ຫ້ອງພະລາທິການ ທະຫານແຂວງສະຫວັນນະເຂດ ສ້າງລາຍຮັບໄດ້ 900 ລ້ານກວ່າກີບ
ເວລາອອກຂ່າວ: 2022-09-20 09:13:31 | ຜູ້ຂຽນ : admin3 | ຈຳນວນຄົນເຂົ້າຊົມ: 229 | ຄວາມນິຍົມ:
ວຽກງານຮັບປະກັນການແກ້ໄຂຊີວິດການເປັນຢູ່ໃຫ້ນາຍ ແລະ ພົນທະຫານ ໃນຖັນແຖວກອງທັບແມ່ນວຽກງານທີ່ສຳຄັນ ເຊິ່ງນອນຢູ່ໃນ 4 ໜ້າທີ່ໃຫຍ່ 26 ແຜນງານຂອງກະຊວງປ້ອງກັນປະເທດວາງອອກ. ໃນນີ້, ກອງບັນຊາການທະຫານແຂວງສະ ຫວັນນະເຂດ ກໍແມ່ນກົມກອງໜຶ່ງ ເຊິ່ງຄະນະພັກ-ຄະນະບັນຊາກອງບັນຊາການທະຫານແຂວງ ໄດ້ເອົາໃຈໃສ່ຊີ້ນຳ ແລະ ຊຸກຍູ້ບັນດາກົມກອງໃຫ້ເອົາໃຈໃສ່ຕໍ່ວຽກງານສ້າງເສດຖະກິດ, ການແກ້ໄຂຊີວິດການເປັນຢູ່ ບົນພື້ນຖານໂຄສະນາສຶກສາອົບຮົມການເມືອງ-ນຳພາແນວຄິດ ຕໍ່ພະນັກງານ-ນັກຮົບ ໃຫ້ມີຄວາມຮັບຮູ້ເຊື່ອມຊຶມ ແລະ ເຫັນໄດ້ຄວາມໝາຍ, ຄວາມສຳຄັນວຽກງານສ້າງພະລາທິການກັບທີ່ ດ້ວຍການໝູນໃຊ້ທ່າແຮງບົ່ມຊ້ອມຂອງກົມກອງ ເຂົ້າໃນການ ເພີ່ມພູມຜະລິດຜົນປູກຝັງ-ລ້ຽງ ສັດ ດ້ວຍຄວາມຮັບຜິດຊອບສູງ ແລະ ມີຜົນສຳເລັດ ເຮັດໃຫ້ຊີວິດການເປັນຢູ່ຂອງພະນັກງານ-ນັກຮົບ ນັບມື້ດີຂຶ້ນເປັນກ້າວໆ.
ສະຫາຍ ພັນເອກ ວັນທອງ ບຸດສະດາ ຮອງຫົວໜ້າກອງບັນ ຊາການ, ຫົວໜ້າຫ້ອງພະລາທິ ການ ກອງບັນຊາການທະຫານແຂວງສະຫວັນນະເຂດ ໄດ້ໃຫ້ຮູ້ວ່າ: ຕະຫຼອດໄລຍະທີ່ຜ່ານມາ, ກໍຄືປັດຈຸບັນ, ຄະນະພັກ-ຄະນະບັນຊາແຕ່ລະຂັ້ນ ໄດ້ເອົາໃຈໃສ່ຊີ້ນຳ-ນຳພາ ພະນັກງານວິຊາການທີ່ກ່ຽວຂ້ອງ ຈັດຕັ້ງປະຕິບັດວຽກງານຮັບປະກັນແກ້ໄຂຊີວິດການເປັນຢູ່ຂອງພະນັກງານ-ນັກຮົບເປັນປົກກະຕິ ຕາມທິດນຳ: ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ. ໃນນີ້ ໄດ້ສຸມໃສ່ການປູກພືດຜັກສວນຄົວເປັນສ່ວນຫຼາຍສາມາດເກັບກູ້ໄດ້ 38.800 ກິໂລກຣາມ, ປູກໄມ້ໃຫ້ໝາກ 1.528 ຕົ້ນ, ໄມ້ອຸດສາຫະກຳ 6.046 ຕົ້ນ, ປູກກ້ວຍເກັບກູ້ໄດ້ 22 ໂຕນ, ລ້ຽງຄວາຍ 17 ໂຕ, ງົວ 466 ໂຕ, ແບ້ 271 ໂຕ, ໝູ 140 ໂຕ, ເປັດ 335 ໂຕ, ໄກ່ລາດ 1.980 ໂຕ, ໄກ່ພັນໄຂ່ 1.130 ໂຕ, ສາມາດສ້າງລາຍຮັບຈາກການເພີ່ມພູມຜະລິດຜົນປູກຝັງ-ລ້ຽງສັດ, ແຫຼ່ງລາຍຮັບອື່ນໆໄດ້ 900 ລ້ານກວ່າກີບ.
ໄປຄຽງຄູ່ກັນນີ້, ກົມກອງຍັງໄດ້ເອົາໃຈໃສ່ໃນການຄຸ້ມຄອງປົກປັກຮັກສາ, ປົວລະບັດຜັດເຊັດພາຫະນະຮັບໃຊ້ທີ່ຂັ້ນເທິງປະກອບ ຖືກຕ້ອງຕາມຫຼັກການ ວິຊາສະເພາະຢ່າງເຂັ້ມງວດ, ຮັບ
ປະກັນວຽກງານການເຄື່ອນໄຫວອົບຮົມ-ຫັດແອບ, ການກຽມ ພ້ອມສູ້ຮົບ ແລະ ວຽກງານບໍລິ ຫານ. ຮັບປະກັນດ້ານນ້ຳມັນເຊື້ອໄຟ, ພາຫະນະຮັບໃຊ້, ຢາປົວ ພະຍາດ, ດ້ານເຂົ້າກິນຮັບປະກັນໄດ້ຢ່າງຄົບຖ້ວນຕາມລະບອບອັດຕາທີ່ຂັ້ນເທິງກຳນົດ, ຮັບປະ ກັນດ້ານຊີ້ນກິນ-ຜັກກິນ 85%, ທົ່ວກອງບັນຊາການທະຫານແຂວງ ມີເຮືອນຄົວລວມ 109 ຫຼັງ, ຈັດຕັ້ງກິນເຂົ້າລວມໝູ່ 2.316 ສະຫາຍ ຮັບປະກັນໃຫ້ອ້າຍນ້ອງໄດ້ກິນເຂົ້າມື້ໜຶ່ງ 3 ຄາບຕໍ່ວັນ, ມີອາຫານ 3 ເຢື່ອງຂຶ້ນໄປຢ່າງເປັນປົກກະຕິ ໂດຍມີເອື້ອຍລ້ຽງຫຸງຕົ້ມປຸງແຕ່ງຖືກຕ້ອງຕາມການຫຼັກອະນາໄມ.
ສະຫາຍ ພັນເອກ ວັນທອງ ບຸດສະດາ ຍັງໃຫ້ຮູ້ຕື່ມອີກວ່າ: ໃນຕໍ່ໜ້ານີ້, ຈະສືບຕໍ່ຊຸກຍູ້ພະນັກ
ງານວິຊາສະເພາະທີ່ກ່ຽວຂ້ອງ ເປັນເຈົ້າການປະຕິບັດທິດທາງ ແຜນການວຽກງານພະລາທິ ການ, ວຽກງານພັດທະນາ-ປັບ ປຸງກໍ່ສ້າງກົມກອງໃຫ້ມີຜົນສຳ ເລັດ ຕາມທິດ ເພິ່ງຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແນໃສ່ເຮັດໃຫ້ນາຍ ແລະ ພົນທະຫານ ມີຊີວິການເປັນຢູ່ດີຂຶ້ນເລື້ອຍໆ.
ໂດຍ: ຄຳໃໝ່ ສັງທອງເພັດ
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ