ກອງປະຊຸມຄົບຄະນະບໍລິຫານງານພັກກົມໃຫຍ່ການເມືອງກອງທັບ
ເວລາອອກຂ່າວ: 2023-01-26 09:08:44 | ຜູ້ຂຽນ : admin2 | ຈຳນວນຄົນເຂົ້າຊົມ: 189 | ຄວາມນິຍົມ:
ກອງປະຊຸມຄົບຄະນະບໍລິຫານງານພັກ ກົມໃຫຍ່ການເມືອງກອງທັບ ປະຈຳປີ 2022 ໄດ້ຈັດຂຶ້ນໃນວັນທີ 25 ມັງກອນ 2023 ນີ້, ໂດຍການເປັນປະທານຂອງ ສະຫາຍ ພົນໂທ ທອງລອຍ ສິລິວົງ ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດ, ເລຂາຄະນະພັກ ຫົວໜ້າກົມໃຫຍ່ການເມືອງກອງທັບ, ມີບັນດາສະຫາຍຮອງເລຂາຄະນະພັກ, ກຳມະການຄະນະປະຈຳພັກ ແລະ ກຳມະການຄະນະພັກ ກົມໃຫຍ່ການເມືອງກອງທັບເຂົ້າຮ່ວມ.
ສະຫາຍ ພົນຈັດຕະວາ ສົມພົງ ແພງປັນຍາ ຫົວໜ້າຫ້ອງການ ກົມໃຫຍ່ການເມືອງກອງທັບ ໄດ້ສະຫຼຸບຕີລາຄາການນຳພາຂອງຄະນະພັກ ກົມໃຫຍ່ການເມືອງ ກອງທັບ ປະຈຳປີ 2022 ແລະ ວາງທິດທາງແຜນການ ປະຈຳປິ 2023 ເຊິ່ງໄດ້ຍົກໃຫ້ເຫັນວ່າ: ໃນປີ 2022 ຜ່ານມາ, ພາຍໃຕ້ການຊີ້ນຳ-ນຳພາຂອງຄະນະພັກກົມໃຫຍ່ການເມືອງກອງທັບ, ກໍຄືຄະນະພັກແຕ່ລະຂັ້ນໃນການຈັດຕັ້ງປະຕິບັດແນວທາງແຜນນະໂຍບາຍຂອງພັກ ແລະ ວຽກງານຈຸດສຸມຂອງກົມໃຫຍ່ການເມືອງກອງທັບ ຕິດພັນກັບ 4 ໜ້າທີ່ໃຫຍ່ 26 ແຜນງານທີ່ຄະນະພັກກະ ຊວງວາງອອກເຂົ້າສູ່ວຽກງານຕົວຈິງຂອງແຕ່ລະກົມກອງສາມາດາໄດ້ຜົນສຳເລັດໃນຫຼາຍດ້ານ, ເປັນຕົ້ນແມ່ນໄດ້ສຸມໃສ່ຊີ້ນຳ-ນຳພາຈັດຕັ້ງປະຕິບັດວຽກງານພັກ-ວຽກງານການເມືອງ, ວຽກງານເຮັດໃຫ້ສະພາບມີຄວາມສະຫງົບ, ວຽກງານກໍ່ສ້າງຮາກຖານການ ເມືອງພັດທະນາຊົນນະບົດຮອບດ້ານຕິດພັນກັບວຽກງານ 3 ສ້າງ, ວຽກງານສຶກສາອົບຮົມການເມືອງ-ແນວຄິດ, ວຽກງານຈັດຕັ້ງພັກ, ວຽກງານພະນັກງານ, ວຽກງານນະໂຍບາຍ, ວຽກງານປະກັນສັງຄົມ, ວຽກງານອົງການຈັດຕັ້ງມະຫາຊົນ, ວຽກງານປ້ອງກັນພາຍໃນ, ວຽກງານກວດກາ, ວຽກງານໄອຍະການ, ວຽກງານສານ ແລະ ວຽກງານອື່ນໆທີ່ປິ່ນອ້ອມໄດ້ຮັບຜົນສຳເລັດຕາມຄາດໝາຍ. ຄຽງຄູ່ກັນນັ້ນ, ຍັງໄດ້ເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນດ້ວຍຫຼາຍຮູບການທີ່ແທດເໝາະ ແລະ ທັນການ, ສຸມໃສ່ສ້າງຂະບວນການດ້ານຕ່າງໆພາຍໃນກົມກອງໃຫ້ມີຄວາມຟົດຟື້ນຕໍ່ເນື່ອງ ເຮັດໃຫ້ບັນຍາກາດທົ່ວກົມໃຫຍ່ການເມືອງກອງທັບ ມີຄວາມເບີກບານມ່ວນຊື່ນ, ພະນັກງານ-ສະມາຊິກພັກ, ນັກຮົບ ມີຄວາມບຸກບືນຫ້າວຫັນຕໍ່ໜ້າທີ່ວິຊາສະເພາະ ກໍຄືໜ້າທີ່ການເມືອງຂອງຕົນ.
ໃນກອງປະຊຸມ, ນອກຈາກໄດ້ສຸມໃສ່ຕີລາຄາການນຳພາຂອງຄະນະບໍລິຫານງານພັກກົມໃຫຍ່ການເມືອງກອງທັບ ແລະ ກຳນົດທິດທາງຈຸດສຸມໃນປີ 2023 ແລ້ວ, ຜູ້ແທນກອງປະຊຸມຍັງໄດ້ພ້ອມກັນປະກອບຄຳຄິດເຫັນ ແລະ ເປັນເອກະພາບໃນການຕີລາຄາສະພາບການຈັດຕັ້ງຊີ້ນຳ-ນຳພາ, ມີຄວາມຮັບຜິດຊອບໃນການເບິ່ງບັນຫາໃຫ້ຖືກກັບຄວາມເປັນຈິງ, ຍົກໃຫ້ເຫັນອັນທີ່ເຮັດໄດ້, ອັນທີ່ເປັນບົດຮຽນ ແລະ ສິ່ງຫຍໍ້ທໍ້ຄົງຄ້າງຕ່າງໆ ກໍຄືການແກ້ໄຂບັນຫາໃນວຽກງານຕົວຈິງໃຫ້ຖືກຕ້ອງທັນກັບສະພາບການ, ເພື່ອຮັບປະກັນໃນການວາງແຜນວຽກງານຈຸດສຸມໃນຕໍ່ໜ້າໃຫ້ແທດເໝາະກັບສະພາບແວດລ້ອມຕົວຈິງຂອງກອງທັບ ແລະ ຊຸກຍູ້ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ V ຂອງຄະນະພັກກະຊວງປ້ອງກັນປະເທດດ້ວຍຈິດໃຈບຸກທະລຸ, ມີການຫັນອັນປ່ຽນໃໝ່ທີ່ດີຂຶ້ນກວ່າເກົ່າ ແລະ ເກີດໝາກຜົນຕົວຈິງ.
ໂດຍ: ເພັດ ສົມນໍວັນ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ