາມຮູ້, ວິທີການສ້າງ ແລະ ປັບປຸງກົດໝາຍ, ນິຕິກຳໃຕ້ກົດໝາຍ, ພາລະບົດບາດການຕິດຕາມກວດກາຂອງກຳມາທິການ ປກຊ-ປກສ ສະພາແຫ່ງຊາດ ແລະ ຂໍ້ຕົກລົງຮ່ວມຄະນະປະສານງານລະຫວ່າງກຳມາທິການ ປກຊ-ປກສ ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ສະຫະພັນນັກຮົບເກົ່າ. ກອງປະຊຸມຄັ້ງນີ້
ແມ່ນຕິດພັນກັບໜ້າທີ່ຄວາມຮັບຜິດຊອບຂົງເຂດ ປກຊ-ປກສ ແນໃສ່ເປັນເສນາທິການໃຫ້ສະພາແຫ່ງຊາດ ແລະ ສະພາປະຊາຊົນຂັ້ນແຂວງໃນການປະຕິບັດ 3 ພາລະບົດບາດດ້ານນິຕິບັນຍັດ, ຂໍ້ຕົກລົງບັນຫາສຳຄັນພື້ນຖານ ແລະ ດ້ານການຕິດຕາມກວດກາພາຍໃນກຳມາທິການ ປກຊ-ປກສ ໃຫ້ມີຄຸນນະພາບ ແລະ ມີປະສິດທິຜົນສູງ.
ພ້ອມນີ້, ກໍເນັ້ນໜັກໃຫ້ບັນດານັກວິທະຍາກອນຈົ່ງເອົາໃຈໃສ່ຢ່າງຕັ້ງໜ້າເພື່ອຖ່າຍທອດສົ່ງຄວາມຮູ້ໃຫ້ນັກສຳມະນາກອນກໍຄືພະນັກງານຂັ້ນວິຊາການ ປກຊ-ປກສ ນັບທັງຢູ່ຂັ້ນສະພາແຫ່ງຊາດ ແລະ ສະພາປະຊາຊົນຂັ້ນແຂວງທີ່ອົບຮົມຄັ້ງນີ້ກຳໄດ້ບົດຮຽນຕ່າງໆ ແລະ ຮຽກຮ້ອງມາຍັງນັກສຳມະນາກອນທັງຫຼາຍຈົ່ງເອົາໃຈໃສ່ຮັບຟັງການບັນລະຍາຍເນື້ອໃນເອກະສານໃຫ້ດີ ແລະ ປະກອບຄຳເຫັນດ້ວຍຄວາມສ້າງສັນ, ເຊີດຊູຄວາມຮັບຜິດຊອບການເມືອງຂອງຕົນເຂົ້າໃນການຄົ້ນຄວ້າ, ປະກອບຄຳຄິດເຫັນຕໍ່ທຸກບັນຫາຢ່າງຖີ່ຖ້ວນ, ພາວະວິໄສ ແລະ ເລິກເຊິ່ງ ເພື່ອເຮັດໃຫ້ກອງປະຊຸມສຳມະນາສ້າງຄວາມເຂັ້ມແຂງໃຫ້ພະນັກງານພາຍໃນກຳ
ມາທິການ ປກຊ-ປກສ ບັນລຸຕາມຈຸດປະສົງ ແລະ ລະດັບຄາດໝາຍທີ່ວາງໄວ້. ກອງປະຊຸມຈະດຳເນີນເປັນເວລາ 2 ວັນ ຈຶ່ງຈະສຳເລັດ.
ໂດຍ: ສົມຄິດ ພູມມີຈິດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ