ຈັດເຝິກອົບຮົມຄູເຝິກບານເຕະຂັ້ນພື້ນຖານຢູ່ເມືອງນ້ຳທາ
ເວລາອອກຂ່າວ: 2022-09-28 09:28:47 | ຜູ້ຂຽນ : admin3 | ຈຳນວນຄົນເຂົ້າຊົມ: 1353 | ຄວາມນິຍົມ:
ສະຫະພັນບານເຕະແຫ່ງຊາດລາວ(ສຕລ)ສົມທົບກັບພະແນກສຶກສາທິການ ແລະ ກິລາ ແຂວງ ຫຼວງນ້ຳທາ ແລະ ສະຫະພັນບານເຕະ ແຂວງ ຫຼວງນ້ຳທາ ໄດ້ຮວ່ມກັນຈັດເຝິກອົບຮົມຄູເຝິກກິລາບານ ເຕະຂັ້ນພື້ນຖານ LFF “D” Certificate Coaching Course 2022 ຂຶ້ນຢ່າງເປັນທາງການທີ່ຫ້ອງການພະແນກສຶກສາທິການ ແລະ ກິລາ ຂອງແຂວງດັ່ງກ່າວ ເມື່ອວັນທີ 26 ກັນຍາ 2022,ໂດຍໃຫ້ກຽດເຂົ້າ
ຮວ່ມພິທີເປີດມີ ທ່ານ ພູນແກ້ວ ຫຼ່າວອີນ ປະທານສະຫະພັນບານ
ເຕະ ແຂວງຫຼວງນ້ຳທາ, ທ່ານ ທອງສອນ ອາດຜາສຸກ ຮອງຫົວໜ້າສຶກສາທິການ ແລະ ກິລາ ແຂວງ ຫຼວງນ້ຳທາ, ທ່ານ ສີສະເຫວີຍ ໄຊຊະນະສີ ແລະ ທ່ານ ພັນຕີ ໂກວັນ ນາມທະວີໄຊ ຄູເຝິກສອນ ຈາກ ສຕລ ແລະ ມີນັກສຳມະນາກອນເຂົ້າຮ່ວມທັງໝົດ 25 ທ່ານ ໃນນັ້ນ, ເປັນຍິງ 3 ທ່ານ ທີ່ມາຈາກ 13 ພາກສ່ວນ
ພາຍໃນ ແຂວງ ຫຼວງນ້ຳທາ.
ກ່າວມີຄຳເຫັນໃນພິທີ, ທ່ານ ພູນແກ້ວ ຫຼ່າວອີນ ໄດ້ກ່າວວ່າ ''ໃນນາມ ປະທານ ສະຫະພັນບານເຕະແຂວງ ຫຼວງນ້ຳທາ ຂໍຂອບໃຈມາຍັງ ສະຫະພັນບານ
ເຕະແຫ່ງຊາດລາວ ເປັນຢ່າງຍິ່ງທີ່ສົ່ງຄະນະຄູເຝິກມາຊ່ວຍຖ່າຍທອດຄວາມຮູ້ໃຫ້ແກ່ນັກສຳມະນາກອນຂອງພວກເຮົາ ແລະ ໃນໄລຍະ 3-4 ວັນນີ້ ຂໍໃຫ້ນັກສຳມະນາກອນທຸກທ່ານຈົ່ງຕັ້ງໃຈຮ່ຳຮຽນ, ຖອດຖອນບົດຮຽນໃຫ້ໄດ້ຫຼາຍທີ່ສຸດບໍ່ວ່າຈະເປັນເຕັກ
ນິກ ຫຼື ຍຸດທະວິທີ ທີ່ທາງຄູເຝິກໄດ້ມາສິດສອນ ແລະ ໃຫ້ກຳແໜ້ນເນື້ອໃນລວມຂອງບົດຮຽນໃຫ້ເລິກເຊິ່ງ ເພື່ອນຳໄປພັດທະນາ ສ້າງນັກກິລາຮຸ່ນໃໝ່ ພາຍໃນ ແຂວງ ຫຼວງນ້ຳທາ ໃຫ້ມີຄວາມກ້າວໜ້າ ແລະ ເກັ່ງຂຶ້ນໄປເລື້ອຍໆ''
ຈຸດປະສົງ ແລະ ເປົ້າໝາຍໃນການຈັດເຝິກອົບຮົມຄູເຝິກບານເຕະຂັ້ນພຶ້ນຖານ LFF “D” Certificate Coaching Course ມີລາຍລະອຽດດັ່ງລຸ່ມນີ້:
ດ້ານຈຸດປະສົງແມ່ນ 1. ເພື່ອພັດທະນາກິລາບານເຕະໃຫ້ມີຄວາມກ້າວໜ້າ ແລະ ແຜ່ຂະຫຍາຍໄປທົ່ວປະເທດໃນໄວໆນີ້. 2. ເພື່ອໃຫ້ການພັດທະນາກິລາບານເຕະມີຄວາມສອດຄ່ອງ ແລະ ເອກກະພາບກັນໃນທົ່ວປະເທດ.3.ເພື່ອໃຫ້ການ
ເຝິກສອນນັບມື້ນັບມື້ມີມາດຕະຖານ ຮັບປະກັນທາງດ້ານປະລິມານ ແລະ ຄຸນນະພາບ.
4. ເພື່ອໃຫ້ນ້ອງໆນັກຮຽນໄດ້ມີສຸຂະພາບແຂງແຮງ ແລະ ມັກກິລາບານເຕະ, ໃຫ້ມີຄວາມຮັກແພງ, ມີນ້ຳໃຈນັກກິລາ, ມ່ວນຊື່ນກັບການຫຼິ້ນກິລາ ແລະ ຫ່າງໄກກັບສິ່ງອະບາຍຍະມຸກທີ່ບໍ່ດີຕ່າງໆ. 5. ເພື່ອໃຫ້ເດັກນ້ອຍມີຄວາມມຸ່ງຫວັງ ແລະ ມີຄວາມບຸກບືນ ໃຫ້ກາຍເປັນນັກກິລາທີດີເດັ່ນໃນເວທີຕ່າງໆ ບໍ່ວ່າຈະຢູ່ພາຍໃນ ຫຼື ຕ່າງປະເທດ. 6. ເພື່ອໃຫ້ກາຍເປັນນັກກິລາທີ່ມີຈຸດມຸ້ງໝາຍກ້າວໄປສູ່ນັກກິລາອາຊີບທີ່ມີປະສິດທິພາບໃນອະນາຄົດ.
ໃນດ້ານເປົ້າໜາຍ:1.ເພື່ອເສີມສ້າງພັດທະນາລຸ້ນສືບທອດກິລາບານເຕະໃຫ້ໄດ້ທົ່ວທຸກເຂດທີ່ຫ່າງໄກ ແລະ ດ້ອຍໂອກາດ.
2. ເພື່ອນຳໃຊ້ການເຝິກສອນທັກສະກິລາບານເຕະຂັ້ນພື້ນຖານໃຫ້ຖືກຕອ້ງຕາມຂັ້ນຕອນ ແລະ ມີຄວາມຄ່ອງແຄ້ວ. 3. ເພື່ອປັບປຸງ ແລະ ພັດທະນາຄູເຝິກໃຫ້ມີຄວາມຮູ້ຄວາມສາມາດໃນການເຂົ້າຮ່ວມການອົບຮົມຄູເຝິກລະດັບພາກພື້ນຂອງອາຊີຕາມລຳດັບໃນອະນາຄົດ. 4. ເພື່ອຊອກເຫັນນັກກິລາບານເຕະໜຸ່ມລຸ້ນສືບທອດທີ່ມີພອນສະຫວັນ. 5. ເພື່ອໃຫ້ນັກກິລາທີ່ໜຸ່ມນ້ອຍມີທັກສະ ແລະ ພັດທະນາຕົວເອງໃຫ້ກາຍເປັນນັກກິລາຕົວແທນໃນຂະແໜງການຕ່າງໆ ເພື່ອກ້າວໄປເຖີງນັກກິລາທີມຊາດໃນອາ
ນາຄົດ. ຊຸດເຝິກອົບຮົມນີ້ຈະດຳເນີນໄປຈົນຮອດວັນທີ 29 ກັນຍາ2022.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ