ຈີນ ແລະ ຍີ່ປຸ່ນ ຄອງແຊັມປະເພດທີມຊາຍ-ຍິງ ຢູ-15
ເວລາອອກຂ່າວ: 2022-09-08 10:12:44 | ຜູ້ຂຽນ : admin3 | ຈຳນວນຄົນເຂົ້າຊົມ: 66 | ຄວາມນິຍົມ:
ການແຂ່ງຂັນປິ່ງປ່ອງຊາວ ໜຸ່ມຊີງແຊັມອາຊີ ຄັ້ງທີ 26 ທີ່ສປປ ລາວ ເປັນເຈົ້າພາບ ທີ່ສູນການຄ້າໄອເຕັກ ໄດ້ດຳເນີນມາເປັນມື້ທີ 5 ນັກກີລາປິ່ງປ່ອງ ຊາວໜຸ່ມຈາກ ສປ ຈີນ ແລະ ຍີ່ ປຸ່ນ ສອງຊາດລະດັບແຖວໜ້າ ດ້ານກີລາປິ່ງປ່ອງຂອງທະວີບ ອາຊີ ແລະ ໂລກ ສາມາດຄວ້າແຊັມປະເພດທີມຊາຍ ແລະ ທີມ
ຍິງ ຮຸ່ນອາຍຸບໍ່ເກີນ 15 ປີ (U15) ໄປຄອງໄດ້ສຳເລັດ ແລະ ນັກກີລາທີ່ໄດ້ແຊັມ ແລະ ຮອງແຊັມ ປະເພດດ່ຽວຍິງ-ຊາຍ U15 ແລະ U19 ຈະໄດ້ສິດເຂົ້າຮ່ວມແຂ່ງຂັນປິ່ງປ່ອງໄວໜຸ່ມ ຊີງແຊັມໂລກ 2022 (World Youth 2022)
ພິທີມອບ-ຮັບຫຼຽນຊະນະເລີດໃນຄັ້ງນີ້ ໄດ້ມີຂຶ້ນໃນວັນທີ 3 ກັນຍາ 2022 ທີ່ສູນການຄ້າໄອເຕັກມໍ ຊັ້ນ 7 ນະຄອນຫຼວງວຽງຈັນ, ໃຫ້ກຽດເຂົ້າຮ່ວມ ແລະ ມອບໂດຍ ທ່ານ ນາງ ແສງເດືອນ ຫຼ້າຈັນທະບູນ ປະທານສະຫະ
ພັນກີລາປິ່ງປ່ອງ ແຫ່ງຊາດລາວ, ມີຕາງໜ້າສະຫະພັນປິ່ງປ່ອງອາ ຊີ, ສະຫະພັນປິ່ງປ່ອງແຫ່ງຊາດລາວ, ຄະນະນຳ, ຄູເຝິກ ແລະ ນັກກີລາທີ່ໄດ້ຮັບຫຼຽນເຂົ້າຮ່ວມຢ່າງພ້ອມພຽງ.
ກ່ອນຈະມີພິທີມອບ-ຮັບຫຼຽນຢ່າງເປັນທາງການ ກໍໄດ້ມີການແຂ່ງຂັນປິ່ງປ່ອງປະເພດທີມຊາຍຮຸ່ນອາຍຸບໍ່ເກີນ 15 ປີ ລະຫວ່າງ ສປ ຈີນ ແຊັມເກົ່າ ພົບກັບໃຕ້ຫວັນຂອງຈີນ. ຜ່ານການແຂ່ງຂັນຜົນປະກົດວ່າ ສປ ຈີນ ແຊັມເກົ່າທີ່ຫຼິ້ນໄດ້ດີກວ່າຢ່າງຊັດເຈນເອົາຊະນະທີມໃຕ້ຫວັນຂອງຈີນ 3-0 ຄູ່ ປ້ອງກັນແຊັມໄດ້ສຳເລັດ ແລະ ເປັນແຊັມສະໄໝທີ 4 ຕິດຕໍ່ກັນ ຂະນະທີ່ ອັນດັບທີ 3 ຮ່ວມຕົກເປັນຂອງ ຍີ່ປຸ່ນ ແລະ ອີຣານ.
ສ່ວນຮອບຊີງຊະນະເລີດປະເພດທີມຍິງຮຸ່ນອາຍຸບໍ່ເກີນ 15 ປີ ຍີ່ປຸ່ນເອົາຊະນະໃຕ້ຫວັນຂອງຈີນ 3-0 ຄູ່ ຄວ້າແຊັມໄປຄອງເປັນຄັ້ງທຳອິດໃນຮອບ 8 ປີ ຕໍ່ຈາກປີ 2014. ຂະນະທີ່ອັນດັບທີ 3 ຮ່ວມຕົກເປັນຂອງ ສປ ຈີນ ແຊັມເກົ່າ ແລະ ສ ເກົາຫຼີ.
ສຳລັບການແຂ່ງຂັນກີລາປິ່ງປ່ອງຊີງແຊັມໄວໜຸ່ມອາຊີ ຄັ້ງທີ 26 ທີ່ ສປປ ລາວ ຮັບກຽດເປັນເຈົ້າພາບ ເຊິ່ງເປັນຄັ້ງປະຫວັດສາດ ຈັດຂຶ້ນລະຫວ່າງວັນທີ 1-6 ກັນຍາ 2022 ໂດຍມີຄະນະນຳ, ຄູເຝິກ ແລະ ນັກກີລາ ຈຳນວນ 240 ຄົນ. ໃນນີ້ມີນັກກີລາ 165 ຄົນ ທີ່ມາຈາກ 17 ປະເທດ ແລະ ເຂດແຄວ້ນປະກອບມີ: ບາເຣນ, ບັງກລາເທດ, ສປ ຈີນ, ໃຕ້ຫວັນຂອງຈີນ, ຮົງກົງຂອງຈີນ, ອີຣານ, ອິນເດຍ, ຍີ່ປຸ່ນ, ກາຊັກສະຖານ, ມາເລເຊຍ, ເນປານ, ກາຕາ, ສ ເກົາ
ຫຼີ, ສິງກະໂປ, ໄທ ແລະ ອຸດສະເບກິດສະຖານ ເຊິ່ງມີການຊີງໄຊທັງໝົດ 11 ລາຍການ ຄື: ລະດັບເຍົາວະຊົນຮຸ່ນອາຍຸບໍ່ເກີນ 15 ປີ (U15) 4 ລາຍການ ປະເພດດ່ຽວຍິງ-ຊາຍ, ທີມຍິງ-ຊາຍ; ລະດັບໄວໜຸ່ມຮຸ່ນອາຍຸບໍ່ເກີນ 19 ປີ (U19) ມີ 7 ລາຍການ ປະ ເພດດ່ຽວຍິງ-ຊາຍ, ຄູ່ຍິງ-ຊາຍ, ຄູ່ປະສົມ ແລະ ທີມຍິງ-ຊາຍ. ສະເພາະນັກກີລາລາວໄດ້ບູລິມະສິດພິເສດໃນນາມເຈົ້າພາບ ໄດ້ສົ່ງນັກກີລາເຂົ້າຮ່ວມແຂ່ງຂັນ 16 ຄົນ ໂດຍລົງແຂ່ງຂັນ 10 ຈາກ 11 ລາຍການ.
ຂ່າວ ແລະ ພາບຈາກ,
ໜັງສືພິມ ສຶກສາ ແລະ ກີລາ.
news to day and hot news
ຂ່າວມື້ນີ້ ແລະ ຂ່າວຍອດນິຍົມ
ຂ່າວມື້ນີ້
ຂ່າວຍອດນິຍົມ
ຫນັງສືພິມກອງທັບປະຊາຊົນລາວ, ສຳນັກງານຕັ້ງຢູ່ກະຊວງປ້ອງກັນປະເທດ, ຖະຫນົນໄກສອນພົມວິຫານ.
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ
ລິຂະສິດ © 2010 www.kongthap.gov.la. ສະຫງວນໄວ້ເຊິງສິດທັງຫມົດ